17/11/15

La cultura del gochu n’Asturies, temática del XVI Seminariu d’Estudios Asturianos


  La Fundación Belenos entama en La Puela esta fin de selmana la decimosesta edición del Seminariu d’Estudios Asturianos. Lleva’l nome de ‘El rei de la cubil: la cultura del gochu n’Asturies’.
  Tres centrase na sidra y el vinu l’añu pasáu, nesta ocasión la organización decidió facer xirar la temática del seminariu n’otru productu clave pa entender el país: el gochu. Asina, los participantes van poder conocer la importancia d’esti animal na nuesa cultura y el papel que xuega anguaño.
  L’actividá va principiar el sábadu a les 10 cola inauguración oficial, pa darréu dar pasu a les ponencies del seminariu. La primera va correr a cargu d’Antón Álvarez Sevilla, de la Fundación Belenos, que va falar de ‘La castra asturcelta: el gochu’l país’, pa depués siguir col gastrónomu Lluis Nel Estrada, que va dar la charra ‘El gochu na gastronomía asturiana d’anguaño’.
  Tres una posa pa la xinta, prevista pa les 14.30 hores, l’antropólogu de la Universidá d’Uviéu Roberto González-Quevedo va intervenir a les 17 hores cola ponencia ‘Aspeutos rituales, económicos ya sociales de la matanza’l gochu’. Va zarrar la xornada Alberto Álvarez Peña, etnógrafu de la Fundación Belenos, con ‘Mitos y tradición oral al rodiu gochu n’Asturies’.
  Como ye vezu, los presentes van poder disfrutar d’una cena a les 21.30 hores pa siguir col tradicional filandón del seminariu con música del país qu’acueye, a partir de les 23.30 hores, el Café Centro.
Visita a una casería         La xornada del domingu va dedicase a la visita, dende les 10.30 hores, d’un casería del conceyu cola fin de que los asistentes puedar conocer de primer mano el procesu y ellaboración tradicional de los productos del gochu. A esta actividá hai que sumar la ellaboración demostrativa d’un choscu a cargu de la Inicación Xeográfica Protexida (IXP) Choscu de Tinéu, que se va celebrar mientres el seminariu nun horariu por confirmar. La xinta, prevista pa les 14.30 hores, va servir como piesllu d’esta edición.
  Les persones que quieran formalizar la matrícula pa participar nesta actividá han de facer un ingresu de 30 euros, axuntando’l nome y apellíos, na cuenta bancaria de la Fundación Belenos: ES24-2048-0000-26-3400123307. Nel casu de que s’escueya tamién la opción d’agospiu con pensión completa en ‘La Nueva Allandesa’, han de sumar 60 euros a la cantidá inicial. Pa más información sobre’l XVI Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o al traviés del corréu electrónicu seminariubelenos@gmail.com.                                Fonte: asturies.com

8 comentarios:

  1. Ye una parte bien importante de la nuesa ancestral cultura asturiana.

    ResponderEliminar
  2. Ye la cultura por antonomasia d'Asturies y de toles autonomíes, de toa España. La cultura del gochu y del vinu, y pol norte de la sidra.

    ResponderEliminar
  3. Viva'l chorizu a la sidra, el xamón, y la carrillada.

    ResponderEliminar
  4. Al gochu polo xeneral hai que pone-y un altar y si ye un gochu asturcelta más grande entá pola importancia tan terrible que tien na nuesa cultura y la nuesa civilización.

    ResponderEliminar
  5. ...y en la nuesa alimentación.

    ResponderEliminar
  6. El cerdo, el gochu, o porco, el porc, txerrikiak, the pork... qué guapu, noble, y aprovechable animal.

    ResponderEliminar
  7. Ye que dende va bien de sieglos vivimos na culturagrecorromana y judeo cristiana del gochu y del vinu y que dure bien de sieglos más.

    ResponderEliminar
  8. Bien ciertu,Tadeo, bien ciertu. Esa ye la nuesa cultura.

    ResponderEliminar

Los comentarios tán pendientes de moderación. Espublizaránse lo primero dable.