La decimocuarta propuesta de TermAst ta dedicada a la sociollingüística

por Pablo R. Guardado

Héctor García Gil ye’l responsable de la decimocuarta propuesta de TermAst. Ésta ta dedicada a los ‘Términos de Sociollinguística’, con cerca de 600 entraes accesibles tanto pa téunicos sociollingüísticos como pal públicu xeneral interesao nel tema.

“Yera evidente la necesidá de contar con un TermAst dedicáu a la sociollingüística”, espresa García Gil, qu’añade que “la sociollinguística y l’asturianu tán venceyaos” al tar l’idioma nuna “situación de conflictu llingüísticu”. Asina púnxose a trabayar na ellaboración d’esti pallabreru compuestu por cerca de 600 entraes, cola so correspondiente definición, que recueye pallabres como ‘abandonamientu llingüísticu’, ‘glotónimu’, neofalante’ o ‘xurileutu’, ente otres.

Les fontes de les que bebe principalmente’l TermAst de García Gil son les catalanes, especializaes na sociollingüística del conflictu, y les belgues. “Quixi partir de cero na ellaboración de la terminoloxía”, destaca’l llingüista, qu’apostó por una pallabreru “accesible pa tol mundu a la hora d’acceder a él”.

‘Términos de Sociollinguística’ yá ta disponible na páxina de TermAst, convirtiéndose na decimocuarta propuesta dende que nel 2009 se punxera en marcha esta iniciativa de l’Academia de la Llingua Asturiana con Softastur y el Colexu d’Inxenieros n’Informática del Principáu d’Asturies. El so oxetivu ye recoyer iniciatives individuales o grupales de propuestes terminolóxiques en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu, será la institución académica la que dirá inxiriéndolos dientro de los sos calces normativos.

Fonte: Asturies.com

L’aplicación de Wikipedia p’Android va tar n’asturianu y munches llingües más gracies a la comunidá asturiana

Wikipedia p’Android va tar n’asturianu

 “El trabayu d’una llingua pequeñina beneficia a millones de persones”, señalen dende la comunidá asturiana de Wikipedia tres consiguir desbloquiar una situación que nun permitía tornar l’aplicación p’Android a los idiomes con códigu de trés lletres. Na actualización próxima va tar n’asturianu dafechu.

 Los miembros de la comunidá de la Wikipedia n’asturianu atoparon un problema a la hora de trabayar na torna de l’aplicación p’Android, que nun contaba con versión n’asturianu. Ésti consistía en que la platafoma Translatewiki nun permitía guardar el llabor fechu de traducción al nun almitir les llingües con locale de trés lletres, como tien el nuesu idioma: ‘ast’.

 “Treslladamos-y un informe fallu, yá qu’Android reconoz los códigos de trés lletres dende va un par d’años, miráronlu y dieron el preste”, espliquen dende la comunidá asturiana de Wikipedia, arguyosa pol fechu de que “el trabayu d’una llingua pequeñina beneficia a millones de persones”. Y ye qu’agora cualquier idioma con locale de trés lletres va poder facer la torna de l’aplicación p’Android de Wikipedia.

 Hai que destacar qu’esta aplicación yá ta disponible n’asturianu pa iOS, el sistema operativu de los iPhone, tres laincorporación del asturianu al CLDR, la base de datos llingüística que naz d'un consorciu de les empreses con más pesu nel terrén informáticu, ente les que ta Apple. Ello consiguióse esti branu gracies a un llabor de cinco años de Softastur, la comunidá asturiana que trabaya pa tornar software llibre al nuesu idioma.Fonte: asturies.com

Softastur asoleya un 'Diccionariu' d'asturianu nuevu más completu p'Android

por Pablo R. Guardado

La consulta de pallabres asturianes al traviés de dispositivos móviles y tabletes tórnase más afayadiza gracies al 'Diccionariu' nuevu que ta acabante de presentar Softastur. Ésti amás inclúi correutor ortográficu, traductor en llinia y conxugador.

Softastur yá desendolcara hai años un 'Diccionariu', qu'agora vese sustituyíu por esta aplicación nueva de mesmu nome programada por Matthew Stuckwisch. La ferramienta usa les definiciones del Diccionariu de l'Academia de la Llingua Asturiana y ufre traducción gracies al proyeutu Apertium/Eslema.

Tamién tien capacidá de conxugación, pa lo que Softastur desendolcó un conxugador propiu tomando como referencia OSLIN. 'Diccionariu' permite d'igual forma usar el correutor ortográficu y amestar a favoritos les pallabres que más preste al usuariu pa revisales n'otru momentu o como recordatoriu.

Esta versión, que yá se pue descargar en Google Play, ta entovía en fase preliminar, anque funciona correutamente.                                                                                                                                 Fonte: Asturies.com

La llingua asturiana yá ta presente en CLDR como un idioma más

por Pablo R. Guardado

La base de datos llingüística cola que trabayen les empreses informátiques más importantes como Google, Apple o Microsoft, yá acepta a la llingua asturiana. "Ye un pasu tan importante como consiguir el locale 'ast'", espliquen dendeSoftastur, la comunidá asturiana d'usuarios que trabaya pa tornar software llibre al nuesu idioma.

Tres cinco años de trámites col Proyeutu CLDR (Common Locale Data Repository), finalmente l'asturianu ta incluyíu nesta base de datos llingüísticu que naz d'un consorciu de les empreses con más pesu nel terrén informáticu y que ye "la infraestructura qu’usen Google, Libreoffice, Apple, Windows, IBM, Twitter, ente otres empreses, nel so software". Sicasí, esto nun significa que, por exemplu, Windows incorpore'l nuesu idioma nes sos versiones nueves, yá qu'esta decisión depende de Microsoft, anque sí facilita a la llingua asturiana tar presente en munchos productos, programes y aplicaciones.

"Nun ye fácil dar esti pasu, que ye tan importante como lo foi consiguir el locale 'ast', yá que los responsables del Proyeutu CLDR son mui esixentes", espliquen dende Softastur, que pon como exemplu'l problema que tuvieron hai cuatro años col alfabetu. "Mandamos-yos de l'A a la Z, incluyendo la h aspirada y la che vaqueira, y ellos respondiéronnos que nun esistíen tomando como referencia un llibru vieyu de Xuan Xosé Sánchez Vicente. Tuvimos que ponenos en contautu con elli pa que-yos unviara un escritu n'inglés nel que-yos esplicaba que la normativa cambiara nesti tiempu y que dambes lletres sí yeren correutes", espliquen.

Amás, el procesu pa incorporase a la base de datos ábrese cada seis meses, lo que ralentiza'l mesmu. Finalmente, ésti yá terminó y l'asturianu ye una llingua más nesta base de datos qu'incorpora'l nome de la llingua, del territoriu, los díes de la selmana, mes, añu, periodu del día completu y abreviáu, nomes de los fusos horarios, estayes xeográfiques, les divises, patrones de data y d’hora y conxuntos de caráuteres usaos pa la escritura de la llingua, ente otros. "Evidentemente, esto uniformiza una bayura de términos, como por exemplu los nomes de capitales, países, etc.", apunten dende Softastur.

Asturianizador de Windows

Ún de los próximos avances que podría tener el nuesu idioma gracies a esta incorporación al CLDR podría ser un 'Asturianizador' pa Windows gracies a la collaboración de Softastur con Softcatalà, coleutivu que tien desendolcáu un 'Catalanitzador'. Ésta ye una ferramienta mui cenciella que, nel casu de nun tener Windows en catalán, permite al usuariu cambiar el sistema operativu a esti idioma y tolos programes y aplicaciones esistentes en llingua catalana usando un asistente.

Semeya de Josep M, de Softcatalà.                                                                                                 Fonte: Asturies.com

Telegram n'ast yá ta disponible nel Play Store

D'esta manera los usuarios nun han d'actualizar l'aplicación de forma manual.

Softastur, responsable de que los asturianos podamos utilizar esti programa de mensaxería nel intre nos nuesos móviles Android en llingua asturiana, anunció güei per Twitter esti avance. Telegram trátase d'una aplicación de software llibre que respeta la privacidá de los usuarios y que permite tamién el so usu pel PC.

Otra manera, Softastur tamién pon a disposición de los usuarios dos paquetes de pegadielles pa poder utilizar col Telegram. Equí pues consultar tola información.

Fonte: Asturies.com

Softastur asoleya una versión nueva del Correutor Ortográficu pal asturianu

Yá ta disponible la nueva versión del Correutor Ortográficu pal asturianu.

Según señalen dende'l coleutivu Softastur, esta primer versión estable (les anteriores considerábamosles versiones beta, o «en pruebes») reconoz más de 50.000 pallabres basaes nel diccionariu normativu de l'Academia de la Llingua Asturiana coles correspondientes flexones.

El Correutor ta disponible pa Mozilla Firefox ( https://addons.mozilla.org/…/fir…/addon/Correutor_asturianu/ ), y pa les suites d'aplicaciones d'oficina LibreOffice ( https://extensions.libreoffice.org/…/correuto…/releases/1.00 ) y Apache OpenOffice ( http://extensions.openoffice.org/…/asturian-spellchecker-di… ).

Fonte: Infoasturies

Ubuntu Phone, n'asturianu

Dende Softastur anuncien la versión n'asturianu d'esti nuevu sistema móvil

   Según despliquen dende Softastur, "Ubuntu phone, salió a la lluz el pasáu fin de selmana de la mano de la empresa BQ, baxo’l modelu Aquaris E4.5. Nel so interior tien un procesador Cortex-A7 de Mediatek de cuatro núcleos a 1.3 GHz con una gráfica Mali 400, acompañaos de 1 GB de memoria RAM y 8 GB d’almacenamientu internu. La batería ye de 2150 mAh y tien doble micro-SIM. El preciu anda alredor de los 169 €".

   Dende'l coleutivu apunten que "la carauterística más importante d’Ubuntu phone, ye l’usu de SCOPES, trátase d’espacios qu’amiesten conteníu procedente de dellos servicios. Diferénciense de les apps móviles pol so calter integrador. Asina, por exemplu, pa escuchar música, un usuariu pue acceder dende’l mesmu espaciu a canciones de SoundCloud o de Grooveshark. Arriendes de les funcionalidaes normales de corréu-e, navegación web, cámara, galería, etc, Ubuntu phone incorpora INRIX, que da a los usuarios d’esti smartphone accesu direutu a la información del tráficu en tiempu real. Pa crear aplicaciones pa Ubuntu Phone, los desendolcadores disponen de ferramientes basaes en HTML5 pa que puedan crear la so app de mou rápidu y cenciellu enantes de xubila a la tienda d’aplicaciones oficial", y too ello, por supuestu, en llingua asturiana.
                                                                                                    Fonte: Infoasturies.net

Les organizaciones del Estáu que trabayen na torna de software llibre a llingües minorizaes afitaron rellaciones en Santiago de Compostela

Santiago de Compostela, Encontro Ibérico de Traductores de Software Libre a Linguas Minorizadas

Na semeya, en primer términu, Chevrel alderica nuna de les sesiones de trabayu del alcuentru

   Esta fin del selmana tuvo llugar en Santiago de Compostela l’Encontro Ibérico de Traductores de Software Libre a Linguas Minorizadas, nel que participó Softastur. Toles organizaciones compartieron esperiencies y métodos de trabayu, y afitaron rellaciones.

   La delegación asturiana tuvo compuesta por cuatro persones que, sábadu y domingu, participaron nes actividaes programaes pol coleutivu gallegu Proxecto Trasno xunto con voluntarios de Softcatalà, Softaragonés y los vascos de Librezale nel Centro de Novas Tecnoloxías de Santiago. “La organización foi perbona, con xuntances por grupos de traductores”, esto ye Mozilla Firefox, Debian GNU/Linux y LibreOffice/Apache OpenOffice, apunta Iñigo Varela, ún de los representantes de Softastur desplazáu a Galicia, que tornó al país mui satisfechu de la esperiencia. “Vimos cómo trabayaben los demás y decatámonos de que tábemos faciendo bien les coses”, destaca. En concreto, los motivos d’esti alcuentru yeren “establecer canales de comunicación ente nós” y “aprender coses unos d’otros”.

   Otru de los aspeutos importantes a tratar yera’l de la terminoloxía y la llingüística, estaya na que se demostró que Softastur foi tamién pel bon camín gracies al glosariu y a la guía d’estilu desendolcada pol coleutivu en consensu cola Academia de la Llingua Asturiana. Un motivu d’allegría pa los asturianos que se sumó a la sorpresa de Pascal Chevrel, representante internacional de Mozilla Firefox presente en Santiago, énte’l sistema de traducción desendolcáu por ún de los miembros de Softastur, Ayoze Roberto; un script de códigu abiertu que’l francés solicitó llevar a la sede de la corporación tres comprobar l’aforru de tiempu que permite. “Amás, comentónos que ye mui factible que Firefox n’asturianu pudiera ganar mil usuarios más” por mor de les estadístiques d’utilización del restolador, destaca Varela. Otra bona noticia pal idioma y pa Softastur, que ve con bonos güeyos la posibilidá de repetir la esperiencia del alcuentru de Santiago nun futuru pa caltener y afondar nes bones rellaciones con tolos coleutivos que trabayen nel Estáu na traducción de software llibre a les llingües minorizaes.

OwnCloud, yá disponible        Dende’l mes pasáu yá ye posible utilizar OwnCloud en llingua asturiana. Esta ferramienta permite xubir, baxar y compartir ficheros con otres persones –al mou de Dropbox– y sincronizar esos ficheros nos equipos que tengamos, cola particularidá de que tamién da la posibilidá de trabayar sobre ficheros de testu online, xestionar contautos, calendariu, tabla de xeres y organizar semeyes, ente otres munches coses. Según apunta Softastur, OwnCloud va arreyáu a OpenMailBox y con una cuenta nesti corréu-web seguru va ser posible utilizar les dos aplicaciones. La xente interesao pue conocer na web del coleutivu Sofastur, los pasos a siguir pa rexistrase y el mou d’utilización del OwnCloud.                                                                  Fonte: Asturies.com

Softastur nel I Alcuentru ibéricu de traductores de software llibre a llingües minorizaes

Una representación del colectivu Softastur ta desplazada esta fin de selmana a Santiago de Compostela pa participar nel primer alcuentru ibéricu d'equipos de traducción de llingües minorizaes, que tien llugar nel Centro de Novas Tecnoloxías de Galicia.

Les xornaes, entamaes pol grupu gallegu Trasno, xurden cola idea de compartir el conocimientu alquiríu a lo llargu los años polos distintos grupos, pa deprender unos d'otros y intentar solucionar los problemes que xurden nos distintos proyeutos que trabayen.

Dos díes de charres y conferencies onde Softastur acude tamién cola idega de proponer alcuerdos de collaboración pal desendolcu de ferramientes y compartición de recursos y tiempu con otros equipos pa optimizar el funcionamientu d'unos proyeutos que, como Softastur, funcionen gracies al trabayu de voluntarios y son mayoritariamente autofinanciaos, refugando sovenciones públiques pa caltenese como proyeutos independientes.

Amás de Softastur y los anfitriones, Trasno, a les xornaes acuden grupos que trabayen col vascu (Librezale), aragonés (Softaragonés) y catalán (Softcatalà) amás d'un representante de Mozilla, empresa que desendolca el famosu restolador web Firefox.

En cuantes a la delegación de Softastur ta compuesta por cinco voluntarios, qu'ente otros, coordinen proyeutos como Firefox, Thunderbird, Ubuntu, Debian, CyanogenMod, Telegram o Gnome.

Fonte: Infoasturies

Owncloud ya tien versión en llingua asturiana

Esti branu traxo pa con elli la presentación de la plataforma OwnCloud cola so primer versión habilitada en llingua asturiana, pa tolos poseedores de cuenta d'OPENMAILBOX.ORG. OwnCloud ye una aplicación llibre que permite l’almacenamientu seguru de ficheros na ñube (neto que Dropbox) y otres aplicaciones en llinia. Con OwnCloud dispones d’un calendariu d’eventos, un xestor de noticies, un editor de testos en llinia, visor de documentos pdf, Galería d’imáxenes.. y pues sincronizar toos estos ficheros en tolos equipos que tengas (windows, mac, Linux, smartphones y tabletes). En Softastur ufierten información abonda de los pasos que tienen de dase pa poer esfrutar de les posibilidaes d'esti almacenamientu na ñube. Más información: Páxina de SoftAstur Fonte: Asturnews

Ya pues facer falar asturianu asturianu al to móvil con Android

SoftAstur presentó esti xueves pela tarde so desenvolvimientu en versión asturiana de l'Android Cyanogenmod

Android  n'asturianu

   Los usuarios de teléfonos intelixentes y tabletes qu'utilicen Android como sistema operativu, podrán escoyer dende güei pa comunicase n'asturianu colos sos preseos y ensin necesidá de facese con ún nuevu. Sedrá abondo con siguir les instrucciones pa instalar la nueva versión d'Android nos sos preseos, que tarán disponibles dende güei mesmo na web softastur.org, como asoleyaron esti xueves pela tarde nel llar de l'Academia de la Llingua Asturiana los especialistes de SoftAstur que presentaron el desenvolvimientu de la versión asturiana d'Android.

   Android ye'l sistema operativu mayoritariu en preseos móviles, tanto por númberu d'usuarios como por númberu de fabricantes y modelos que furrulen con elli. Les razones fundamentales pa esi lliderazgu son la so calidá y la versatilidá qu'ufre a la industria pola so condición de software de 'códigu abiertu', lo que permite que puea modificase y adautase llibremente según les necesidaes del fabricante o l'usuariu.

   Esa versatilidá favoreció la so adopción pola gran mayoría de fabricantes de preseos móviles y fornidores de telecomunicaciones, qu'aprovechen la calidá y economía de desendolcu d'Android adautándolu a les distintes funcionalidaes de los aparatos o servicios qu'ufren a los sos veceros. Sobro la base d'Android, los fabricantes y operadores desendolquen les sos propies versiones (denomaes 'ROM') que son les que lleven instalaos los preseos con distintes funcionalidaes o, nel so casu, restricciones.

   Una d'eses 'ROM' ye Cyanogenmod (cyanogenmod.org), que tien como principales carauterístiques un mayor apueste pol software llibre, l'ameyoramientu de la privacidá l'usuariu y el desaniciu de restricciones d'usu (ye capaz de lleer munches más tribes de ficheros d'audiu o vídeu, por exemplu). Cyanogenmod vien instaláu 'por defeutu' por dellos fabricantes en tol mundiu, y furrula nun gran númberu de teléfonos intelixentes y tabletes de marques como Samsung, Sony, Asus, Acer, HTC, LG, Motorola, Amazon Kindle, Google Nexus, Hewlett Packard, Huawei o ZTE, ente otres munches.

   A eses ventayes, l'Android Cyanogenmod suma agora la posibilidá d'utilizar el sistema operativu n'asturianu, dempués del trabayu que se vieno desendolcando nos caberos años pola comunidá de Softastur, y d'una facilidá d'instalación percenciella: Namái ye necesario coneutar el teléfonu al PC y executar el programa d'instalación, que fadrá tolos pasos automáticamente ensin plantegar problemes al usuariu.

La  instalación

   La posibilidá de que los móviles vengan n'asturianu “de fábrica” ye un aspeutu que tará namái arreyáu de la voluntariedá de los fabricantes o de los fornidores de telecomunicaciones, que podrán instalar la opción del idioma asturianu nos 'forks' qu'instalen nos preseos que ponen a la venta.

  N'España, son dellos los exemplos de fabricantes o fornidores qu'inclúi nos sos preseos les opciones de llingües como'l gallegu, el vascu o'l catalán, lo que lleva a quien quiera cuntar con eses opciones a siguir un procesu asemeyáu al que dende güei podrán realizar los falantes d'asturianu.

   Lo que ye enforma más difícil ye ver darréu un iPhone o un Nokia Lumia n'asturianu. Dambes tribes de preseos móviles utilicen un sistema operativu 'privativu'. Esto ye: namái pue ser modificáu pol fabricante ya impon una serie de restricciones d'usu que nun se dan nos preseos Android.

   Polo xeneral, les tornes d'esa triba de sistemes respuenden namái a criterios de rentabilidá económica, polo que les corporaciones propietaries d'esi software nun faen el llabor de torna si nun hai un mercáu potencial que rentabilice esi trabayu. En casos concretos, como los del catalán, el vascu o el gallego, les tornes de software privativu namái se realizaron por diches corporaciones empara de fuertes inyeiciones de dineru públicu difícilmente cuantificables pero que foron millonaries, n'euros, a lo llargo de los caberos años.

   Per otru llau, Softastur xurde como un coleutivu que sofita la introducción del asturianu nel campu les nueves teunoloxíes, pero nel marcu d'un apueste ñidiu pol software llibre como l'alternativa ética pal desendolcu de productos teunolóxicos d'una calidá y seguridá superiores y accesibles a tol mundiu. Poro, el so trabayu céntrase namái n'aplicaciones 'llibres' o, como nel casu d'Android, de códigu abiertu.

   Softastur ye una asociación ensin ánimu de llucru que nos caberos años vieno trabayando nel desendolcu de software llibre en llingua asturiana. A lo llargo d'esti tiempu, punxéronse a disposición de los usuarios decenes d'aplicaciones, ente les que destaca'l sistema operativu d'entornu d'escritoriu Ubuntu (asina como otres distribuciones GNU/Linux), el restolador Firefox, la suite ofimática OpenOffice (anguaño LibreOffice), l'editor de gráficos GIMP, el reproductor VLC o'l xestor de corréu Thunderbird, ente otros muchos. Fasta'l llanzamientu d'Android n'asturianu, Softastur yá punxere a disposición de la comunidá delles aplicaciones pa teléfonos intelixentes, ente les que destaca'l programa de mensaxería nel intre Telegram.

Más información: Páxina web pa installar Android             Fonte: Asturnews

Softastur ufre'l primer webmail n'asturianu: OpelMailBox

OpenMailBox primer webmail n'asturianu

   El coleutivu Softastur nun apara na so xera d’ufrir a los usarios software llibre en llingua asturiana. L’avance últimu ye’l trabayu desendolcáu con OpenMailBox, el primer webmail n’asturianu, que destaca pola so seguridá y privacidá.

   La diferencia principal d’OpenMailBox con Thunderbird –tamién n’asturianu– ye qu’esta ferramienta permítenos xestionar el nuesu corréu electrónicu en cualquier PC con conexón a la rede al traviés del restolador, lo que ye mui útil cuando nun utilizamos l’ordenador propiu. Sicasí, tamién ufre la posibilidá de descargar el corréu con un xestor de correos –Softastur recomienda’l Thunderbird– al tener serviciu IMAP y SMTP, tanto en PC como nun teléfonu intelixente. Na páxina web del coleutivu asturianu informen sobre los pasos necesarios pa rexistrase y abrir una cuenta n’OpenMailBox, que destaca pola so seguridá, el respetu de la privacidá y l’ausencia de publicidá, amás de por ser de baldre y n’asturianu dafechu.

   Otra manera, la selmana pasada Softastur espublizó una anovación de Telegram, aplicación de mensaxería nel intre en llingua asturiana. Ésta ha de facese de forma manual, al igual que la instalación primera, y inclúi notes de voz y el guardáu de multimedia en llugares más afayadizos. L’ésitu de la versión asturiana de Telegram ta siendo importante, con alredor de 7.000 descargues en poco más de quince díes.    Fonte: Asturies.com

Telegram n'asturianu perpasa les 3.500 descargues

Les redes sociales agradecen a Softastur la torna de l'aplicación. Telegram, tamién n'asturianu Descarga Telegram n'asturianu (Softastur) Telegram, el primer serviciu de mensaxería instantánea disponible n'Android, perpasó esti mediudía les 3.500 descargues. La traducción de l'aplicación ta teniendo una bona acoyida nes redes sociales. En Twitter, Evu Gandboy felicitábase porque "yá uso telegram n'asturianu!" mientres @Noepola llamenta que namás tea disponible p'Android: "Jolin yo también quiero Telegram n’Asturianu". Softastur asoleyó ayeri la torna de l'aplicación a la llingua del país, que puede descargase de baldre na so páxina web. Pa instalala, namás ye necesario disponer d'un teléfonu Android -les polítiques de códigu d'Apple nun permiten la 'app' de Telegram n'asturianu-, habilitar la opción 'Fontes desconocíes', descargar l'app y executala pa instalala. Quienes ya esfrutaren de l'aplicación nel so 'smartphone', deberán esaniciala enantes d'entamar esti procesu. Tamién Android Nun va ser la única meyora que l'asturianu va vivir nos prósimos meses nos 'smartphone'. Android va habilitar los códigos de 3 lletres, lo que va permitir que llingües como l’asturianu (‘ast‘) puedan ser ‘traducibles’ nel proyeutu. "Nun se sabe si va ser na versión 4.5 ó 5.0.x.. pero ser, va selo", anuncien en Softastur, qu'encamienta a usar un restolador web n’asturianu, que identifique al usuariu na rede como usuariu de la llingua ‘ast’. "Cada asturfalante qu'usa un restolador web en castellanu, fai un -2 a la llingua asturiana". Fonte: Queyeho.com

Una terminoloxía del teatru y les artes escéniques, undécima propuesta de TermAst

 por Pablo R. Guardado
Belarmino Daniel Álvarez y Antón Caamaño son los responsables de la undécima propuesta del proyeutu TermAst de l’ALLA: ‘Terminoloxía de Teatru y Artes Escéniques’. La institución ta acabante d’espublizar dos llibros.

Estos direutores d’escena afrontaron el retu de recoyer términos venceyaos al mundu del teatru y de les artes escéniques “porque apoyar el teatru asturianu nun ye sólo facer una comedia n’asturianu”, señala Caamaño. Asina, ellaboraron un pallabreru formáu por alredor de 1.200 términos que, al final, quedaron reducíos a un millar pa que’l conxuntu tuviera más sentíu. Sicasí, estos nun queden pa prau y podríen recuperase pa terminoloxíes venceyaes a la música, la ópera y el doblaxe qu’Álvarez y Caamaño nun descarten facer nun futuru próximu.

El proyeutu TermAst ye una iniciativa conxunta de l’Academia de la Llingua Asturiana (ALLA), el coleutivu Softastury el Colexu Oficial d’Inxenieros n’Informática del Principáu d’Asturies. Ésta tien como oxetivu recoyer iniciatives individuales o grupales de propuestes terminolóxiques en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu, será la institución académica la que dirá inxiriéndolos dientro de los sos calces normativos.

Na ‘Terminoloxía de Teatru y Artes Escéniques’, Álvarez y Caamaño ufren una bayurosa llista de términos que van dende ‘abaxo’ (“Primer términu, parte del escenariu más averada al públicu”) a ‘zarzuela’ (“Obra teatral que se representa falada, cantada y acompañada de música; Música qu’acompaña a una obra teatral que se representa cantada y falada; Soxéneru teatral musical o opereta procedente de Madrid representáu con diálogu y cantu”). Decenes de pallabres que los profesionales de la escena y los aficionaos al teatru yá pueden consultar na web de TermAst.

Dos espublizaciones

L’ALLA anunció esta selmana la espublización de dos llibros. El primeru trátase de la obra ganadora del Premiu Llorienzu Novo Mier de Creación Lliteraria 2011, ‘La mano vacía’, de Héctor Pérez Iglesias. Ésti suma’l númberu 47 de la coleición ‘Llibrería académica’. La otra novedá ye la salida a la venta de la quinta edición de ‘El principín’, el clásicu d’Antoine de Saint-Exupéry, con motivu del trixésimu aniversariu de la so edición n’asturianu. Nel 1983, Xosé Lluis García Arias encargóse de la torna d’esta novela xuvenil cola collaboración de Marta Suárez Estrada, que sumaba’l títulu númberu 7 de la coleición ‘Escolín’.

Na semeya, actores de Producciones Nun Tris tres representar 'Xuanón namoráu', ente ellos Caamaño –terceru pela derecha–.

Fonte: Asturies.com

Softastur asoleya la versión n'asturianu de Libre Office 4.2

Dende'l coleutivu asoleyen puntualmente n'asturianu la versión 4.2 de LibreOffice, coincidiendo col so llanzamientu.

LibreOffice, el conxuntu d'aplicaciones d'ofimática basaes nel software llibre, ta acabante d'asoleyar una nueva versión, la 4.2. Como yá ye vezu, dende Softastur ufren puntualmente la versión n'asturianu d'esa ferramienta informática, que yá ta disponible pa la so descarga, con tola información disponible nel sitiu web propiu de SoftAstur.

The Document Foundation anuncia LibreOffice 4.2, una nueva versión principal empobinada a usuarios avanzaos, y otru pasu alantre significativu pal meyor conxuntu d’aplicaciones pa ofimática llibre de tolos tiempos. LibreOffice 4.2 presenta un un gran númberu de remociques nel rindimientu ya interoperabilidá dirixíos a tou tipu d’usuarios, pero particularmente pa los usuarios avanzaos y d’empreses. Amás, ta meyor integráu con Microsoft Windows.

Calc recibió la mayor reforma de códigu dende que se creó, lo que-y da mayores ganancies de rindimientu con grandes datos (especialmente al calcular valores de caxelles y al importar fueyes de cálculu XLSX grandes y complicaes), mentanto qu’un nuevu intérprete de fórmules opcional permite el cálculu masivu en paralelo de les caxelles de fórmules usando la GPU vía OpenCL. Esto último funciona meyor con una Arquitectura de Sistema Heteroxenea (HSA, poles sigles n’inglés) como la nueva APU Kaveri de AMD. La interoperabilidá nes dos direiciones con Microsoft OOXML; particularmente pa DOCX, igual que pal anticuáu RTF, ameyoró considerablemente. Tamién s’amestaron nuevos filtros d’importación pa documentos Abiword y presentaciones Apple Keynote.

LibreOffice 4.2 ufre dos remociques específicos en Windows pa usuarios empresariales: un diálogu simplificáu d’instalación personalizada qu’evita posibles errores, y la capacidá d’alministrar y bloquiar de mou centralizáu la configuración con Oxetos de Política de Grupos (GPO, poles sigles n’inglés) vía Active Directory. Tolos usuarios benefíciense d’una meyor integración con Windows 7 y 8, coles miniatures de documentos abiertos agrupaes agora por aplicación y una llista de documentos recientes, que s’amuesen ambos na barra de xeres.

A los usuarios avanzaos de toles plataformes va gusta-yos la flexibilidá de la ventana Configuración pa espertos, que s’amestó na llingüeta Opciones avanzaes. Esta carauterística pue desactivase fácilmente, pa los grandes despliegues y pa usuarios básicos.

Libreoffice 4.2 ufre una nueva pantalla d’aniciu, con un diseñu más llimpiu que fai meyor usu del espaciu disponible – incluyendo pantalles pequeñes – y amuesa una vista previa de los últimos documentos.

No que cinca a móviles,Libreoffice agora tien sofitu pa Control Remotu d’Impress pa iOS – amás del Control Remotu d’Impress pa Android yá disponible – que permite la xestión visual del ritmu d’una presentación nel portátil usando la pantalla d’un iPhone o un iPad. Esta app anguaño ta esperando la revisión d’Apple y anunciaráse en cuantes tea disponible na iTunes Store.

LibreOffice 4.2 ye’l primer conxuntu d’aplicaciones d’ofimática llibres qu’incorpora una nueva función d’accesibilidá pa Windows (basada en IAccessible2) desendolcada por IBM. Pa esta versión considérase experimental, pero sustituirá a la anterior accesibilidá basada en Java na siguiente versión principal.

La Interfaz d’usuariu de Libreoffice sigue recibiendo una llimpieza significativa con un 70% de los diálogos anovaos y munchos axustes de la interfaz distribuíos. Esta versión tamién incluye un guapu tema nuevu d’iconos «planos» – Sifr – y un conxuntu anováu d’estilos de documentu predeterminaos.

Toles funciones nueves y ameyoraes de LibreOffice 4.2, incluyendo les que nun apaecen equí, tan resumíes nesta páxina web: https://www.libreoffice.org/download/4-2-new-features-and-fixes/.

Fonte: Infoasturies 

10 años de Softastur

Softastur ye una asociación ensin ánimu de llucru que tien por oxetivu fomentar l'usu y facer presente la llingua asturiana nes nueves teunoloxíes, concretamente nel software llibre.

El coleutivu Softastur ta de cellebración, y ye que cumplen el décimu aniversariu de la so creación nel añu 2003. Dende entós son numberosos los proyeutos desendolcaos pa facilitar la presencia de la llingua asturiana en sistemes operativos, restoladores, y toa triba de programes venceyaos al software llibre, qu'anguaño puede esfrutar tola comunidá internauta asturfalante.

Anguaño Softastur caltién Ubuntu, que ye el primer sistema operativu n'asturianu asina como los principales proyeutos d'escritoriu y distribuciones de Software llibre. L'equipu de Softastur, cunta ente les sos files con profesores, escritores/traductores en llingua asturiana, programadores, y l'asesoramientu direutu de l'Academia de la Llingua Asturiana, asina como d'un grupu de correutores pa les traducciones finales.

Fonte: Infoasturies

Mozilla asoleya Thunderbird 10 en llingua asturiana

Coincidiendo col llanzamientu de Firefox 10, la Fundación Mozilla espublizó güei mesmo Thunderbird 10, l’afamáu Xestor de corréu electrónicu. La novedá nesti casu, ye qu’esta versión inclúi la llingua asturiana, lo que nun asocedía dende la versión 1.0 (2004). Dempués de retomar aquel proyeutu y tres 1 añu de trabayu, Softastur tien el gustu de presentavos la versión que ta acabantes de salir, y que yá s’alcuentra disponible pa toles plataformes (Linux, Win, Mac).

Páxina de descarga, Carauterístiques, Novedaes

Fonte: softastur

L'asturianu, la tercer llingua'l mundiu n'Ubuntu

Torna al nuesu idioma del sistema operativu.

Según informo'l coleutivu Softastur, la llingua asturiana atópase anguaño ente les tres primeres llingües del mundu nel aspeutu de la torna al nuesu idioma, sólo per detrás de llingües como'l brasileñu y l'eslovenu y xusto per delantre de llingües tan importantes a nivel mundial como l'inglés, castellán, rusu, francés o italianu, qu'en bona parte de los casos entá nun algamaren la torna dafechu.

La clasificación correspuéndese cola cabera versión del sistema operativu de códigu llibre más conocíu, Ubuntu, que gracies al coleutivu Softastur cunta con una versión na nuesa llingua que puede ser instalada por toes aquelles persones interesaes nes distintes xornaes que periódicamente organiza'l coleutivu pal espardimientu del sistema operativu llibre y de la nuesa llingua na fastera informática

Fonte: Infoasturies

Primer aplicación llibre pa móviles 100% n'asturianu

Dende güei mesmo cualesquier usuariu d'un teléfonu Android pue descargar de baldre l'aplicación “Diccionariu”, una versión móvil del Diccionariu de la Academia de la Llingua Asturiana.

Pal so usu faise necesaria la conexón a Internet y ta basada nes definiciones del Diccionariu de l'Academia de la Llingua Asturiana. L'aplicación ta desendolcada pol avilesín David Rodríguez Álvarez en collaboración con Softastur.

L'aplicación tien una llicencia llibre GPL (General Public License), que permite l'accesu al códigu fonte a tol mundu, pa poder ameyorala y enantala.
Carauterízase pola so cenciellez, usabilidá y pocu espaciu ocupáu nel móvil. Dispón d'una caxa de consulta onde s'amuesa'l resultáu de la busca y un control de pallabres propuestes: cuando nun s'atope la pallabra buscada, amosará les suxerencies nuna llista. Tamién cuenta con una opción nel menú que posibilita la copia del resultáu de la busca nel portapapeles, pa poder inxertalu nun mensaxe, corréu-e, documentu...

Funciona en cualesquier versión Android 2.1 y superior y pue baxase totalmente de baldre dende'l Android Market de Google o dende la url https://market.android.com/details?id=com.tarsoft.diccionariu

Fonte: Infoasturies