El parque de Mánfer

     

   Cumplióse n’abril d’esti añu’l décimu aniversariu del fallecimientu del escritor, y otres munches coses, Manuel d’Andrés Fernández, Mánfer de la Llera. Con esti motivu, l’Ayuntamientu de Xixón, a instancies de l’Asociación de Vecinos de Pumarín, dedicó-y un guapu parque nel barriu en que vivió munchos años: Pumarín. Pa ser sinceru, ellí onde ta asitiáu’l parque pa min siempres fue El Llanu d’Arriba, pues cuando yo yera neñu Pumarín principiaba p’allá de la Ronda de Camiones -agora Gaspar García Laviana- onde se llantaron les famoses 1.500. Pero bueno, eso ye lo de menos. Dicía que Manfer yá tien un Parqué en Xixón, onde vivió los caberos 40 años, a axuntar a  la cai y el bustu que tien en Sama, que fue’l so conceyu de nacencia.

     L’actu presidiólu l’alcaldesa, Carmen Moriyón, que lleó unes emotives pallabres sobre l’homenaxeáu, por cierto, nun perfechu asturianu, cosa que ye de destacar pues la so antecesora nel cargo, la señora Fernández Felgueroso, nun lo fizo en tolos años (que fueron munchos) que presidió la Casa Conceyu. Intervinieron tamién dos de los sos fíos, Efrén y Vital -Ramón taba ellí pero nun faló- lléendose unos versos que quedaron impresos nel monolitu que da nome al parque. Ellí tuvimos, amás de la familia, dellos amigos (yo llevaba tamién la representación de l’Academia de la Llingua de la que fue miembru correspondiente) y dalgunos conceyales de los grupos municipales que realzaron l’actu cola so presencia. Y hubo tamién dalgún faltosu metepates que dio unes voces extemporanies, seguro que por quexes xustificaes pero qu’ellí nun procedíen.

   Como yá tengo muncho falao y escrito de Mánfer -el siempres dicía en broma que yo yera’l so presentador oficial-nun voi volver a relatar los sos méritos nin cuntar les sabroses anéudotes que tuvi con él y que yá cunté n’otros llaos. Namás quiero volver a recordalu a los diez años de la so muerte y dicir que me prestó muncho esti homenaxe que-y fizo’l so conceyu d’adopción con tou merecimientu. Y de pasu, dar a la lluz una semeya a la que-y tengo munchu cariñu pues mandómela él por corréu pocu tiempu enantes del so fallecimientu. Ye una semeya del 22 de xunu de 2001, que ta fecha nel Muséu de la Minería del Entregu, onde se celebraba el “Primer Encuentro de Escritores de la Mina”, y se-yos fizo un homenaxe a él y a César Rubín. Yo fui l’encargáu d’enumerar los sos méritos y na foto toi lleéndolos, xunto al propiu Manfer, a Carlota, que fue la so compañera de los últimos años, y al otru homenaxeáu César Rubín. Manfer sabía que yo nun tenía la foto y, nuna comida que ficimos ellos y la mio muyer y yo na sidrería de debaxo la so casa, prometió mandámela, como asina fizo. Bueno, histories vieyes pero que vienen bien pa facer esti recordatoriu.  Un abrazu, Mánfer.
Fonte: trabayudecampu. com/Vicente García Oliva/asturies.com

Un monolitu recuerda a Mánfer de la Llera nel parque de Xixón que lleva’l so nome

por Pablo R. Guardado

“Ye’l meyor exemplu pa los nenos que van xugar nél”, afirmó l’alcaldesa de Xixón Carmen Moriyón, qu'emplegó l'asturianu na so intervención. La zona verde ta en Pumarín, ente les cais València y Baleares, y l’avenida Schulz.

Un añu depués de que la xunta de gobiernu, a pidimientu de l’Asociación de Vecinos Severo Ochoa –de la que foi presidente–, decidiera dar el nome de Parque Mánfer de la Llera a esti llugar de Pumarín, el Conceyu de Xixón entamó un homenaxe a esti “mineru, escritor y home comprometíu colos sos conciudadanos”, como reza’l monolitu destapáu esta mañana n’honor a Manuel d’Andrés Fernández (Ciañu, 1918; Xixón, 2005). Nella participó l’alcaldesa de Xixón, Carmen Moriyón, que tuvo acompañada de conceyales de dellos grupos municipales, familiares y amigos del homenaxáu y vecinos del barriu. Ente los asistentes, personalidaes destacaes de la cultura asturiana, como Vicente García Oliva, Xuan Xosé Sánchez Vicente, Humberto Gonzali o Xosé Nel Riesgo, direutor de la Fundación Municipal de Cultura, Educación y Universidá Popular, ente otros.

La primera en tomar la pallabra foi Moriyón, arrodiada por Clementina d’Andrés, hermana de Mánfer de la Llera, amás de los fíos del escritor Ramón, Vital y Efrén, que tuvo acompañáu pol so fíu Óscar. L’alcaldesa refirióse al de Ciañu como “un gran escritor y meyor persona; una persona cabal”, del qu’emponderó’l “respetu y compromisu pa colos drechos ciudadanos. El mesmu respetu y el mesmu compromisu que dende bien neñu contraxo con Asturies, col so paisaxe, cola so cultura y, sobre manera, cola so llingua”.

Darréu recordó cómo Mánfer de la Llera llegó a Xixón nel 1964 “al entós recién estrenáu barriu de les 1.500, un barriu modernu y d’abonda guapura, como él mesmu describe nel poema ‘Pumarín”, y cómo participó nel movimientu vecinal impulsando la creación de l’Asociación de Vecinos Severo Ochoa. Tres la so xubilación de la mina nel 1967 por silicosis, “nun pasen dos años cuando se compromete col movimientu de pensionistes del que foi militante activu, primeru na clandistinidá y llueu en democracia”, apuntó Moriyón, que puntualizó que’l mayor compromisu d’él “foi la familia que formó con Celia nel 1946”.

Por último, l’alcaldesa aseguró que-y prestaría poder conocer “al pá, al vecín, al amigu… Al home que supo guiar la so vida con un sentíu de compromisu y tolerancia”, y apuntó que’l nome de Mánfer de la Llera “ye’l meyor nome pa esti parque, porque ye’l meyor exemplu pa los nenos que van disfrutar d’él”.

Un home mui activu y solidariu

En nome de la familia tomó la pallabra Efrén, responsable de les viñetes d’Asturies.com, que quixo agradecer “mui fondamente a l’asociación de vecinos y al Conceyu de Xixón esti homenaxe al nuesu padre” Mánfer de la Llera, “un asturianu de Ciañu, Llangréu, mineru de profesión, pero que nun se dedicaba sólo a trabayar na mina y a mantener una familia, sinón que facía actividaes mui diverses: cultivar la lliteratura en llingua asturiana y trabayar pola so dignificación; lluchar pola dignidá de los pensionistes y xubilaos; esparder la cultura nos ámbitos populares y obreros; y tamién trabayar por ameyorar les condiciones de vida del barriu de la Pumarín y la so xente”.

Efrén recordó la situación de Pumarín cuando la so familia aportó a Xixón, un barriu “modernu que salía nes postales de Xixón”, pero con munches deficiencies que Mánfer de la Llera denunciaba na prensa llocal “nes sos cróniques y nes sos xestiones”. Yera “un namoráu del barriu de Pumarín, al que dedicó dalgunos poemes y escritos”, cola circunstancia de que’l parque qu’agora lleva’l so nome “yera de los sitios de Pumarín que más-y prestaben”. Asina, el monolitu instaláu nel parque tien el fragmentu d’un poema “inspiráu parcialmente nesti parque”, que lleó íntegramente Vital d’Andrés.  

Pa zarrar l’actu, Vital destacó qu’espera “qu’esti parque sirva como homenaxe non sólo a Mánfer de la Llera, como símbolu d’un barriu que buscaba la so dignidá tanto no urbanístico como no social y no cultural, sinón tamién a toos aquellos que, como él, llucharon y s’esmolieron polos barrios de Xixón”.

Na semeya, Ramón y Efrén destapen el monolitu dedicáu al so padre. A la drecha, Clementina y Vital.

Fonte: Asturies.com