Un senador de Compromís respuende en lleonés al presidente de la Diputación de Lleón

• por Pablo R. Guardado

Carles Mulet respuende asina al presidente de la Diputación de Lleón, el popular Juan Martínez Majo, que s'indignó pol usu del valencianu na Cámara alta. Nun videu esplicativu, el senador de Compromís sofita la oficialidá del lleonés, usándo tamién el glotónimu "asturianu" pa referise a la llingua común d'Asturies y Lleón.

Tres facer referencia a Martínez Majo, "quien durante'l pasáu Plenu amuelaba-y muito que se pudiera falar valencianu nel Senáu", señaló que "a min, per contra, amuelame bien que nun se respete las llinguas y culturas de los territorios d'España". Darréu apuntó que-y prestaría "qu'esa persona s'esforciara n'algamar la oficialidá del llionés na sua provincia, comunidá autónoma y ayuntamientu; qu'alzara la voz nel seu propiu partíu onde se niegan a llexislar sobre la llingua lleonesa" pese a los mandaos del estatutu de Castilla y Lleón y del Conseyu d'Europa.

Comprómís colgó un videu na rede na que'l propiu Mulet esplica los motivos que-y llevaron a emplegar el lleonés na so intervención d'ayeri y pidió disculpes sobre posibles errores de pronunciación al nun saber l'idioma. "Esperamos qu'esto sirva p'ayudar a algamar la oficialidá del lleonés; del asturianu", afirma nel mesmu.

Fonte. Asturies.com

BARTOLOMÉ PÉREZ FALA DEL LLEONÉS N'ACTUALIDÁ

Asturies.com ufre una charra de Bartolomé Pérez sobre la situación del lleonés n'actualidá

Setiembre 25, 2013 por Redacción

   

   L’abogáu lleonés y presidente de l’Asociación Cultural Faceira, Nicolás Bartolomé Pérez, espuso en xunu en Xixón ‘La situación del llionés dientro del dominiu llingüísticu ástur’. Asturies.com ufre agora esta charra a los sos llectores.

 

   Faceira ye una de les cinco asociaciones de defensa d’asturlleonés que presentaron recién a les Cortes de Castilla y Lleón un escritu nel que reclamen el cumplimientu del artículu 5.2 del Estatutu d’Autonomía,  “desenvolviendo una llei y una política llingüística que garantan la protección del llionés y la súa enseñanza”. 

   Bartolóme Pérez, el so presidente, tuvo en xunu nel Atenéu Obreru de Xixón nuna xornada entamada por Ásturadedicada al lleonés pa falar de la situación del idioma y presentar el so llibru ‘Mitoloxía popular del Reinu de Ḷḷión’ –con ilustraciones de Alberto Álvarez Peña–, actividá a la que’l coleutivu tamién convidó a Fran Allegre pa dar a conocer la so producción lliteraria y musical.

 

   Nesti videu qu’ufre agora Asturies.com, los llectores van poder conocer de boca del académicu la situación actual del idioma al sur del cordal al traviés de datos, cifres y testimonios, asina como l’actitú que caltienen los partíos políticos hacia ella y cómo se recueye la so esistencia nel Estatutu d’Autonomía.

 

Morrió Severiano Álvarez

 

El llunes finó Severiano Álvarez (Cuevas del Sil, 1933), autor decanu de les lletres lleoneses. L'escritor, de 80 años, yera un gran defensor del idioma y escribiera obres como 'Cousas de aiquí' o 'La gota d'augua'.

 

 Fonte  Asturies.com

L'asturianu más cerca de ser definíu como llingua nel Diccionariu de la llingua catalana

Un momentu del conceyu nel IEC

El miércoles pasáu, 10 d’ochobre, Inaciu Galán, presidente d’Iniciativa pol Asturianu foi recibíu nel llar de la Secció Filològica del l’Institut d’Estudis Catalans (IEC), l’academia de la llingua catalana, en Barcelona. Nel conceyu, Galán presentó l’informe “Definir el términu “asturianu” con xeitu. Informe sobre la presencia del vocablu “asturianu” y otros términos nos diccionarios normativos d’otres llingües”, que solicitá al IEC un cambiu na definición de los términos “asturià”, “lleonès” y “bable” nel so diccionariu, onde nun apaecen definíos a les clares como idioma. La respuesta de los miembros del IEC foi, según espliquen dende la organizaión "bien positiva" y anque esta enmienda ha pasar entá pel procesu correspondiente, "la disposición del Institut pa esti cambiu foi absoluta".

Nel conceyu participaron Lluïsa Castellón, Secretaria de la Secció Filològica, que disculpó l’ausencia del Presidente por tar asistiendo a un congresu en Girona, y Carolina Santamaria, Xefa de les Oficines Lexicogràfiques, que s’encarguen de la redacción y el caltenimientu del Diccionari de la llengua catalana. Nel mesmu falóse de la situación del asturianu y de la necesidá de reconocimientu de la llingua d’Asturies en tolos contestos posibles dientro y fuera d’Asturies y del restu de territorios onde ye llingua propia. Amás, Galán esplicó l’actividá d’Iniciativa pol Asturianu y dalgunos fechos hestóricos na rellación ente les llingües catalana y asturiana, como la primer torna del catalán al asturianu, que ye del sieglu XIX, o la gran cantidá de tornes feches ente les dos llingües nes décades últimes, ente otres cuestiones.

Iniciativa pol Asturianu califica esti conceyu como "mui positivu" y agradeció "la disposición del IEC pa cola so reclamación". Dende la organización camiente qu'"el reconocimientu del asturianu como llingua nos diccionarios d’otres llingües cercanes ye perimportante pal futuru del idioma, pues estos diccionarios son referencia pa millones de falantes d’otres llingües y que l’asturianu apaeza como lo que ye, un idioma, xenera un conocimientu más real sobre la situación de la llingua asturiana".

Darréu del conceyu ente miembros del IEC y el presidente d’Iniciativa pol Asturianu, convidóse al representante asturianu a facer una visita guiada per toles instalaciones del edificiu del Institut, esplicando’l funcionamientu del mesmu, asina como la hestoria d’esta entidá fundada en 1907.

Esta ye la segunda ocasión en qu’Iniciativa pol Asturianu solicita a una academia’l cambiu de la definición del términu “asturianu” d’un diccionariu. La primer petición elevóse a la Real Academia Española, que respondió a la organización asturiana que va estudiar el cambiu nel so diccionariu dientro de la so Comisión de Lesicografía. L’informe que se presentó a caúna de les entidaes llingüístiques inclúi un llistáu de sofitos firmáu por profesores y caderalgos del ámbitu de la filoloxía, pertenecientes a diez universidaes del mundu enteru.

Fonte: asturnews
Más info: IEC, Diccionariu IEC

Faceira asoleya "Xurdir. Guía gramatical de Leonés"

Faceira asoleya una guía gramatical de lleonés. L'Asociación Cultural Faceira publica'l llibru “Xurdir. Guía gramatical de Leonés”, que pretende ufiertar un preséu prácticu pa conocer los elementos esenciales de la gramática lleonesa. La obra estructúrase en dieciocho capítulos onde se sinteticen de manera rigorosa cuestiones ortográfiques, morfolóxiques y sintáctiques, cuenta con abondosos exemplos qu'ilustren les esplicaciones, y complétase con una amplia bibliografía que recueye los principales estudios llingüísticos realizaos sobre la variedá lleonesa del asturianu. Esti manual ye, según espiiquen dende Faceira “un trabayu imprescindible mesmo p'aquellos que s'interesen pol lleonés como para quien quieren empecipiase nel estudiu d'esta llingua”. Con esta obra Faceira inaugura la colección Biblioteca Llionesa na que se van dir publicando obres sobre'l lleonés y llibros redactaos nesti idioma. Xurdir va presentase esti vienres 6 de xunetu, a les 20:00 hores, nel Salón Región del Institutu Lleonés de Cultura (Cai Santa Nonia 3, Llión) y nel marcu de les II Xornaes de Patrimoniu Llingüísticu qu'entama El Teixu. Rede pal estudiu y defensa de la llingua asturllionesa. Fonte: Asturnews.