"Tierra" (del grupu Xera): Meyor cantar n'asturianu 2009

El cantar “Tierra”, de los uvieinos Xera foi escoyíu en Mieres como’l meyor n’asturianu del 2009 y sedrá l’encargáu de representar a Asturies nel Festival Liet International.
El xuráu, compuestu pola escritora Sofía Castañón, la cantante Anabel Santiago, el coordinador del Festival Liet International, el frisiu Onno Falkena, que dio un discursu na gala dafechu n'asturianu, los críticos Aurelio Argel y David Serna y la Direutora Xeneral de Política Llingüística, Consuelo Vega, decidió que la fusión de folk y música lletrónica de “Tierra” yera’l meyor cantar del añu.

Ente los finalistes a esti Premiu convocáu pola Conseyería de Cultura y cellebráu nel Auditoriu Teodoro Cuesta de Mieres, taben tamién Brandal, Dixebra, Misiva y Lafu&Rebeca, a los que-y fixo los coros Alfredo González, ganador del añu pasáu. El grupu ganador ñació en Trubia en 2005, y hasta’l momentu tien espublizaos dos discos, en 2006 “Lliendes”, el so discu de debut, y l’añu pasáu ”Tierra”, onde se recueye’l cantar ganador que tamién da títulu al discu. Xera viaxará’l prósimu 20 de payares a Escocia, onde va celebrase una nueva edición del festival de llingües minoritaries Liet International, que cuenta grabar la prestixosa cadena BBC.

Asturies ye la primer comunidá llingüística qu’escueye un representante pal festival.

Fonte: Asturies.com

Población llectora asturiana: 52,9%, más de 2 puntos perbaxo la media estatal

La población llectora mayor de 14 años asitióse l'añu pasáu n'Asturies nun 52,9 %, más de dos puntos perbaxo de la media estatal del 55 %, según los resultaos del Barómetru de vezos de llectura y merca de llibros de la Federación de Gremios d'Editores d'España (FGEE), patrocináu pola Direición Xeneral del Llibru, Archivu y Biblioteques del Ministeriu de Cultura.

Por comunidaes autónomes, Madrid caltiénse como la Comunidá con población más llectora (64,4%) y supera en cuasi diez puntos la media estatal, mientres que Castiella-La Mancha (50,5%), Andalucía (50,2%) y Estremadura (49,4%) zarren la parte baxa de la tabla.
Otres ocho Comunidaes nun llogren algamar en cambiu l'índiz de llectura mediu. Amás de les mentaes (Castilla-La Mancha, Andalucía y Estremadura), trátase de Castiella y Lleón (55,0%), Galicia (54,9%), Comunidá Valenciana (54,6%), Murcia (54,3%) y Asturies (52,9%).

Sobre les obres preferíes, 'El niño con el pijama de rayas', de John Boyne, foi'l llibru más lleíu nel 2009, mientres que Stieg Larsson llidera la clasificación por autor mas lleíu y mercáu.

El barómetru tamién revela que, a nivel estatal, un 55,6% los entrevistaos mercaron llibros nel últimu añu, y d'ellos, un 40,4% mercó llibros non de testu, mientres qu'un 31,7% mercó dalgún llibru de testu. De la mesma manera, el númberu mediu de llibros mercaos n'España nel 2009 foi de 10,5 llibros por persona, colo que se caltién la tendencia de los caberos trés años.

Nel barómetru tamién s'entiende que la tasa de llectores de llibros n'España asitióse nel 55% de la población mayor de 14 años nel 2009, de los que’l 41,3% asegura lleer llibros diaria o selmanalmente, son los llamaos llectores frecuentes, y otru 13,7% son los denomaos llectores ocasionales, que declaren lleer dalguna vegada al mes o al trimestre. Hai que destacar sobre otros años l'aumentu de llectores ente los paraos.

Fonte: Europa Press

Meyor blogue fechu n'asturianu 2009: El Xanu'l Caborniu

Nesta segunda edición, la nuesa bloguesfera decidió que’l meyor blogue en llingua asturiana de tol 2009 ye:

El Xanu’l Caborniu con 59 votos.

En segundu llugar:
la verdá ye mentira con 45 votos.

Y en tercer puestu:
González y González con 36 votos.

Na votación a la meyor estética o meyor diseñu, los blogueros y blogueres en llingua asturiana decidieron que’l ganador seya:
El Xanu’l Caborniu con 8 puntos.

Estos son los resultaos decidíos democráticamente por tola xente que quiso mandar un corréu colos sos votos, dientro les bases de la convocatoria’l meyor blogue de 2009.
Dientro’l II Sidra&Blogues que se cellebrará’l 20 de febreru na Casa los Alberti de Ciañu (Llangréu), de magar les 17 hores, habrá una entrega de premios (simbólica) pa reconocer el trabayu fechu polos blogueros seleicionaos. Ye perimportante que los premiaos verifiquen la so asistencia.

¡Norabona a los premiaos!

Nesta segunda edición de les votaciones al meyor blogue, queremos dar les gracies a tola xente que nos sofitó, participando y espardiendo la idega, a los que vos punxisteis en contautu con nós pa ofrecenos la vuesa ayuda y a los que participasteis activamente. Les votaciones d’esti añu tuvieron entamaes por La Esfoyaza y TrayasgayA cola collaboración de marquinos y González y González.
Milenta gracies.

Fonte: Vota’l meyor blogue fechu n’asturianu

Entama L'Arribada 2009

El llunes entama una nueva edición de L'Arribada qu'esti añu desendólcase fasta'l 3 d'ochobre con una montonera d'actividaes col programa más ampliu de toles ediciones cellebraes . El llunes va entamar l’Arribada 2009 nel Centru Polivalente de la Plaza Obdulio Fernández, en Villaviciosa, organizáu xunto cola asociación maliaya La Compaña del Ronchel.

L'Arribada d'esti añu entama cola novedá d’entamar les "Arribaes per Asturies", cola primer per Villaviciosa. Ellí, dende les 12:00 hores, van presentase Peñas cantábricas de Rafael Balbín de Villaverde (reedición) y Las fiestas asturianas nuevas formas y viejos ritos de David M. Rivas. La primer comunicación de l'Arribada va ser Dos proyeutos del sieglu XIX: Puertu de Tazones y canalización de la Ría de Villaviciosa de Senén Rivero Cueto. Otres actividaes del llunes son Tazones y la ballena: una semeya con historia nel Muséu del Pueblu d’Asturies y finalmente va facese un Homenaxe a les pescaderes de Tazones.

L’alcuentru lliteraríu cuntará esti añu con homenaxes, tertulies, presentaciones, conferencies, ponencies, teatru, esposiciones, películes...

Del 15 al 30 de setiembre les actividaes fadránse nel Centru de Cultura Antiguu Institutu (CCAI) de Xixón, y del 1 al 3 d’ochobre nel Muséu del Ferrocarril de Xixón.
Les actividaes organizaes pola asociación cultural L’Arribada cunten col sofitu de la Conceyalía de Cultura Tradicional de Xixón, Fundación Municipal de Cultura, Educación y Universidá Popular de Xixón, Ayuntamientu de Villaviciosa, Conseyería de Cultura del Principáu d’Asturies y la Oficina Municipal de la Llingua de Xixón.

Pues afondar na información nel blogue de L’Arribada.

Premios de los Concursos 2009 de l'Academia de la Llingua Asturiana

Ayeri tuvo llugar l'actu d’entrega de los premios a los ganadores de los Concursos de l’Academia de la Llingua Asturiana 2009, al tiempu que quedaben convocatos los premios de 2010 y se daba l'anuncia de que cada añu na entrega de los premios van presentase les ediciones de los premiaos nel añu anterior.

Los premios del apartáu de recoyida d'información toponímica, foron un trabayu sobre los topónimos de les parroquies de les parroquies de Zarréu y Degaña, del que ye autor Francisco Javier Redondas Maseda y los áccesit de los trabayos sobre les parroquies de Llatores (Uviéu), fechos por Gabino Arcadio Alonso; Felgueras (L.lena) de Verónica y Raúl Fueyo Alcedo; y La Marea (Piloña), de María Aurina González Nieda.

Lluis Portal Hevia foi'l ganador del Concursu de Llectures pa Rapazos, pol trabayu 'Pelegrinos del abismu'. Mientres, el poemariu tituláu 'Cuando'l mundu debala', del que ye autor Berto García García, ganó'l premiu 'Llorienzu Novo Mier'. Nel apartáu de teatru, ganó la obra titulada 'La fuxida', de la que ye autor Xaviel Vilareyo.

El premiu de recoyida de material lliterario escrito 'Premiu Federico G.-Fierro Botas', onde se dio un accésit de 300 € al trabayu tituláu 'Poesíes asturianes de Carlos de la Concha', de Rafael Rodríguez Valdés, amás d'otros dos a los trabayos titulaos 'Testos asturianos en prosa', de Xosé Lluis Campal y Aurora Sánchez, y al trabayu 'Amuesa de publicidá en llingua asturiana', d'Inaciu Galán.

'El teatru de Pachín de Melás y la crítica del so tiempu', del que ye autor Xosé Lluis Campal Fernández, ye'l ganador de la modalidá d'investigación sobre lliteratura asturiana. Mientres, 'El llobu na tradición oral asturiana', d'Alberto Álvarez Peña, recibió l'áccesit na categoría de recoyida de material oral lliterario.

Dientro de los trabayos d'investigación quedaron ermos los de la categoría de recoyida oral de material léxico, d'investigación llingüística, y los de cómics y curtios cinematográficos n'asturianu.

XXI Conciertu pola Oficialidá

Mañana, sábadu 25 d’abril, nel XXI Conciertu pola Oficialidá, rock y folk son los sones que van enllenar carpa onde la vindicación llingüística entama una folixa pol futuru de la llingua asturiana. Hai pocos festivales de música asturiana que tengan tantos años. El conciertu va llantase nel Campus d'Humanidaes de la Universidá d'Uviéu. Ellí van tar la carpa xigante y los dos escenarios de grandes dimensiones onde van xubir los grupos participantes nesti conciertu, qu'amuesen el so compromisu y sofitu pa cola vindicación d'oficialidá de la llingua asturiana. Los grupos d'esta XXI edición son de lo meyor que se ta faciendo de música n'asturianu. Pela parte folk van tar Tuenda, Los Gatos del Fornu, Felpeyu y La Bandina, y na parte rockera Skama la Rede, Dixebra y Skontra.

Per otru llau, el conciertu va ser el llugar de presentación del nuevu CD compilatoriu de la Xunta pola Defensa de la Llingua Asturiana. Trátase del nuevu discu de Músicos pola Oficialidá pa esti añu 2009 nomáu “Ye lo que nos pasa”.