Llaviana instala cartelos indicativos nuevos nos que s’emplega namái’l castellanu

• . El Plenu de Llaviana aprobará la ordenanza d’asturianu

Cartelos nuevos namái en castellanuen en Llaviana

  El Plenu de Llaviana aprobó por unanimidá la Ordenanza Municipal d’Usu de la Llingua Asturiana. El testu, que va pasar agora a esposición pública, incorpora una comisión de siguimientu que va axuntase de manera añal pa velar pol so cumplimientu.

 Cola ausencia d’un conceyal del PSOE, otru d’Izquierda Xunida (IX) y el de Foro, la ordenanza d’asturianu presentada pol equipu de gobiernu socialista salió alantre colos votos a favor de tolos grupos municipales, incluyíu’l Partido Popular (PP). Ésta nació d’un borrador propuestu pol ciudadanu llavianés René Durán, que Somos Llaviana presentó a toles fuercies.

 “Los primeros colos que nos reunimos foi con IX, que presentaron delles propuestes pal testu. Llueu, con estes modificaciones, axuntamos con Foro y el PP, que vieron bien el documentu, polo que quedó asina”, esplica Unai Castaño, voceru de Somos Llaviana. Tres el Plenu de febreru del 2016 l’equipu de gobiernu comenzó a trabayar col borrador presentáu, “pero quedó la cosa parada hasta finales d’añu”, recuerda.

 El martes, finalmente, aprobóse en Comisión el testu definitivu, “que ye’l que presentó’l PSOE con aportaciones del nuesu borrador”, y que s’aprobó de manera inicial ayeri nel Plenu. Agora, tres la próxima espublización nel BOPA pa la presentación de posibles alegaciones enantes, va tornar a la Casa Conceyu pa la so aprobación definitiva.

Satisfaición en Somos Llaviana

 “Tamos contentos, porque, pese a pequeños matices, incorpora les nueses propuestes. Lo importante ye que la ordenanza saliera alantre”, apunta Castaño, que destaca ente elles la creación d’una comisión de siguimientu pa velar porque la ordenanza se cumpla. “Va tener calter añal y nella van tar presentes la téunica del Serviciu de Normalización Llingüística y un representante de cada grupu municipal, que nun tien por qué ser conceyal. Nel nuesu casu va ser René Durán, que foi la persona que comenzó esti trabayu”, esplica’l voceru de la candidatura de xunidá popular.

 D’esta forma, y a la espera de la so aprobación definitiva, Llaviana yá cuenta con una ordenanza que va servir pa regular l’usu del asturianu nel conceyu, asina como’l llabor del Serviciu de Normalización Llingüística, agora mesmu –y hasta fin d’añu–esternalizáu y con una actividá de namái 8 hores selmanales.                                               Fonte: asturies.com

La ordenanza de Llaviana inclúi la creación d’una comisión de siguimientu

Plenu de Llaviana

El Plenu de Llaviana aprobó por unanimidá la Ordenanza Municipal d’Usu de la Llingua Asturiana. El testu, que va pasar agora a esposición pública, incorpora una comisión de siguimientu que va axuntase de manera añal pa velar pol so cumplimientu.

Cola ausencia d’un conceyal del PSOE, otru d’Izquierda Xunida (IX) y el de Foro, la ordenanza d’asturianu presentada pol equipu de gobiernu socialista salió alantre colos votos a favor de tolos grupos municipales, incluyíu’l Partido Popular (PP). Ésta nació d’un borrador propuestu pol ciudadanu llavianés René Durán, que Somos Llaviana presentó a toles fuercies.

“Los primeros colos que nos reunimos foi con IX, que presentaron delles propuestes pal testu. Llueu, con estes modificaciones, axuntamos con Foro y el PP, que vieron bien el documentu, polo que quedó asina”, esplica Unai Castaño, voceru de Somos Llaviana. Tres el Plenu de febreru del 2016 l’equipu de gobiernu comenzó a trabayar col borrador presentáu, “pero quedó la cosa parada hasta finales d’añu”, recuerda.

El martes, finalmente, aprobóse en Comisión el testu definitivu, “que ye’l que presentó’l PSOE con aportaciones del nuesu borrador”, y que s’aprobó de manera inicial ayeri nel Plenu. Agora, tres la próxima espublización nel BOPA, pa la presentación de posibles alegaciones enantes, va tornar a la Casa Conceyu pa la so aprobación definitiva.        Fonte: asturies.com

Guía turística de Llaviana

- Eladio Suárez Canteli (Villoria, Llaviana)

  

El llunes 7 de xunetu presentabase la guía turística y gastronómica de Llaviana. Na so introducción dizmos que la so xera ye la de dar valir, recuperar, esparder y amosar la bayura cultural del conceyu. Lleo la guía y llama munchu l'atención qu'amás de tar escrita dafechu en castellán, nun apaez en nengún llau mentada la llingua asturiana, daque que nun se correspuende colo que mos propón na introducción (a nun ser que nun se considere la llingua como patrimoñu cultural de Llaviana).

Otru casu llamativu ye'l del usu de la toponimia. Hai que dicir que'l Conceyu de Llaviana robló un alcuerdu cola XAT pa oficializar la toponimia del conceyu (BOPA del 4 de xineru de 2008). Na guía usa topónimos que nun son oficiales (castellanizaos), esto ye, que nun son llegales, pero paez ser que la llei qu'ellos mesmos faen nun fai falta que se cumpla. Como digo, los topónimos de Llaviana tan oficializaos dende 2008, esto ye, dende fai 6 años, y les instituciones públiques tienen qu'usalos por llei, pero na guía apaecen delles veces na forma tradicional, otres veces na forma illegal, ensin negún sentíu, en dellos casos como si foren dos pueblos estremaos (ye'l ca su de Llorío/Lorío o El Condado/Condao, que pa eso los llavianetos comemos “bacalado” y vamos de vacaciones a “Bilbado”). Otres veces namás apaecen na forma illegal como La Pomarada (La Pumará), Valdelasabejas (Valdelesabeyes), Viescabozada (Viscozá), Merujal (El Meruxal) y asina más de treinta topónimos.

Yá pa finar, na estaya de gastronomía, les pallabres qu'apacen n'asturianu como fabes, fayuelos, etcétera, pónenles en cursiva lo mesmo que si foren pallabres extranxeres. Lo más díficil d'entender ye que la coordinadora d'esta guía (Inés García Vega) seya, amas de la conceyala d'Educación, Cultura, Turismu y Participación Ciudadana, tamién de promoción del asturianu. Asturies sí que ye “different”.

Fonte: La Nueva España

I Concursu de postales navidiegues n'asturianu

Llaviana gueta felicitaciones navidiegues n’asturianu.

La Oficina de Normalización Llingüística del Conceyu de Llaviana convocó'l so primer concursu d'ellaboración de postales de navidá en llingua asturiana, dirixíu a los alumnos de los centros d'educación primaria del conceyu.

Con esta iniciativa guétase “avanzar na dignificación social del asturianu nun ámbitu tan importante como l'educativu: fomentando la presencia de la llingua asturiana na aula, promoviendo la trasmisión xeneracional del asturianu y previniendo l'abandonu de la llingua materna”.

Va haber trés categoríes y un premiu pa caúna d'elles; los premios van consistir nun llote de llibros pa cada ganador. Toles postales participantes van formar parte d'una esposición que va entender tol periodu de Navidá y que va tener llugar na Casa la Cultura de La Pola y na biblioteca de Los Barreros. El plazu d'entrega de los trabayos conclúi’l día 2 d'avientu. El concursu cunta cola ayuda de la Conseyería de Cultura y Deporte d'Asturies y l'Academia de la Llingua Asturiana.

Fonte: Asturnews

Pablo X.Suárez faise col X Concursu de Narraciones Curties Conceyu Llaviana

16/06/2011
Redaición
El X Concursu de Narraciones Curties Conceyu Llaviana yá tien ganador, Pablo X. Suárez, col rellatu “El bichu grande”. Amás, Pablo Rodríguez Medina, con “La vuelta”, y David Fernández, con “La espera interminable”, algamaron el segundu y tercer premiu, respectivamente.
Un actu celebráu dientro del VI Festival de la Sidra de Llaviana y presentáu pol músicu Tante Blanco sirvió d’espaciu pa la entrega de los premios, de 400, 200 y 100 euros, d’esti concursu entamáu pola Oficina de Normalización Llingüística de Llaviana.

Fonte: asturnews, bases del concursu

Campaña n'asturianu sobre'l reciclaxe en Llaviana

La campaña ‘¡Erre qu’erre! ¡Reduz, reutiliza, recicla!’ yá llegó a Llaviana. La Oficina de Normalización Llingüística del conceyu de la cuenca’l Nalón ta acabante de poner en marcha esta actividá dirixida al seutor del comerciu.

La conseyería de Mediu Ambiente y la Oficina de Normalización de Llaviana busquen con esta campaña “sensibilizar a la ciudadanía del pelligru que supón la contaminación, amás de fomentar actitúes respetuoses pa col mediu ambiente. Con esos oxetivos los comercios participantes na campaña van distribuir tres tipos de materiales: bolses reutilizables con información sobre reciclaxe, cuadernos de papel reciclao con conseyos mediuambientales y cartelos esplicativos”. Tolos comerciantes interesaos en participar nesta campaña de normalización de la llingua del país puen recoyer el material na Oficina de Normalización Llingüística, na plaza Armando Palacio Valdés númberu 1 de La Pola Llaviana.

Esta iniciativa, que tamién ta furrulando n’otros conceyos como Cangas del Narcea, Siero o Ḷḷena gracies a la collaboración ente servicios al traviés de la Rede de Normalización Llingüística nos Conceyos, tien ayuda económica de la Conseyería de Cultura y Turismu.

Fonte: Asturies.com

Campaña "Lleer faite llibre" de promoción de la llectura en Llaviana

El Conceyu de Llaviana, en collaboración cola Oficina de Normalización Llingüística, punxo en marcha la campaña ‘Lleer faite llibre’. Ésta consiste na edición de seis cartelos con fragmentos d’obres lliteraries asturianes. En total, son 300 cartelos que tán distribuyéndose en dellos espacios públicos y privaos del conceyu “col oxetivu de facer llegar la lliteratura a la ciudadanía”, señalen dende la Oficina de Normalización. ‘Lleer faite llibre’ ta compuestu por seis tipos de cartelos, caún con un testu d’autores de renome como Xuan Bello, Miguel Allende, Berta Piñán, Iris Díaz Trancho, Xuan Santori y Ovidio Parades. “

La seleición de testos, que tuvo llugar nos meses precedentes, cuntó cola collaboración d'un grupu de mayestres que desenvuelven la docencia en dellos centros educativos municipales, y nella tamién participaron responsables de la Conceyalía de Mocedá y Promoción del Asturianu, de la Oficina de Normalización Llingüística y de la Oficina d'Información a la Mocedá”, informen dende’l SNL llavianés. Esta campaña de promoción de la llectura, que ta dientru del Plan Revolucionariu de la Llectura que desarrolla la Conceyalía de Mocedá y Promoción del Asturianu, aspira dar a conocer la lliteratura n’asturianu a la ciudadanía y desarrollar la capacidá crítica na población, buscando que la llectura de los testos propuestos tenga continuidá nes biblioteques y llibreríes de Llaviana. Nos meses prósimos van dase a conocer otres iniciatives nesi sen.

Fonte: Asturies.com

X Concursu de narraciones curties n'asturianu en Llaviana

El Conceyu de Llaviana convoca la décima edición d'esti concursu dotáu con 400, 200 y 100 euros pa los tres primeros. Los trabayos, tanto en prosa como en versu, han tar redactaos en llingua asturiana, respetando les normes ortográfiques y gramaticales n'usu de l'Academia de la Llingua Asturiana, con un llargor máximu de 10 fueyes.

El tema sedrá llibre valorándose los trabayos que recueyan tradiciones, costumes, llugares, fechos, paisaxe d'Asturies y, sobremanera, del Conceyu de Llaviana y el Valle’l Nalón. Les obres van presentase na Oficina de Normalización Llingüística de Llaviana, allugada na Plaza Armando Palacio Valdés 1, 33980, en La Pola Llaviana. El plazu d'almisión de trabayos acaba'l vienres 3 de xunu a les 14:00 hores.

Más información: Bases completes

Fonte: Asturnews

La Xunta Elleutoral de Llaviana refuga les candidatures de Conceyu Abiertu n'asturianu pese a la sentencia del Tribunal Constitucional

Nuevu casu de represión llingüísitica nunes elleiciones anque esta vegada el proceder de la Xunta ye anticonstitucional gracies a la sentencia 48/2000 de 24 de febrero de Tribuna Constitucional.

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Magar que nun ye definitivu, Conceyu Abiertu quixo facer públicu y denunciar el determín tomáu pola XEZ de Llaviana porque supón "l’enésimu ataque escontra la llingua asturiana y aquellos ciudadanos que la empleguen". Ye más, Conceyu Abiertu "llamenta" que los responsables de la XEZ de Llaviana "tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu".

Conceyu Abiertu retrucará al determín de la Xunta Ellectoral de Zona de Llaviana sofitándose nesta sentencia y confía en que’l prósimu llunes, 25 d’abril, se proclamen les sos candidatures nos conceyos de Samartín del Rei Aurelio y Llangréu.
Fonte:blogue frayando cadenes

VIII edición del concursu cuentos "Ello yera una vez"

El Conceyu de Llaviana y la Oficina d'Información a la Mocedá convoquen esti concursu nel que pue tomar parte xente mozu de 14 a 35 años. Los cuentos puen tar en castellán o n'asturianu con un máximu de diez fueyes, de tema llibre, valorándose la orixinalidá y los temes rellacionaos colos intereses, inquietúes y esmoliciones de la mocedá.

Afítense dos categoríes con un únicu premiu en dambes; Pa mozos de 14 a 18 años, 100 euros; y pa mozos de 19 a 35 años, 250 euros. El plazu de presentación de los rellatos va finar'l 31 de marzu de 2011.

Más información: Bases completes del concursu

Fonte: Asturnews

XI Concursu de Rellatos Curtios pa Muyeres

El Conceyu de Llaviana y el Conseyu Municipal de la Muyer, en collaboración col Centru Asesor de la Muyer, convoquen la undécima edición del concursu Rellatos Curtios pa Muyeres, empobináu a muyeres mayores de 18 años qu'escriban en castellán o asturianu.

La tema a tratar ye llibre, valorándose especialmente: la calidá lliteraria de la obra, l'usu d'un llinguaxe non sexista, un abordaxe de les temes distintos de los estereotipos femenín y masculín tradicionales que representen una sociedá más igualitaria.

Hai un primer premiu, na categoría xeneral de 1.200 euros. Amás, va otorgase un accésit de 300 euros a la meyor obra fecha por una autora del Conceyu de Llaviana. El plazu de presentación de los rellatos termina’l 18 de febreru, teniendo que se mandar al Centru Asesor de la Muyer, en Llaviana.

Más información: Bases completes del concursu

Fonte: Asturnews

Campaña mediu ambiental n'asturianu en Llaviana

Llaviana fai una campaña de sensibilización ambiental n’asturianu.

La Conceyalía de Mediu Ambiente y la Oficina de Normalización Llingüística del Conceyu de Llaviana entamen una campaña de sensibilización por cuenta de la cellebración del Día Mundial del Mediu Ambiente. Con esta iniciativa lo que se quier ye concienciar a la ciudadanía del pelligru que suponen les acumulaciones illegales de basura, y de la necesidá de respetar y cudiar la natura.

La campaña va desenvolvese n'asturianu, col aquel de garantizar qu’esta llingua tea presente en tolos ámbitos, faciendo por que nun quede arrequexada nel ámbitu cultural. Quier treslladase a los y les llavianeses que l'asturianu ye una llingua válida pa cualquier temática y situación comunicativa y que, lo mesmo que'l paisaxe asturianu, necesita de respetu y proteición pa que nun se pierda.El proyeutu que se va poner en marcha consiste, nesta primer fase, na colocación de carteles informativos, anque yá ta previsto siguir cola campaña nos meses vinientes col diseñu de midíes complementaries.

Fonte: RTPA-Estaya d'asturianu

IX Concursu de Narraciones Curties n'asturianu de Llaviana

El IX Concursu de Narraciones Curties Conceyu de Llaviana yá tien abiertu’l plazu pa presentar trabayos, éstos, tanto en prosa como en versu, han tar redautaos en llingua asturiana, respetando les normes ortográfiques y gramaticales de l’Academia de la Llingua Asturiana, con un llargor másimu de 10 fueyes. Les obres tienen de remitise, en sobre zarráu, al Serviciu de Normalización Llingüística de Llaviana (Plaza Armando Palacio Valdés, 1) enantes del vienres 4 de xunu.

Los cuentos tienen de ser inéditos, non premiaos n’otros concursos lliterarios y ensin tar suxetos a nengún compromisu d’edición. El tema ye llibre valorándose los trabayos que recueyan tradiciones, costumes, llugares, fechos, paisaxe d’Asturies y, sobre manera, del conceyu de Llaviana y el Valle del Nalón. Hai tres premios, el primeru con una dotación de 600 euros, el segundu con 300 y el terceru con 150.

La entrega premios va ser el día 13 de xunu de 2010, coincidiendo cola cellebración del V Festival de la Sidra de Llaviana.

Fonte: Infoasturies