Softastur asoleya un 'Diccionariu' d'asturianu nuevu más completu p'Android

por Pablo R. Guardado

La consulta de pallabres asturianes al traviés de dispositivos móviles y tabletes tórnase más afayadiza gracies al 'Diccionariu' nuevu que ta acabante de presentar Softastur. Ésti amás inclúi correutor ortográficu, traductor en llinia y conxugador.

Softastur yá desendolcara hai años un 'Diccionariu', qu'agora vese sustituyíu por esta aplicación nueva de mesmu nome programada por Matthew Stuckwisch. La ferramienta usa les definiciones del Diccionariu de l'Academia de la Llingua Asturiana y ufre traducción gracies al proyeutu Apertium/Eslema.

Tamién tien capacidá de conxugación, pa lo que Softastur desendolcó un conxugador propiu tomando como referencia OSLIN. 'Diccionariu' permite d'igual forma usar el correutor ortográficu y amestar a favoritos les pallabres que más preste al usuariu pa revisales n'otru momentu o como recordatoriu.

Esta versión, que yá se pue descargar en Google Play, ta entovía en fase preliminar, anque funciona correutamente.                                                                                                                                 Fonte: Asturies.com

“Quiero creer que lo del diccionariu ye una anéudota”, afirma Cano

La polémica saltó nes redes sociales tres unaentrevista a Javier Fernández nel so despachu emitida per TPA: la pantalla del ordenador del presidente del país taba elevada con un exemplar del Diccionariu de l’Academia de la Llingua Asturiana (ALLA). “Quiero creer que ye una anéudota”, apunta Ana María Cano.

En declaraciones a Asturies.com, la presidenta de la institución académica señala que “ye posible que lu garrara por casualidá; por ser el primeru que tenía a mano”, refugando la posibilidá que de que lu colocara debaxo la pantalla de manera premeditada. “Lo contrario sería llamentable”, añade, “una ofensa mui grave a los asturianos, a l'Academia, a tola xente que trabayó nesti proyeutu, y a la llingua asturiana”.

Cano recuerda que "el diccionariu supunxo venti años de trabayu y la so creación representa la obra más emblemática de la llingua asturiana, un proyeutu que vien ya dende Xovellanos" y esti fechu amosaría "mui poca sensibilidá pa col idioma". Anéudota o non, lo cierto ye que la imaxe del diccionariu corrió como la pólvora peles redes sociales, con crítiques al presidente Fernández y al tratu que da a la llingua asturiana.

Fonte: Asturies.com