La llingua protagonizó’l Día d’Asturies en Twitter

Más de 700 mil persones lleeron los 1500 tuits que xeneró en total la campaña #AsturiesNasturianu que desenvolvió Iniciativa pel Asturianu coincidiendo col Día d’Asturies.

La campaña propuesta por Iniciativa pol Asturianu p’animar a la xente a usar l’asturianu nel Día d’Asturies y asina quitar prexuicios pa siguir faciéndolo’l restu l’añu y da-y presencia digna al idioma nun día nel que’l Gobiernu d’Asturies tamién-y la niega, xeneró más de 1.500 tuits cola etiqueta o hashtag #AsturiesNasturianu a lo llargo de tola xornada, lo que fizo que más de 700.000 persones vieren tuits escritos n’asturianu.

La organización Iniciativa pol Asturianu amosó’l so contentu pol resultáu d’esta campaña viral que consiguió convertise nuna de les más actives a lo llargo del Día d’Asturies con un total de más de 2.477.000 impautos.

Fonte: Asturnews

Asturies va celebrar el Día de la Nación Asturiana con actos per tol país

   Esti martes ye 8 de setiembre, xornada na que se celebra'l Día de la Nación Asturiana. La Llegra, Podemos, IX y el PAS entamen actos. Colunga acueye les actividaes qu’organiza’l Gobiernu.

   Baxo’l paragües de ‘Lluchando pola soberanía’, La Llegra torna a apostar por axuntar un bloque soberanista pa esti 8 de setiembre. “Frente a la parafernalia gubernamental, autocomplaciente y afitada en falsos rellatos como’l Cuadonguismu, vemos qu’otru 8 de Setiembre más faise imprescindible salir a la cai a reivindicar que nesta Asturies, poco o nada hai que cellebrar, y sí muncho que siguir construyendo a comuña, nesa pernecesaria visión alternativa d’Asturies cola que valtiar les problemátiques que mos afecten”, espliquen na convocatoria.

   La crisis, la perda de población, la sumisión a Madrid y Bruxeles, la defensa de los derechos llaborales, llingüísticos y de la muyer, y la necesidá de polítiques sociales reales son dalgunes de los temes que toquen les reivindicaciones d’esta xornada. “Puxamos, polo tanto, por superar un sistema capitalista que, sirviéndose les sos ferramientes estatales y supraestatales, niega al nuesu pueblu’l mandu de la economía, de los recursos naturales, de les polítiques sociales a desarrollar, de cómo rellacionanos con otros pueblos: en definitiva, niega la construcción d’un futuru dignu pa les clases populares de la nuesa nación”, afirmen.

   La concentración d’Uviéu va tener como sede’l Paséu Los Álamos a les 12.30 hores. Mentes, a les 14 hores, van desendolcase xuegos tradicionales, actuaciones musicales y una xinta popular na plaza’l Paragües. Esta convocatoria cuenta col sofitu de Darréu, Xunta Estudiantil Asturiana, Corriente Sindical d’Izquierda (CSI), Conceyu Abiertu y Andecha Astur.

Monedero y Teresa Rodríguez, nel Pueblu d’Asturies        Una folixa popular, entamada por dellos coleutivos políticos y sociales, ente ellos Podemos, va ser la principal novedá d’esti Día de la Nación Asturiana. Va tener como sede’l Muséu del Pueblu d’Asturies y va contar cola presencia como convidaos del politólogu Juan Carlos Monedero y de la vocera de Podemos Andalucía, Teresa Rodríguez. Dambos van participar nuna mesa redonda, de nome ‘De qué hablamos cuando hablamos de unidad popular’, prevista pa les 13.30 hores na que tamién tán confirmaos Dani Ripa, secretariu xeneral de Podemos Asturies; Marcos Muñiz, d’Asturies pola Unidá; y Rosa Martínez, covocera federal d’EQUO. Modera l’eventu Eva Fernández, vicepresidenta de la Sociedá Cultural Xixonesa.

   A les 16.30 hores, ta prevista otra mesa redonda, nesta ocasión centrada na ‘Cultura y política en tiempos de cambio’, cola presencia de David Acera, de SOS Cultura; José Manuel Sande, conceyal de Cultura d’A Coruña; Jorge Lago, coordinador del Instituto 25M; y Orlando Fernández, conceyal de Xixón Sí Puede. La moderación va correr a cargu de la editora Silvia Cosío.

   L’actu central de la folixa popular va desendolcase a les 18 hores y va tener como presentadores a Xune Elipe y Penélope Miranda. Nél van intervenir Monedero y Teresa Rodríguez, amás del diputáu Emilio León, el conceyal de Xixón Sí Puede Mario Fueyo y la edil de Somos Uviéu Ana Taboada. Darréu va celebrase un conciertu (19 hores) coles actuaciones de Felpeyu, Rodrigo Cuevas y Truequedart.

   Otra manera, l’actividá nel Pueblu d’Asturies va principiar al meudía y va contar con un mercáu del llibru, discu, artesanía y productos ecolóxicos, amás de talleres infantiles, presentaciones, música y una xinta popular prevista pa les 15 hores, ente otres actividaes.

Actuación de Nuberu en Cangues d’Onís     Como ye vezu, Izquierda Xunida (IX) tamién va celebrar el Día d’Asturies con un actu políticu, nel que va tar otru añu más el coordinador federal Cayo Lara. Presentáu pol área ‘Faciendo país’, nesta ocasión va tener como sede Cangues d’Onís, en concreto la finca Villa María, y nél tamién van participar Leticia de Nava y el coordinador d’IX Asturies, Manuel González Orviz.

   Tres les intervenciones polítiques, previstes pa les 13 hores, va celebrase una xinta (15) y va actuar Nuberu (16.30 hores). IX pon autocares pa toles persones interesaes n’acudir a esta cita dende Avilés, Xixón, Uviéu, Mieres, Llangréu y L’Entregu.

Homenaxe floral a Pelayo            El Partíu Asturianista (PAS) tamién caltién les sos costumes pa esta xornada y va facer un homenaxe floral a Pelayo, “fundador del Estáu asturianu’, na estatua que tien llevantada en Xixón. Va ser a les 12.30 hores, pa depués celebrar una xinta de xeremandía.

   D’igual forma, la formación afala a tolos asturianos a sacar la so bandera del país nos sos balcones y ventanes pa celebrar esti día.

La folixa entamada pol Gobiernu, en Colunga         Los productos artesanos, el deporte y la cultura tradicional son los protagonistes de les actividaes programaes pol Gobiernu pal Día de la Nación Asturiana, qu’esti añu tien como sede Colunga. Éstes van principiar a les 17 hores de güei, cola apertura del Mercáu Tradicional y la Feria de Productos Artesanos, que s’ubicará na plaza del Monumentu, la cai Doctor Grande Covián y la redolada de la plaza d’Abastos, onde tamién va asisitase la I Feria del Comerciu.

   Los Xardinos Tomás Montoto van acoyer conciertos de tonada güei (18 hores) y mañana (16.30 hores), día nel que tamién va actuar el Coro Marinero Manín de Llastres (19.30 hores). Danny Daniel va xubir al escenariu instaláu na avenída del Sueve a les 21 hores d’esta nueche, pa depués dar pasu Alberto & García (23 hores). Mentes, mañana va ser el turnu de Xuacu Amieva (20.30 hores) y Bueno (22 hores).

   Pa facilitar l’asistencia de ciudadanos van ponese autobuses llanzadera ente Colunga y Llatres, con paraes na playa de La Griega y el Muséu del Xurásicu d’Asturies. Éstos van tar disponibles dende les 16.30 hores, güei, y dende les 10.30 hores, mañana.
Fonte: asturies.com

Adxuntu	Tamañu
Cartelu Lluchando pola Soberanía.jpg	113.43 KB
Programa Folixa Popular del 8-S.jpg	69.25 KB
Cartelu actividá d'Izquierda Xunida pal 8-S.jpg	47.43 KB
Programa Día d'Asturies en Colunga.pdf	2.05 MB

Demanen que la Diada d'Astúries marqui l'inici d'una política lingüística més ambiciosa amb l'asturià

La Junta per la Defensa de la Llengua celebra que l'acord PSOE-IU de juliol parli de "normalització" de la llengua · L'entitat considera que la Diada és un bon moment per a demostrar un canvi envers l'impuls públic de l'asturià · L'Acadèmia de la Llengua Asturiana presentarà aquest setembre una "proposta concreta" per a l'oficialitat

La Junta per la Defensa de la Llengua Asturiana (XDLA, sigles en asturià) vol que la Diada d'Astúries, que se celebra el 8 de setembre, marqui "l'inici d'una política lingüística nova" en aquell país. La Junta considera que els compromisos a favor de l'asturià continguts en l'acord de govern entre el PSOE i Esquerra Unida poden ser la base per a l'assoliment d'avanços per a la llengua pròpia d'Astúries.

L'acord es va signar el juliol passat i va possibilitar la formació d'un nou govern a Astúries, presidit per Javier Fernández (PSOE). Al document, els dos partits van admetre que tenen "discrepàncies importants" sobre l'estatus legal de l'asturià. Esquerra Unida considera que la llengua hauria de ser oficial, mentre que el PSOE s'hi oposa.

Malgrat això, els dos partits van apuntar a la creació d'una comissió d'estudi sobre "el règim de protecció de l'asturià i les seves diferents alternatives". Com a mesures concretes, PSOE i IU van dir que "reforçaran la implantació, normalització i difusió" de la llengua a l'administració, els mitjans de comunicació i l'escola i que "milloraran el finançament de l'Acadèmia de la Llengua Asturiana".

"Sembla que s'assumeix la paraula 'normalització' -en lloc de la 'protecció' que ha valgut de poc- a banda de parlar de la visibilitat de l'idioma en els actes públics i la seva presència als mitjans", valora positivament la XDLA en un comunicat. L'organització reclama que això es comenci a notar durant la Diada d'Astúries: "Si de debò es vol normalitzar, si de debò hi ha un canvi, ha d'haver-hi una discriminació positiva cap a la llengua que, de moment, no és d'ús normal. I aquest és el cas de l'asturià".

L'Acadèmia de la Llengua Asturiana (ALLA), per la seva banda, va emetre en juliol un comunicat molt crític amb l'acord entre el PSOE i IU. Segons l'ALLA, el pacte és "una nova oportunitat perduda" per a atorgar l'oficialitat a l'idioma i per a igualar els drets lingüístics dels asturianoparlants amb els dels castellanoparlants. L'Acadèmia va avançar llavors que aquest setembre traslladarà a totes les forces polítiques parlamentàries una "proposa concreta d'oficialitat" per a l'asturià.

(Imatge: manifestació a favor de l'oficialitat de l'asturià / imatge: vsuarezp.)

Fonte: Nationalia

La XDLA pide que’l Día d’Asturies sía l’aniciu d’una visibilidá nueva pal idioma

 

La XDLA pidía esti vienres que’l Día d’Asturies sía l’aniciu d’una visibilidá nueva pal idioma que quede afitada nel usu na publicidá de la xornada, l’apueste pola industria cultural nes actividaes y la presencia del idioma dientro de la programación de RTPA, cuestiones toes elles que “tienen de ser claves nesta xornada tan simbólica”.

Dientro de poques selmanes, va celebrase’l día grande d’Asturies ypala Xunta Pola ésta ye “una fecha que tendría que tar marcada pol emponderamientu de la nuestra realidá llingüística y cultural. Dexando de llau’l conteníu políticu que tendría o podría tener esta xornada, la fiesta itinerante del Día d’Asturies -qu’esti añu va celebrase en Colunga- acueye muestres d’oficios y deportes tradicionales o de la gastronomía del país, dalgo qu’a la fin ye un exemplu más de la nuestra cultura”. Sicasí, amás de too esto, la Xunta pola Defensa de la Llingua Asturiana (XDLA) opina qu’esta fecha tien que ser “la que marque l’aniciu de la política llingüística nueva del Executivu autonómicu, onde parez que s’asume la palabra normalización -en cuentes de la protección que pa poco valió-, amás de falar de la visibilidá del idioma nos actos públicos y la so presencia nos medios de comunicación”.

Asina, na opinión de la organización de defensa de la llingua, “los actos del Día d’Asturies tienen que tener como protagonistes principales a la xente que trabaya pola cultura d’esta tierra, dexando de llau les “grandes estrelles” de la música española que poco o nada tienen que ver cola celebración. La cartelería y propaganda tamién tienen qu’usar l’asturianu, pero non como una llingua de segunda. Y ye qu’estos años vimos cómo l’asturianu aparez de forma menos visible que’l castellanu, mentes que les promociones nos medios de comunicación son namás en castellanu, nun agraviu comparativu claru hacia la llingua asturiana. Si de verdá se quier normalizar, si de verdá hai un cambiu, tien qu’haber una discriminación positiva hacia la llingua que, de momentu, nun ye d’usu normal. Y esi ye’l casu del asturianu”.

Nesi mesmu sentíu, pa la XDLA ye bien importante visibilizar al máximu la Feria del Llibru y del Discu n’Asturianu, una actividá que permite comprobar la calidá y cantidá de la industria cultural n’asturianu. Y ello, porque nesti sector xenérase emplegu y actividá económica: “Y ye que la llingua asturiana tamién ye una industria que da trabayu a cientos de persones de manera directa o indirecta. Los sectores que trabayen nos diferentes aspectos de la cultura son fundamentales p’asegurar el futuru mesmu d’Asturies, motivu principal pa festexar una xornada como’l Día d’Asturies·.

Per otru llau, nos últimos tiempos vien falándose de dar un reblagu a la presencia del idioma na RTPA y la XDLA quier dexar bien claro que “nos puntos recoyíos nel alcuerdu sobre política llingüística, hai un específicu sobre la RTPA que fala de medrar la presencia de la llingua y la cultura asturiana na programación“. Nesi sentíu, amás, la XDLA recuerda “l’éxitu d’audiencia de les dos películes doblaes al nuestru idioma que s’emitieron el Día d’Asturies pasáu. Amás, esi día la cadena tuvo un 30% de la programación n’asturianu”·. Sicasí, anque la emisión de doblaxes parecía convertise nun clásicu d’esa xornada, “llevamos meses ensin saber de más proyectos. Tampoco nun se sabe nada del apoyu de TPA a la industria audiovisual a pesar de los munchos curtiumetraxes y documentales rodaos n’asturianu y que, de momentu, nun s’emitieron na cadena. Queremos recordar que si se fala de potenciar l’usu del idioma na RTPA, los pasos tienen que ser hacia alantre; nun se puen dar pasos atrás. Ye hora que dexen de llau los sos complexos d’inferioridá y se comprometan con una televisión que de verdá pueda llamase asturiana“.

Fonte: Asturnews

Les emisiones n’asturianu en TPA del Día d’Asturies tuvieron bonos datos d’audiencia

por Pablo R. Guardado

Un 6,2 por cientu y un 6,1 por cientu de cuota de pantalla algamaron la redifusión de ‘El rostru impenetrable’ y la emisión de ‘Greystoke, la lleenda de Tarzán’, de manera respeutiva, en TPA’l 8 de setiembre, datos superiores a la media de la canal. La XDLA recuerda la necesidá de cuidar la calidá llingüística de los productos.

La yá histórica película de Marlon Brando doblada por Gonzali Producciones volvió a ser un ésitu d’audiencia na so tercer emisión tres la so estrena les Navidaes pasaes pesie a competir nesta ocasión cola final d’etapa de La Vuelta en La Farrapona. Mentes, la producción sobre Tarzán tornada al asturianu por Vacaloria Producciones –mesma empresa responsable del doblaxe de ‘Os Bolechas– rexistró tamién unos bonos datos pesie a coincidir cola estrena de temporada de productos bien conocíos de televisiones de calter estatal, como ‘El chiringuito de Pepe’ (Telecinco), ‘Isabel’ (TVE) o ‘Top Chef’ (Antena 3). Según los datos fechos públicos pola Xunta pola Defensa de la Llingua Asturiana (XDLA), dambes películes superaron la media de la canal, “que ye del 6 por cientu”, y a otros productos de ficción de TPA n’asturianu emitíos na fin de selmana, que tuvieron una media del 3,8 por cientu. “Asina, queda demostrao a les clares la demanda social y l’ésitu d’audiencia que supón la emisión de producción ayena doblada al asturianu”, apunten dende’l coleutivu cívicu, que recuerda que “independientemente de los datos, RTPA tien la obligación llegal d’emitir programación n’asturianu y ser un axente activu nel procesu de normalización del nuestru idioma. Amás, nun se pue dexar de llau la importancia económica que tienen estos productos al convertise nun revulsivu pal texíu audiovisual del país, ún de los motivos polos que se punxo en marcha RTPA”.

Sicasí, la XDLA quier poner la voz d’alarma nun asuntu bien importante, como ye’l cuidáu de la calidá llingüística: “Depués de ver el doblaxe de les dos películes y conocida la noticia d'un proyeutu de programa infantil dobláu al asturianu, la XDLA quier volver recordar la necesidá d'un mayor control sobre la calidá llingüística de los productos. Ye imprescindible que les traducciones tean en manes de persones o equipos con una esperiencia y conocimientu contrastaos. El modelu llingüísticu tien que ser natural y non rebuscáu, pero tamién los actores tienen que saber pronunciar bien lo que tán dramatizando. Pa eso ye fundamental que la supervisión del guión, amás de ser efectiva nel papel, siga tamién na sala de doblaxe, controlando que nun se dean por bones tomes onde haiga errores na pronunciación o onde s'escapen castellanismos. Estos primeros pasos del doblaxe teníen que disponer non solo d'un equipu filolóxicu asesor sinón d'abondos medios económicos pa que'l productu final tenga toles garantíes”.

30 por cientu del total de la programación

La XDLA tamién quier felicitar a RTPA pola iniciativa d’emitir más de cuatro hores de ficción en llingua asturiana, más nuna xornada tan marcada como’l Día d’Asturies, lo que supunxo un 30 por cientu del total de la programación de la TPA’l 8 de setiembre, “dalgo ensin precedentes na historia” de la canal, si sumamos otros espacios nel nuesu idioma. D’igual forma, recuerda a la direición del ente públicu de comunicación que “esti 8 de setiembre demostró qu’una cadena comprometida col idioma y la cultura d’esti país ye posible y, amás, tien ésitu, polo que ye hora de que dexen de llau los sos complexos d’inferioridá y se comprometan con una televisión que de verdá puea llamase asturiana”.

Fonte: Asturies.com

Iniciativa pol Asturianu denuncia que'l Gobiernu escuende la llingua nel Día d'Asturies

Iniciativa pol Asturianu llamenta la vergoñosa presencia del asturianu nos actos de celebración d’esti día

Iniciativa pol Asturianu quier amosar el so refugu al tratu discriminatoriu al idioma asturianu que ta acabante recibir tres asoleyase’l cartelu del Día d’Asturies entamáu pol Gobiernu del Principáu.

La celebración oficial del Día d’Asturies, qu’esti añu sedrá en Candás, cunta con un cartelu promocional onde l’asturianu, pese a tar presente, figura de manera ñidiamente marxinal, con una fonte de muncho menor tamañu y d’un color perclaru que dificulta a les clares la so llexibilidá, mentanto que la información en llingua castellana ye bien visible en tamañu y color. Paez que’l Gobiernu d’Asturies quixere esconder la llingua asturiana, en llugar d’amosala con arguyu nun día como esti, qu’habría ser de celebración de lo propio.

Iniciativa pol Asturianu quier asina denunciar que ye responsabilidá del Gobiernu del Principáu d’Asturies non solo l’usu normalizáu del idioma nos sos actos oficiales, sinón evitar que la so presencia seya arrequexada o aneudótica. Poro, pidi al Gobiernu del Principáu qu’esti seya l’últimu añu nel que l’asturianu nun seya protagonista de los actos, y la futura presencia de la información en llingua asturiana con, pelo menos, la mesma visibilidá que la información en castellán. Una políticia qu’habría siguise tol añu, pero que manca especialmente cuando se fai en día tan importantes p’Asturies y pa la divulgación de la nuesa cultura y llingua, como esti.

Iniciativa pol Asturianu quier aprovechar esti día p’animar a los asturianos y asturianes a reflexonar sobre’l futuru del idioma, que tien la so meyor política de normalización en que los propios ciudadanos usen la so llingua en tolos ámbitos de la vida, con normalidá y arguyu. Nun podemos dexar de felicitar el Día d’Asturies a tolos asturianos, colos meyores deseos y esperando que seya un día que sirva pa la recuperación del autoestima de la nuesa sociedá sobre los sos propios elementos identitarios, que tienen a la llingua asturiana como la so canal d’espresión.

Fonte: Iniciativa pol Asturianu

La XDLA critica l'ausencia de la Feria del Llibru y el Discu n'Asturianu el Día d'Asturies

La XDLA critica que nun se celebre la Feria del Llibru y el Discu n'Asturianu esti 8-S.

La Xunta pola Defensa de la Llingua Asturiana emitió esti vienres, 7 de setiembre, un comunicáu onde critica que les celebraciones del Día d'Asturies «dexen de llau» la industria cultural n'asturianu al nun programase, dientro de los actos entamaos pol Gobiernu, la Feria del Llibru y el Discu n'Asturianu, «una actividá que da aire a un sector que xenera bien de puestos de trabayu y mueve la economía».


La organización en defensa de los derechos llingüísticos considera que'l 8 de setiembre habría ser una fecha «marcada pol emponderamientu de les nuestres tradiciones y la nuestra identidá». Acordies con esto, la folixa itinerante del Día d'Asturies, qu'esti añu acueye'l conceyu de Tinéu, inclúi muestres d'oficios y deportes tradicionales, amás de la gastronomía y los productos agroalimentarios del país, exemplos, pa la XDLA, «de la nuestra cultura y la nuestra forma de ser».

Otros aspectos positivos de les celebraciones que destaca la XDLA son el protagonismu de los grupos asturianos na estaya musical de la fiesta –frente a les «grandes estrelles de la música española, que poco o nada teníen que ver cola celebración» y que se contrataben otros años– o la cartelería billingüe –dalgo onde la organización ve espeyáu'l trabayu del movimientu de reivindicación llingüística–.

Por too ello, la tacha principal que la Xunta pola defensa de la Llingua Asturiana fai al programa oficial ye qu'esti añu nun se celebre la Feria del Llibru y del Discu n’Asturianu, una actividá que permitía que les persones qu'acudíen al sitiu onde se desenvolvía la xornada –unes 500.000 en Ribeseya nel 2010– pudieren comprobar la cantidá y calidá de la industria cultural que s'espresa nel idioma propiu. Esti ye, amás, a xuiciu de la organización ciudadana, un sector que xenera empléu y activiá económica y que, nun siendo n'actividaes como la feria qu'esti añu nun se va facer, nun tien la visibiliá qu'habría tener ente un públicu ampliu.

Dende la XDLA nun entienden que, nesti tiempu de crisis y recortes, «cola cultura como una de les primeres afectaes pola época económica mala», una actividá qu'entama'l Gobiernu autonómicu –qu'ayuda a la publicación de la mayoría de llibros y discos n'asturianu– «nun permita qu'estos productos lleguen a tola sociedá». Recuerda la organización que la llingua asturiana ye tamién «una industria grande que da trabayu a cientos de persones de manera directa o indirecta» y que, en tiempos de crisis, necesita de l'apoyu de l'Alministración.

Fonte: Les Noticies