Arcu Lliterariu va contar con convidaos de Galicia y Miranda de l Douro

  Del 23 al 31 de xunetu, nel marcu del V Festival Arcu Atlánticu, va celebrase una edición nueva del Arcu Lliterariu, estaya que va centrase na lliteratura asturiana y na normalización. L'Asociación Cultural L'Arribada yá tien zarrada la programación d'un certame que va contar con convidaos de Galicia y Miranda de l Douro.

  Charres, alderiques, presentaciones, talleres, teatru o proyeiciones conformen el completu programa del Arcu Lliterariu, que va tener como broche d'oru, el domingu 31 a les 13 hores nel Escenariu Atlánticu, la entrega de los Premios Timón 2016 qu'esti añu reciben Esther García López (X Premiu Timón p’autores en llingua asturiana y eonaviego), Pilar Sánchez Vicente (VII Premiu Timón p’autores asturianos en llingua castellana) y Ramón d’Andrés (IV Premiu Timón de Cultura Asturiana). La edición d'esti añu crez en conteníos y pretende dar "un papel destacáu a los espacios d’alderique sobre la lliteratura d’Asturies y la normalización de la llingua asturiana", destaquen dende L'Arribada.

  La estrena de 'Diez negrinos (And then there were none)', filme dobláu al asturianu por Gonzali Producciones, va abrir a les 19 hores del sábadu les actividaes del Arcu Lliterariu na carpa instalada n'El Muelle, onde van desendolcase la mayoría d'elles. Pal día siguiente tán previstos dellos alderiques sobre la lliteratura en llingua asturiana, abriendo asina una serie de xornaes dedicaes a les nueses lletres.

  De forma paralela, el martes y el miércoles, a les 19.30 hores, va desendolcase nel Centru de Cultura Antiguu Institutu un taller de Wikipedia n'asturianu. Nesi mesmu llugar, el sábadu a les 19.30 hores, Telón de Fondo va representar la obra 'Squash'.

Xeremandía'l sábadu 30         El vienres, a les 18 hores, ta prevista una Xornada sobre Normalización Llingüística pal que L'Arribada va convidar a coleutivos y a representantes de partíos políticos p'aldericar sobre esti asuntu de vital importancia pal futuru de nuesu idioma. Mentes, el sábadu (12 hores, Muséu Casa Natal Xovellanos) va celebrase la yá tradicional Xeremandía, alcuentru poéticu nel qu'habrá presencia gallega y mirandesa.

   Yá de tarde a les 18 hores na carpa d'El Muelle, dellos convidaos de Miranda de l Douro va presentar obres lliteraries y trabayos científicos y divulgativos en y sobre'l mirandés nuna actividá entitulada 'Paisaxes lliterarios y culturales na Tierra de Miranda'. Darréu, a les 20 hores, l'escritor Antón Riveiro Coello va repasar énte los presentes la so trayeutoria creativa en gallegu, pa finar con 'Buenos Aires, capital del llibru gallegu', sesión na que Víctor F. Freixanes, direutor xeneral de la histórica Editorial Galaxia, va falar del proyeutu 'Mar Maior Argentina', de la proyeición lliteraria nos circuitos esteriores y de les más recientes novedaes espublizaes pola decana de les editoriales gallegues.                                Fonte: asturies.com

La revista Cultures celebra 25 años col so númberu 19

  L'actu de celebración de los 25 años de la revista Cultures, el próximu llunes 21 d’avientu, a les 19:30 de la tarde, na sala de conferencies del Antiguu Institutu Xovellanos (cai Xovellanos 21) de Xixón dientro de les actividaes del décimu aniversariu de L’Arribada va sirvir tamién pa presentar el númberu 19 de la revista.

  Nel actu de presentación del nuevu númberu de la revista qu’edita l’Academia de la Llingua Asturiana van participar l’etnógrafu Alberto Álvarez Peña y el direutor de Cultures, Roberto González-Quevedo.                                          Fonte: asturnews.com

Xixón y l’Arribada homenaxeen al conceyu de Miranda do Douro

Muséu Casa Natal de Xovellanos de Xixón

  Esti sábadu día 5 d’avientu, a les 11 la mañana va celebrase la inauguración oficial de la xornada dedicada al conceyu portugués de Miranda do Douro, na casa natal de Xovellanos en Xixón, dientru de la programación del décimu aniversariu de l’Arribada.

  L’actu que va desenvolvese nel Muséu Casa Natal de Xovellanos de Xixón va cuntar cola intervención del so alcalde (presidente de la Cámara Municipal) Artur Nunes, de la conceyala d’Educación y Cultura de Xixón Ana Montserrat López, del secretariu de l’Academia de la Llingua Asturiana Roberto González-Quevedo y del presidente de l’A.C. L’Arribada Humberto Gonzali.

  Nel mesmu llugar, media hora depués pa presentase un llibru-discu que recueye un trabayu sobre la presencia del cantautor Zeca Afonso n’Asturies: y que fai alcordanza de como “no segundo ano que veio, José Afonso foi apoteótico. Uns meses antes tinha acontecido a Revolução dos Cravos e quando ele começou a cantar «Grândola Vila Morena», a Guarda Civil começou a desalojar as pessoas do carvalhal, mas toda a gente continuou a cantar.”

  La xornada d’homenaxe va tener como act cimeru a les 12 una Charra-Tertulia sobre la Cultura de Miranda do Douro na que van intervienir Mário Correia (Música y Etnografía), Alfredo Cameirão (Léngua Mirandesa) y Herminio Bernardo (Historia).

  La Vagamar lliteraria cumple’l décimu aniversariu esti añu y, pa cellebralo, l’asociación cultural vieno entamando dende hai selmanes un eventu nomáu 10 años de L’Arribada onde fai analís, ente’l 14 de payares y el 26 d’avientu, de la evolución cultural de Xixón y Asturies per aciu d’un abanicu ampliu de propuestes en forma d’alcuentros con lliteratos y creadores artísticos, proyecciones, tertulies, presentaciones, conferencies, actos institucionales, actuaciones musicales, y otros.

  Les actividaes que queden por desenvolver tan acutaes palos díes 5, 9, 10, 11, 12, 14,1 5, 16, 18, 21, 22, 23 y 26 d’avientu. 10 años de L’Arribada tien una subvención estraordinaria del Ayuntamientu de Xixón, pola que se soscribió’l conveniu correspondiente. Los conteníos del programa podrán siguise nel blog del eventu.         Fonte: asturnews.com

Convóquense los premios Timón 2014

   

Convocatoria de los Premios Timón 2014

   Mañana, 10 d'ochobre de 2014, ábrese la convocatoria de los Premios Timón 2015 entamaos pola Asociación Cultural L’Arribada. Les candidatures, razonaes, puen ser presentaes por una persona o un colectivu nes señes de corréu electrónicu de l'asociación: larribada@gmail.com, hasta’l 10 de xineru de 2015. Los Premios Timón destínense a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones los/es escritores que nacieren nel añu 1.965 o antes.

   Trátase del IX Premiu Timón, p’autores en llingua asturiana y n’eonaviego, y del VI Premio Timón, p’autores asturianos en llingua castellana.

   Igualmente, prémiase tamién a asociaciones, sociedaes y fundaciones con sede n’Asturies que tengan como fin la conservación y promoción de la identidá cultural de nueso, per aciu del III Premiu Timón de Cultura Asturiana.

   P’alcordar los gallardones l’asociación convocará trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de la décima edición de L'Arribada.

   Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014); del Premio Timón, Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013) y Carmen Ruiz-Tilve; y del Premiu Timón de Cultura Asturiana l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).    Fonte: Asturnews.com

"Con financiación, la Biblia n'asturianu taría terminada en dos años", asegura Andavert

José Luis Andavert, direutor xeneral de la Sociedad Bíblica n'España

    José Luis Andavert apunta a la falta de financiación como’l “gran problema p’acabar el proyeutu” de tornar la Biblia al asturianu. El direutor xeneral de la Sociedad Bíblica n’España cree que, con perres, en dos años podría tar terminada esta iniciativa aniciada por Federico González-Fierro Botas hai 25 años.

   “Ta aparcáu, pero non abandonáu”, destaca Andavert, qu’apunta que la traducción “ta fecha”, quedando pendiente “una llectura dende la perspeutiva teolóxica de los términos y la concordancia ente los testos diferentes”. Un llabor que pue paecer cenciello a priori, pero que nun lo ye dada la estensión de les escritures sagraes. Amás, por mor de qu’esti trabayu desendolcóse dende 1989 hasta primeros d’esti sieglu, participando nél más d’una docena de persones, fadría falta una revisión de la normativa académica, l’estilu y la gramática.

   “Con financiación, la Biblia n’asturianu taría terminada en dos años”, afirma’l biblista, que recuerda que nel pasáu’l proyeutu contó con ayudes de CaxAstur y de la Direición Xeneral de Política Llingüística. Poro, d’algamar perres pa los trabayos de remate, los asturianos podríen disfrutar de les sagraes escritores na llingua propia pa 2016 o 2017, fecha ésta última destacada “por cumplise’l 500 aniversariu de la reforma protestante”. Nesi sen, Andavert destaca’l calter interconfesional de la Biblia.

   Lo que tien nidio’l direutor xeneral de la Sociedad Bíblica ye que, tarde o temprano, el proyeutu aniciáu nel 1989 va ser una realidá y la so espublización, el meyor homenaxe al xesuita asturianista González-Fierro Botas, figura que recordó’l vienres l’Asociación Cultural L’Arribada con motivu de La Vagamar. “Conocílu nel 1988. Yera un gran cristianu y pronto fixi muncha amistá con él, al igual que tola mio familia. Facíemos tertulies na que tamién participaben los nuesos fíos, amantes de la montaña, como Federico, una persona tremendamente capaz y un trabayador incansable”, apunta Andavert, que rememora aquellos primeros años de la iniciativa: “Presentámosla a Gabino Díaz Merchán, que la acoyó con muncho apreciu. Amás, contó tamién cola aprobación de toles comunidaes cristianes asturianes”.

Servirá “pa reforciar la normalización llinguística”   La materialización del  proyeutu va servir “pa reforciar la normalización llingüística d’un idioma que, na mio opinión, debería ser cooficial xunto col español”. Tamién obligaría “a tomar decisiones en materia de toponimia y onomástica”. “La finalización del proyeutu ye la mio tarea y compromisu”, añade Andavert, que nun quier metese nel llabor de tornar la Biblia al gallegu hasta nun tener terminada la versión asturiana. Enantes, la Sociedad Bíblica yá fixera la catalana –coles sos variantes– y la vasca –ésta n’euskara batua y na fala d’Iparralde–, amás de delles en castellanu, y el Nuevu Testamentu n’aragonés y na fala d’una zona de Cáceres, ente otres munches iniciatives. Anguaño trabaya na traducción de la Biblia a la llingua de señes catalana y a la española.                                                                Fonte: Asturies.com

L'Arribada na Semana Negra 2014: Presentamos "L'espeyu onde miranos. Televisiones de proximidá n'Europa Occidental y procesos de recuperación identitaria", de Damián Barreiro

 

L'Arribada na Semana Negra 2014

  El miércoles 9 de xunetu L’Arribada programa na Carpa del Encuentro, en dientro de la XXVII Semana Negra, la presentación del llibru L’espeyu onde miranos. Televisiones de proximidá n’Europa Occidental y procesos de recuperación identitaria, de Damián Barreiro,  obra que llogró el VI Premiu Fierro Botas que convoca añalmente l’Ayuntamientu de Gijón / Xixón. Nesti actu tará l’autor del llibru, la representante d’Ediciones Trabe Eshter Prieto y l’escritor Humberto Gonzali.

   Damián Barreiro Maceiras (A Estrada, Pontevedra, 1984) ye periodista. Tres de ser redactor demientres años del selmanariu Les Noticies y n’Asturies.com, amás de presentador en dellos programes de TLG, la televisión local de Xixón, collabora nel periódicu Diagonal Asturies, na sección «Escolinos» del diariu La Nueva España y n’otros medios asturianos.

  L’espeyu onde miranos. Televisiones de proximidá n’Europa Occidental y procesos de recuperación identitaria, ye un completu ensayu sobre la importancia que los medios de comunicación, en xeneral y la televisión en particular, tienen sobre’l caltenimientu y pervivencia d’una llingua y, más p’allá, sobre la creación o recuperación de la identidá específica de los pueblos a los que representen y nos que se desenrollen.

   Afitando’l conceptu de televisión de proximidá como daqué que ta definíu non pol ámbitu de cobertura, sinón polos sos conteníos, pol accesu de la comunidá al mediu, pol predominiu de la producción propia y pola promoción de los intereses locales, l’autor fai un percorríu peles televisiones de proximidá, o autonómiques, más cercanes a Asturies, tanto d’Europa como del Estáu español, nel qu’analiza l’usu que nelles se fai de les llingües propies y el papel qu’estos medios tuvieron na normalización y estandarización d’esos idiomes.

   Tres d’esti análisis de los medios de la rodalada, l’ensayu céntrase na situación y papel de la RTPA (Radiotelevisión del Principáu d’Asturies) nos nueve años d’existencia y más en concreto de la TPA, una televisión que nun ye a reflexar el mundu dende la mirada asturiana, nin a dignificar y espardir l’usu de la so llingua, por más qu’esi sía ún de los mandaos recoyíos nos sos Estatutos.                                                                                Fonte: arribada.wordpress.com

Xosé Bolado gana'l VIII Premiu Timón d'esti 2014

Xosé Bolado ye'l gallardonáu col VIII Premiu Timón pa escritores en llingua asturiana o n'eonaviego, convocáu pola Asociación Cultural L'Arribada, según alcuerdu d'un xuráu integráu por Aurora García Rivas, Alberto Álvarez Peña, Miguel Rojo y Lluis Portal Hevia, y presidíu por Humberto Gonzali, que falló'l premiu esto lunes 19 de mayu. El Premiu Timón quier distinguir la trayectoria lliteraria de los escritores en llingua asturiana y n'eonaviego Pa esta edición optaben a los gallardones los/es escritores que nacieren nel añu 1.964 o antes. Xosé Bolado nació n’Uviéu en 1946. Académicu de la Llingua, profesor de lliteratura y estudiosu de la lliteratura asturiana y poeta, ye autor de la Antoloxía poética del Surdimientu (1989). Como antólogu y críticu lliterariu ye autor tamién del prólogu, les notes y la bibliografía de "Escritores en Llingua asturiana" (1992), de la colección "Grandes autores asturianos" de la editorial Hércules-Astur, de dos llibros de Rosario Acuña y del fascículu "Lliteratura asturiana contemporania"' de la Historia de Asturias de La Nueva España. Tien publicaos diversos trabayos y artículos sobre l’actual panorama de les lletres asturianes. Publicó tamién los siguientes llibros de poesía n'asturianu; Conxura contra la decadencia (Llibros del Pexe, 2002), Na estación de los relevos (Llibros del Pexe, 2006) y La bona Intención (en formatu billingüe, Impronta Editorial, 2012), Fue presidente del Atenéu Obreru de Xixón, onde fundó la colección poética Deva, y primer director de la revista creativa de l’Academia de la Llingua Lliteratura. Los ganadores anteriores del Premiu Timón fueron, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013). Esti gallardón, consistente nuna obra del escultor y ceramista xixonés Jesus Castañón, entregaráse’l 27 de setiembre mientres la cellebración de La Vagamar 2014. Fonte: Asturnews

L'Arribada conderga "l'emperramientu antiasturianu" del conceyal Justo Vilabrille

L'Arribada pide la rectificación del conceyal, reservándose la posibilidá de realizar aiciones llegales o sociales. Ante les declaraciones llamentables, malintencionaes y apinaes de falsedá y ataques al honor de les persones realizaes pol conceyal nel Conceyu de Xixón/Xixón, Justo Vilabrille Linares, referíes al Festival Arcu Atlánticu, onde se cita a l'Asociación Cultural L’Arribada, queremos faer delles puntualizaciones y amosar nuesa más enérxica condena pola so actitú claramente antiasturiana. L'Arribada nun ta venceyada a nengún partíu políticu. Na so directiva hai votantes de toles sensibilidaes ideolóxiques presentes n'Asturies. Amás, nes nueses propuestes siempres s'escluyó cualquier tipu de sectarismu, lo que por desgracia nun yera la norma pa ciertos eventos bien cercanos a anteriores equipos de gobiernu municipal. L'Arribada considera bien grave que'l señor Vilabrille fale de "embolsamientos" de cantidaes y tratos de favor, cuando ye conocíu pola ciudadanía xixonesa qu'él, siendo conceyala de Cultura, integrar nun equipu de gobiernu municipal que, esti sí, axudicó cientos de miles d'euros a delles entidaes que se movíen totalmente na órbita del so partíu. Nesti puntu, queremos destacar el calter claramente difamatoriu de les palabres del conceyal Vilabrille, cuando diz que la esposa d'un representante na FMCEyUP (que nun ye miembru de L'Arribada) ye presidenta de l'asociación, pos tal afirmación ye totalmente falsa. El presidente de la nuesa asociación cultural ye Alberto Álvarez Peña y la persona citada nunca tuvo ostentando la presidencia. Per otra parte, nin ella, nin nengún miembru de L'Arribada, va embolsase, nin s'embolsó nunca, un euru de dineru público pol so trabayu nel espardimientu de la nuesa cultura y la nuesa lliteratura. Resúltanos inconcebible esti usu denigrante y marcadamente machista que'l conceyal Vilabrille fai de la condición d'esposa" y esperamos que tal despropósitu nun sía compartíu pol partíu al que diz representar. Queremos recorda-y a esti conceyal que la mentira nun puede despintar lo que ta claru. Asina, no tocante a les cifres manipoliaes con clara intención política pol señor Vilabrille, méntense cantidaes amañando y tracamundiando conteníos de la propuesta de programación pa 2014 de la FMCEyUP. En tal propuesta, determinense 4.100 euros pa la Oficina de Normalización Llingüística destinaos collaborar na parte técnica del programa de la Vagamar de la nuesa asociación, nel arriendu d'equipos de soníu y contratación d'actuaciones musicales y ponentes. Estos 4.100 euros nun s'ingresen en nenguna cuenta de L'Arribada, pos la xestión económica ye realizada directamente pola Oficina mentada. Amás, dase la circunstancia de qu'esta partida de 4.100 vien siendo conseñada na programación de la Fundación dende l'empiezu del anterior mandatu municipal, a propuesta del Grupu Municipal d'Izquierda Xunida, qu'entós se responsabilizaba de la área de cultura tradicional. Dase'l casu de que Justo Vilabrille Linares, entós conceyal de Cultura de Xixón, siempres sofitaba na so condición de presidente de la Xunta Rectora de la FMCEyUP esta asignación de 4.100 euros. Tocantes a una cantidá de 19.100 euros que nos axudica a L'Arribada, encamentamos una llectura mínimamente sollerte del apartáu de la programación onde s'inscribe esti dineru y vese, claramente, que L'Arribada "va ser la encargada" de desenvolver la temática lliteraria y non la totalidá de les actividaes, que tamién se refieren a danza, teatru, música, mar, naturaleza y patrimoniu común, como puede lleese na descripción y que la nuesa asociación nun va executar. Asina, l'añu pasáu, L'Arribada tuvo asignada pal desenvolvimientu de les actividaes lliteraries una cantidá inferior a los 6.000 euros, situación que se repitiría en 2014. Los planteamientos del conceyal Xustu Vilabrille contradicen lo dicho y fecho por él mesmu en numberoses ocasiones, participando n'actos de L'Arribada de forma bien activa, comprobando y allabando públicamente'l calter abiertu y plural de la nuesa asociación, y aprobando reiteradamente na so condición pasada de conceyala de Cultura la asignación de partíes económiques pal sofitu al desenvolvimientu de los nuesos programes culturales. Tristemente, vemos una vegada más cómo intereses partidistes, y personales, d'esti representante políticu, inciden una vegada más nel ataque y nel despreciu a entidaes asturianistes, un ataque y despreciu que se careció por décades en Xixón, un conceyu onde hasta apocayá se premiaba descaradamente a asociaciones allegaes al partíu del señor Vilabrille mientres, coles mesmes, decenes d'asociaciones xixoneses de calter asturianista malapenes recibíen les migayes d'aquella política cultural". Continuidá d'esta forma de faer les coses ta na retirada, dende 2013, de les subvenciones del Principáu destinaes a la promoción del asturianu poles asociaciones culturales de la nuesa comunidá autónoma. Ante esti repitíu ataque, l'Asociación Cultural L Arribada acútase l'entamu de les acciones llegales y/o movilizaciones sociales qu'envalore oportunu en defensa democrática del so bon nome y en sofitu a la cultura asturiana, en tantu y en cuanto el señor Justo Vilabrille Linares nun presente la so dimisión como conceyala nel Conceyu de Xixón/Xixón o'l so partíu dea en demandá-yla o haya una retractación per parte del conceyal difamante. Fonte: Infoasturies

L'Arribada da a conocer a los candidatos a los Premios Timón

   Esti día diéronse a conocer los candidatos al II Premiu Timón de Cultura Asturiana, que son la Sociedad Humanitarios de San Martín, la Fundación Belenos, l’Asociación Cultural San Tirso del Eo, la Xunta pola Defensa de la Llingua Asturiana y la Sociedad Popular y Cultural La Regalina. Dotramiente, Lurdes Álvarez, Esther Prieto, Xosé Bolado, Ignaciu Llope, Esther García López y Ánxel Álvarez Llano, conformen la rellación d’autores qu’aspiren al VIII Premiu Timón p’autores en llingua asturiana y n’eonaviego. El 2 de marzu pasáu zarró’l plazu de la convocatoria pa recibir candidatures a los Premios Timón 2014.

   Los Premios Timón destínense a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones los/es escritores que nacieren nel añu 1.964 o antes. Trátase del VIII Premiu Timón, p’autores en llingua asturiana y n’eonaviego, y del V Premio Timón, p’autores asturianos en llingua castellana.

   Igualmente, prémiase tamién a asociaciones, sociedaes y fundaciones con sé n’Asturies que tengan como fin la conservación y promoción de la identidá cultural de nueso, per aciu del II Premiu Timón de Cultura Asturiana.

   Los candidatos al II Premiu Timón de Cultura Asturiana son la Sociedad Humanitarios de San Martín, la Fundación Belenos, l’Asociación Cultural San Tirso del Eo, la Xunta pola Defensa de la Llingua Asturiana y la Sociedad Popular y Cultural La Regalina.

   Lurdes Álvarez, Esther Prieto, Xosé Bolado, Ignaciu Llope, Esther García López y Ánxel Álvarez Llano, conformen la rellación d’autores qu’aspiren al VIII Premiu Timón p’autores en llingua asturiana y n’eonaviego.

Presentáronse pal V Premio Timón p’autores asturianos en llingua castellana les candidatures de Fulgencio Argüelles, Tino Pertierra, Carmen Ruiz-Tilve, Pepe Monteserín, José María Ruilópez, Aurelio González Ovies, Alejandro M. Gallo, Diego Carcedo, Ángeles Caso, Pedro de Silva, Paco Ignacio Taibo II y Luis Arias Argüelles-Meres.

P’alcordar los gallardones l’asociación convocará trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse’l 27 de setiembre, mientres la cellebración de La Vagamar 2014.

   Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013); del Premio Timón, Luis Fernández Roces (2010), Juan Méjica (2011), Fernando Menéndez (2012) y Gonzalo Suárez (2013); y del Premiu Timón de Cultura Asturiana, l’Asociación Cultural Ensame Sidreru (2013).

   El sábadu prósimu, 15 de marzu, fallaráse'l II Premiu Timón de Cultura Asturiana; el sábadu 22 de marzu, el V Premio Timón (autores en castellanu); y el sábadu 29 de marzu, el VIII Premiu timón (autores n'asturianu y n'eonaviego).   Fonte: Asturnews

MIGUEL ROJO GANA'L VII PREMIU TIMÓN

Miguel Rojo gana'l Premiu Timón

   L’escritor tinetense Miguel Rojo ye’l ganador del VII Premiu Timón, convocáu por L’Arribada p’autores en llingua asturiana y n’eonaviego, según alcuerdu d’un xuráu aconceyáu güei en Xixón y formáu por Xurde Morán, Roberto González-Quevedo, Antón García, Aurora García Rivas y Humberto Gonzali.

   Pa esta edición, optaron a los gallardones escritores que nacieren nel añu 1.963 o anteriormente. La distinción consiste nuna obra del escultor y ceramista xixonés Jesus Castañón, que s’entregará mientres la cellebración de L’Arribada 2013, el viniente sábadu 28 de setiembre.

   Miguel Rojo (Zarracín, Tinéu, 1957) ye un escritor qu'escribe n'asturianu y n'español. Afáyase ente los más destacaos representantes de la lliteratura del Surdimientu y tien obra publicao en cuasi tolos xéneros. Ye autor de Histories d'un seductor. Memories d'un babayu , novela que llogró ún de los mayores éxitos de ventes de la lliteratura asturiana. Doctor en bioloxía, dedícase a la enseñanza como profesor d'institutu.

   En 1988 consiguiera'l Premiu Xosefa Xovellanos de novela con Asina somos nós . El so llibru siguiente foi una colección de relatos titulada Tienes una tristura nos güeyos que me fai mal (1989). Tien escrito tamién lliteratura infantil y poesía. Ún de los sos relatos llevóse al cine nel curtiumetraxe Xicu’l topeiru, de Gonzalo Tapia.

   En 2005 y 2008 algamó'l Premiu de la Crítica d'Asturies en Poesía y Lliteratura Infantil respectivamente, polos llibros LLaberintos y El viaje de Tin y Ton.

   Obra n'asturianu Narrativa Asina somos nós. SPPA, 1989 (Premiu Xosefa Xovellanos); Tienes una tristura nos güeyos que me fai mal. Llibros del Pexe, 1989; Histories d'un seductor (memories d'un babayu). Trabe, 1993 (Premiu Narraciones Trabe); Prosa ya versu. Atenéu Obreru de Xixón,1999; Cuentos pa un turista blancu. Ámbitu, 2006; Dir pa escuela (coordinador). Ámbitu, 2008; La ponte y otros cuentos. Suburbia, 2009; Asina somos nós. Trabe, 2011 (2º Edición) Infantil Telva y los osos. Trabe, 1994; Telva y el fueu. Trabe, 1998; ¿De qué tará fecha la Lluna?. Editorial Pintar-Pintar, 2008; El viaxe de Tin y Ton. Editorial Pintar-Pintar, 2008; Raitán, el papu coloráu. Editorial Trabe, 2010; El dinosauriu, el príncipe, la nena y la so ma. Editorial Pointar-Pintar, 2010 Poesía Buscador d'estrel.las. Editora del Norte, 1996 (Premiu Fernán Coronas); Bilbao: estación terminal. Ambitu, 2001; Llaberintos. Trabe, 2006 (Premiu de la Crítica 2005); Territorios. Edición billingüe. Llibros del Pexe, 2007; El Paséu /El Paseo. (Edición bilingüe asturianu-español) Ediciones Seronda, 2011 Obra n'español Narrativa Historias del más acá. Trabe, 1999; Historias de un seductor (memorias de un gilipollas). Tal y Cual, 2002; La senda del cometa. Laria, 2007; La hoja del ginkgo biloba. Editorial Difácil, 2010 Infantil Raitán, el petirrojo. Everest, 2003; ¿De qué estará echa la Luna?. Editorial Pintar-Pintar, 2008; El viaje de Tin y Ton. Editorial Pintar-Pintar, 2008 (Premio de la Crítica 2008); El dinosaurio, el príncipe, la niña y su mamá. Editorial Pintar-Pintar,2010 Poesía Territorios. (Edición bilingüe asturianu-español). Llibros del Pexe, 2007; El Paséu /El Paseo. (Edición bilingüe asturianu-español) Ediciones Seronda, 2011 Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011) y Antón García (2012).

   Fonte:  Asturnews.com

Antón García faise col VI Premiu Timón pola so carrera lliteraria

Antón García n'imaxe d'archivu Antón García faise col VI Premiu Timón pola so carrera lliteraria L’escritor de Tinéu, Antón García ye’l ganador del VI Premiu Timón, convocáu por L’Arribada p’autores en llingua asturiana y n’eonaviegu, según alcuerdu d’un xuráu aconceyáu güei en Xixón y formáu por Alberto Álvarez Peña, Carlos Espina, Vicente García Oliva, Aurora García Rivas y Humberto Gonzali. Pa esta edición, optaron a los gallardones escritores que nacieren nel añu 1962 o anteriormente. La distinción consiste nuna obra del escultor y ceramista xixonés Jesus Castañón, que s’entregará mientres la celebración de L’Arribada 2012, nel viniente mes de setiembre. Antón García (Tuña, 1960) ye escritor, editor, traductor y críticu lliterariu. Fundó les editoriales Trabe y Tsibros de Frou. Autor d’una importante obra lliteraria onde destaquen los títulos de narrativa El Viaxe (1987), El pelegrín valiente (1993) y Díes de muncho (1998); los poemarios Estoriu (1984), Los díes repetíos (1989), Venti poemes (1998) y La mirada aliella (2007); les traducciones Memoria d’outru ríu d’Eugenio de Andrade (1985), Contra la oscuridá d’Eugenio de Andrade (1988), Cuentatrapos de Víctor Carbajal (1989) o Los otros feriantes d’Álvaro Cunqueiro (1999); asina como, ente otros, los estudios y ediciones La Xudit. Xuan González Villar (1990), El cuentu asturianu (1860 – 1936) (1992), El cuentu asturianu tres la guerra (1998), Lliteratura asturiana nel tiempu (1993), Poesía asturiana y traducciones. Fernán Coronas (1993), Cartes a la catedral d’Uviéu y otros poemes. Ángeles López Cuesta (1994), Obra Poética. Xuan María Acebal (1995) y Obra Asturiana. Marcos del Torniello (1996) Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010) y Vicente García Oliva (2011). Fonte: Asturnews.

L'Arribada respuende a les acusaciones del PSOE poles contrataciones pal Festival Arcu Atlánticu

L'asociación L'Arribada respuende a les acusaciones del PSOE de Xixón, feches al traviés del ex conceyal de Cultura Justo Vilabrille, que venceyó la contratación d'esta asociación per parte de Carlos Rubiera, actual conceyal de Cultura, pa la organización de delles actividaes dientro del Festival Arcu Atlánticu, que va celebrase en xunetu na ciudá, a la presencia d'Humberto Gonzali na xunta rectora de la Fundación Municipal de Cultura.
Esti ye'l testu completu unviáu por L'Arribada:
PROTESTA DE L’ASOCIACIÓN CULTURAL L’ARRIBADA ANTE L’ATAQUE DEL CONCEYAL JUSTO VILABRILLE LINARES
Ante les declaraciones llamentables y malintencionaes del conceyal socialista nel Ayuntamientu de Xixón, Justo Vilabrille Linares, referíes al venideru Festival Arcu Atlánticu, onde se cita a l’Asociación Cultural L’Arribada, queremos facer delles puntualizaciones.
L’Arribada nun ta venceyada a nengún partíu políticu. Na so directiva hai votantes de toles sensibilidaes ideolóxiques presentes n’Asturies. Per otra parte, nel desarrollu de les nuestres propuestes siempres tuvo escluyíu cualaquier tipu de sectarismu, lo que por desgracia nun yera la norma pa ciertos eventos “culturales” bien cercanos a la ideoloxía d’anteriores equipos de gobiernu municipal. L’Arribada considera mui grave que’l señor Vilabrille fale d’axudicaciones a déu suxiriendo escures trames y tratos a favor, cuando ye persabío por tola ciudadanía xixonesa que, él, en siendo conceyal de cultura, foi integrante d’un equipu de gobiernu municipal que, ésti SÍ, axudicara a déu decenes de miles d’euros a dalgunes asociaciones por toos conocíes y que se movíen dafechamente na órbita ideolóxica del so partíu. Igualmente, deseyamos precisar que naide de L’Arribada va percibir nengún euru de los 5880 que xestionará la nuestra entidá nel Festival Arcu Atlánciu.
L’Arribada quier recorda-y al señor Vilabrille lo qu’él bien conoz de cuantayá, que’l ciudadanu Humberto Gonzali nun ye dende va años miembru de la nuestra asociación, y que la so collaboración como moderador o presentador en delles actividaes fízose siempres ensin recibir remuneración de nengún tipu, dándose’l casu de qu’Humberto Gonzali tien aportao en toles ediciones dineru del so bolsillu pa completar el presupuestu añal de la nuestra programación. Y decimos que’l conceyal Justo Vilabrille conoz de primera mano esto de lo que facemos alcordanza porque él, en reiteraes ocasiones, participó n’actos de L’Arribada de mou mui activu, comprobando de primera mano’l nuestru calter abiertu, plural, non sectariu y alloñáu de toa vinculación partidaria, calter que tien allabao, polo que resulten pa nós más incompresibles ya inaceptables les sos palabres.
L’Arribada considera que’l posicionamientu d’esti representante socialista dista muncho de ser democráticu, pues incide una vegada más nel ataque y despreciu a entidaes asturianistes; ataque y despreciu que se sofrió per décades en Xixón, conceyu onde hasta va poco se premiaba descaradamente a asociaciones afines al partíu del señor Vilabrille mientres, al empar, decenes d’otres asociaciones xixoneses de xeitu asturianu malapenes recibíen les migayes que la política cultural d’aquel entós tenía a bien dar.
L’Arribada nun ve de recibu l’actitú politizada y antiasturiana del conceyal Justo Vilabrille Linares amosada na so intervención d’esta mañana. Esperamos que con ella nun s’abra un camín involucionista promovíu pola fuerza política que lu designó como miembru dela Xunta Rectora de la Fundación Municipal de Cultura. L’enrarecimientu de les relaciones culturales que se ta dando na ciudá nos últimos tiempos fainos ser pesimistes pero, con tou y con ello, aguardamos que’l sentíu común y l’espíritu democráticu torne a allugase nes tiestes responsables d’esta agresión contra la nuestra asociación y contra la lliteratura y la cultura asturianes.

Fonte: asturnews, l'Arribada

más info asturies.com

Xicu Monteserín repasa en L'Arribada la so obra empobinada al públicu infantil

El escritor Xicu Monteserín, autor de las obras más pioneras de la literatura infantil en asturiano, es el protagonista de la presentación 'De cuentos, xuegos y cosadielles, un repasu a les obres pa neños', que tiene lugar este lunes en el patio del Antiguo Instituto, en el marco de las jornadas Vagamar 2011, organizadas por L'Arribada.

Xicu Monteserín es autor de 'Un ermitañu de nome Merlín' (1984) y '¿Xugamos a les cosadielles?' (1986), premiados en el Concurso de Llectures pa rapazos de la Academia la Llingua; también del relato 'Florín, el pescador de ballenes' (1993). En el año 1994 publicó el volumen de poemas 'Nunca caxa d'ágates'.

Se vinculó desde muy pronto al movimiento asturianista, militando en diversos colectivos nacionalistas y siendo uno de los miembros fundadores de la Liga Celta de Asturias. Su primeras cartas aparecen en el boletín de esta asociación celtista, Astor, en el de la Academia de la Llingua, Lletres Asturianes, y en la revista Orbayando, que él mismo codirigió. Fue tesorero de la asociación de Escritores y Traductores en Llingua Asturiana (Etlla).

Fonte: 20 minutos

L'Arribada 2010 entamará n'abril y finará en payares

El primer conceyu de la organización de l’Arribada definió importantes novedaes nel entamu del eventu pa esti añu. En primer llugar, la duración. La edición viniente, que yá ye la quinta, tendrá’l so entamu nel mes d’abril y la fin nel mes de payares, ye dicir, les actividaes de l’Arribada allongaránse demientres 8 meses. Pa ello, dixébrase en trés estayes: Vagamar 2010, Per Asturies 2010 y Rolda 2010.

"Vagamar 2010", que nos sos campos lliterariu y cultural seguirá presentándose como’l noyu de l’Arribada, y onde de continuu y en dellos díes de la segunda metada del mes de setiembre desarróllase un númberu importante d’actos de toa mena, teniendo como sede al Centru Cultura Antiguu Institutu de Xixón.

"Per Asturies 2010", qu’agrandando’l camín abiertu na edición de 2009, valdrá pa entamar xornaes de l’Arribada per otros conceyos d’Asturies,amás del de Xixón que ye’l qu’acueye lo más del calendariu del eventu. Esti añu vuelve a entamase en Villaviciosa y a esti conceyu van añedise dos más, ún del centru d’Asturies y otru de la fastera más occidental de la nuestra comunidá autónoma.

"Rolda 2010", qu’axuntará un conxuntu d’actividaes a facer nel conceyu Xixón, pela rede municipal de centros, n’ateneos culturales, en centros educativos y n’establecimientos collaboradores. Rolda 2010 permitirá desestacionalizar l’amuesa de productos lliterarios y culturales arreyaos a la llingua asturiana, abriendo asina l’*Arribada* a la participación de nuevos colectivos.

Pelo llargo los prósimos díes, l'asociación dirá ufiertando más información sobre les estayes de l’Arribada, en cuantes que vayan iguándose les programaciones.

Fonte: L’Arribada

Entama L'Arribada 2009

El llunes entama una nueva edición de L'Arribada qu'esti añu desendólcase fasta'l 3 d'ochobre con una montonera d'actividaes col programa más ampliu de toles ediciones cellebraes . El llunes va entamar l’Arribada 2009 nel Centru Polivalente de la Plaza Obdulio Fernández, en Villaviciosa, organizáu xunto cola asociación maliaya La Compaña del Ronchel.

L'Arribada d'esti añu entama cola novedá d’entamar les "Arribaes per Asturies", cola primer per Villaviciosa. Ellí, dende les 12:00 hores, van presentase Peñas cantábricas de Rafael Balbín de Villaverde (reedición) y Las fiestas asturianas nuevas formas y viejos ritos de David M. Rivas. La primer comunicación de l'Arribada va ser Dos proyeutos del sieglu XIX: Puertu de Tazones y canalización de la Ría de Villaviciosa de Senén Rivero Cueto. Otres actividaes del llunes son Tazones y la ballena: una semeya con historia nel Muséu del Pueblu d’Asturies y finalmente va facese un Homenaxe a les pescaderes de Tazones.

L’alcuentru lliteraríu cuntará esti añu con homenaxes, tertulies, presentaciones, conferencies, ponencies, teatru, esposiciones, películes...

Del 15 al 30 de setiembre les actividaes fadránse nel Centru de Cultura Antiguu Institutu (CCAI) de Xixón, y del 1 al 3 d’ochobre nel Muséu del Ferrocarril de Xixón.
Les actividaes organizaes pola asociación cultural L’Arribada cunten col sofitu de la Conceyalía de Cultura Tradicional de Xixón, Fundación Municipal de Cultura, Educación y Universidá Popular de Xixón, Ayuntamientu de Villaviciosa, Conseyería de Cultura del Principáu d’Asturies y la Oficina Municipal de la Llingua de Xixón.

Pues afondar na información nel blogue de L’Arribada.