¿Y Astérix na tele falando n'asturianu?

por Pablo R.Guardado
La XDLA insiste en que FORTA tien los derechos de les películes d’animación del galu, polo que TPA podría emitiles en llingua asturiana. Otros territorios yá les disfrutaron nel so idioma propiu.

La salida a la venta güei de ‘La foceta d’oru’, el númberu 2 de la serie d’Astérix, xunto col estrenu mundial el xueves de ‘Astérix y el papiru de César’, la historia nueva –que fai la númberu 36– del compañeru d’Obélix, y l’ésitu de les traducciones anteriores, sobre manera ‘Astérix na tierra los pictos’, con 2.500 exemplares vendíos, lleva a la Xunta pola Defensa de la Llingua Asturiana (XDLA) a insistir na demanda de “facer el doblaxe al nuestru idioma de les películes protagonizaes pol héroe galu, un llabor que diba responder al compromisu de llevar l’asturianu al mayor públicu posible, sobre too a lo más mozo”. La organización cívica recuerda que’l pidimientu anterior, fechu hai dos años cola salida de l’aventura de la conocida pareya n’Alba, nun s’atendió, polo que torna “a solicitar lo mesmo a la Dirección Xeneral de Planificación Llingüística y Normalización y a la RTPA”.

La XDLA recuerda que “les televisiones autonómiques agrupaes na organización FORTA, ente les que ta la TPA, tienen los derechos d’emisión de les películes d’animación que protagonizó l’héroe galu a lo llargo d’estos años, qu’amás repítenles davezu en feches señalaes, como’l branu y Navidá, por mor del so éxitu. Mesmamente, les últimes películes d'Astérix llegaron a estrenase nos cines en vascu y catalán, mentes qu'en Galicia una campaña fecha a comuña ente TVG y la Secretaría Xeral de Política Lingüística permitió la edición en DVD de delles películes infantiles doblaes, ente les que taben dalgunes protagonizaes por esti personaxe tan conocíu del cómic francés”.

Esti pasu podría interpretase como'l primeru “pa visibilizar el cumplimientu del alcuerdu d'investidura ente PSOE y IX, que diz que RTPA tien qu'aumentar los sos conteníos en llingua asturiana, y del mesmu plan de dignificación del asturianu, aprobáu apocayá col consensu d'una parte importante del arcu parllamentariu y que, con unos términos menos esplícitos, vien a dicir lo mesmo”. Nel casu contrariu, “namás pue entendese como dexar en papel moyao lo pactao, amás de ser una muestra más de los prexuicios del equipu de dirección actual de RTPA y de lo necesario del cambiu: el compromisu mínimu de cumplir cola llexislación tien que ser un motivu sine qua non pa dirixir RTPA, non como hasta agora”.

Obligación de promocionar l'idioma

Por último, la XDLA calca en que l’ente públicu de comunicación “tien la obligación d’atender a les minoríes, protexer a los neños, educar a l’audiencia y promocionar el nuestru idioma, funciones que se cumplen cola emisión d'un productu asina”, y fai referencia al ‘Informe sobre la necesidá d’una programación infantil en TPA’ espublizáu en payares del 2013 pol coleutivu nel que se destaca que l’asturiana ye –xunto cola aragonesa– “la única cadena europea d’una comunidá billingüe que nun emite programación pa los más pequeños na llingua propia”, y too ello pese a éxitos demostraos como la serie gallega ‘Los Bolechas’, de la que namái se tornaron los 26 capítulos de la primer temporada. En Galicia yá van pela quinta.

Fonte: Asturies.com

Astérix vuelve esta seronda con dos llibros n’asturianu baxo’l brazu

Trátase del volume nuevu ‘Ásterix y el papiru de César’ y del númberu 2 de la coleición, ‘La foceta d’oru’.

Distribuciones Terrier afita asina la so apuesta por tornar al asturianu toles histories del popular personaxe. “Ye la nuesa pretensión”, confirma Javier Melón, alministrador de la empresa, que volvió a confiar pa la traducción d’esti proyeutu doble en María Xosé Rodríguez López. “Trátase d’una pieza clave pa nós, tanto como’l propiu Astérix”, apunta Melón, qu’anuncia la salida a la venta de les dos obres pal 22 d’ochobre.

‘Astérix y el papiru de César’, editada por Bruño Salvat, empresa poseedora de los derechos de los cómics, trátase de la historia nueva del galu, la que fai’l númberu 36. Didier Conrad, como dibuxante, y Jean-Yves Ferri, como guionista, repiten tres estrenase con ‘Astérix na tierra los pictos’ (2013), siempre baxo la supervisión d'Albert Urdezo, creador del personaxe xunto col fináu René Goscinny.

A pesar de que nun se conocen munchos detalles de la historia, nesti cómic los acontecimientos desendólquense na Galia y, como novedá, va apeacer un villanu desconocíu que trabaya como asesor de César. Al igual que nel volume anterior, na qu’Astérix y Obélix visitaben Alba, la tierra los pictos, la historia va espublizase n’asturianu, castellanu, catalán, gallegu y vascu, “faciendo normal lo que yá lo ye a nivel de cai”, esplica Melón. L’apuesta va ser fuerte, con una tirada inicial de 1.500 exemplares, cola pretensión de tener un ésitu asemeyáu al númberu 35, cuando s’editaron 2.500.

Al empar, va tar nes llibres ‘La foceta d’oru’, segunda historia firmada por Urdezo y Goscinny. Espublizada nel 1962 tres salir per entregues na revista francesa ‘Pilote’, cuenta l’aventura d’Astérix y Obélix nun viaxe hacia Lutecia pa consiguir una foceta d’oru depués de qu’a Panorámix se-y rompiera la de so. Nesti casu, la tirada ye de 1.000 exemplares.

Otros proyeutos en cartera              Terrier cuenta amás con otros proyeutos en cartera pa tornar al asturianu, anque de momento éstos tán guardaos nel caxón. La versión en llingua asturiana de ‘El Hobbit’ foi un ésitu, cola primer edición escosada, y les traducciones futures siguiríen la mesma llinia. “Trataríense d’ésitos lliterarios internacionales mui populares”, apunta Melón.                                                                                                                          Fonte: asturies.com

La XDLA pidea a TPA que celebre la Selmana de les Lletres emitiendo una película d'animación en llingua asturiana

   La XDLA pide a TPA y a Política Llingüística que se festexe la Selmana de les Lletres emitiendo una película d’animación n’asturianu. Esti añu, la xornada va tar dedicada al cómic, xéneru nel que nacieron personaxes como  Astérix,  Shin-Chan,  Son Goku  o  Doraemon.

   Hai díes, el Gobiernu d’Asturies anunciaba que la XXXV Selmana de les Lletres Asturianes diba tar dedicada al cómic n’asturianu. A la Xunta pola Defensa de la Llingua Asturiana (XDLA) paez-y una bona decisión: el cómic ye un xéneru que val p’averar la llingua propia a les xeneraciones más moces. Por eso, como añadíu a la programación de la Selmana, la XDLA propón a la Dirección Xeneral de Política Llingüística y a TPA que collaboren nel doblaxe al asturianu de dalguna película d’animación protagonizada por un personaxe de cómic.

Por exemplu, les televisiones agrupaes na organización FORTA, ente les que ta TPA, tienen los derechos d’emisión de les siete películes d’animación que protagonizó Ásterix y que se reponen cada poco con bien bona acoyida ente los neños y los non tan neños. Hai que recordar l’éxitu ensin precedentes que tuvo la publicación n’asturianu d’Astérix na tierra de los pictos, que vendió en pocos meses más de 2.000 exemplares. Sicasí, nun ye l’únicu personaxe de cómic, o de manga –versión xaponesa d’esti xéneru-, ente los que podría escoyer la cadena asturiana. Asina, como muestra, hai doce películes de Shin-Chan doblaes al gallegu, vascu o catalán; quince de Dragon Ball; diecisiete de Doraemón –mesmamente, TVG estrenó Doraemon e o mundo perdido’l 6 de xineru del 2014-; y ocho d’El detective Conan –la última emitida en gallegu'l 3 de xineru del 2013-.

   La XDLA destaca estos personaxes pol éxitu d’audiencia de les versiones de TVG, TV3 y ETB, que siempre tuvieron perriba del 20%. La organización, como ya señaló nel Informe sobre la necesidá d’una programación infantil en TPA, vuelve a recordar que la nuestra televisión ye la única cadena europea d’una comunidá billingüe que nun emite programación pa los más pequeños na llingua propia, polo qu’actualmente nun ta cumpliendo colos sos mandaos llegales".

   Pala Xunta pola Defensa de la Llingua "nun se pue poner de sida que la emisión d’un productu asina supondría un gastu mayor pa TPA, porque la FORTA tien los derechos d’emisión d’estos productos –yá emitió delles películes infantiles nes navidaes pasaes- y porque la nuestra televisión ta dedicando una partida del so presupuestu (unos 100.000 euros) en doblaxes al castellanu fechos en Madrid. Sicasí, doblar una película d’animación de 75 minutos al asturianu podría facese con 5.000 euros. Otra manera, de facer la traducción podría encargase la mesma Dirección Xeneral de Política Llingüística o l’Academia de la Llingua Asturiana, polo que nun supondría nengún costu añadíu. Tamién hai que tener en cuenta que la emisión d’una película asina valdría pa poner los pegollos d’una industria del doblaxe. Por exemplu, l’aparición de TVG en Galicia xeneró una industria que mantién a 300 persones y a seis empreses. Nun se pue dexar de llau l’importante’l papel que podría xugar esta emisión como material pa les clases d’asturianu. P’acabar, la Xunta pola Defensa de la Llingua Asturiana recuerda qu’esti apueste pola emisión d’una película d’animación n’asturianu supondría defender la tresmisión xeneracional, dalgo pa lo que cuadra mui bien una xornada como la Selmana de les Lletres, onde la Dirección Xeneral de Política Llingüística y la TPA tienen que collaborar pa da-y la mayor visibilidá posible".    Fonte:  Asturnews

Bruño va siguir apostando pol asturianu tres l'ésitu algamáu con "Astérix na tierra los Pictos"

    2.000 exemplares vendíos, tres una primer edición de 1.500 y una segunda de 500. Ésos son los númberos que presenta'l cómic d'Astérix y que va llevar a Bruño, merecedor del Pegollu de la XDLA xunto con Caudalia, a siguir apostando pol idioma.

   Asina, nel 2015, fecha na que ta prevista la espublización de l’aventura próxima del galu y del so collaciu Obélix, ‘Astérix chez les Bataves’, va haber la correspondiente versión asturiana del cómic y, posiblemente, una torna del númberu 1 de la coleición, ‘Astérix le Gaulois’, según confirmó a Asturies.com Miguel González, el direutor comercial de Distribuciones Terrier, qu’acompañó a Isabel Carril, direutora editorial de Bruño, a recoyer el Pegollu de los XXIX Premios Andrés Solar de la Xunta pola Defensa de la Llingua Asturiana, gallardón compartíu col centru comercial Caudalia. La razón d’esta apuesta nueva de la editorial madrilana pola llingua asturiaana son los 2.000 cómics espublizaos de ‘Astérix na Tierra los Pictos’ –con traducción de María Xosé Rodríguez– tres escosar una primer edición de 1.500 exemplares. Unos númberos más que relevantes que va permitir a los llectores asturianos a disfrutar na llingua propia de les andancies de los galos na so visita próxima a los bátavos, pueblu xermánicu qu’ocupaba parte del territoriu de lo qu’anguaño son los Países Baxos.

   “Ye un arguyu y un honor l’algamar el Premiu Andrés Solar polo que representa. Lleva ventinueve ediciones y paeznos un llabor importantísima de la Xunta pola Defensa de la Llingua Asturiana”, afirmó Carril. Tanto ella como González confirmaron que los resultaos de les ventes “superaron les nueses bones espectatives, porque sabíemos qu’había un publicu potencial, pero non hasta onde podíen llegar unos personaxes tan populares como Astérix y Obélix”. Los 2.000 númberos espublizaos, con especial incidencia nes cuenques, onde la versión asturiana supera en ventes a la española, “son dalgo históricu y un comienzo”, señalaben los dos responsables al unísonu. D’igual forma, recordaron l’enfoque inicial del proyeutu, destináu a un profesoráu de Llingua Asturiana faltu de materiales colos que trabayar colos escolinos, y la so esperanza en que los cómics d’Astérix “ayuden a la creación d’una xeneración llectora nueva en llingua asturiana”.

El Grupo Editorial Bruño foi, xunto col centru comercial Caudalia, los protagonistes de la gala d’entrega de los XXIX Premios Andrés Solar, gallardones creaos nel 1985 n’alcordanza del poeta xixonés y militante de la XDLA –que finara un añu enantes n’accidente de tráficu– que busquen premiar a la entidá o persones que rescamplaren na defensa de la llingua asturiana y poner n’evidencia a la entidá o persones que fixeren tolo contrario. Asina, entrégase’l pegollu y la Madreña de Purpurina, de manera respeutiva. Ésta última foi pa Paradores de Turismo, “entidá de capital público que sistemáticamente niégase a contestar tolos requerimientos fechos pa que respete la toponimia oficial nos sos establecimientos d'Asturies, como son los casos de Xixón, Courias o Cangues d’Onís”. Nengún responsables de la empresa, como ye vezu col ‘madreñazu’, acudió a recibir el premiu.

   La otra ausencia significativa foi la de la xerente de Caudalia, Pilar Suárez, anque nesti casu por motivos ayenos a la so voluntá. Sicasí, unvió un escrito que se lleó nel actu celebráu’l sábadu nel Centru de Cultura Antiguu Institutu de Xixón nel que manifestó que “ye una gran satisfaición recibir güei esti pegollu y quiero aprovechar estes llinies pa confirmar l’apueste d’esta xerencia pa col usu, promoción y visualización de la llingua asturiana, usando pa eso los recursos que tenemos nes nuestres manes pa poder llevalo a la práutica, nun ámbitu tan difícil de facelo como son les grandes superficies comerciales. Por eso queremos manifestar que vamos siguir faciendo campañes publicitaries y comerciales, amás d’otres actividaes na nuestra llingua, esperando que vuelvan a tener una bona aceptación y dando asina un pasín más a favor de la normalización del asturianu y qu’eso seya una realidá”. D’igual forma, confirmó que’l Pegollu supón “una motivación más pa siguir trabayando nesa dirección y intentar d’esa manera que la llingua asturiana tea presente nel día a día del centru”.

El galu y Harry Potter n’asturianu na TPA      Ún de los momentos más esperaos de los Premios Andrés Solar ye’l discursu de la XDLA, onde la organización fai un repás a lo asocedíu mientres l’añu y analiza la salú del idioma. El so voceru, Carlos Pulgar, foi l’encargáu de  la llectura d’un testu mui críticu nel que llamentaba que nun fora raru ver toles selmanes “cómo se maltraten los derechos d'un o una falante, d'unos pas o d'unos escolinos pol simple fechu de querer falar, usar o estudiar l'asturianu. Tol añu lu pasamos teniendo que sentir los incumplimientos del marcu llegal vixente, bien probe por cierto, de parte de les diferentes alministraciones, por acción o omisión”.

    Darréu, Pulgar foi analizando la situación del idioma por estayes. Asina, en materia de toponimia señaló que “tenemos que ver cómo la propia Alministración que la oficializa, depués ye la primera n'incumplila dafechu. Lo mesmo da que sía nel BOPA, que na documentación y bases de datos de les conseyeríes o que nos servicios públicos de comunicación, l'usu de la toponimia correcta y oficial o directamente nun se fai o faise de manera errática, parcial y caprichosa. Les reivindicaciones repetíes nesti sen nun topen más qu'indeferencia, pasotismu o bones palabres que depués nun cuayen”. Una situación “tanto o más preocupante” vívese na enseñanza, coles “consecuencies llacerioses que pue tener la aplicación de la LOMCE n'Asturies”, que podría aprovechar el Gobiernu “pa dexar l'enseñu de la llingua nuna situación inda más arrequexada y marxinalizada”, o la falta de profesoráu en munchos centros al aniciu del cursu “pola falta de previsión y planificación”.

    Otra situación murnia ye la de la presencia del idioma nos medios de comunicación públicos, onde se ve “un usu parcial y deficiente de la toponimia oficial, una programación televisiva y radiofónica marxinal en porcentaxes y fuertemente tematizada, con bloques y conteníos vetaos al asturianu y con ausencies de clamor como la d'una programación infantil que valga pa favorecer la tresmisión xeneracional del idioma”. Al respeuto, la XDLA señala que “nun nos queda otro que lluchar porque la futura Llei de Medios recueya de manera inequívoca la vocación del serviciu públicu de comunicación d’impulsu fundamental a la normalización llingüística”.

Sobre los gallardonaos, Pulgar centróse nun primer momentu na empresa pública Paradores de Turismo, merecedora de la Madreña de Purpurina, l’antipremiu de la XDLA, “por encarnar perbién l’actitú de muchos departamentos de l’Alministración estatal que nun se quieren dar por enteraos de la esistencia del procesu de oficialización toponímica n’Asturies y la so inescusable aplicación en tou tipu d’equipamientos, establecimientos y infraestructures”. Por contra, emponderó’l llabor de los premiaos col Pegollu, principando por Caudalia, centru comercial mierense que lleva dos años promoviendo “diferentes campañes onde la llingua asturiana ye la llingua vehicular de tol material que se reparte ente la xente”, como folletos, cartelos o vales de descuentu. “El grau d'aceptación popular d'estes promociones ta siendo mui importante al amestar naturalidá y normalidá na so presentación, col usu de rexistros llinguísticos correctos. Por esto y por tratase d'actividaes y campañes d'una incidencial potencial grande, non restrixíes al ámbitu cultural, feches sólo n'asturianu y ensin ayudes institucionales, pensamos que se trata d'un premiu bien dignu y merecíu. Nun nos queda otro qu'agradecer el desarrollu d'estes campañes y esperar que tengan continuación regular nel tiempu y ampliaes na midida de lo posible a tolos ámbitos de competencia de la xestión del Centru Comercial”, continuó Pulgar.

    Bones pallabres tamién recibió’l Grupo Editorial Bruño, responsable de que “a lo llargo d'unos díes y selmanes” pudiéranse ver “coses a les que, desgraciadamente, tamos poco avezaos: la presencia del asturianu con normalidá y n'igualdá de condiciones coles otres llingües tanto n'anuncios y promociones como en llibreríes y notes de prensa de medios de comunicación. Foron unos díes nos que pudimos tastiar lo que pue y tien que ser la normalidá y la normalización”. Iniciatives como la d’Astérix o la del primer llibru de Harry Potter –espublizáu n’asturianu por Ediciones Trabe– son consideraes perimportantes pola XDLA, que recuerda que la TPA tien los derechos d’emisión de les series d’animación del galu y de les películes del magu al traviés de la FORTA. “Pidimos a la nuestra televisión pública que trabaye nel doblaxe al asturianu de les películes protagonizaes por estos personaxes, un llabor que diba responder al compromisu de llevar l’asturianu al mayor públicu posible, sobre too a lo más mozo”, demandó Pulgar.

Respeuto al 2014, na que va celebrase la trixésima edición de los Premios Andrés Solar, el voceru de la organización afirmó que tenemos “un añu per delantre pa facer les coses nes que creemos y que queremos, tenemos un añu pa siguir —hai que siguir— dando toles batalles necesaries pola normalización de la nuestra llingua, por que se llogren los nuestros derechos cola oficialidá, por una enseñanza digna del asturianu y n'asturianu, por unos medios que sían un serviciu públicu p’ayudar al futuru de la nuestra llingua y la nuestra sociedá. Ye tiempu de trabayar como nunca y lluchar como siempre, participando de los espacios deliberativos y comunes de los que, como nós, afuxen del lobismu y el mantenimientu del statu quo, pa dexar p'atrás de manera definitiva esti estáu de les coses que solo ufierta a la nuestra llingua la desapaición. Vamos llevantar, construir y defender una Asturies habitable pa toos y toes, y onde l’asturianu se fale y se sienta, onde sía una llingua viva”.

    L’actu, que presentó Naciu Varillas, terminó cola actuación musical del dúu Mapi Quintana y Elías García. Acompañada d’un contrabaxu –nes manes d’ella– y d’un bouzoki, la voz de Quintana dio dulzura a dellos cantares tradicionales del valle d’El Güerna, pa finar el conciertu con dos temes del valle de Payares.  Na semeya, Martínez, Lali Solar –hermana d’Andés Solar– y Carril sostienen el Pegollu.
    Fonte:  Asturies.com

50 años d'Astérix

El Festival de l’Amadora señala los 50 años d'Astérix. El Festival Internacional de Cómic de l’Amadora (FIBDA) va tener esti añu una esposición dedicada a los 50 años de la creación d’Astérix y de la irreducible aldega gala.

La vixésima edición del festival trescurrirá del 23 de ochobre al 8 de payares, nel Fórum Luís de Camões, na Amadora, a semeyanza del qu’aconteció n’años anteriores. Pa esta edición ta prevista una esposición con dibuxos d’Albert Uderzo, l’autor que diseñó los más de trenta volumes de les hestories del pequeñu galu, munchos d’ellos col argumentista René Goschinny, fináu en 1977.

N’ochobre sedrá llanzáu en simultáneo en varios países, incluyendo Portugal, un álbum inéditu robláu por Uderzo pa señalar el mediu sieglu d’Astérix. L’álbum, inda ensin títulu, tendrá 56 páxines y ta anunciáu como «la mayor llacuada festiva preparada polos irreducibles galos».
El llanzamientu sedrá simultánéu en varios países.

Dicá güei, les hestories d’Astérix y del so insepartable amigu Obélix, vendieron más de 300 millones d’exemplares en tol mundiu y tán disponibles en 107 llingües y dialeutos, incluyendo l’asturianu y el mirandés.