Antón Reixa va acudir a la presentación d'un llibru sobre la TPA

La XDLA edita esti trabayu entituláu 'La tele que queremos; televisión pública y reivindicación llingüística n'Asturies' que se va dar a conocer el día 21.

El músicu, escritor y realizador gallegu, con dellos trabayos na TVG, Antón Reixa va participar nun alderique xunto Esther Prieto, Xosé Antón Fernández 'Ambás', Pablo Quiroga y Carlos Suari sobre los medios de comunicación. Esta mesa redonda siguirá a la presentación del llibru que recueye los documentos ellaboraos nos últimos años polaXunta pola Defensa de la Llingua Asturiana (XDLA) sobre la presencia del nuestru idioma nes emisiones de la RTPA.

Estos conteníos empiecen nos años noventa, cola reivindicación pola puesta en marcha d’una televisión autonómica n’asturianu dafechu, y finen anguaño, col nacimientu de la RTPA y la necesidá, "cada día más evidente, de convertila nuna ferramienta al serviciu de la normalización del asturianu". L'actu va celebrase'l xueves 21, de magar les 17.30 hores, nel xixonés Toma 3 (Marqués de Casa Valdés, 27).

Fonte: Asturies.com

La SGAE retirará una demanda contra RADIO KRAS

Antón Reixa retirará la demanda de la SGAE a la xixonesa Radio Kras

   Una carta pública a Antón Reixa del músicu xixonés Xabel Vegas llevó al presidente de la SGAE a anunciar la retirada de la demanda de la entidá que dirixe a Radio Kras. La emisora llibre debía d’afrontar un pagu de 2.328,08 euros.

   Vegas escoyó’l so blogue ‘El óxido’, nel agora diariu dixital ‘Público’, pa treslladar a Reixa la importancia que tuvo Radio Kras na so formación musical nunos tiempos nos que yera difícil sentir bandes independientes de fuera del Estáu. D’esta forma, pretendía que’l músicu gallegu entendiera l’abusu de cobrar perres a una entidá ensin ánimu d’arriquecimientu con 27 años de vida que se caltién gracies a les cuotes de los sos socios; y lo consiguió, yá que Reixa comunicóse con él pa tresllada-y que dio instrucciones pa suspender la demanda y aniciar un diálogu cola emisora xixonesa pa saber qué porcentaxe real de repertoriu de la Sociedad General de Autores y Editories (SGAE) utiliza. Amás, en Twitter, la entidá reconoció "el llabor de la emisora".

   D’esta forma, Radio Kras nun tendrá que pagar los 2.328,08 euros que-y reclamaba la SGAE, pero tovía tien pendiente otra demanda, nesti casu de l'Asociación de Gestión de Derechos Intelectuales (AGEDI)-Asociación de Artistas, Intérpretes y Ejecutantes (AIE), na que-y esixe una cantidá que podría ser de 3982 euros o de 13625,28 euros, según la categoría que-y s’aplique. Nesis sen, Reixa anunció que va treslladar la posturar de la SGAE a estes entidaes pa que reconsideren la so postura.
 
   Fonte:  Asturies.com