"Conceyos pola oficialidá"
L’agua nun pudo frenar la manifestación ‘¡L’asturianu, llingua oficial!’ convocada pola XDLA pol Día de les Lletres Asturianes. 5.000 persones, según la organización, participaron na marcha, na que la novedá foi la incorporación de la pancarta ‘Conceyos pola oficialidá’.
En total, nesta primer fase de la iniciativa entamada pol Ayuntamientu de Bimenes y laXunta pola Defensa de la Llingua Asturiana (XDLA) sumáronse 80 cargos de los conceyos d’Uviéu, Xixón, Avilés, Llangréu, Llaviana, Ayer, Ḷḷena, Mieres, Valle Altu de Peñamellera, Morcín, Ribeseya, Nava, Siero, Villaviciosa, Carreño, Castrillón, Corvera, Noreña, Llanera, Pravia, Sotu'l Barcu, Grau, Cangas del Narcea, El Franco, A Veiga, Eilao, Santalla, Cuaña y Grandas. “Vamos siguir nes próximes selmanes texendo esta rede de voluntaes, intentando llegar a los sitios onde tovía nun fuimos quién y sumar más xente a estos más de 30 conceyos y esti centenar de cargos públicos que representen yá más de 130.000 votos de la xente d'Asturies”, aseguró Carlos Pulgar na intervención frente al Teatru Campoamor al finar la manifestación.
Ésta salió de la Estación del Norte puntual y tuvo que variar el percorríu pol mor del corte d’Uría pol incendiu que valtó recién un edificiu de la cai, finando cola vida del bomberu Eloy Palacio. Por ello, la marcha, encabezada pola banderona d’Asturies en manes de Xosé María García Sánchez 'Llábana' y la Bandona pola Oficialidá tuvo que xirar per Melquíades Álvarez y tornar a Uría por Doctor Casal.
Con 3.500 persones participantes según les fuercies del orde y 5.000, según la organización, darréu pudieron vese les pancartes de la XDLA col lema ‘L’asturianu, llingua oficial yá!!’, la de ‘Conceyos pola Oficialida’ y la d’un grupu de falantes de gallego-asturiano, a la que siguieron los baberos de dellos partíos políticos, sindicatos y coleutivos: Iniciativa pol Asturianu, el bloque soberanista promocionáu dende’l Llar La Llegra, el CSA La Semiente, la Corriente Sindical d’Izquierda (CSI), Juventudes Comunistas, Izquierda Xunida, SUATEA y Andecha Astur.
L’exemplu de Bimenes El voceru nacional de la XDLA, Pulgar, encargóse esti añu de lleer un discursu nel que la organización cívica apuntaba que “yá ta bien d'aguantar ‘instituciones’ qu'intenten impidir qu'un conceyu apruebe una simple declaración o un plan de normalización pa protexer la so realidá llingüística. Yá ta bien de ver cómo n'Avilés, la tercer ciudá del país, tamién hai quien vota en contra de que se regule l'usu del idioma, una midida que nun ye namás que protexer a la xente que quier usar l'asturianu nes sos rellaciones cola Alministración”, entendiendo que’l “problema y lo que molesta, pa dalgunos, ye namás que se fale n'asturianu, que se fale del asturianu, que s'aliende”.
Por ello, esplicó l’orixe de la iniciativa ‘Conceyos pola Oficialidá’, “acción pa frañar esi techu y mostrar que son munchos los conceyos y munchos los y les representantes democráticos de la xente que quieren dar un pasu alantre pa favorecer la transición a una dómina nueva onde los derechos fundamentales de les persones que falen asturianu o gallego-asturiano tean aseguraos, onde al traviés de la oficialidá se reconoza la igualdá xurídica de tola ciudadanía”, aseguró.
“Agora Bimenes vuelve ser un conceyu pioneru”, siguó Pulgar faciendo referencia a la declaración d’oficialidá del 1997 que pretende repetir l’equipu de gobiernu actual el 2 de xunetu, “un exemplu pa siguir polos demás conceyos asturianos; va ser el primeru en garrar una pancarta onte tean representaos conceyales de tolos partíos que quieran, una pancarta que demuestre qu'en tolos partíos, perriba de les sos diferencies ideolóxiques, hai xente que se compromete a trabayar pola llingua del país y el so futuru basándose en principios que teníen que ser tan básicos como'l respetu y la tolerancia”.
La especialidá docente, la promesa de los centros pilotu d’usu vehicular del idioma pal cursu viniente y el mandatu marcu foron dalgunos de los temes que tocó la XDLA, qu’afaló a los presentes a vese nes cais “defendiéndonos de cualquier enemigu del idioma y de cualquier represor de les posibilidaes de supervivencia del asturianu, llámese Cherines, Gabino, La Nueva España o FSA”. Fonte: asturies.com
