El calendariu escolar va cuntar con 177 xornaes lectives y una ponte de 5 díes en payares

Un aulariu asturianu d'Educación Infantil

  Principáu yá tien calendariu escolar pal próximu cursu,  cuntando con 177 xornaes lectives y  como con novedaesuna ponte de 5 díes en payares.

 Aprobáu la selmana pasada pola Conseyería d’Educación y Cultura nel intre d’una xunta na que participaron el director xeneral de Personal Docente y Planificación Educativa, Roberto Suárez, y representantes de les families, les organizaciones sindicales de la enseñanza público y alcordao y les direcciones de los centros docentes, nesti calendariu estableciéronse un total de 177 xornaes lectives.

 Na xunta analizaron les distintes propuestes presentaes y finalmente diose lluz verde a una qu’establez l’entamu del cursu en Primaria’l día 11 de setiembre, con finalización el 21 de xunu,  ente que’l cursu pa los alumnos de Secundaria y d’otres enseñances quedó establecíu ente’l 13 de setiembre y el 25 de xunu.

 La principal novedá introducida pol equipu que dirixe Genaro Alonso ye que s’estableció un nuevu día non lectivu. Tratarsedel 2 de noviembre (xueves), que xuníu al 1 d’esi mes (festivu nacional), al 3 (día del profesor) y a la fin de selmana, xenera una ponte de cinco díes ensin clase. Según indica la Conseyería d’Educación y Cultura, esti planteamientu «ayuda a permediar el periodu lectivu en #cada trimestre y a establecer un tiempu de descansu tres los siete primeres selmanes de #cada cursu». Hai otres xornaes non lectives. Tratase del 7 d’avientu (ente los festivos día de la Constitución y fiesta de la Inmaculada) y el 12 y 13 de febreru (Antroxu). A tollo habría qu’añedir los díes festivos nacionales, autonómicos y locales.

Trés trimestres

 Coles mesmes, afitáronse los periodos destinaos a les vacaciones de Navidá y Selmana Santa. Son los mesmos pa Primaria y Secundaria. El primeru d’esos periodos de descansu va dende’l 26 d’avientu al 5 de xineru,  ente que’l segundu ye del 2 al 6 d’abril. Fonte: asturnews.com

Genaro Alonso: «Vamos faer lo indicible pola especialidá en Llingua Asturiana y Lliteratura»

El conseyeru d’Educación y Cultura, Genaro Alonso, aseguró esta selmana que la reconocencia de la especialidá docente de Llingua Asturiana y Lliteratura per parte del Gobiernu central ye un oxetivu irrenunciable» del so departamentu y garantizó que va faer «lo indicible» pa consiguilo.

Asina retrucó nel plenu de la Xunta Xeneral a una entruga de la diputada d’IX Concha Masa sobre esta cuestión que l’Executivu del Principáu vien reclamando dende va dellos años al Ministeriu d’Educación y que la so negativa, al so xuiciu, solo respuende a un problema «de voluntá política». Masa emplazó al conseyeru «a dar una puñada na mesa» y esixó-y resultancies concretos más allá de la so bona voluntá, los sos viaxes y les sos cartes».

Fonte: Asturnews

Alonso da por solucionáu’l problema de l’ALLA

Na semeya, Alonso xunto a Wenceslao López Martínez, alcalde d'Uviéu, y José Luis Blanco, direutor xeneral d'Evaluación y Cooperación Territorial del Ministeriu d'Educación, Cultura y Deporte

  El conseyeru d’Educación y Cultura anunció esti llunes que’l problema de l’Academia de la Llingua Asturiana (ALLA) “ta resueltu”. Genaro Alonso aseguró que la institución va siguir cobrando vía tresferencia, como hasta agora, y que va siguir na mesma sede.

  El problema de l’ALLA comenzó cuando Intervención del Gobiernu punxo torgues a la tresferencia corriente a la entidá que venía recibiendo dende la so creación al pasar al considerala privada, polo qu’entendía que’l modelu pa recibir financiación sería’l d’una subvención. La presidenta Ana María Cano alertó d’esta situación y negóse a aceptar dicha subvención, lo que conllevaba un cambiu d'estatus xurídicu de la institución académica.

  Nel mes que trescurrió dende que Cano fixo pública la problemática, punxéronse enriba de la mesa delles soluciones, dende la creación d’una llei específica de l’ALLA, que manexó nun primer momentu la conseyería, a la modificación del artículu 2 de la Llei 5/1997 d’Academies del Principáu d’Asturies pa incluyir la entidá como institución de Derechu Públicu del Principáu d’Asturies o l’aprobación d’un decretu por parte del Conseyu de Gobiernu pa modificar los sos estatutos. Finalmente, el cambiu ye que nada cambia, según se desprende de les pallabres d’Alonso ayeri enantes de tomar parte na inauguración del XIV Congresu Internacional d’Educación Inclusiva ‘Práutiques innovadores inclusives: retos y oportunidaes’ qu’entama la Universidá n’Uviéu.

  “El problema ta resueltu. Pudo haber un retrasu no que foi la execución presupuestaria porque, como saben, hebo unos cambios na interpretación del sistema de financiación, que si tresferencia o subvención… Va ser tresferencia. Consecuentemente, va ser la mesma, con incrementu de los presupuestos, que la que veníen recibiendo”, aseguró’l conseyeru. Mentes, sobre’l llocal asitiáu nel Monasteriu de San Pelayo, afirmó que “va ser el mesmu y lo siguirá pagando la Conseyería de Facienda al traviés d’esta tresferencia”.
Fonte: asturies.com

Educación va aplazar a 2019 les oposiciones de mayestros

Javier Fernández, Presidente asturianu

 Nun va haber n’Asturies oposiciones al cuerpu de mayestros esti añu y, previsiblemente, tampoco’l que vien. El conseyeru d’Educación apuntó ayeri a 2019 como l’añu nel que se convoque la ufierta pública d’empléu pa Infantil y Primaria.

 Genaro Alonso aplazaba asina estes oposiciones pocu dempués de conocese la fecha na que, a la fin, el Gobiernu central va aprobar el decretu llei nel que se va afitar la tasa de reposición. Va Ser l’últimu día d’esti mes cuando se dea’l vistu bonu a un decretu que dexaría convocar les oposiciones. Una midida que l’Executivu autonómicu plantegó hai un par de meses ensin llograr respuesta. Tres l’aprobación del decretu, solo pa la comunidá educativa, tendrá de ser convalidáu pol Congresu.

 «Llega tarde», remarcaba sobre esi decreto llei Genaro Alonso, quien volvió asegurar qu’esta midida, avanzada yá la selmana pasada pol Gobiernu del PP, nun va modificar la decisión yá tomada. Nun se van convocar oposiciones a maestru anguaño. Entá ye más, apuntó la posibilidá de retrasar más allá de 2018 esta convocatoria.

 Alonso volvió incidir en qu’hai qu’evitar l’efectu llamada. Según la conseyería, podríen presentase más de 20.000 persones. El decretu aprobaráse’l mesmu día nel que se va dar el vistu bonu al proyectu de llei de los presupuestos del Estáu.
Fonte: asturnews.com

“Les llingües son una riqueza; la solución, non el problema”, asegura Alonso

 El conseyeru d’Educación y Cultura, Genaro Alonso, reivindicó l’asturianu con motivu de la celebración del Día Internacional de la Llingua Materna. “Les llingües son una riqueza; la solución, non el problema”, afirmó nuna visita al CEE Juan Luis Iglesias Prada.

 Énte los medios de comunicación destacó qu’esta xornada que se celebra güei promovida pola UNESCO, qu’esti añu tien el lema ‘Hacia un futuru sostenible al traviés de la educación multillingüe’, “tien una particular importancia pa nosotros porque nun solamente ye reivindicar les llingües maternes, sinón nesti casu reivindicar una llingua materna en situación de minorización como ye l’asturianu, en situación diglósica”. Darréu aseguró “toda potenciación y reivindicación llingüística particularmente ye importante pa esta conseyería”, faciendo referencia a los actos programaos con escolinos y escolines ayeri en Mieres y esta mañana en La Pola Siero.

 D’igual forma nos recreos de tolos centros educativos del país lleóse güei un ‘Manifiestu pola llingua materna’ aprovechando la xornada na que “festexamos que nesta tierra tenemos una llingua nuestra, vuestra, de toos y toes”. Nel mesmu espónse a los neños y neñes ocho razones pa defender la llingua de los sos güelos que fina con un concluyente “porque saber asturianu ye saber algo más qu’una llingua: ye un sentimientu y una oportunidá”.

 Na semeya, Alonso mientres la visita fecha ayeri al Colexu d'Educación Especial Juan Luis Iglesias Prada, de Sama, xunto al presidente de la Mancomunidá del Valle del Nalón, Tomás Cueria; el direutor xeneral d'Ordenación Académica y Innovación Educativa, Francisco Laviana; l'alcalde de Samartín del Rei Aurelio, Enrique Fernández Rodríguez; y parte del profesoráu y l'alumnáu, con motivu de la II Xornaes de Puertes Abiertes de la escuela.
Fonte: asturies.com

Adxuntu	Tamañu
Manifiestu pola llingua materna (asturianu)	19.11 KB
Manifesto pola llingua materna (gallego-asturiano)	19.25 KB

"En trés décades consiguimos crear un corpus lliterariu al altor de cualquier lliteratura moderna", destaca Alonso

Na Semeya los premiaos, xunto a les autoridaes y los miembros de los xuraos de los premios.

  El paraninfu de la Universidá d'Uviéu acoyó esti xueves la gala d'entrega de los Premios Lliterarios, la gran fiesta de les nueses lletres. Genaro Alonso, conseyeru d'Educación y Cultura, destacó que "en poco más de trés décades consiguimos crear un corpus lliterariu propiu y cultu al altor de cualquier lliteratura moderna".

  El rector de la institución universitaria, Santiago García Granda, encargóse d'abrir l'actu, que tuvo presidíu tamién, xunto con Alonso, por Cristina Valdés, direutora xeneral d'Universidaes y Investigación, y Fernando Padilla, direutor xeneral de Planificación Llingüística y Normalización. Na so intervención, el responsable d'Educación y Cultura recordó l'aniciu d'estos gallardones, col Primer Concursu de Narraciones Curties Diputación d’Asturies, nel 1980, y emponderó la evolución de les nueses lletres nesti tiempu.

  "Ye llargu'l camín andáu. Ye muncho lo escrito y munchos los finxos algamos", siguó Alonso, que calificó la gala de "actu d'agradecimientu y reconocimientu" a los escritores "testigos una vegada más de la vitalidá y escelencia" de la lliteratura asturiana. Pa finar, citó a los cinco ganadores de los gallardones d'esti añu, "verdaderu valedores d'esti gran árbol de les lletres asturianes, corresponsables a la fin de la so evolución y ésitu".

  Los premiaos del 2016 son Xulio Arbésú, con 'El valor del rei' (XXXVII Premiu Xosefa Xovellanos de novela); Ángeles Carbajal, con 'Un vasu d'agua' (XXII Premiu Xuan María Acebal de poesía); Vanessa Gutiérrez, con 'El paisaxe nuestru' (XXII Premiu Máximo Fuertes Acevedo d’ensayu); Adolfo Camilo Díaz, con 'La mar' (IX Premiu María Xosefa Canellada de lliteratura infantil y xuvenil): y Luis Navazo, con 'Indianu' (VIII Premiu Alfonso Iglesias de cómic con ‘Indianu’). Toos ellos recibieron un 'Árbol de les lletres', una pieza artística esclusiva de l'artista Charo Cimas.

  La nota musical del actu púnxola Tuenda, el tríu formau por por Xosé Antón Fernández 'Ambás', Elías García y Pepín de Muñalén, qu'interpretó delles pieces.    Fonte: asturies.com

El Gobiernu estatal frena la creación de la especialidá docente de Llingua Asturiana por tar en funciones

. La creación de la especialidá docente entra nuna fase de parálisis

• . Podemos ufre'l so sofitu a Alonso pa que la especialidá docente nun tea en riesgu

Xenaro Alonso fala na Xunta Xeneral asturiana

   Genaro Alonso acusa de "desllealtá" al Gobiernu de Mariano Rajoy por camudar de postura sobre la creación de la especialidá de Llingua Asturiana. Diz agora que modificar el real decretu d'especialidaes ye "imposible" al tar en funciones y el conseyeru rellaciona esta decisión cola postura contraria del PP asturianu a la normalización.

  El secretariu d'Estáu d'Educación, Formación Profesional y Universidaes, Marcial Marín, comunicó al Gobiernu asturianu que la única vía posible pa la reconocencia ye'l cambiu del real decretu 1834/2008, d'especialidaes, un trámite que xulga agora “imposible” de facer pol contestu políticu. “El Gobiernu central desdizse asina del alcuerdu adoptáu pa siguir col diálogu y los llabores del grupu de trabayu, una actitú dafechu deslleal, porque la situación actual del Executivu en funciones ye exautamente la mesma que cuando s'alcordó siguir cola negociación”, esplicó Alonso.

  La reunión prevista p'ayeri cancelóse díes enantes per parte de Madrid tres l'anuncia de Marín d'esta circunstancia a la Conseyería d'Educación y Cultura, que tenía preparada una documentación colos antecedentes de la negociación, la propuesta de decretos de creación de la especialidá docente y la solicitú pa la posterior reconocencia per parte del ministeriu. Tamién incluyía, según espliquen dende'l Gobiernu, una serie d'informes que xustifiquen la necesidá de resolver la situación actual, como'l dictame del Conseyu Escolar del Estáu, casos de profesoráu en llingües propies d'otres comunidaes y la normativa vixente n'Asturies sobre'l tratamientu educativu del asturianu y el gallego-asturiano, amás d'otros estudios d'interés.

La política del PP sobre la normalización          "Esta situación d'incumplimientu de los compromisos alcordaos y de desllealtá institucional concuerda cola política que ta faciendo'l PP d'Asturies, qu'intenta torpediar el procesu de normalización del asturianu y del gallego-asturiano con iniciatives incomprensibles”, afirmó Alonso, que cita, ente otres actuaciones, el boicó de los populares al usu del asturianu xunto col castellán na Xunta Xeneral del Principáu, la impugnación del Plan de Normalización Llingüística de Carreño y la rotura, agora, del procesu de negociación pa consiguir la especialidá docente del profesoráu de Llingua Asturiana y Lliteratura y Gallego-Asturiano.

  Sicasí, el conseyeru apunta que'l so departamentu va siguir trabayando pa llograr la reconocencia de la especialidá y avanzó que va buscar sofitos a favor d'esta midida ente los grupos parllamentarios de la Xunta Xeneral, na Conferencia Sectorial d'Educación y nel restu de comunidaes autónomes. “La reconocencia de la especialidá nes mesmes condiciones que'l restu ye la forma más afayadiza de dignificar la enseñanza del asturianu y la situación de los más de 300 docentes que la imparten de forma regular na inmensa mayoría de los centros educativos”, añadió.                                                                      Fonte: asturies.com

Educación y Cultura apostará por midíes con baxos costos económicos na promoción del asturianu pola prórroga

La prórroga presupuestaria, como se presuponía, va llendar enforma los planes del conseyeru Alonso na promoción del asturianu. Nuna respuesta a Gaspar Llamazares apunta qu'apostará por midíes con baxos costos económicos.

Genaro Alonso emplegó pa ello l'asturianu, dalgo non habitual dende l'Alministración. En concreto respondió la entruga parllamentaria plantegada por Llamazares '¿Cuál es la situación y cuál será su reflejo en la prórroga presupuestaria de la dignificación, promoción y protección de la llingua asturiana?' con un testu con siete puntos, al que se-y sumen les midíes previstes de normalización llingüística tresversal pa esti añu.

En primer llugar, el conseyeru reconoz al diputáu d'Izquierda Xunida (IX) que l'aumentu de la partida pa l'Academia de la Llingua Asturiana "pue vese dificultada col nuevu escenariu, deriváu de la prórroga presupuestaria". Tamién los pautos colos ayuntamientos pa caltener los servicios de normalización llingüística, anque nesti casu apunta qu'Educación y Cultura va tratar de "realizar una modificación presupuestaria p'atender les peticiones d'estos conceyos". Llanera, Candamu, A Veiga y Grau trabayen anguaño na creación d'estos órganos.

Les ayudes a medios de comunicación, producción editorial y discográfica n'asturianu tampoco nun van disponer del aumentu presupuestariu previstu: "va ser difícil de realizar yá que les modificaciones presupuestaries previstes pa tal fin tendrán que ser destinaes a otros capítulos". No que respeuta los Premios Lliterarios, les recompenses a los ganadores caltendránse, pero nun se podrá crear el gallardón de teatru como se demanda y como tenía previsto la conseyería.

Onde nun paez que vaya haber problemes ye na cantidá destinada al aumentu de fondu bibliográficu pa biblioteques públiques y centros educativos. Por último, Alonso afirma que "la Proposición Non de Llei d'ellaborar un Plan de Normalización Llingüística pue atopar dificultaes nel desarrollu del mesmu. Munches de les midíes previstes nel Plan de Normalización deberíen dir acompañes d'un presupuestu afayadizu pal so desarrollu".

Los planes pa esti añu

Pese a la situación mala que dibuxa Alonso, el conseyeru apunta que tratará de poner esti añu en marcha "midíes de normalización llingüística tresversal que nun arrecostinen con costes económicos o qu'en tou casu éstos seyan asumibles nes circunstancies actuales". Asina cita la edición n'asturianu de les páxines web de tolos organismos de l'Alministración y l'emplegu del idioma na cartelería y comunicaciones.

Tamién comprométese a promover, "al traviés de la negociación y alcuerdos cola dirección de la RTPA, un tratamientu normalizáu de la llingua y aumentu de programes n'asturianu". Otra midida ye'l "diseñu, organización y desarrollu de cursos de formación especialmente dirixíos al personal de medios de comunicación".

L'usu de la toponimia oficializada por parte de tolos organismos oficiales, la dinamización del funcionamientu de la Xunta Asesora de Toponimia, y la coordinación colos distintos servicios de normalización llingüística, asima como de les actividaes d'apoyu rellacionaes cola enseñanza del asturianu y gallego-asturiano, completen la llista de midíes previstes, abierta a iniciatives nueves de promoción del idioma que sían asumibles pola conseyería.Fonte: asturies.com

Adxuntu	Tamañu
respuesta_del_conseyeru_a_llamazares_sobre_prorroga_presupuestaria_y_asturianu.pdf	212.96 KB

Genaro Alonso: “la oficialidá ye l’estáu natural que más-y convién” al asturianu

Nuna entrevista asoleyada esti domingu, el Conseyeru d’educación, Cultura y Deporte nun dexa  llugar a la dubia y afita  que “la oficialidá ye l’estáu natural que mas-y convién” al asturianu.

Na entrevista qu’asoleya esti domingu’l diariu El Comerciu, Genaro Alonso fala tamién de los problemes colos interinos y garantiza la convocatoria de les places de secundaria anunciaes al tiempu qu’adelanta’l 25 de xunu como fecha probable de les oposiciones y novedaes como que los temes escoyíos seyan pa tolos tribunales y que nun se repartan les places polos tribunales, ameyorando en forma la igualda de la preba.

Tamién fala de la especialidá docente y la xunta que caltendrá en marzu col gobiernu pa ello y darréu’l periodista entruga-y si la especialidá ¿ye’l primer pasu pa la cooficialidá?
y la contestación ye bien albidrable: “Nun tien nada que ver. Lo primero sería tener la cooficialidá y, de resultes directa inmediata, la reconocencia de la especialidá. Llograr ésta nun ye nengún pasu pa la cooficialidá, que tresciende esta conseyería y ye una decisión soberana de la Xunta”. Con esta declaración dexa cayer que la opinión de l’Academia al respeutive ye la lóxica nel Estáu Español, pero ensin confrontar col Gobiernu nel que participa.

Y como’l periodista insiste en entruga-y la so opinión personal sobre la oficialidá, el Conseyeru dala: “Ye l’estáu natural que más-y convien a una llingua milenaria como la nuesa. Sería un delitu de la Humanidá dexala morrer ensin más nin más. Los poderes públicos tienen de faer lo indicible pa caltener esi valor patrimonial”.

Fonte: Asturnews

SUATEA esixe un cambiu de rumbu urxente en política llingüística

SUATEA esixe a la Conseyería d’Educacón y cultura la dignificación llingüística y nin desanicie l’asturianu de la Educación infantil nin consienta ratios de 30 alumnos en Primaria.

Como fai alcordanza SUATEA nun comunicáu asoleyáu esti martes, el pasáu mes d’ochobre, el Parlamentu asturianu aprobó una Proposición non de Llei pola dignificación de la llingua asturianacol apoyu del PSOE, Podemos, IX y Foro y “nella, ínstase al Conseyu de Gobiernu a diseñar un plan de dignificación y normalización llingüística enantes del próximu periodu de sesiones”.

Y amás el conseyeru d’Educación y Cultura, Genaro Alonso, nes sos comparecencies públiques y nos conceyos realizaos a primeros de cursu con tolos sindicatos presentes na Xunta de Personal Docente, “comprometióse a meyorar el desarrollu de la Llei d’Usu y Promoción del asturianu y el so reforzamientu nel ámbitu educativu”. De la mesma manera, el Director Xeneral de Planificación lingüística, “mostróse comprometíu con estos principios y con dar solución a les reclamaciones que se-y treslladaron sobre tola riestra d’irregularidaes detectaes a los primero del cursu”.

Pero sigún denuncia SUATEA “estes intenciones y declaraciones concrétense na realidá nuna política continuista cola de gobiernos anteriores del PSOE y que consiste nel desaniciu de la enseñanza del Asturianu y del Gallego-Asturiano na Educación Infantil, la falta de siguimientu per parte de la inspección educativa d’irregularidaes na ufierta de l’asignatura en Secundaria, la non cobertura de baxes de Gallego-Asturiano dende hai más d’un mes nes escueles de Tapia y la illegalidá de la xuntanza de grupos con ratios d’alumnáu de más de 25 alumnos en Primaria”.

Son casos como los de les Escueles Llerón-Clarín y Aniceto Sela de Mieres, onde l’alumnáu d’Educación Infantil (E.I.) venía recibiendo clases d’Asturianu dende hai cuantayá (nel Llerón-Clarín yá fue centru pilotu na implantación de l’asignatura d’asturianu nel añu 1984) y esti cursu tovía nun les reciben.

SUATEA y la Comunidá Educativa d’estos centros lleven reclamando dende primeros de cursu que s’amplie’l contratu del profesor d’Asturianu a xornada completa pa poder siguir impartiendo esta asignatura n’E.I: “Sangrante ya illegal (la llexislación vixente establez una ratio máxima de 25 alumnos pa grupos de Primaria), ye tamién el casu del Colexu La Vallina de Lluanco onde un profesor d’Asturianu, contratáu a media xornada, imparte clases nun grupu de primeru y otru de terceru de Primaria con 30 alumnos y alumnes, consecuencia de la xuntanza de dos del mesmu nivel. Lo mesmo pasa con otru grupu de sestu con 28 alumnos. La Dirección del centru, igual qu’esti sindicatu, pidieron cuantayá l’ampliación a xornada completa del profesor pa poder desdoblar estos grupos y atender, cola calidá a la que tien derechu, a esti alumnáu”.

Asina, en viendo “la inacción flagrante de la Conseyería d’Educación y Cultura, del Serviciu de Planificación Llingüística y del Gobiernu del PSOE énte estos fechos acontecíos al entamu del supuestu camín de la Normalización Llingüística nel ámbitu educativu, nun mos queda otra que pidir un cambiu de rumbu de 180 graos si se quier cumplir col mandáu de la Xunta Xeneral del Principáu y colos derechos llingüísticos del alumnáu”.                                                                     Fonte: asturnews.com

Genaro Alonso afita so apueste pola oficialidá

   El Conseyeru de Cultura, Genaro Alonso, comprometióse otra vuelta cola oficialidá nuna entrevista espublizada esti domingu pol diariu La Nueva España.

   Ensin dubia de dengún tipu, el Conseyeru de Cultura contesto-y a la periodista Pilar Rubiera qu’elli sofita la oficialidá. Y que fadrá tolos posibles pa poer algamala, trabayando emntantu pola noralización social hasta’l puntu que la llei d’anguaño lo permita.

   Genaro Alonso fizo alcordanza de que la oficialidá no depende del so departmentu, sino de la Xunta Xeneral del Principáu, pero que la so posición ye evidente: Oficialidá.

   Ya lo adelantare na entrega de los diplomes de la UABRA nel paraninfu de la Universidá cuando prometió “trabayar pa favorecer la enseñanza y la dignificación del asturianu y pa que nunca naide ponga reparos al so usu”.

   Alonso amosóse esi día dispuestu a llograr l’oxetivu de que la llingua “tenga una imaxe normalizao y serio, con respetu a les normes y al códigu” porque como diz na entrevista del diariu La Nueva España “tarrezo l’asturianu sólo pa usu folclóricu, defiendo que seya oficial”.

   Ana Cano, presidenta de l’Academia, ya-y pidiera nel Paraninfu qu’igue problemes como l’insuficiente númberu d’hores dedicaes a la llingua na enseñanza y el yá eternu asuntu de la reconocencia de la titularidá del profesoráu y la so rempuesta ye clara: va puxar nel Ministeriu pa que s’incluya la especialidá d’asturianuporque camienta que la disculpa de que nun ye llingua oficial nun tien valir: si fora asina, el llatín y el griego tampoco podríen ser especialidaes docentes.                                                                 Fonte: asturnews.com

Alonso defende la igualdá del asturianu y el castellanu ensin avanzar si habrá viceconseyería

El conseyeru nuevu garró’l miércoles les competencies n’Educación y Cultura, actu nel qu’anunció la creación d’una direición xeneral d’Enseñances Profesionales y Aprendizaxe Permanente.

Ana González entregó al ayerán les dos carteres de la Conseyería d’Educación y Cultura, que centró la so intervención más nos aspeutos educativos. Asina, aseguró que los destinatarios del so trabayu son los alumnos y tuvo bones pallabres pa la xestión de González. Tamién anunció la creación d’una direición xeneral d’Enseñances Profesionales y Aprendizaxe Permanente y que se caltendría la viceconseyería d’Educación.

No que respeuta a la política llingüística, pa la qu’Izquierda Xunida demandaba una viceconseyería, nun avanzó nada, anque apuntó que "tamos redefiniendo la estructura". Otra manera, defendó la igualdá del asturianu col castellanu: “Si n’Asturies hai dos llingües, a dambes hai que quereles, protexeles y cultivales. Eso téngolo claro”. Fonte: www.asturies.com

Genaro Alonso sustitúi a González al frente d'Educación y Cultura

Na semeya, Genaro Alonso nuevu Conseyeru d'Educación y miembru de númberu de l'ALLA

Asturies, 27 Xunetu, 2015 por Pablo R. Guardado

   El filólogu ayerán, non afiliáu a la FSA-PSOE, ye miembru de númberu de l'Academia de la Llingua Asturiana. Javier Fernández caltién a cuatro de los ocho conseyeros de la llexislatura anterior.

   Doctoráu nel 1989 pola Facultá de Filoloxía de la Universidá de Lleón cola tesis 'La transposición sintáctica en español: los transpositores relativos', ye autor de la versión asturiana del famosu rellatu de Leopoldo Alas 'Clarín', 'Adiós Cordera', espublizada nel 1987 y reeditada nel 1992. Nel 1990 dio a estampa’l volume didácticu 'Exercicios prácticos de llingua asturiana' y tien publicaos artículos a esgaya sobre cuestiones pedagóxiques, de gramática funcional y sobre'l romanceru en revistes como 'Lletres Asturianes', 'Archivum' o 'Escuela Española'. Ye inspector d'educación dende'l 1994, y ente'l 2001 y 2007 presidió l'Asociación de Inspectores de Educación de Asturias (ADIDE).

   Alonso va sustituyir a Ana González, conseyera que nun cumpliera la promesa de crear la especialidá docente de Llingua Asturiana y Gallego-asturiano nesta llexislatura última. Algamar dicha especialidá y l'adaptación de la LOMCE van ser los retos principales del ayerán.

Restu del Executivu               A esti cambiu n'Educación y Cultura hai qu'añadir el de les conseyeríes d'Emplegu, Industria y Turismu, cola entrada de Francisco Blanco por Graciano Torre; na de Sanidá, con Francisco del Busto por Faustino Blanco; y na de Servicios y Derechos Sociales; con Pilar Varela por Graciela Blanco. Continúen Guillermo Marnítez Suárez al frente de Presidencia y Participación Ciudadana; Dolores Carcedo, de Facienda y Sector Públicu; Belén Fernánez González, d'Infraestructures, Ordenación del Territoriu y Mediu Ambiente; y María Jesús Álvarez González, de Desarrollu Rural y Recursos Naturales. Fonte: Asturies.com