Concentración: Stop llingüicidiu

El delegáu del Gobiernu en funciones del PP vuelve atacar los derechos llingüísticos d’Asturies. Igual que nes últimes vegaes, l’oxetivu del so ataque son los fundamentos mesmos de la esistencia del idioma: l’usu llibre de la llingua d’unos vecinos y vecines cola so Alministración más averada decidíu democráticamente.

Gabino de Lorenzo requier al Conceyu de Noreña pa qu’anule la ordenanza d’usu del asturianu, aprobada recién. Nuna argumentación tautolóxica y falsera niega que l’asturianu pueda usase con normalidá pol Conceyu y los sos ciudadanos y ciudadanes por nun ser oficial, cuando otres veces afirma que nun pue ser oficial hasta que nun s’use con normalidá. Esti círculu viciosu ye un intentu claru y desesperáu d’acabar cola llingua tarazando los pocos pero firmes avances que tán faciéndose nos conceyos nel camín hacia la normalización y hacia la oficialidá.

Pa denunciar esti esterminiu planificáu del nuesu idioma, la Xunta pola Defensa de la Llingua Asturiana convoca una

CONCENTRACIÓN

EL LLUNES 25 DE XUNETU A LES 12:00

DELANTRE DE LA DELEGACIÓN DEL GOBIERNU D’ESPAÑA
(Plaza España, Uviéu)

Llamamos a tolos asturianos y asturianes, a toles organizaciones polítiques y sindicales, a representantes na Xunta Xeneral y nos conceyos a xuntase con nós esi día pa dici-yos lo más enérxicamante que séamos quién que queremos la nuesa llingua reconocida llegalmente cola OFICIALIDÁ, queremos poder usar la nuesa llingua con LLIBERTÁ y NORMALIDÁ. En definitiva QUEREMOS PODER VIVIR N’ASTURIANU.

Fonte: XDLA

Énte l’anulación pol gobiernu español de les Ordenances del asturianu de Noreña

La responsabilidá d’esti nueu actu de represión llingüística nun ye solo del PP-PSOE. Los collaboracionistes son tan responsables comu los represores.

Cuandu yá mos falten pallabres pa responder a la represión sistemática que se vive nel nuesu país, N’AST quier denunciar que les responsabilidaes nun son namás de los qu’exercen la represión direutamente, sinon de toos aquellos que collaboren con ellos, concretamente IU que tuvo nes sos manes el gobiernu del “Principado” y cambió la Oficialidá de la nuesa llingua por puestinos y perres, pero tamién de un Foro que diz ser favoratible a la oficialidá y nun fain un res, o un Podemos que non solo nun fai ná, sinon qu’usa’l tema llingüísticu comu argumentu propagandísticu.

La represión de la nuesa llingua nacional nun finará metantu nun-yos suponga un costu políticu a los represores. Les carencies democrátiques del Estáu español, especialmente nuna Asturies con una istitución, el “Principado”, y un Estatutu autonómicu impuestos dende Madrid, permiten la continuidá d’esta situación represiva, polo que se frai preciso un cambiu nes táutiques emplegaes fasta agora por un movimientu llingüísticu domeñáu en bona midía poles llinies polítiques marcaes dende los mesmos partíos collaboracionistes, esculpiando les sos responsabilidaes y tracamundiando l’oxetivu básicu, la reconocencia de los drechos llingüísticos de los asturianos, por oxetivos secundarios que nun van acullá de discretes meyores na situación d’asimilación colonialista que carez el nuesu país.

Tamos fartos de posturéu, de que s’use la defensa de la llingua asturiana y de los drechos de los asturianos cenciellamente comu material publicitariu y qu’a la hora de la verdá nun se reconozan drechos ellí onde los que dicen defender la Oficialidá cunten col poder políticu (Ayuntamientos onde IU, Podemos ya Foro tan nel gobiernu). Desiximos el fin de la collaboración colos partíos antidemocráticos que nun respeten p’Asturies los drechos humanos internacionalmente reconocíos, y denunciamos a tolos que collaboren d’una forma o otra con ellos, comu responsables del caltenimientu d’esta situción.

Ello asina, N’AST fai un llamamientu a la reactivación de la llucha en defensa de los drechos llingüísticos, de denuncia de los responsables direutos de la represión de la nuesa llingua, y de toos aquellos que collaboren colos mesmos.                              

Fonte: N’AST

Delegación de Gobiernu requier l'anulación de les ordenaces del asturianu en Noreña

Gabino De Lorenzo, el Delegáu del Gobiernu n'Asturies, mandó al Conceyu de Noreña un requerimientu d'anulación del alcuerdu pol que s'aprobaron les ordenances d'usu del asturianu nel conceyu.

El consistoriu recibió un requerimientu d'anulación del alcuerdu plenariu pol que s'aprobaron les Ordenances d'Usu de la Llingua Asturiana nel Conceyu de Noreña. Nel escritu de Delegación de Gobiernu consideren qu'entrepasa les competencies del conceyu según la llexislación vixente ya que según la so opinión nun se pue dicir que l'asturianu ye la llingua propia de Noreña (art.1.1), que les comunicaciones orales o escrites n'asturianu de los y les ciudadanes col Ayuntamientu nun puen ser válides llegalmente (art.4.1) y que nun se puen redactar actes n'asturianu, amás d'en castellanu (art.8).

Los grupos municipales que nel so día aprobaron les ordenances (IPÑ, CA NOREÑA, IU-IX y FORO) consideren qu'esti requerimientu nun se sostién xuridicamente per dengún llau, indiquen que precisamente eses trés cuestiones tan avalaes de recién por un informe xurídicu del Principáu ante un casu perasemeyáu nel Conceyu de Carreño y califiquen esta actuación como un ataque políticu contra l'asturianu y los derechos llingüísticos dientro de la so estratexa asturfóbica y etnocida.

Conocíu el requerimientu, consideren que va contra la voluntá democrática del Conceyu Noreña surdía del Plenu y en contra de les competencies propies. Nes Comisiones d'ayeri pidióse que'l Conceyu Noreña solicitare un informe sobre la llegalidá d'eses trés cuestiones a la Dirección Xeneral de Planificación Llingüística y Normalización de la Conseyería d'Educación y Cultura, amás de comunicar el requerimientu a l'Academia de la Llingua Asturiana, institución del Principáu que tien ente les sos finalidaes "velar polos drechos llingüísticos asturianos" por si fuera en contra d'estos.

El conceyal Toño Martínez (Conceyu Abiertu por Noreña) considera qu'el requerimientu nun tien base llegal y que una vez recibíu l'informe dende Planificación Llingüistica, que suponen siguirá la mesma llínia favoratible que'l fechu pal Carreño, decidiran nun anular la ordenaza y esperar a ver si dende Delegación presenten un contenciosu alministrativu. Martínez quixo destacar que les ordenances nun tuvieron alegaciones nel so plazu y que funcionen con normalidá.

Conocíu esti requerimientu dende l'Academia de la Llingua Asturiana  (ALLA) fixeron un comunicáu onde califiquen esta petición como "nuevu allugamientu anti-asturianu"  del Delegáu de Gobiernu. L'ALLA considera que "la igua d’estes situaciones namái pasa pol reconocimientu de la oficialidá de la llingua histórica del pueblu asturianu" y pide a los grupos parllamentarios que "sofiten esti procesu de reconocimientu xurídicu del asturianu y qu'actuen afalando calces de dignificación y de planificación llingüística que, acordies col marcu normativu vixente enconten l’usu del asturianu en tolos ámbitos."

Tamíen dende Iniciativa pol Asturianu quixeron "condergar esti ataque a l'autonomía de los conceyos pa establecer midíes de normalización del asturianu", consideren que con esta mediá "oculta cola apariencia d'una decisión xurídica lo que nun ye más qu'un nuevu intentu de da-y un güelpe más al asturianu" y piden al  Conceyu de Noreña que "se nieguen a acatar esta sentencia y que sigan la llucha nos tribunales hasta acabar toles posibilidaes." Fonte: Asturies.com

Adxuntu	Tamañu
reclamacion_delegacion_norena_1_3.jpg	87.48 KB
reclamacion_delegacion_norena_2_3.jpg	84.68 KB
reclamacion_delegacion_norena_3_3.jpg	52.5 KB
iniciativa_pol_asturianu_nota_prensa_delegacion_ordenances_norena.pdf	108.88 KB
alla_nota_de_prensa_asturianu_en_norena.pdf	87.33 KB

"Les ordenances tamién van valir p'aumentar l'autoestima de los ciudadanos", asegura Martínez Fernández

• por Pablo R. Guardado

El Plenu de Noreña aprobó na tarde del xueves les ordenances d'usu del asturianu nel conceyu, presentada por Conceyu Abiertu. El testu contó col apoyu de tolos grupos municipales, cola oposición única del PSOE y PP, formaciones que votaron en contra.

"Tamos mui contentos por contar con una mayoría a favor de la ordenanza, anque la postura del PSOE y del PP dexen un mal saborgu de boca. Yeremos más optimistes con respeuto al PSOE, que n'otros conceyos del país aprueba y inclusive propón testos similares, anque finalmente nun optó nin por astenese", apunta Antonio Martínez Fernández, edil de Conceyu Abiertu por Noreña. Sicasí, les 'Ordenances municipales pal usu de la llingua asturiana nel conceyu de Noreña' salieron alantre por una mayoría amplia de 9 votos a favor y 4 en contra gracies a los apoyos d'IPÑ (4), IX (2) y Foro (1), amás de los dos conceyales de la candidatura de xunidá popular.

Ésta yera la segunda propuesta d'ordenances que facía la formación nacionalista, quedando la primera torgada nel 2012 pola oposición del PSOE, daquella nel gobiernu, y d'Ideas. "Nesta ocasión presentamos un testu más amable, más entendible p'aquelles persones nun avezaes al asturianu", señala Martínez Fernández, que recuerda que naquella ocasión viéronse obligaos a presentar les ordenaces per vía d'urxencia por decisición el alcalde César Movilla, agora na oposición.

Precisamente Movilla amosó una postura d'ataque al asturianu nel alderique del Plenu previu a la votación. Asina afirmó que la ordenanza "nun ye una prioridá" y "pasa perriba del estatutu", comparándola con una cooficialidá. D'igual forma, denunció que "carez d'informes téunicos, xurídicos y económicos que la xustifiquen".

Esti mesmu argumentu utilizólu la vocera del PP, Marian Velasco, que señaló que "la ordenanza afita derechos pa unos pero deberes pa otros". "Si s'analiza artículu per artículu, esta normativa que vustedes proponen ye nula de plenu derechu", añadió la popular.

Inaciu Iglesias, edil de Foro y nel equipu de gobiernu, defendió con firmeza la ordenanza propuesta y recordó a los conceyales del PSOE y PP que "nun tamos falando d'oficialidá en nengún casu. Eso ye asustar a la xente", y señaló que'l testu "nun va suponer costu nengún" y sí "va garantizar los derechos de los ciudadanos".

Mentes, Ana González, d'Independientes por Noreña (IPÑ) defendió'l cambiu de votu con respeuto al 2012, cuando la formación s'astuvo. Nesta ocasión sofítalo por ser "más cenciello pa permitir la so eficacia". Poco depués, Movilla acusaría a esta formación de modificar la so postura "a fin de mantener, a base de lo que sía, l'alcaldía y l'equipu de gobiernu".

"Normalizar lo que ye normal"

L'aprobación de les 'Ordenances municipales pal usu de la llingua asturiana nel conceyu de Noreña', qu'agora entren nuna fase d'esposición pública mientres un mes pa la presentación de posibles alegaciones' van "normalizar lo que ye normal", apunta Martínez Fernández. Asina va regular l'usu del idioma tanto nel planu institucional como nes comunicaciones de les persones de Noreña col Conceyu".

"Va aumentar la autoestima de los ciudadanos no que respeuta al usu del idioma", añade l'edil de Conceyu Abiertu por Noreña, que refuga "la politización" que fixeron PSOE y PP d'esti asuntu.

Na semeya, Martínez Fernández vota a favor de les ordenances xunto col so compañeru Pablo Pérez Fonseca.

Fonte: Asturies.com

Noreña estrena indicadores en llingua asturiana nel ayuntamientu

por Pablo R. Guardado

El Conceyu de Noreña ta d'estrena. Les dependencies municipales yá llucen cartelos n'asturianu que señalicen los distintos llugares del mesmu. Conceyu Abiertu por Noreña tien presentao una propuesta pa unes ordenances d'usu del idioma.

Asina, según les semeyes que colgó l'edil Inaciu Iglesias na rede social Facebook, les conceyalíes, les sales, el Rexistru y la secretaría o los baños tán señalizaos yá n'asturianu. "Coses pequeñes que cuesten bien poco y presten abondo", apuntó'l conceyal de Foro satisfechu por esta iniciativa.

Conceyu Abiertu por Noreña presentara a primeros de marzu nel Rexistru Municipal una propuesta d'Ordenances Municipales pal Usu de la Llingua Asturiana nel Conceyu Noreña. "Con elles esperamos por fin asegurar, nel ambitu del nuesu conceyu y dientro de les competencies municipales, la efectividá de los derechos llingüísticos que la llexislación otorga a los ciudadanos y ciudadanes residentes n'Asturies, asina como tamién el cumplimientu de los Derechos Humanos", espresaben dende la candidatura de xunidá popular.

D'igual forma, cuenten tamién qu'estes ordenances sirvan pa "promover y normalizar el usu d'una llingua milenaria, un patrimoniu cultural de valos incalculable del pueblu asturianu y por tanto de tolos y toles noreñeses". La organización nacionalista confía en que la so aprobación "sía por unanimidá".

Semeyes d'Inaciu Iglesias.

Fonte: Asturies.com