Xixón aprueba'l Plan de Normalización del asturianu cola astención del PP

• 
  

Tolos partíos voten a favor sacante'l PP que s'astién pol proyectu de llevar la llingua asturiana a les escueles de 0-3

La unanimidá algamada nel Conseyu Asesor, qu'iguó la propuesta que se votó nel plenu, nun se pudo caltener na votación final y el PP desmarcóse cola astención nuna votación na que Foro, Xixón Sí Puede, IU, PSOE y Ciudadanos dieron el sí al Plan de Normalización del asturianu.

El Plan de Normalización Llingüística de Xixón ta conformáu por 68 puntos dividíos en cinco árees, depués de que'l Conseyu Asesor de la Llingua decidiera retirar ún por cuestiones téuniques a pidimientu de la Unión de Comerciantes de Gijón/Xixón.

Fonte: Asturies.com

El Conseyu Asesor de la Llingua de Xixón recibe'l Plan de Normalización

• por Pablo R. Guardado

Esti martes, a les 18.30 hores, ta convocáu'l Conseyu Asesor de la Llingua de Xixón pa debater el borrador del Plan de Normalización Llingüística ellaboráu por una Comisión entamada al efeuto. Si se diera'l preste, ésti pasaría al Plenu pa la so aprobación definitiva.

Tres más d'un mes de trabayu, tal como anunció Asturies.com el pasáu 3 de febreru, dicha Comisión consensuó un testu definitiu que güei va llevase al Conseyu Asesor de la Llingua de Xixón, organismu nel que tán representaos los grupos municipales, l'Academia de la Llingua Asturiana, asociaciones en defensa del idioma, sindicatos, vecinos, hosteleros y otros coleutivos culturales. La reunión ta prevista pa les 18.30 hores na Pescadería Municipal Antigua y nella tamién va informase de la actividá de la Oficina de Normalización Llingüística.

El Proyeutu de Plan de Normalización Llinguística busca sustituyir al del 2008 —que nun se cumplió— y nun trai novedaes destacaes respeuto a ésti. Sicasí, les partes implicaes nel so desendolcu sí muestren optimismu con que'l documentu nuevu lleve la normalización de forma tresversal a toles estayes del conceyu.

Cinco árees

El documentu divídese en cinco árees: sector alministrativu del Conceyu; enseñu y tresmisión xeneracional; sector socioeconómicu; sector sociocultural y deportivu; y medios de comunicación y nueves teunoloxíes. En total son 69 midíes, que van acompañaes colos plazos pa poneles en marches dende yá hasta'l 2019.

Ente elles destaca l'usu de la imaxe corporativa del conceyu de manera billingüe nes dependencies municipales, uniformes y vehículos, asina como na publicidá institucional; el desarrollu de campañes informatives sobre la realidá llingüística de Xixón al personal municipal; l'usu de la toponimia oficial; y el roblamientu de convenios con coleutivos empresariales pa potenciar la llingua, ente otros munchos.

Ún de los aspeutos más importantes del Plan ye'l de la tresmisión xeneracional. Al respeuto'l documentu propón estudiar la creación d'un programa pilotu qu'introduza l'asturianu como llingua vehicular nel ciclu de 0 a 3 años pa les families que lo soliciten, y el potenciamientu de la matrícula na materia de Llingua Asturiana nes escueles del conceyu. Tamién s'inclúi nel documentu'l desendolcu d'una campaña empobinada a a padres y madres, y actividaes d'ociu pa neños y neñes y mocedá.

Fonte: Asturies.com

Xixón peracaba'l borrador del so Plan de Normalización Llingüística

• por Pablo R. Guardado

La selmana pasada Xixón Sí Puede reclamaba l'aplicación del plan nuevu de normalización - Esti plan ta yá nuna fase avanzada pendiente del pasu pol Conseyu Asesor y el plenu del conceyu- El Plan de 2008 incumplióse

Según pudo saber Asturies.com, una Comisión encargada de facer un borrador del Plan lleva trabayando más d'un mes y espérase que nel so conceyu de güei miércoles seya a zarrar una redaición consensuada del borrador del Plan de Normalización Llingüística que sedrá'l primer documentu d'esti tipu aprobáu dempués del que se punxo en funcionamientu en 2006.

Tres de la finalización d'esti borrador, el documentu ha pasar pa la so discusión al Conseyu Asesor de la Llingua, y, darréu, al Plenu nel que tien que ser aprobáu poles fuerces polítiques, polo que s'espera que nel mes qu'entra pueda peracabase tol ciclu y entamar tolo más en marzu coles aiciones previstes nun documentu qu'ha tar en vigor hasta 2019.

Nos últimos meses esta Comisión de Trabayu creada pol Conseyu Asesor de la Llingua Xixón, y na que participen representantes de grupos políticos y d'asociaciones en defensa del idioma, ta trabayando les propuestes que tien enriba de la mesa, pa iguar un documentu que lleve la normalización de forma tresversal a toles estayes del conceyu.

El Plan de 2008

Les organizaciones de defensa del idioma foron especialmente crítiques coles aplicación del Plan de 2008, que s'incumplió na mayoría de les sos previsiones. Amás yá a final de 2006 la falta d'implicación del equipu de gobiernu -daquella compuestu por IU-BA y PSOE- na política llingüistica llevó a tolos miembros del conseyu asesor de la llingua a la so dimisión en bloque.

Fonte: Asturies.com

Iniciativa pol Asturianu esixe al Conceyu de Xixón qu’use’l topónimu oficial de la ciudá

Iniciativa pol Asturianu vieno acabante de pedir al Ayuntamientu de Xixón qu’emplegue, como Ciudá Europea del Deporte 2016, el nome oficial de la ciudá dende l’añu 2006, que foi cuando l’ayuntamientu de Xixón aprobó la denomación billingüe Gijón/Xixón.L’Asociación de Capitales Europeas del Deporte (ACES Europe) concedió a Xixón la distinción de Ciudá Europea del Deporte 2016.  Y pa Iniciativa pol Asturianu, “ye perbona noticia qu’esta ciudá esfrute’l títulu y faiga actividaes pa fomentar ente los xixoneses el deporte”.

Pero, “esti privilexu ye amás un mou d’amosar Xixón a Europa y al mundu, los sos requexos y la so cultura. Ye por eso que camentamos qu’había tenese en cuenta’l que ye’l nome oficial de la ciudá dende l’añu 2006, que foi cuando l’ayuntamientu de Xixón aprobó la denomación billingüe Gijón/Xixón”. El nome, a parte de ser l’oficial, ye vehículu de la cultura de los sos habitantes.

Nel añu 2014 la ciudá europea del deporte foi Cardiff/Caerdydd, otra ciudá na que se falen dos llingües y na que tolos cartelos al rodiu d’esta cuestión tuvieron fechos en billingüe: inglés y galés, esto ye, nun s’usaron solo los topónimos nes dos llingües, sinon que los cartelos taben escritos en dambes. Nestos casos, sigún relata Iniciativa nun comunicáu asoleyáu esti día “ye cuando hai qu’amosar el compromisu col asturianu y usalu normalmente; les promeses yá tán feches, agora falta tomar midíes. Xixón recibió yá en 2010 un campeonatu d’España de duatlon nel que s’incluyó non solo la toponimia oficial, sinón tamién l’usu del asturianu”.

Dende Iniciativa pol Asturianu, denuncien l’usu incorrectu del topónimu nes actividaes y na propaganda que se ta faciendo pa los actos organizaos al rodiu d’esti eventu y esixen “l’usu de la toponimia oficial en tolos ámbetos de la so organización como símbolu de la llegalidá, del respetu a les sensibilidaes qu’esisten na ciudá per parte de los habitantes pa col asturianu y como muestra de la riqueza cultural d’Asturies y de Xixón. Amás, pidimos qu’esta ciudá amuese sensibilidá y compromisu dafechu col asturianu, llingua de los xixoneses, y que faiga un usu normal del asturianu nos cartelos y dientro de los actos que s’organicen venceyaos a Xixón como la ciudá europea del deporte 2016″.

Fonte: Asturnews

Un monolitu recuerda a Mánfer de la Llera nel parque de Xixón que lleva’l so nome

por Pablo R. Guardado

“Ye’l meyor exemplu pa los nenos que van xugar nél”, afirmó l’alcaldesa de Xixón Carmen Moriyón, qu'emplegó l'asturianu na so intervención. La zona verde ta en Pumarín, ente les cais València y Baleares, y l’avenida Schulz.

Un añu depués de que la xunta de gobiernu, a pidimientu de l’Asociación de Vecinos Severo Ochoa –de la que foi presidente–, decidiera dar el nome de Parque Mánfer de la Llera a esti llugar de Pumarín, el Conceyu de Xixón entamó un homenaxe a esti “mineru, escritor y home comprometíu colos sos conciudadanos”, como reza’l monolitu destapáu esta mañana n’honor a Manuel d’Andrés Fernández (Ciañu, 1918; Xixón, 2005). Nella participó l’alcaldesa de Xixón, Carmen Moriyón, que tuvo acompañada de conceyales de dellos grupos municipales, familiares y amigos del homenaxáu y vecinos del barriu. Ente los asistentes, personalidaes destacaes de la cultura asturiana, como Vicente García Oliva, Xuan Xosé Sánchez Vicente, Humberto Gonzali o Xosé Nel Riesgo, direutor de la Fundación Municipal de Cultura, Educación y Universidá Popular, ente otros.

La primera en tomar la pallabra foi Moriyón, arrodiada por Clementina d’Andrés, hermana de Mánfer de la Llera, amás de los fíos del escritor Ramón, Vital y Efrén, que tuvo acompañáu pol so fíu Óscar. L’alcaldesa refirióse al de Ciañu como “un gran escritor y meyor persona; una persona cabal”, del qu’emponderó’l “respetu y compromisu pa colos drechos ciudadanos. El mesmu respetu y el mesmu compromisu que dende bien neñu contraxo con Asturies, col so paisaxe, cola so cultura y, sobre manera, cola so llingua”.

Darréu recordó cómo Mánfer de la Llera llegó a Xixón nel 1964 “al entós recién estrenáu barriu de les 1.500, un barriu modernu y d’abonda guapura, como él mesmu describe nel poema ‘Pumarín”, y cómo participó nel movimientu vecinal impulsando la creación de l’Asociación de Vecinos Severo Ochoa. Tres la so xubilación de la mina nel 1967 por silicosis, “nun pasen dos años cuando se compromete col movimientu de pensionistes del que foi militante activu, primeru na clandistinidá y llueu en democracia”, apuntó Moriyón, que puntualizó que’l mayor compromisu d’él “foi la familia que formó con Celia nel 1946”.

Por último, l’alcaldesa aseguró que-y prestaría poder conocer “al pá, al vecín, al amigu… Al home que supo guiar la so vida con un sentíu de compromisu y tolerancia”, y apuntó que’l nome de Mánfer de la Llera “ye’l meyor nome pa esti parque, porque ye’l meyor exemplu pa los nenos que van disfrutar d’él”.

Un home mui activu y solidariu

En nome de la familia tomó la pallabra Efrén, responsable de les viñetes d’Asturies.com, que quixo agradecer “mui fondamente a l’asociación de vecinos y al Conceyu de Xixón esti homenaxe al nuesu padre” Mánfer de la Llera, “un asturianu de Ciañu, Llangréu, mineru de profesión, pero que nun se dedicaba sólo a trabayar na mina y a mantener una familia, sinón que facía actividaes mui diverses: cultivar la lliteratura en llingua asturiana y trabayar pola so dignificación; lluchar pola dignidá de los pensionistes y xubilaos; esparder la cultura nos ámbitos populares y obreros; y tamién trabayar por ameyorar les condiciones de vida del barriu de la Pumarín y la so xente”.

Efrén recordó la situación de Pumarín cuando la so familia aportó a Xixón, un barriu “modernu que salía nes postales de Xixón”, pero con munches deficiencies que Mánfer de la Llera denunciaba na prensa llocal “nes sos cróniques y nes sos xestiones”. Yera “un namoráu del barriu de Pumarín, al que dedicó dalgunos poemes y escritos”, cola circunstancia de que’l parque qu’agora lleva’l so nome “yera de los sitios de Pumarín que más-y prestaben”. Asina, el monolitu instaláu nel parque tien el fragmentu d’un poema “inspiráu parcialmente nesti parque”, que lleó íntegramente Vital d’Andrés.  

Pa zarrar l’actu, Vital destacó qu’espera “qu’esti parque sirva como homenaxe non sólo a Mánfer de la Llera, como símbolu d’un barriu que buscaba la so dignidá tanto no urbanístico como no social y no cultural, sinón tamién a toos aquellos que, como él, llucharon y s’esmolieron polos barrios de Xixón”.

Na semeya, Ramón y Efrén destapen el monolitu dedicáu al so padre. A la drecha, Clementina y Vital.

Fonte: Asturies.com

Xixón robla un alcuerdu cola ALLA pa siguir col estudiu de la toponimia menor del conceyu

El Conceyal d’Educación y Cultura de Xixón, Carlos Rubiera, robló un alcuerdu xunto a Ana Cano, presidenta de l’Academia de la Llingua Asturiana, pol que’l Conceyu de Xixón se compromete a entrega-y una partida de 3.000 euros a la institución llingüística, que va revisar los estudios de la toponimia de les parroquies que ta estudiando personal dependiente de la conceyalía y proceder darréu al so asoleyamientu dientro de la so coleición de cartafueyos de toponimia, onde yá tienen dellos volúmenes dedicaos al conceyu xixoniegu. Esti alcuerdu llega selmanes dempués de que'l llider d'Izquierda Xunida en Xixón, Jorge Espina, criticará la inaición del conceyal de Foru, Carlos Rubiera, na so responsabilidá como conceyal del que dependen les competencies de Política Llingüística. Fonte: Asturnews

Abiertu'l plazu pa presentar ensayos al VI Premiu Fierro-Botas

El concursu convócalu'l Conceyu de Xixón al traviés de la Conceyalía d'Educación, Cultura, Xuventú y Fiestes. L'almisión d'orixinales acaba'l día 13 de setiembre de 2013 inclusive. Concederáse un premiu de 3.000 € y la publicación del ensayu. Pue participase con obres d’ensayu o trabayos d’investigación nos que se recueyan los siguientes ámbitos: investigación sobre la cultura asturiana; investigación sobre la cultura rusa o eslava; la memoria social y colectiva de los pueblos rusu y asturianu; la memoria social y colectiva de Xixón. Más información: Bases completes del concursu Fonte: Asturnews

L'Arribada respuende a les acusaciones del PSOE poles contrataciones pal Festival Arcu Atlánticu

L'asociación L'Arribada respuende a les acusaciones del PSOE de Xixón, feches al traviés del ex conceyal de Cultura Justo Vilabrille, que venceyó la contratación d'esta asociación per parte de Carlos Rubiera, actual conceyal de Cultura, pa la organización de delles actividaes dientro del Festival Arcu Atlánticu, que va celebrase en xunetu na ciudá, a la presencia d'Humberto Gonzali na xunta rectora de la Fundación Municipal de Cultura.
Esti ye'l testu completu unviáu por L'Arribada:
PROTESTA DE L’ASOCIACIÓN CULTURAL L’ARRIBADA ANTE L’ATAQUE DEL CONCEYAL JUSTO VILABRILLE LINARES
Ante les declaraciones llamentables y malintencionaes del conceyal socialista nel Ayuntamientu de Xixón, Justo Vilabrille Linares, referíes al venideru Festival Arcu Atlánticu, onde se cita a l’Asociación Cultural L’Arribada, queremos facer delles puntualizaciones.
L’Arribada nun ta venceyada a nengún partíu políticu. Na so directiva hai votantes de toles sensibilidaes ideolóxiques presentes n’Asturies. Per otra parte, nel desarrollu de les nuestres propuestes siempres tuvo escluyíu cualaquier tipu de sectarismu, lo que por desgracia nun yera la norma pa ciertos eventos “culturales” bien cercanos a la ideoloxía d’anteriores equipos de gobiernu municipal. L’Arribada considera mui grave que’l señor Vilabrille fale d’axudicaciones a déu suxiriendo escures trames y tratos a favor, cuando ye persabío por tola ciudadanía xixonesa que, él, en siendo conceyal de cultura, foi integrante d’un equipu de gobiernu municipal que, ésti SÍ, axudicara a déu decenes de miles d’euros a dalgunes asociaciones por toos conocíes y que se movíen dafechamente na órbita ideolóxica del so partíu. Igualmente, deseyamos precisar que naide de L’Arribada va percibir nengún euru de los 5880 que xestionará la nuestra entidá nel Festival Arcu Atlánciu.
L’Arribada quier recorda-y al señor Vilabrille lo qu’él bien conoz de cuantayá, que’l ciudadanu Humberto Gonzali nun ye dende va años miembru de la nuestra asociación, y que la so collaboración como moderador o presentador en delles actividaes fízose siempres ensin recibir remuneración de nengún tipu, dándose’l casu de qu’Humberto Gonzali tien aportao en toles ediciones dineru del so bolsillu pa completar el presupuestu añal de la nuestra programación. Y decimos que’l conceyal Justo Vilabrille conoz de primera mano esto de lo que facemos alcordanza porque él, en reiteraes ocasiones, participó n’actos de L’Arribada de mou mui activu, comprobando de primera mano’l nuestru calter abiertu, plural, non sectariu y alloñáu de toa vinculación partidaria, calter que tien allabao, polo que resulten pa nós más incompresibles ya inaceptables les sos palabres.
L’Arribada considera que’l posicionamientu d’esti representante socialista dista muncho de ser democráticu, pues incide una vegada más nel ataque y despreciu a entidaes asturianistes; ataque y despreciu que se sofrió per décades en Xixón, conceyu onde hasta va poco se premiaba descaradamente a asociaciones afines al partíu del señor Vilabrille mientres, al empar, decenes d’otres asociaciones xixoneses de xeitu asturianu malapenes recibíen les migayes que la política cultural d’aquel entós tenía a bien dar.
L’Arribada nun ve de recibu l’actitú politizada y antiasturiana del conceyal Justo Vilabrille Linares amosada na so intervención d’esta mañana. Esperamos que con ella nun s’abra un camín involucionista promovíu pola fuerza política que lu designó como miembru dela Xunta Rectora de la Fundación Municipal de Cultura. L’enrarecimientu de les relaciones culturales que se ta dando na ciudá nos últimos tiempos fainos ser pesimistes pero, con tou y con ello, aguardamos que’l sentíu común y l’espíritu democráticu torne a allugase nes tiestes responsables d’esta agresión contra la nuestra asociación y contra la lliteratura y la cultura asturianes.

Fonte: asturnews, l'Arribada

más info asturies.com