"La tele que queremos": mesa redonda nel CSOA La Madreña

El CSOA La Madreña acueye esti miércoles una mesa redonda entamada pola XDLA.

La Xunta Pola Defensa de la Llingua Asturiana entama esti miércoles a les 19:00 nel CSOA La Madreña (Cai Xeneral Elorza 32, Uviéu) la mesa redonda entitulada "La tele que queremos". L'envís de la mesma sedrá afondar alrodiu'l papel d'un serviciu públicu de comunicación como normalizador del idioma, temática na que vien trabayando la XDLA na so reivindicación d'una RTPA n'asturianu dafechu.

Pa ello, amás de cola moderación de Carlos Pulgar (XDLA), va cuntase cola participación de Carlos Menéndez Otero (profesor de la Universidá d'Uviéu), Oscar Vega (miembru del Comité d'Empresa de la RTPA), Xosé Antón Fernández "Ambás" (músicu y presentador) y Damián Barreiro (periodista), conformando asina un alderique con visiones vinientes dende distintos puntos de vista venceyaos al mediu.

Fonte: Infoasturies

III Concursu lliterariu "Demuestra'l to amor pola llingua"

‘Demuestra’l to amor pola llingua’, concursu lliterariu de Xunta Moza, algama la so tercer edición

por Pablo R. Guardado

Xunta Moza ta acabante de convocar la tercer edición del concursu lliterariu ‘Demuestra’l to amor pola llingua’. Los interesaos en participar tienen hasta’l martes pa declarase a la so llingua materna en 140 carauteres.

Ye precisamente nesa fecha, el 21 de febreru, cuando a nivel mundial se celebra’l Día Internacional de la Llingua Materna, xornada conmemorativa instaurada pola UNESCO a favor del plurillingüísmu y la diversidá llingüística. La estaya moza de la Xunta pola Defensa de la Llingua Asturiana (XDLA) pretende asina collaborar pa difundir esti mensaxe y visibilizar la situación de l’asturianu.

El III Concursu Lliterariu ‘Demuestra’l to amor pola llingua’ trátase d’una iniciativa orixinal, yá que los participantes han de presentar un eslogan, frase o microrrellatu de non más de 140 carauteres –124 si la ferramienta utilizada pa concursar ye por Twitter– na que declare, en prosa o versu, el so amor y apreciu a la so llingua materna. Los trabayos pueden presentase en formatu lletrónicu, bien mandando un corréu a amorpolallingua@gmail.com, bien al traviés de Twitter usando’l hashtag #amorpolallingua; o per vía postal dirixendo les cartes a la direición de la organización: Xunta Moza, cai La Gascona 12, 3.u, 33001, Uviéu.

El ganador del concursu, que va fallase’l nun actu cultural el vienres 23 de febreru, a les 21 hores, nel CSOA La Madreña d’Uviéu, va recibir un llote de productos de la Xunta pola Defensa de la Llingua Asturiana y Xunta Moza. Dende la organización encamienten a tolos participantes a acudir a esti eventu.

Fonte: Asturies.com