Cursu 2017-2018 na Escolina de Reciella

A la Gueta los Sueños

Sigue abierta la prematricula pa neños y neñes de 0 a 6 años.

L'asociación de families pol asturianu Reciella entamó con esti proyectu educativu nel añu 2015 con unos 10 escolinos, y esti añu graduaronse cásique 40 nos sos grupos de Xixón, Candás y Uviéu.

Dende Reciella tan abiertos a abrir esta iniciativa a más conceyos si hai families interesaes. L'oxetivu ye formar grupos pequeños de neños y neñes de 0 a 6 años p'aprender asturianu demientres xueguen y socialicen con rapacinos de la so edá un día a la selmana.

Les families interesaes n'apuntase pueden facelo unviando un corréu a info@reciella.com.                                                                                                                                            Fonte: asturies.com

El videu del cantar ‘Entaína’ suma 10.000 reproducciones en menos de 48 hores

28 Setiembre, 201

Pablo R. Guardado

 El recibimientu del cantar ‘Entaína’, de Skama la Rede, ta siendo estraordinariu. En menos de 48 hores el tema que promociona’l Día de la Reciella y la carrera familiar pol asturianu del domingu yá suma más de 10.000 reproducciones na páxina de Facebook d’Asturies.com. “Tamos desbordaos con estes cifres”, asegura’l cantante Miguel Fernandi ‘Burilo’.

 Escueles de tol país tán proyeutando’l videu nes sos clases y inclusive pue vese nes pantalles de los autobuses municipales de Xixón. El videu de ‘Entaína’, realizáu por Pablo Quiroga d’Algamar Producciones, ta llegando a miles de persones en tol país, que queden cola lletra prestosa compuesta por David Guardado, miembru de ‘Reciella. Families pol Asturianu'.

 “Tamos desbordaos con estes cifres. Tamos flipándolo”, afirma Burilo, qu’apunta que dalgunos de los cantares de la banda en YouTube llleguen a les 25.000 reproducciones pero nun periodu más llargu de tiempu. “Amás, prestónos muncho facer la canción. Miembros de la banda sonlo tamién de Reciella y la grabación del videu colos guaḥes, que se portaron perbién, tamién foi mui prestosa”.

 La prueba en direuto col cantar resultó igualmente satisfactoria. “Tocámosla’l vienres en Santurtzi y a la xente gustó-yos, polo que tamos pensando incluyila ente los temes qu’interpretaremos nos conciertos próximos”, apunta’l vocalista de Skama la Rede. De momento, ta confirmáu ún en Morea’l día 8 y l’actuación nel XIII Asturies Nun Escaez de Sama qu’entama Darréu’l día 15.

Debú en ‘Bestiariu’

 ‘Entaína’ nun ye’l primer cantar infantil de Skama la Rede, que fixera una versión de ‘El coche’l maestru’ de Xentiquina pal discu homenaxe ‘Xentiquina Crew!’ (Algamar Producciones), y tampoco nun va ser el caberu. La banda ta trabayando nun cantar “qu’espero que nos quede igual de prestosu” pal segundu discu de ‘Bestiariu’, que va tar dedicáu “al cámbaru”, anuncia Burilo.

Fonte: asturies.com

Fonte: asturies.com

'A la gueta los sueños' festexa la Navidá con un reportaxe sobre esta celebración y cola estrena de la seición ‘El requexu de los escolinos’

Paula 5 años de Villamayor y L'Anguleru

     Avérase la Navidá y con ella llega tiempu d’estrenos en ‘A la gueta los sueños’. Asina, los usuarios d’esta revista dixital infantil van poder conocer el significáu de la celebración y les tradiciones d’estes feches nun reportaxe, asina como disfrutar d’una seición nueva, ‘El requexu de los escolinos’, con un especial sobre L’Anguleru con dibuxos de neños y neñes de Piloña, Tinéu y Castrillón.

   L’orixe de la celebración, la cena de Nuechebona, el nataliegu, L’Anguleru, la tradición de los regalos, los villancicos, los aguilandos o mazcaraes d’iviernu y el Día de Reis son los temes que toca esti reportaxe sobre la Navidá. Nella pues amás atopar imáxenes rellatives, videos y enllaces colos que completar la información y sorprender mañana a los tos familiares colos tos conocimientos sobre esta fiesta.

   Esta xornada previa a Nuechebona aprovechamos tamién pa inaugurar ‘El requexu de los escolinos’ una estaya nueva onde podrán vese dibuxos y testos fechos pola reciella. Como nun podía ser d’otra forma, L’Anguleru protagoniza’l primer especial d’esta estaya, nel que collaboraron con nós neños y neñes de Piloña, Tinéu y Castrillón, a los que se sumarán mañana pequeños de Roces (Xixón). Si quies apurrinos los tos dibuxos o testos dedicaos a L’Anguleru –u otros sobre la temática que más te preste– pa que salgan en ‘El requexu de los escolinos’ pues facelo na direición de corréu electrónicu redaccion@asturies.com. D’igual forma, esti espaciu tamién ta abiertu a tolos trabayos que se faigan en clase de Llingua Asturiana y Gallego-asturiano y que los maestros y alumnos quieran compartir con nós y toda la comunidá que forma ‘A la gueta los sueños’.       Fonte: asturies.com