Les Noticies diz adiós a los quioscos.
Primera de la edición cabera de Les Noticies en papel.
L’únicu periódicu en papel que s’asoleya dafechu n’asturianu, el selmanariu Les Noticies, despídese de los quioscos esta selmana y failo con un númberu nel qu’apaez la primera con un gran titular “Depués de 15 años, última edición impresa”. El númberu 769 sedrá recordáu como’l caberu d’esti periódicu que sigue agora’l so camín na rede, al traviés de lesnoticies.com
A les amueses de solidaridá y llamentu pol fin del proyeutu en papel llegaes yá per parte d’Iniciativa pol Asturianu y la Xunta pola Defensa de la Llingua Asturiana, sumóse agora la de l’Asociación de Profesionales de la Comunicación d'Avilés (APCA), que calificó esti pieslle como’l pieslle a “quince años de periodismu impresu íntegramente n’asturianu y, polo tanto, el pieslle a quince años d’una forma de ver y contar la realidá d’Asturies”.
Un poco d’hestoria
El periódicu espublizó hasta agora 20.000 páxines en papel, con tou tipu d’informaciones, cuntando con “un periódicu onde s'exerció'l periodismu profesional y se normalizó l'asturianu”, según espliquen dende Ámbitu, la empresa editora.
El selmanariu Les Noticies presentóse na Feria Muestres d’Asturies n’agostu de 1996 y salió al mercáu col so primer númberu un 6 de setiembre d’esi mesmu añu. N'aquella presentación en sociedá, l'editor de Les Noticies y primer direutor del periódicu, Inaciu Iglesias, afitó les llínies maestres del proyectu editorial: "El nuesu compromisu ye colos asturianos, colos nuestros llectores y cola so cultura particular. Esi vínculu éticu vamos a renovalu selmana a selmana hasta consiguir asentar un proyeutu a toes lluces necesariu", esplicaba. Ente los sos direutores tuvieron, amás d’Iglesias, Sixto Cortina, Xuan Bello, Ramón Lluís Bande, Henrique Facuriella o Beatriz R. Viado, que se convirtió na primer direutora muyer d’un periódicu asturianu.
Fonte: Asturnews
