Noreña estrena indicadores en llingua asturiana nel ayuntamientu

por Pablo R. Guardado

El Conceyu de Noreña ta d'estrena. Les dependencies municipales yá llucen cartelos n'asturianu que señalicen los distintos llugares del mesmu. Conceyu Abiertu por Noreña tien presentao una propuesta pa unes ordenances d'usu del idioma.

Asina, según les semeyes que colgó l'edil Inaciu Iglesias na rede social Facebook, les conceyalíes, les sales, el Rexistru y la secretaría o los baños tán señalizaos yá n'asturianu. "Coses pequeñes que cuesten bien poco y presten abondo", apuntó'l conceyal de Foro satisfechu por esta iniciativa.

Conceyu Abiertu por Noreña presentara a primeros de marzu nel Rexistru Municipal una propuesta d'Ordenances Municipales pal Usu de la Llingua Asturiana nel Conceyu Noreña. "Con elles esperamos por fin asegurar, nel ambitu del nuesu conceyu y dientro de les competencies municipales, la efectividá de los derechos llingüísticos que la llexislación otorga a los ciudadanos y ciudadanes residentes n'Asturies, asina como tamién el cumplimientu de los Derechos Humanos", espresaben dende la candidatura de xunidá popular.

D'igual forma, cuenten tamién qu'estes ordenances sirvan pa "promover y normalizar el usu d'una llingua milenaria, un patrimoniu cultural de valos incalculable del pueblu asturianu y por tanto de tolos y toles noreñeses". La organización nacionalista confía en que la so aprobación "sía por unanimidá".

Semeyes d'Inaciu Iglesias.

Fonte: Asturies.com

Unanimidá pa unes ordenances d'usu del asturianu nel plenu d'Uviéu

Casa Conceyu d'Uviéu La organización Iniciativa pol Asturianu denunciare énte'l propiu Conceyu d'Uviéu y la Procuradora Xeneral d'Asturies el casu de discriminación vivíu por un miembru de la so directiva, que según esplicaron "foi obligáu a presentar un documentu en castellán nel rexistru del Conceyu, prohibiéndo-y presentalu n'asturianu". El casu, tresmitíu a les fuercies polítiques con representación nel plenu fizo surdir una propuesta d'Izquierda Xunida qu'esti vienres aprobaron por unanimidá PP, Foru, PSOE ya IX, y pola que se decidió redactar unes ordenances d'usu del asturianu qu'eviten más casos como esti y fomenten l'usu del asturianu nel conceyu que ye capital d'Asturies. Dende Iniciativa pol Asturianu celebren "el consensu xeneráu alredor del asturianu", anque anuncien que tarán "sollertes al cumplimientu de lo aprobao nel plenu d'esti vienres pasáu". Recuerden que "la situación del asturianu nel conceyu d'Uviéu ye de nula presencia per parte de l'alministración municipal" y qu'Uviéu "ye unu de los conceyos asturianos onde menos pasos se dieron hasta agora, y qu'ente otres cuestiones, tien pendiente l'aprobación de la toponimia tradicional como oficial, como yá ficieron una gran mayoría de los conceyos asturianos, incluyendo cásique tolos más poblaos, como Xixón, Avilés, Llangréu, Mieres, Siero o Castrillón", espliquen. Iniciativa pol Asturianu unvió una comunicación a tolos conceyales uvieínos felicitándolos pola so decisión del vienres pasáu y animándolos a siguir dando más pasos a favor del asturianu, asina como ufriéndose a asesor en cuestiones de normalización llingüística al equipu municipal y a la oposición. Fonte: Asturnews

Noreña va debatir les ordenances sobre l'usu del asturianu

Noreña va debatir les ordenances sobre l'usu del asturianu que propón Conceyu Abiertu

El Plenu del Conceyu de Noreña va debatir esti xueves, 26 de xunetu, la propuesta d'ordenanza pal usu de la llingua asturiana que presentó Conceyu Abiertu por Noreña a finales de mayu. D'entós p'acá, los grupos políticos tuvieron oportunidá d'estudiar el testu y presentar aportaciones a una propuesta que, a xuiciu de Conceyu Abiertu, ye «asumible perfectamente» por toles formaciones con representación nel Conceyu y «axustada a la llegalidá vixente».


La formación asturianista pretende que la norma sía aprobada por unanimidá de los grupos porque, na so opinión, «la llingua ye patrimoniu de tolos noreñenses, independientemente de la so ideoloxía». Por esti motivu, l'aprobación d'una norma local que reconoza los drechos llingüísticos de tolos ciudadanos, que regule'l so usu nel Conceyu y incluya midíes de promoción y normalización, como ye la que se propón, diba ser, en palabres de Conceyu Abiertu por Noreña, «amás d'un actu de dignificación de la llingua y cultura asturianes, un avance democráticu necesariu».

El testu que se va debatir empieza col reconocimientu del drechu de tolos vecinos del Conceyu de Noreña a usar l'asturianu y que les comunicaciones –orales o escrites– cola alministración local tengan la mesma validez que si foren en castellanu. Tamién s'afita la obligación del Conceyu de redactar toles comunicaciones, notificaciones y documentación alministrativa –como les actes del Plenu y les comisiones informatives– tanto n'asturianu como en castellanu, inclusive nes rellaciones con otres Alministraciones, como la central del Estáu o la Xunión Europea .

Ente les midíes de promoción y normalización del idioma, la propuesta d'ordenances recueye la publicación en castellanu y asturianu de tola publicidá que faiga'l Conceyu, l'usu del asturianu polos cargos públicos n'actos institucionales, la valoración del conocimientu de la llingua propia nes convocatories públiques d'empléu que supongan atención a la ciudadanía o la organización de cursos pa deprender y perfeicionar l'asturianu destinaos a los trabayadores municipales.

Fonte: Les Noticies

Conceyu Abiertu propón una Ordenanza pal usu del asturianu en Noreña

El conceyal d’esta formación nel conceyu condal presentó una propuesta al restu de partíos col oxetivu d’intentar que s’apruebe por unanimidá.

Conceyu Abiertu por Noreña presentó-yos al restu d’organizaciones polítiques del conceyu (PSOE, IPÑ, PP, FDLI, FAC ya IDEAS) una propuesta d’Ordenanza municipal pal usu de la llingua asturiana nel Conceyu de Noreña pa que la puean estudiar y facer propuestes de cara a llevala a los órganos de decisión del conceyu nes próximes selmanes. La propuesta tien como referencia otres ordenances d’usu del asturianu vixentes anguaño n’otros conceyos asturianos.

Conceyu Abiertu por Noreña espera poder aconceyar con representantes de toles organizaciones, “de cara a recoyer les sos impresiones y propiciar l’aprobación d’una ordenanza por unanimidá”, espliquen. D’aprobase, esta sedría la primer vegada que Noreña se dote d’una normal llocal sobre la llingua propia del conceyu, se reconozan los drechos llingüísticos de tolos vecinos y vecines, se regule l’usu nel ayuntamientu y dalgunes midíes de promoción y normalización. Ye por ello que dende Conceyu Abiertu albidre que “sedría preferible aprobalo tolos grupos, siendo amás la llingua patrimoniu de tolos noreñenses independientemente de la so ideoloxía”.

Mientres los últimos meses, espliquen, “en Conceyu Abiertu por Noreña venimos estudiando les ordenances sobre l’asturianu vixentes n’otros conceyos d’Asturies, de cara a llevar alantre esti puntu del nuesu programa elleutoral”.

Recuerden la necesidá d’estes ordenances con un casu asocedíu va unos meses, cuando pa Conceyu Abiertu “volvió a vese claramente nel conflictu llingüísticu que se vivió en Noreña a finales del añu pasáu”, en referencia a la negativa del alcalde a almitir mociones n’asturianu y el rechazu a una propuesta posterior de solución provisional, que presentaron dende Conceyu Abiertu.

Aquella polémica fizo que l’Academia de la Llingua Asturiana amosara’l so descontentu pola actuación del alcalde, xunto a otres organizaciones de defensa de la llingua y cultura asturianes.

Conceyu Abiertu alvierte que presenta “unes ordenances axustaes a la llexislación vixente y asumible por tolos grupos municipales y pol propiu gobiernu municipal (PSOE-IDEAS)” y recuerden que’l PSOE “tien aprobao ordenances d’esti tipu n’otros conceyos asturianos”, recordando amás que “les ordenances nun supondríen un coste económicu al Conceyu, dependiendo gran parte de les actuaciones de la voluntá política y que tres aprobala, diría poniéndose en práutica paulatinamente, según los medios disponibles”.

Pa la formación nacionalista “l’aprobación de la ordenanza, amás de ser un actu de dignificación de la llingua y cultura asturianes, supón un necesariu avance democráticu”.

Fonte: Asturnews