Cultura recupera'l IX Premiu al Meyor Cantar

Tres un añu de parón, el Premiu al Meyor Cantar va celebrase otra vuelta

Detalle, Banda de Gaitas El Trasno de Cuaña

  Esti vienres espublizáronse nel BOPA les bases nueves del concursu, que deroguen les del 2010, modificaes nel 2013, y la Conseyería d'Educación y Cultural anuncia que la novena edición del concursu va convocase d'equí a va poco.

 Pese a qu'Ana María Fueyo, anterior direutora xeneral de Política Llingüística, anunciara a Asturies.com n'abril del añu pasáu la so intención de celebrar la gala del Premiu al Meyor Cantar nos primeros meses de branu, ésta nun se convocó finalmente, frenando una iniciativa con bona respuesta d'artistes, grupos y públicu que se venía celebrando dende l'añu 2007. Ésta siempre solía tener llugar ente febreru y marzu, coincidiendo cola cercanía del Día Internacional de la Llingua Materna (21 de febreru).

Na semeya, actuación d'El Trasno na edición última del Premiu al Meyor Cantar, 2014

 Cola espublización d'este nueves bases –que pue consultar nel documentu anexu a la noticia– y l'anuncia de la convocatoria del IX Premiu al Meyor Cantar, dase continuidá a un concursu que premia al meyor tema n'asturianu y gallego-asturiano del añu anterior y que tien nel so palmarés a artistes y formaciones como Toli Morilla ('Azul y gris', 2007), Herbamora ('Nosh', 2008), Alfredo González ('La nada y tu', 2009), Xera ('Tierra', 2010), Skama la Rede ('Condenáu', 2011), Asturiana Mining Company ('Si nun conoces Vaḷḷouta', 2012), Taranus ('Ensin ti', 2013) y la Banda Gaitas El Trasno ('Volviche', 2014).
Fonte: asturies.com

Adxuntu	Tamañu
bases_reguladores_del_premiu_al_meyor_cantar_nueves_del_2016.pdf	207.59 KB

El Conceyu de Bimenes declarará la oficialidá otra vuelta'l 2 de xunetu

Casa Conceyu de Bimenes

  L'equipu de gobiernu plantega celebrar un Plenu nesa xornada pa declarar la oficialidá de la llingua asturiana nel conceyu yerbatu venti años depués de convertise nel primer ayuntamientu del país en dar esi importante pasu. Esti miércoles va aconceyar con un coleutivu llocal pa empezar a poner les bases al procesu.

  L'alcalde Aitor García Corte, del Partíu Asturianista (PAS), busca asina asitiar otra vuelta'l focu na reconocencia de los derechos llingüísticos de los yerbatos y de tolos asturianos y, al empar, recuperar la importancia de la Fiesta de la Oficialidá de la Llingua Asturiana que tolos años conmemora la primer declaración d'oficialidá, fecha'l 5 de xunetu del 1997 siendo alcalde Joaquín García Gutiérrez 'Xuacu'. Naquel tiempu l'asuntu llevóse a los tribunales y el Constitucional torgóla, al igual que la del restu de conceyos que siguieron el mesmu camín que Bimenes.

  Mañana l'equipu de gobiernu conformáu pol PAS, IX y Xente Yerbato —col PSOE na oposición—, va aconceyar con un coleutivu llocal pa empezar a afitar tolos detalles d'una xornada que se pretende que sía mui especial. Va ser la primera d'otres munches nun procesu nel que s'espera involucar tamién a entidaes de fuera del conceyu.

  Una de les opciones que se baraxen nun primer momentu ye llevar el Plenu nel que se va votar la oficialidá, el sábadu 2 de xunetu, a la cai pa compartir esi momentu con tolos ciudadanos. Venti años depués, Bimenes torna a garrar la bandera de la defensa de los derechos llingüísticos nel país.                                                                  Fonte: asturies.com