Mieres festexa la llegada de la estación nueva cola Folixa na Primavera

Presentación de Folixa na Primavera de Mieres

 Música, tradición y fiesta axúntense esta fin de selmana en Mieres cola Folixa na Primavera. La sidra va correr pela villa en trés xornaes na quMúsica, tradición y fiesta axúntense esta fin de selmana en Mieres cola Folixa na Primavera. La sidra va correr pela villa en trés xornaes na que destaquen les actuaciones musicales de Seu, Dixebra, Nuberu y los quebequinos Yves Lambert Trio.

 La Folixa na Primavera va comenzar mañana, a les 18 hores, cola inauguración de la esposición ‘Gastronomía n’Asturies’ na Biblioteca, pa una hora depués dar el chupinazu d’aniciu de la fiesta nel Parque Xovellanos, epicentru de les actividaes. Laude Martínez va encargase de lleer el pregón nun actu presentáu por Anabel Santiago –que va actual al final del mesmu– y nel que tamién va entregase’l XVII Distintivu a la Investigación Folclórica Fini Suárez, qu’esti añu ye pa l’Asociación de Vecinos Por un Cenera Mejor, “pol trabayu colectivu na conservación, espardimientu y dignificación de la cultura asturiana, cola celebración añal del Mercáu Astur”.

 A les 20.10 hores va celebrase un festival de tonada con Patricia Pariente, Celestino Rozada Tamés, José Antonio ‘Cantu la Vara’ y los gaiteros Moisés Martínez López, Iván Rionda Castro y Ramón García Sánchez, eventu que va presentar José Manuel García. Tres el mesmu, a les 21.15 hores, va actuar la Banda de Gaites Villa de Mieres y,  a les 23 hores, el grupu folk del oriente Seu, que presenta formación nueva na Folixa na Primavera, y Dixebra cola xira ‘Tour 87-17’ por motivu del so trentenu aniversariu.

4.000 llitros de sidra

 La bébora nacional ye ún de los grandes protagonistes de la Folixa na Primavera y dende mañana a les 19.05 hores van repartise nel Parque Xovellanos 4.000 llitros de sidra procedente de siete llagares. El sábadu l’espiche de les pipes va ser a les 12.05 hores, momentu nel que van tocar los grupos folclóricos La Flor del Pomar (Nava) y Ruxidera.

 De tarde, la sidra va empezar a repartise a les 18.45 hores, depués de los xuegos pa neños y neñes y los xuegos tradicionales, y del pasucais de los grupos de l’Associació Cultural Sant Miquel de Balansat (Eivissa) y L’Artusu, con final nel Parque Xovellanos, onde van actuar a les 18.50 hores. Mentes, a les 19 hores va principiar na plaza de la Casa Conceyu l’Amuesa de Bandes de Gaites, cola participación de Villa de Mieres, Ciudad de Oviedo, El Gumial (Morea) y Lembrazas da Terra de Gullarei (Galicia). Tres un pasacais, a les 21 hores, toes van interpretar les sos pieces nel Xovellanos.

 Pela nueche, a les 23 hores, van comenzar los conciertos con Nuberu, que ta de vuelta coincidiendo col so cuarentenu aniversariu, pa depués dar pasu al tríu lideráu por Yves Lambert, músicu quebequín que formó parte hasta’l 2002 de La Bottine Souriante, formación bien conocida n’Asturies. A les 2.15 hores va interpretase la Danza d’Oñón, al igual que tolos años.

Concursu de fotografía y menú de la Folixa

 La venta de la bolla de la Folixa na Primavera na carpa la fiesta, El Requexu, el Liceo y la Plaza, por parte de la Hermandad de Festejos San Bartolomé de Baíña, dende les 9 hores, va abrir el domingu l’actividá de la xornada cabera d’esta edición. Al meudía va principiar el repartu de sidra, pa depués dar pasu a l’actuación del grupu Prau Llerón y una amuesa de deporte tradicional asturianu a cargu de Seis Conceyos.

 Otra manera, la novedá  d’esta edición ye l’entamu del concursu de fotografía FotoFolixa’17, en collaboración cola Agrupación Fotográfica Semeya, que tien como oxetivu buscar la semeya de la Folixa na Primavera. Los ganadores van llevar premios de 300, 200 y 100.

 Mentes, a lo llargo de los trés díes de celebraciones en Mieres, dellos restoranes de la villa van ufrir el menú de la Folixa na Primavera. Ésti va tar formáu por sopa d’ablanes o menestra del tiempo, de primeru; bacaláu o cabritu, de segundu; y borrachinos o sorbete de sidra, de postre.                                                                                                         Fonte: asturies.com

Adxuntu	Tamañu
Programa Folixa na Primavera 2017	33 KB

Dixebra va grabar trés temes con motivu del so 30 aniversariu, que va cuntar con una xira conmemorativa

por Pablo R. Guardado

‘Tour 87-17’ ye’l nome de la xira que va llevar a Dixebra a tocar per Asturies y otros países europeos a los llargo d’esti 2017 y que va cuntar con un conciertu especial. D’igual forma, el grupu avilesín va entrar n’estudiu pa grabar trés temes dientro del proyeutu musical nomáu ‘Dalgo vieyo, dalgo nuevo, dalgo emprestao’.

El vienres, 6 de xineru, cúmplense 30 años del primer ensayu de Dixebra, que tuvo llugar nuna cochera de Castañeda, nel conceyu de Corvera. Nestes trés décades esta formación pasó de tener cuatro a nueve componentes y a convertise na banda referente del rock en llingua asturiana, con ún de los direutos más potentes del país y miles de siguidores dientro y fuera d’Asturies.

Pa esti añu tan especial, Dixebra entama una xira de nome ‘Tour 87-17’ cola que va tocar tanto nel país como n’otros territorios del Estáu y d’Europa. La primer parada va ser el 18 de febreru en Valles, nel llocal de l’Asociación Músico-Cultural Pepe Bocanegra, a la que van siguir otres feches que la banda cuenta con avanzar en feches próximes. D’igual forma, anuncia un conciertu especial, ensin dar detalles concretos, anque será al altor del de Corvera del décimu aniversariu o’l d’Avilés del ventenu, que quedó pa la posteridá con ‘Dixebra n’acción’.

Trés cantares

Dixebra va entrar tamién n’estudiu a lo llargo del añu pa desendolcar el proyeutu ‘Dalgo vieyo, dalgo nuevo, dalgo emprestao’. Ésti va consistir na grabación de trés cantares: ‘Da-yos caña’, qu’abría’l discu debut de la banda, ‘Grie-ska’; ‘Sigue’l tren’, tema nuevu lletra que fala de la so trayeutoria, con personaxes que xuben y baxen a esi tren metafóricu; y una versión de la canción tradicional irlandesa ‘New York girls’ basáu na del grupu Oyster Band.

Otra manera, nel Facebook del grupu lideráu pol cantante Xune Elipe, únicu miembru de la formación orixinal que sigue activu, van dir xubiéndose artículos, semeyes, reportaxes, materiales y anéudotes de los 30 años de la banda a lo llargo de tol 2017.

Fonte: Asturies.com

Dixebra va tocar nel Ciares Rock Fest

28 Xunu, 2016 por Pablo R. Guardado

Va celebrase'l 30 de xunetu con motivu del 70 aniversariu del UC Ceares y el III Alcuentru de Fútbol Popular, qu'organiza'l club xixonés.

Dixebra va tocar asina per primer vegada en Ciares nun conciertu que va poner el ramu al III Alcuentru de Fútbol Popular, qu'entama l'equipu del barriu pa celebrar el so aniversariu. Tres celebrase en Palencia y Murcia, representantes de los clubes xestionaos polos sos propios aficionaos van aconceyar en Xixón el 31 de xunetu y, los dos díes previos, participar nun ciclu de charres abiertes a tolos aficionaos.

Xuntos colos avilesinos, van tar nel Ciares Rock Fest Ana Curra, Lagartija Nick y una banda entovía por confirmar. Les actuaciones van principiar a les 21 hores nel patiu del Colexu Públicu Los Pericones –antiguu Manuel Rubiu–, con entraes a la venta a 10 euros hasta'l xueves, pa pasar depués a costar 12 anticipada y 15, na puerta.

Los puntos de venta d'entraes son los siguientes: Librería Paradiso y Yáskaru (Centru), Dipos, La Capiella y Rías Bajas (Ciares), La Plaza y La Folixa (Cimavilla), Sidrería Canteli (El Carmen) y Café de Lola (Los Fresno), en Xixón; Petit Sports Club (Versalles), n'Avilés; y el Llar La Llegra (El Postigu), n'Uviéu.

Fonte: Asturies.com

El programa ‘Don de lenguas’ de ‘Comando Actualidad’ deceiciona pol tratu dáu al asturianu

Na semeya, un momentu de la grabación del programa nun ensayu de Dixebra

   “Foi una manipulación descarada”. La emisión del programa ‘Don de lenguas’ del espaciu ‘Comando Actualidad’ de TVE deceicionó pol tratamientu dáu al asturianu. Dos díes de grabación quedaron resumíos en 7 minutos “inconexos” que dexaron fuera cuestiones d’importancia como la lliteratura, la situación del idioma nel sistema educativu o la demanda d’oficialidá.

   Xune Elipe, la persona que facía de filo conductor del reportaxe dedicáu a l’asturianu del programa emitíu anueche en La 1 con un cuota de pantalla del 8,7 por cientu a nivel estatal (1.715.000 espectadores), nun podía dexar d’amosar el so enfadu tres el resultáu definitivu. “Foi una manipulación descarada”, afirma’l cantante de Dixebra, que vio como’l montaxe final “cargóse dos díes de grabación bien estructuraos nel que se reflexaba un verdaderu movimientu de recuperación llingüística”. Al final, el papel d’Elipe como filo conductor, pa lo qu’utilizó’l castellanu por pidimientu del reporteru Ricard Sabaté, nun se vio como tal nos 7 minutos escasos dedicaos al asturianu, que se centraron no rural.

   “Con tolos respetos pa les fales que salieron nel programa, estes peculariedaes llingüístiques nun son comparables col asturianu, aragonés y aranés”, continúa Elipe, que considera especialmente sangrino’l tratu dau a la llingua del Val d’Arán. “Ye oficial nel estatutu catalán, tien lliteratura y ta escolarizáu, y la imaxe que dieron foi la d’una llingua pa falar coles cabres”, critica. Nel casu concretu del asturianu, el responsable de Goxe Producciones quita responsabilidá al reporteru de ‘Comando Actualidad’ y ponla en Madrid. “Sorpendiéronse colo qu’atoparon n’Asturies, que nun pegaba cola idea que teníen pal programa, más folclóricu o rural, y alcontraron que la llingua asturiana tien connotaciones polítiques nel sentíu de qu’hai una proyeición política no que se ta reclamando. Vieron asemeyances nidies a lo qu’asocede en Galicia, Euskadi o Catalunya y eso ye un tema tabú nesta etapa de TVE. Yera una pataca caliente pa ellos”, argumenta pa tratar de comprender el tratu residual dáu al idioma, con una reducción de tiempu comparao col restu de llingües, y asitándolu al final del programa con una estructura “rara; claramente inconexa”.

Entrevistes non emitíes

   Nel montaxe final del espaciu dedicáu al asturianu quedaron ensin salir Samuel Castro y Esther Prieto, responsables d’Ediciones Trabes, que falaron a Sabaté de la producción lliteraria y la necesidá d’oficialidá, asina como imáxenes de cartelos n’asturianu en dellos establecimientos d’Uviéu. Tampoco nun se sacó pallabra dalguna de les declaraciones feches pol guitarrista de Dixebra y maestru de Matemátiques Primi Abella, onde se mostraba mui críticu cola política del Gobiernu con respeuto a la materia de Llingua Asturiana asina como la postura de ministru José Ignacio con respeuto a la especialidá docente, nin del periodista Paco Álvarez sobre la trayeutoria de Dixebra. ‘Comando Actualida’ si fixo referencia a la producción musical con imáxenes de Tutu Estudios y de Sergio Rodríguez y Elipe, pero de manera testimonial.

   No que sí se centró de manera especial el reportaxe foi, como nel restu de fales y llingües, no rural. D’esta forma, Caldones protagonizó les primeres imáxenes pa depués pasar al mercáu de La Pola Siero xunto con Xosé María García Sánchez ‘Llábana’, ún de los primeros profesores d’asturianu cuando nel 1984 principiaba l’enseñu del idioma na escuela. Darréu, les imáxenes pasaron a la casa de Llábana, con imáxenes del horru, del llagar y de la manera de facer ‘Afuega’l Pitu’ acompañaes con pequeñes entrugues referentes al idioma.

   L’espaciu da llueu un saltu a la ciudá, en concreto a Uviéu, a los cursos de la Xunta pola Defensa de la Llingua Asturiana p’adultos que pon Héctor Xil, que tampoco pue ocultar el so desencantu col programa. “Como mínimo puedo dicir que toi deceicionáu por tolo que grabaron y pudieron sacar, y lo que quedó al final”, afirma pa depués calificar la distribución de tiempu como una “tomadura de pelo”. “El reportaxe quedó esgonciáu. Teníemos un argumentu trazáu, con visites a Trabe y con Llábana, y punxeron lo que-yos dio pela gana”, continúa Xil, que cree que los reporteros vieron n’Asturies “dalgo que nun esperaben”

   Nel so casu concretu, “tuvieron grabando media tarde y conmigo conversaron sobre 15 minutos onde tratamos temes como la oficialidá y la situación del idioma na escuela. Al final nun salió nada”, esplica. Sobre les razones d’esti tratu tan sorprendente y el recorte de tiempu, Xil considera que ‘Comando Actualidad’ buscaba un enfoque más rural que nun atoparon y “la historia salíase un poco de madre, polo qu’apostaron poles imáxenes de Caldones”.

Oficialidá "necesaria"

   Esta deceición por parte d’un programa que llevantó un gran interés nel país, como amuesa la so repercusión nes redes sociales, lleva a Elipe a raficase en que “la oficialidá ye necesaria”. “O la llingua asturiana se declara oficial o nunca nos van tomar en serio”, asegura. La xente interesada en ver el programa completu pue facelo na web de "Comando Actualidad".         Fonte: asturies.com

Dixebra y Trabe algamen el Premiu Andrés Solar. Los retayos en llingua asturiana y la Llei Wert el Madreñazu

La Xunta pola Defensa la Llingua Asturiana acaba d'anunciar los ganadores de los XXVIII Premios Andrés Solar. Nesta ocasión, el Pegollu foi, ex aequo, pa la formación musical Dixebra y pa la editorial Trabe, que cumplen 25 y 20 años, respectivamente, como proyectos fundamentales pa entender el desarrollu cultural, social y económicu de la llingua asturiana nes últimes décades. El Madreñazu foi, tamién ex aequo, pa los recortes en materia llingüística y pa la Llei Wert.


La Xunta pola Defensa de la Llingua Asturiana decidió conceder esti 2012 el Pegollu de los Premios Andrés Solar a los decanos del rock astur y a la editorial uviedina «pol so apueste decidíu pola música y lliteratura a lo llargo de bien d'años, demostrando que l’asturianu ye una ferramienta útil y necesaria nel rellatu de la contemporaneidá d'Asturies».

Otra manera, la versión negativa, el Madreñazu, reconoz a la persona o entidá que rescamplaren pol so llabor negativu pa cola llingua asturiana. Na edición del 2012, va pa los recortes en materia llingüística y pa la Llei Wert. «Nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu», afirma la organización, qu'añade que no que cinca a la llamada Llei Wert, «namás hai que dicir qu’introduz modificaciones brutales que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa».

La entrega de los Premios va facese’l día 15 d’avientu a les 19.30 hores, nel Salón d’Actos del Antiguu Institutu de Xixón. L’actu va contar cola actuación musical de Dani Stylo que va facer reellaboraciones de temes históricos de Dixebra. Tamién, como tolos años, depués de l’actu va haber una espicha nel chigre xixonés Canteli, la entrada val 20 euros. Pa dir, hai qu’acutar sitiu y llamar al 985229553 o mandar corréu a info@exunta.org, primero d’esti 13 d’avientu.

Fonte: Les Noticies

Dixebra ente los cien grupos más destacaos del entamu de sieglu

Dixebra ente los cien grupos más destacaos del entamu de sieglu. Por cuenta del décimu aniversariu de la revista Rock Estatal (una de les más importantes dedicada a la escena rockera del Estáu español), nel so últimu númberu, correspondiente a esti mes de xunetu, la publicación inclúi un reportaxe especial tituláu “Las 100 bandas más destacadas de la última década”, fechu a partir de les opiniones de periodistes especializaos y llectores. Nél apaez un llistáu colos grupos más representativos, influyentes o importantes de los últimos diez años nel rock fechu nel Estáu; ente elles figura reseñada la formación avilesina Dixebra, que respuende a un cuestionariu pequeñu. El grupu asturianu apaez al llau d’otros como Barricada, Barón Rojo, Burning, Celtas Cortos, Fito & Fitipaldis, Héroes del Silencio, Loquillo, Los Enemigos, M Clan, Marea, Pereza, Rosendo, Siniestro Total o Soziedad Alkohólica. Fonte: Asturnews.

Dixebra reclama la oficialidá del asturianu al recibir dos premios

El grupu Dixebra, qu’anguaño cumple venticinco años d’actividá ininterumpida, recibía esta selmana dos gallardones por cuenta de la so llarga trayectoria. El primeru recoyíalu’l llunes pasáu en Piedrasblancas, capital del conceyu de Castrillón, onde la Banda de Gaites L’Alborecer facía entrega del so máximu gallardón a la formación decana del rock asturianu. La Gaita d’Oru recibíenla nel marcu del Día de Castrillón nes fiestes llocales, de manes de l’alcaldesa, Ángela Vallina, pola so xera en defensa de la llingua asturiana y la incorporación de la música asturiana a contestos sonoros contemporáneos.

El segundu reconocimientu llegó-yos en casa, asina na novena edición de los premios qu’añalmente concede’l periódicu La Voz de Avilés, foron merecedores del gallardón nel apartáu d’Acción Cultural. Na gala d’entrega, que se facía esti xueves, y a la qu’asistíen bien de representantes políticos del país, ente ellos tolos alcaldes d’Avilés y comarca, diputaos na Xunta Xeneral (como Ignacio Prendes d’UpyD o Jesús Gutiérrez del PSOE –amás de secretariu xeneral de la FSA-), senadores (como l’expresidente asturianu Álvarez Areces), conseyeros (Presidencia y Educación y Cultura) y otros cargos de l’alministración, Dixebra fizo alcordanza de tolos músicos que trabayen cola llingua asturiana como ferramienta de creación, pidió “dende la humildá, pero tamién dende la convicción nes nuestres razones, que los representantes políticos asuman con naturalidá, respetu y llibertá’l fechu llinguísticu asturianu”, desixeron que s’acabe col “apartheid llingüísticu que sufre esti país llamáu Asturies” y acabaron la so intervención comentando que’l “meyor premiu que nos pueden dar a la xente que trabayamos, nos comunicamos o creamos na llingua asturiana ye’l de la so oficialidá”.

Otra manera, Dixebra sigue cola so xira braniega, que los va llevar a tocar nes próximes selmanes en llugares como Candás, Carabanzo o Avilés, amás de delles cites fuera del país. A la vuelta del branu van enzarrase nel llocal d’ensayu pa preparar los temes que van formar parte del so discu nuevu, pal que baraxen la so salida a la cai nos primeros meses del añu qu’entra.

Fonte: Asturnews

Dixebra: 25 años de rock n'asturianu

Dixebra cellebrará'l so 25 aniversariu na Sala Quattro d'Avilés.

El grupu asturianu de rock Dixebra vien d'anunciar el llugar de cellebración del conciertu conmemorativu del so 25 aniversariu, que tendrá llugar el Vienres 30 de Marzu de magar les 22:30 hores na Sala Quattro d'Avilés, conceyu d'orixe de la banda y llugar onde Dixebra presentó'l so segundu discu "¿Asturies o Trabayes?" va práuticamente 19 años.

Según anuncien dende'l grupu, cuntarán con delles collaboraciones y surprieses, ufiertando al públicu un repertoriu clásicu con temes que'l grupu nun tocó en direutu nos caberos años. Les entraes yá tan disponibles al traviés de la rede y dellos establecimientos d'Uviéu, Xixón y Avilés a un preciu de 12 euros n'anticipada y 15 en taquilla.

D'otru lláu, el grupu musical asturianu llideráu por Xune Elipe ye'l primeru que confirma la so presencia na edición 2012 del "Conciertu pola Oficialidá" organizáu pola Xunta Moza en conxuntu cola XPDLLA.

Fonte: Infoasturies