Podemos denuncia l'incumplimientu del pautu d'investidura sobre l'asturianu na RTPA

 Cien díes de Virgili ensin novedaes pa col asturianu

Sorpréndese pola ausencia de programes nuevos en llingua asturiana na programación de RTPA que Virgili presentó recién nel conseyu d'alministración del ente públicu.

Tres sobrepasar la llende de los sos cien primeros del alcuerdu ente FSA-PSOE, IX y PP pa confirmar como direutor xeneral de la RTPA a Antonio Virgili, Podemos Asturies denuncia la falta de compromisu pa col asturianu del periodista, "incumpliendo asina'l pautu d'investidura pol que salió escoyíu presidente del Principáu Javier Fernández, colos votos del PSOE y Izquierda Unida". Nél, los socialistes comprometíense "a incrementar la presencia de la llingua asturiana nos medios de comunicación asturianos de titularidá pública".

"Esti fechu amuesa qu'en materia de política llingüística'l problema nun ye presupuestariu, como indicaba recién nos medios de comunicación el conseyeru d'Educación y Cultura, Genaro Alonso, sinón de falta de voluntá política a la hora d'utilizar RTPA como ferramienta pa poner en valor la realidá llingüística presente na sociedá asturiana y como elementu social de cohesión, equidá y modernidá", señalen dende Podemos. Por ello anímenlu a concienciar a los sos compañeros nel Gobiernu "sobre la necesidá de presentar un proyeutu de presupuestos nuevu que puxe por diches polítiques, asina como otres qu'afeuten a la inmensa mayoría de persones na nuesa comunidá autónoma".

"Por si esa propuesta nun algamara l'ecu deseáu nel Conseyu de Gobiernu del que forma parte, el Grupu Parllamentariu de Podemos Asturies espresa la so voluntá d'apoyar y collaborar con una batería de propuestes pa la normalización de la llingua que nun supongan costu dalgún pa les arques de l'Alministración asturiana", poniendo como exemplu'l Día Internacional de la Llingua Materna, que se celebra'l domingu. "Podría ser la fecha idónea pa demostra-y a la sociedá asturiana que, pese a las discrepancies que tengamos en delles polítiques, el respetu y compromisu de futuru pa coles llingües que conviven n'Asturies pueden ser motivu de consensu ente toles fuercies polítiques con representación nel Parllamentu asturianu", afirma.

Fonte: asturies.com

L’Academia de la Llingua Asturiana llamenta'l conteníu del alcuerdu PSOE-IX pa la investidura del Presidente del Principáu

Nuna nota de prensa asoleyada esti día, una vegada yera conocíu dafechu’l conteníu del alcuerdu PSOE-IX pa la investidura del próximu Presidente del Principáu d’Asturies, l’Academia de la Llingua Asturiana treslladaba a la sociedá asturiana'l so malestar pol conteníu del apartáu “Institucionalidá, identidá y cultura d’Asturies”. L’ALLA llamenta dafechamente’l conteníu del citáu pautu no que fai a la llingua y a la cultura d’Asturies y cuida que ye otra vuelta una oportunidá perdida pa iguar d’una vez el futuru de la llingua asturiana y garantizar los derechos llingüísticos de tolos asturianos y asturianes. Na opinión de la institución, "de nenguna de les maneres el curtiu y ruin conteníu del pautu respuende a les necesidaes y espeutatives de la sociedá asturiana". Y, de nenguna de les maneres tampocu nun se xustifica que "llueu de más de 30 años de reivindicación llingüística –con una llingua perfechamente normativizada y reconocida internacionalmente, y con una sociedá preparada pa la so normalización social a tolos efeutos–, el compromisu seya la creación d’una comisión d’estudiu sobre’l réxime de proteición del asturianu y la meyora de la Llei d’Usu y Proteición. Y ello, porque a) cuando lo que se quier ye –como nesti casu– nun solucionar el problema, lo que se fai ye nomar una comisión y solicitar informes. ¿Cuántos van solicitaos y fechos, por exemplu, sobre la reconocencia de la Especialidá Docente del profesoráu de Llingua Asturiana? Y b) porque la Llei d’Usu y Promoción, que como persabemos nin se respeta nin se cumple en nengún de los sos apartaos, nun almite más meyora que la reforma del Estatutu d’Autonomía p’Asturies y la declaración de cooficialidá de la llingua asturiana". L'ALLA diz tamién na nota de prensa qu'una vegada más "trátase de vaguedaes y de pallabres vacues que nun empobinen a nengún llau y que nun faen otro qu’aplazar y dexar pa más tarde la solución a ún de los problemes más serios que carez la democracia d’esti país de magar la transición". Pa finar, l’ALLA da anuncia de que, "acordies col discursu institucional del caberu Día de les Lletres, treslladará nel próximu mes de setiembre a toles fuercies polítiques representaes na Xunta Xeneral y al Gobiernu asturianu una propuesta concreta de cooficialidá axustada a les necesidaes y carauterístiques de la sociedá asturiana. La cooficialidá de la llingua asturiana ye pa nós irrenunciable y enxamás dexaremos de trabayar y lluchar por ella". Fonte: Asturnews

"El pautu d'investidura a Javier Fernández ye una fueya en blanco pa siguir cola paralización" (de la llingua asturiana)

Na semeya, l'alcuerdu del pautu ente PSOE ya IX

Llingua asturiana  15 Xunetu, 2015 por Pablo R. Guardado

  La Xunta critica qu’IX nun usare’l so pesu pa marcar l’axenda de la política llingüística. Entiende qu’esta situación va permitir que continúe la “parálisis” nesa materia y el “retrocesu” del idioma.

  La organización cívica sentencia que “parez qu'intenten vendenos el desalcuerdu” sobre l’asturianu “como una midida o que nos demás puntos hubo un consensu xeneralizáu y que namás foi nesa cuestión onde surdieron les rocees. Sobre manera, ye especialmente llamativo qu'una de les fuercies firmantes d'esti alcuerdu asegurara na campaña electoral que la oficialidá yera una prioridá”, en referencia a Izquiera Xunida (IX).

  “Nun s'esixó a la FSA un derechu humanu como ye la igualdá de derechos llingüísticos, cuestión que vien xenerando una movilización civil constante dende los tiempos de la Transición y que sigue ensin resolver. Pa negar la oficialidá agora pónense sides como la falta de consensu o, mesmamente –utilizando un argumentariu mui de la FSA–, fálase de que quién lo reclama ye una minoria. Nun vemos mayoríes nin manifestaciones multitudinaries a favor de la reforma de la llei electoral, midida qu'a pesar de la negativa inicial socialista sí s'inclúi nel alcuerdu”, continúa la Xunta pola Defensa de la Llingua Asturiana (XDLA).

Comisión d’estudiu           La situación, na so opinión, “ye mui preocupante’, yá que ye “una fueya en blanco al Executivu de Javier Fernández pa que siga cola paralización total qu'hubo na llexislatura pasada”. Tamién ve como una falta de respetu la puesta en marcha d’una comisión d’estudiu sobre’l réxime de proteición del idioma: “Pa eso nun faen falta comisiones d'estudiu porque les fórmules yá les conocemos”.

  Lo necesariu pa protexer l’idioma ye “firmar midíes concretes en materia política llingüística efectiva, pero nel alcuerdu nun se fala d'activar esta materia y d'implicase con ella”. Tampoco nun se traten “mínimos que tendríen que tar en marcha dende hai más d'una década, como l'usu de la toponimia en toles estayes alministratives –mesmamente, na RTPA–”.

  “Asina queda comprobao que vamos tener un Executivu formáu por un sector que quier acabar col nuestru patrimoniu llingüísticu (PSOE) y apoyáu por una fuercia política que nun aprovecha'l so pesu pa marcar l'axenda de la política llingüística. Y ye que si nun hai nada firmao ye que nun hai nengún compromisu nesa materia, polo que tenemos mieu de que too siga igual que siempre: parálisis y retrocesu”, fina’l comunicáu la XDLA.   Fonte: Asturies.com