Concursu de rellatos n'asturianu na FNAC

La FNAC de Parque Principáu cumple 10 años y pa cellebralo convoquen un concursu de rellatos n'asturianu. A él van poder presentase toles persones que quieran con obres orixinales ya inédites n'asturianu y non premiaes n'otros concursos. El tema va ser llibre y la obra ganadora va formar parte del primer llibru de rellatos n'asturianu espublizáu pola FNAC.

Van poder presentase a esti concursu siete exemplares orixinales, mecanografiaos o a ordenador con lletra de 12 puntos, formatu DIN A-4 per una cara y a doble espaciu, con un mínimu de 5 fueyes y un máximu de 10, ensin firmar. Han presentase acompangaos d'un sobre peslláu onde tien que figurar el seudónimu del autor. Nel interior del sobre tien que constar el nome y apellíos del autor, DNI, fecha de nacencia, domiciliu, teléfonu y un currículum vitae curtiu.

Les obres han remitise per corréu o entregase personalmente enantes del 15 de xunu de 2011. El xuráu va ser designáu pola direición del centru ente persones de prestixu reconocíu dientro del mundu lliterariu. El premiu va fallase'l día 30 de xunu.

Fonte: RTPA-Estaya d’asturianu

IV Premiu Arbidel de Cuentos Eróticos n'asturianu

El plazu de presentación fina l'8 d'abril de 2011.

La Conceyalía de Cultura del Conceyu de Ribeseya ta acabante asoleyar les bases de la cuarta edición del Premiu Arbidel de Cuentos Eróticos n'asturianu. El premiu convócase “col envís de contribuyir al espardimientu y promoción del usu del asturianu y de la cultura asturiana en xeneral”. L’añu pasáu resultaron ganadores David Artime Coto con "El problema vascu" y Adolfo Camilo Díaz con "La Expedición".

Les obres puen presentase fasta l’8 d'abril y van entregase dos premios, el primer premiu dotáu con 1.200 euros y el segundu con 500. La entrega premios va ser na Selmana de les Lletres Asturianes, en mayu.

Fonte: Infoasturies

III Premiu de rellatos eróticos n'asturianu "Arbidel" de Ribesella

El Conceyu de Ribesella dió anuncia de la convocatoria de la tercer edición del premiu 'Arbidel', dedicáu a los rellatos eróticos en llingua asturiana.

Los orixinales, que nun podrán ser inferiores a ocho fueyes mecanografiaes a doble espaciu per una cara, puen presentase fasta'l prósimu 20 d'abril nel mesmu Conceyu. Resérvense dos premios, ún de 1.200 euros, y otru de 500. Los trabayos premiaos publicaránse prósimamente nun volume qu'incluyirá los gallardonaos nestes trés primeres ediciones.

Les bases del concursu puen consultase na páxina web del Ayuntamientu de Ribesella.

Fonte: Europa Press

XXIII Concursu de Rellatos de Temática Marinera

Carreño convoca’l XXII Concursu de Rellatos de Temática Marinera.
Les bases de la convocatoria nueva del Concursu de Rellatos de Temática Marinera yá tán espublizaes. Trátase d'un certame convocáu pol Conceyu de Carreño y que nesta ocasión llega a la edición númberu ventidós.

Al concursu pue presentase cualesquier persona, con un trabayu en prosa orixinal y inéditu, n’asturianu o en castellanu, anque nun se van almitir obres que yá foren ganadores n'otros concursos lliterarios –tanto asturianos como a nivel estatal–, o los que foren presentaos o premiaos n'anteriores ediciones d'esti certame.

La estensión d'estos trabayos nun pue pasar de les venticinco fueyes, y tienen que s'unviar seis exemplares, amás de tolos datos del autor.El plazu d’almisión de los orixinales fina a les 14:00 hores del 31 de marzu del 2010; l’unviu tien que se facer per corréu postal a: Casa Conceyu de Carreño, cai Santolaya 1-3, de Candás (CP 33430), especificando nel sobre «XXI Concursu de Rellatos de la Mar Conceyu de Carreño».

El rellatu ganador va premiase con 3.000 euros. Amás, va haber un accésit de 1.000 euros. El ñuedu central de la obra tien que ser tolo que tenga que ver cola temática marinera.

Fonte: Les Noticies