La Universidá d'Uviéu entama una xornada sobre l'espardimientu y impautu del asturianu

Celébrase esti xueves nel Aula Rector Alas.
A lo llargo de día van ser delles les conferencies, meses redondes y talleres que se van celebrar dientro d'estes xornaes de nome 'Espardimientu ya impactu de la Llingua Asturiana'. Nella collaboren la Conseyería d'Educación y Cultura, el Seminariu de Filoloxía Asturiana, la Xunta pola Defensa de la Llingua Asturiana, Ediciones Trabe y Saltadera.
L'actividá principió a les 9.30 hores cola participación de la direutora xeneral d'Universidades y Investigación, Cristina Valdés; el vicerrector d'Estudiantes, Luis J. Rodríguez Muñiz; el vicerrector d'Estensión Universitaria y Comunicación, Leopoldo Sánchez Torre; el direutor xeneral de Política Lingüística, Fernando Padilla; y el presidente del Comité Organizador, Raúl Carbaja. Darréu, Xulio Viejo dio la lleición inaugural, entitulada 'La presencia de la Llingua Asturiana na Universidá d'Uviéu: historia, actualidá y perspectives'.
El restu d'actividaes son les siguientes:

• 12 hores: mesa redonda 'La Llingua Asturiana como llingua vehicular nos distintos medios d'espardimientu y divulgación', cola moderación de Ramón d'Andrés y la participación d' Ana Isabel González, direutora del Serviciu de Publicaciones de la Universidá d'Uviéu; José Muñiz Fernández, direutor d'espublizaciones; Xuan Xosé Sánchez Vicente, escritor y ensayista; Antón García, ensayista, traductor y editor; Esther Prieto, representante de la Editorial Trabe.
• 15.15 hores: taller 'Deprendemos llingua asturiana cola Xunta pola Defensa de la Llingua.
• 16 hores: esperiencia didáutica 'La Llingua Asturiana nel procesu d'enseñanza-aprendizaxe de la Conocencia Social, Natural y Cultural', a cargu de Jesús García Albá, caderalgu de la Escuela Universitaria de Maxisteriu.
• 16.45 hores: presentación del llibru 'Nel ríu la fame', de Pilar Arnaldo. Presenta la profesora y escritora Marta López Fernández.
• 17.30 hores: recital de poesía n'asturianu con Pablo Texón, Xuan Bello, Marta Mori, Fame Poétika y Alejandro Fernández Osorio.
• 19 hores: lleición de clausura 'Nós tamién tenemos historia', a cargu de María Belén San Pedro, profesora del Departamentu de Ciencies de la Educación de la Universidá d’Uviéu y investigadora.

Adxuntu	Tamañu
programa_dactividaes_de_les_xornaes_espardimientu_ya_impactu_de_la_llingua_asturiana.jpg	275.58 KB

El RIDEA y el SFA entamen un ciclu de conferencies

'Los estudios filolóxicos asturianos, güei' ye'l títulu d'esta iniciativa que principia'l xueves.

Ramón d'Andrés, coordinador del Seminariu de Filoloxía Asturiana (SFA) de la Universidá d'Uviéu, ye'l responsable d'esti ciclu entamáu pol Real Instituto de Estudios Asturianos (RIDEA) que se compón de cuatro conferencies sobre filoloxía asturiana, una collaboración cultural novedosa y importante ente estes dos entidaes. La primer d'elles va celebrase'l xueves cola participación de Xulio Viejo, que va falar de los 'Procesos históricos nel espaciu llingüísticu asturiano-lleonés'.

"La conformanza histórica del asturiano-lleonés, algamando una determinada estensión xeográfica y afitando un conxuntu peculiar de trazos llingüísticos, ye un procesu directamente relacionáu col vertebramientu territorial y políticu d’un reinu", apunta'l programa sobre la conferencia de Viejo, que va celebrase, al igual que'l restu, a les 19.30 hores na sede del RIDEA (Palaciu Conde Toreno, Uviéu). La entrada ye llibre hasta completar aforu.

Restu d'intervenciones

Los protagonistes del restu d'intervenciones, que van desendolcase nos trés siguientes xueves, son les siguientes:

• 'La frontera xeográfica del asturianu pel occidente', de D'Andrés (3 de marzu): "Novedoses aportaciones al estudiu de la llende llingüística ente l’asturianu y el gallegu, apoyaes nun proyectu d’investigación ellaboráu nel occidente d’Asturies".
• 'Los entamos históricos de la lliteratura en llingua asturiana', de Xuan C. Busto (10 de marzu): "Nuevos datos sobre los periodos iniciales de la lliteratura n’asturianu, de magar naz en 1639 hasta que s’espubliza’l primer llibru impresu en 1839".
• 'Trescalar la penumbra de lo estranxero: teoría y práctica de la traducción en Fernán Coronas y testos nuevos', d'Antón García (17 de marzu): "Fernán Coronas, el Padre Galo, amás de poeta n’asturianu, desendolcó un interesante llabor de traductor a esa llingua (dende l’alemán y l’italianu) y al castellanu (dende’l xaponés). Esta xera, poco conocida, ilústrase con testos nuevos acabante descubrise. Analízase tamién la traducción como actividá histórica de la lliteratura n’asturianu".

Fonte:asturies.com

Adxuntu	Tamañu
ciclu_de_conferencies_del_ridea_los_estudios_filoloxicos_asturianos_guei.pdf	519.22 KB

El SFA y el RIDEA homenaxearán al filólogu Manuel Menéndez los díes 28 y 29 d'ochobre

Manuel Menéndez (1909-1962)

   El SFA y el RIDEA homenaxearán al filólogu Manuel Menéndez los díes 28 y 29 d'esti mes d’ochobre con dos xornaes d’estudiu dedicaes a la so figura, al cumplise de recién el 50 cabudañu de la so muerte. El Seminariu de Filoloxía Asturiana (SFA) de la Universidá d'Uviéu y el Real Institutu d’Estudios Asturianos (RIDEA) van desenvolver les dos sesiones na Sala de Conseyos del Departamentu de Filoloxía Española (Campus d’El Milán, Uviéu) y nel Salón d’Actos del RIDEA (Pza. Porlier, Uviéu).

    L'Homenaxe celebrase estos dos díes cola figura del filólogu Manuel Menéndez García (1909-1962), autor de la perconocida monografía "El Cuarto de los Valles. Un habla del occidente asturiano", como referencia.

Les dos xornaes van llevar el títulu de «Manuel Menéndez y l’Asturias occidental mediu sieglu depués».

   Les sesiones van facese na Facultá de Filosofía y Lletres y na sé del RIDEA na Plaza Porlier d’Uviéu, y tendrán secciones dedicaes a la dialectoloxía, etnografía y historia, con una sesión específica d’homenaxe al filólogu.

   Les Xornaes van zarrase cola presentación de dos llibros inéditos del llingüista homenaxáu: Toponimia, refranes y conjuros y Palabras y cosas de Bermiego.

   Manuel Menéndez (1909 - 1962) foi una de les figures más destacaes de la Llingüística y Dialectoloxía Asturianes del sieglu XX. Recordáu sobre manera pol so modélicu llibru sobre la fala d’El Cuarto de los Valles, punxo tamién el so interés nel estudiu de la cultura popular y la historia de l’Asturies occidental. Foi un representante xenuín del asturianismu intelectual que Juan Ignacio Ruiz de la Peña llamó «xeneración de Valdediós».                                                              Fonte: asturnews.com

El SFA y el RIDEA homenaxearán al filólogu Manuel Menéndez

Sedrá a fines del próximu mes d’ochobre con dos xornaes d’estudiu dedicaes a la so figura

   Al cumplise de recién el 50 cabudañu de la so muerte, el Seminariu de Filoloxía Asturiana (SFA) de la Universidá d'Uviéu y el Real Institutu d’Estudios Asturianos (RIDEA) van celebrar a fines del próximu mes d’ochobre dos xornaes d’estudiu dedicaes a la figura del filólogu Manuel Menéndez García (1909-1962), autor de la perconocida monografía "El Cuarto de los Valles. Un habla del occidente asturiano".

 

   Les dos xornaes van llevar el títulu de «Manuel Menéndez y l’Asturias occidental mediu sieglu depués». Les sesiones van facese na Facultá de Filosofía y Lletres y na sé del RIDEA na Plaza Porlier d’Uviéu, y tendrán secciones dedicaes a la dialectoloxía, etnografía y historia, con una sesión específica d’homenaxe al filólogu.

   Les Xornaes van zarrase cola presentación d'un volume onde se recueyen importantes materiales inéditos de la so obra investigadora.                                                                                                     Fonte: Asturnews.com