'A la gueta los sueños' festexa la Navidá con un reportaxe sobre esta celebración y cola estrena de la seición ‘El requexu de los escolinos’

Paula 5 años de Villamayor y L'Anguleru

     Avérase la Navidá y con ella llega tiempu d’estrenos en ‘A la gueta los sueños’. Asina, los usuarios d’esta revista dixital infantil van poder conocer el significáu de la celebración y les tradiciones d’estes feches nun reportaxe, asina como disfrutar d’una seición nueva, ‘El requexu de los escolinos’, con un especial sobre L’Anguleru con dibuxos de neños y neñes de Piloña, Tinéu y Castrillón.

   L’orixe de la celebración, la cena de Nuechebona, el nataliegu, L’Anguleru, la tradición de los regalos, los villancicos, los aguilandos o mazcaraes d’iviernu y el Día de Reis son los temes que toca esti reportaxe sobre la Navidá. Nella pues amás atopar imáxenes rellatives, videos y enllaces colos que completar la información y sorprender mañana a los tos familiares colos tos conocimientos sobre esta fiesta.

   Esta xornada previa a Nuechebona aprovechamos tamién pa inaugurar ‘El requexu de los escolinos’ una estaya nueva onde podrán vese dibuxos y testos fechos pola reciella. Como nun podía ser d’otra forma, L’Anguleru protagoniza’l primer especial d’esta estaya, nel que collaboraron con nós neños y neñes de Piloña, Tinéu y Castrillón, a los que se sumarán mañana pequeños de Roces (Xixón). Si quies apurrinos los tos dibuxos o testos dedicaos a L’Anguleru –u otros sobre la temática que más te preste– pa que salgan en ‘El requexu de los escolinos’ pues facelo na direición de corréu electrónicu redaccion@asturies.com. D’igual forma, esti espaciu tamién ta abiertu a tolos trabayos que se faigan en clase de Llingua Asturiana y Gallego-asturiano y que los maestros y alumnos quieran compartir con nós y toda la comunidá que forma ‘A la gueta los sueños’.       Fonte: asturies.com

III Concursu de Narraciones Curties de Piloña

III CONCURSU DE NARRACIONES CURTIES "Conceyu Piloña"
El Conceyu de Piloña, axuntando los bonos puxos pol xorrecimientu del asturianu oriental entamaos pol periódicu del Oriente "EL FIELATO" y pola CAXA RURAL de L'INFIESTU, convoca'l Tercer Concursu de Narraciones Curties "Conceyu de Piloña", d'acordies coles siguientes

BASES
1/ El primer premiu ta dotáu con 1.000 euros y el segundu con 700 euros. Tales cantidaes podrán dividise en dos partes iguales si al xuráu-y cuaya. El premiu pue ser declaráu ermu, si la calidá de los trabayos nun aportase l'altor necesariu.
2/ Presentase a esti concursu ye llibre pa toles persones que quieran. La obra ha ser rigorosamente inédita, non premiada anteriormente, nin suxeta a compromisu nengún d'edición.
3/ El xuráu tará escoyíu ente persones arreyaes al ámbitu de la llingua o la lliteratura asturiana.
4/ Los trabayos tarán escritos en llingua asturiana, nun tendrán menos de tres fueyes nin más de cinco per un solu llau, en lletra de cuerpu 12.
5/ Los trabayos entregaránse o unviaránse anantes del 12 de xunu de 2010 al Conceyu de Piloña, C/ Covadonga, númberu 9, L'Infiestu, códigu postal númberu 33530 , en dos sobres zarraos nos que s'escribirá per fuera "III Premiu Conceyu Piloña de Narraciones Curties", faciendo constar el títulu del trabayu y el nomatu l'autor. Nun sobre enxertaránse tres copies del trabayu y nel otru los datos del autor y númberu del teléfonu de contautu. Puen mandase pel corréu, pero nun van almitise los que lleven nel matasellos fecha posterior de la mentada enriba.
6/ El Periódicu "El Fielato" espublizará'l trabayu premiáu cuando lo xulgue oportunu. El Conceyu de Piloña atroca'l drechu d'espublizar los trabayos premiaos. Tamién podrá asoleyar les obres non premiaes, col acuerdu previu del autor.
7/ Los trabayos que nun se premien devolveránse-yos a les persones propietaries de les obres, si lo piden, al otru mes de dase a conocer el fallu. Depués d'esti plazu, el Conceyu nun tien obligación de guardalos.
8/ Los erros, tracamundios y omisiones qu'hubiere nestes bases, resolverálos el Conceyu. Escontra'l so determín nun cabe retrucar.
9/ El fallu del xuráu daráse a conocer nos medios de comunicación los primeros díes del mes de xunetu del 2010. El premiu entregaráse nun actu na Casa de Cultura'l vienres 16 de xunetu, a les 20 hores, onde les persones premiaes van lleer la so obra en públicu.
10/ Les persones que participen nesti concursu aceuten dafechu estes bases.

Fonte: Asturnews