Alcuentru en Xixón con Francisco Álvarez, autor de 'Lluvia d'agostu'

Francisco Álvarez va falar de la so novela Lluvia d’Agostu (Premiu Xosefa Xovellanos de Novela).

Dempués d’ una fondera documentación historiográfica, l'autor recrea con maestría los ambientes de la época, evoca brillantemente a los sos protagonistes, y devuelve a la vida, baxo la lluvia fino d’ agostu, al iconu d’ aquella revolución llibertaria: Buenaventura Durruti, el mecánicu, el pistoleru anarquista, l’ espropiador de bancos, el cenetista carismáticu, el milicianu de la Barcelona antifascista. Nesta obra vamos ser testigos del primer gran atracu a mano armada nel Estáu español, el del Bancu d’España en Xixón, vamos siguir los pasos clandestinos de Durruti y los sos compañeros Ascaso y Jover per América Llatina, vamos acompañalos al esiliu francés pa preparar la insurrección y vamos empobinar pa Zaragoza cola Columna Durruti llueu de parar el golpe militar en Cataluña. 

Francisco Álvarez (Xixón, 1970) ye periodista, traductor lliterariu y autor de les obres Patiu de prisión (VTP, 1998), En poques pallabres (Trabe, 1998), Dixebra, cróniques d’un pueblu (L’Aguañaz, 2003), Historia de cinco goles. El Mundial de ‘El Guaje’ (La Cruz de Grado, 2010), Rumbo a la Historia. Navíos emblemáticos de todos los tiempos (Seronda, 2011), La tierra de la libertad. Crónica de los derechos humanos y civiles en el mundo (Seronda, 2012) y Un país llamáu Dixebra. La historia y les lletres de la banda decana del rock n’asturianu (Seronda, 2013). Tornó al asturianu la novela de Leonardo Sciascia Una historia cenciella (Seronda, 2012), y del italianu al castellanu les noveles Lobos frente al mar, de Carlo Mazza, (Seronda, 2013), Memoria del vacío, de Marcello Fois, (Hoja de Lata, 2014), Premiu al Meyor Llibru Italianu Espublizáu n’España esi añu, y Choque de civilizaciones por un ascensor en Piazza Vittorio, de Amara Lakhous (Hoja de Lata, 2016).

Esti alcuentru con Francisco Álvarez tendrá llugar nel Centru Municipal Integráu d'El Llano, mañana martes 18 a les 19.30 hores y cuntará con Nuria Rodríguez como presentadora d'esta segunda edición del llibru sobre la figura de José Buenaventura Durruti.

Fonte: YeXixón.com

Durruti noveláu. Trabayu de campu.

Autor: Vicente García Oliva

 Nun sé, llóxicamente, el nivel que teníen el restu noveles que se presentaron al Premiu Xosefa Xovellanos, pero toi cuasi seguru de que Lluvia d’agostu, del amigu Francisco Álvarez, ganólu merecidamente. Reservé la so llectura pal periodu vacacional de descansu (yá se sabe que los xubilaos tenemos munches y diverses xeres) y acerté, pues ye una novela mui entretenida.

 Nun ye fácil encadarmala, dientro de la forma novelística, nun o otru xéneru pues participa de varios d’ellos: la novela histórica, la biografía, el periodismu, inclusive la novela negra, como la parte de la preparación y l’asaltu al Bancu d’España de Xixón, pero si yo tuviera que definila según la llectura que yo fici, diría d’ella que ye una novela épica. Esiste, a lo llargo de tola historia que sigui al personaxe de Buenaventura Durruti, una esaltación, un aliendu, en definitiva, una épica qu’algama nun sólo al propiu personaxe  protagonista, sinón a los sos compañeros d’aventures/desventures (Ascaso, Jover, García Oliver…) y, más en xeneral, a tolos llibertarios y a la propia idega del anarquismu como sistema. Hai un engrandamientu, yo creo que consciente, de los valores del mésmu y escuéyense dalgunos de los momentos más “trunfales” del movimientu nos años prebélicos y, depués, na propia Guerra Civil española.

 Durruti fue un personaxe mui controvertíu, nun sólo polos sos enemigos, sinón inclusive polos del so propiu bandu. El mesmu autor recueye la conversación de Durruti y García Oliver colos anarcosindicalistes Ánxel Pestaña y Joan Peyró, onde estos últimos reprochen los sos métodos d’actuación diciendo qu’ellos son como “la lluvia d’agostu que trai falses promeses de frescor cuando más abrasa l’aire”. Ensin embargu, Francisco Álvarez nun se detién -y fai bien- nestes disputes que socavaron y muncho al movimientu anarquista, pa siguir poniendo l’acentu no  qu’a él-y interesa: la trayeutoria vital del líder y la so relación cola so compañera, los sos amigos y correlixonarios, hasta llegar a un final que yá conocemos, lo cuál nun-y quita nenguna fuercia a la narración que Paco lleva con una maestría impropia d’una primer novela, como ye’l casu.

 Podría discutise por qué l’autor escoyó éstes, en llugar d’aquelles otres anéudotes al rodiu de la vida de Durruti, o por qué se cuenta la historia con tantos dires y venires temporales, en llugar de facelo cronolóxicamente y con más orde, pero eses son decisiones del propiu autor qu’hai que respetar y que, amás, nun-y quiten valir nin méritu nengún a la so obra. Sicasí, por dicir dalgo y que nun se piense que l’amistá intervién nesti pequeñu comentariu, abúltame qu’hai dalgunos capítulos nos que l’aición se detién en demasía en coses poco importantes pal desarrollu de la novela, como la conversación ente l’Inspector Xefe y el Comisariu, de magar l’asaltu al Bancu d’España de Xixón que, anque ta ocurrente, creo que s’allarga demasiao. O el capítulu de la so intervención nel barcu que lleva a los prisioneros a África, anque sirva p’amosanos el carauter de líder de Durruti.

 Norabona, pues, a Francisco Álvarez por ufiertanos esta guapa y bien escrita novela que lu coloca, ya dende agora, dientro de los más importantes novelistes asturianos. Pa ser una primera obra nun ta mal ¿non?                    Fonte: trabayudecampu.com