La Universidá d'Uviéu proyecta curtios n'asturianu

La Casa de les Llingües, entidá de la Universidá d'Uviéu encargada del enseñu d'idiomes organiza'l ciclu Cine de Babel (entamáu en collaboración cola delegación asturiana de AEGEE-Foru d'Estudiantes Europeos) Dientro d'estes xornaes dedicaes al cine, esti vienres, 18 de mayu, a les 18.30, nel Club de les Llingües del centru, van proyectase dellos curtios n'asturianu: "Lo que precises selo yo", "Carreteres inciertes" y "7337", en versión orixinal con subtítulos en castellán.
El pase va dir precedíu d'una curtia introducción per parte d'un profesor collaborador de La Casa de les Llingües. Va poder celebrase un curtiu alderique al rematar les películes.

Fonte: asturnews

La Casa de les Llingües de la Universidá d'Uviéu entama cursos d'asturianu

Yera una de les promeses que se ficieren nel momentu de creyar la Casa de les Llingües de la Universidá d’Uviéu, en 2008, cola llegada del rector Vicente Gotor al gobiernu universitariu. Pero nun foi hasta agora, y dempués de delles protestes del Conceyu Universitariu pol Asturianu, cuando la nueva institución convocó cursos d’asturianu dientro de la so ufierta, qu’inclúi otres diez llingües pal cursu 2011-2012.

Estos cursos, de nivel A1 d’asturianu cunten con venti places y van celebrase en Xixón, Uviéu y Avilés. Empobinaos a mayores de 17 años, tienen un preciu de 320 euros.
N’Uviéu los cursos van celebrase los llunes y miércoles, de 16:30 a 18:00 hores; en Xixón, dientro de la Cátedra Xovellanos, los martes y xueves, de 19:30 a 21:00 hores, y n’Avilés, llunes y miércoles, de 18:00 a 19:30 hores. Toos ellos van entamar na selmana del 3 d’ochobre, rematando’l 31 de mayu de 2012, cuntando con 90 hores de docencia. La matricula tará abierta del 4 de xunetu al 16 de setiembre .

Más información: Más información sobre los cursos

Fonte: Asturnews