SUATEA denuncia que’l Llibru Blancu de MECD namái quier desacreditar al profesoráu

Llibru Blancu del Profesoráu de José Antonio Marina

  SUATEA vieno acabante asoleyar un comunicáu de denuncia nel qu’afita que cola presentación del llibru blancu per parte del Ministeriu en plena campaña electoral, “avanzóse un grau más nel intentu de descreitu del profesoráu del nuesu país”. Sigún SUATEA, el PP cunta col inestimable sofitu d’otres fuerces polítiques p’aumentar el coru de quien achaquen al profesoráu la responsabilidá de los males de la nuesa educación: “asina lo tamos viendo na presentación de los programes electorales y nel usu partidista del acabamientu del profesoráu en banciar ente candidatos.

  Pero’l llibru blancu del profesor Marina, tantu na so versión amplia como na amenorgada, “nun respuende a les mires creaes pol PP nel sentíu de sentar les bases pa un alderique sobre la educación nel nuesu país. Llindase a faer gala d’un notable desconocimientu de la realidá educativa actual y a resalvar los verdaderos problemes que los años de retayos y depauperación traxeron a la enseñanza pública” Darréu reproduzse’l comunicáu de SUATEA dafechu:
1- El llibru blancu escarez d’un analís seriu y rigorosu alrodiu de l’actual situación de la educación pública. Pásase de dides sobre la medría de xeres, del númberu d’alumnáu al qu’atender, o del despidu de 40.000 docentes nos últimos años. Nun hai mención a les condiciones nes que se desenvuelven les actividaes docentes nin sobre les dificultaes que traviesen les families y l’alumnáu. Tampoco s’enceta la situación escepcional, respectu al restu d’Europa, d’un sistema educativu onde la enseñanza privada subvencionada al traviés de los conciertos educativos detrae cantidaes inxentes de fondos que tendríen de ser destinaos a la enseñanza pública. El llibru blancu prescinde de tou marcu socioeconómicu nun país nel qu’esisten millones de neños y neñes per debaxo del estragal de la probeza.
2. Les propuestes de Marina amuesen un desconocimientu fondu de la realidá na que los docentes desenvuelven el so llabor. Nun hai mención dalguna a que los principales problemes a los que güei s’enfrenten tienen que ver cola falta de sofitos pa realizar les sos funciones, la falta de tiempu material pa desenvolver el so trabayu debíu a la medría del horariu lectivu en secundaria, FP y enseñances de réxime especial, la falta de profesoráu tutor y especialista en primaria y la medría del númberu d’alumnos per aula. Sí se fai referencia a la comparanza con otros países pa concluyir que, en realidá, eses peores condiciones llaborales nun inciden na vida de los docentes nel nuesu país. Tampoco al so xuiciu tuvo importancia dalguna l’amenorgamientu drásticu del porcentaxe del PIB destináu a educación, asuntu que nin siquier ye mentáu de raspión nel so llibru. Pasar d’un 5’1% a un 4’3% en 2013 nun paez ser dignu de mención nel analís de partida.
3. Les recetes apurríes por Marina nel so llibru blancu basar nel so interés por demostrar una serie de tesis de forma preconcebida y non n’estudios rigorosos de la realidá educativa. La solución qu’ufierta a los problemes educativos nun consiste n’ameyorar el gastu educativu nel sector públicu. Pa él, la falta d’evaluación del profesoráu ye la base de tolos males. Y ello ensin argumentación dalguna. Namái apurre, pa sofitar la so argumentación, comparancies con dellos países onde s’aplicaron. Inclusive llega a reivindicar lo asocedío en Chicago y Nueva York nel cuelmu de la desfachatez: recordemos que’l sistema siguíu nestes ciudaes, que sacó a la cai a miles de docentes y de families pa protestar polo indigno del mesmu, consiste no siguiente: en sometiendo a evaluación a una determinada escuela y equipu educativu, si les resultancies son desfavorables, la escuela ve amenorgaos los sos fondos y el profesoráu los sos salarios. Si vuelve asoceder lo mesmo tres una segunda evaluación, la receta ye la mesma. Esto ye, en cuenta de detectar problemes y ayudar a superalos, vuelve castigase a esa comunidá educativa. Si tres la tercer evaluación les resultancies siguen siendo malos, la escuela ye cerrada o vendida y los sos docentes despidíos. Ésta ye no fondero la filosofía del señor Marina.
4. P’aplicar eses fórmules hai que vencer resistencies: esaniciar como interlocutores válidos a los sindicatos docentes – dalgunos como la Confederación de STEs yá dexamos claro’l refugu a les sos intenciones-; reforzar la figura de los directores pa que estos puedan conformar los claustros a la so guisa y aprovir les vacantes según la so voluntá; poder despidir a profesores que s’aguanten a les innovaciones”, una y bones el calter funcionarial d’estos ten de ser puestu en cuestión como asocede n’otros países..
5. Frente a les demandes de la inmensa mayoría del profesoráu que ta yá esperimentando lo que supon la LOMCE, Marina pretende reforzar los aspeutos más negativos de la mesma: la creación d’una carrera docente cola culminación de convertise n’asesor del conseyeru d’educación, la introducción d’un xerente nos centros y l’evaluación como elementu punitivu na vida docente son dalgunos d’ellos. La introducción d’un sistema competitivu ente’l profesoráu resalva que lo que’l profesoráu reivindica ye’l sofitu al trabayu n’equipu, l’amenorgamientu de la carga horaria, la estabilización de les plantiyes docentes, la formación del profesoráu dientro del horariu lectivu…
6. De perfacese la propuesta de Marina, la burocracia crecería de forma esponencial: les figures dedicaes a enllantar el sistema d’evaluación,  supervisores de los supervisores y les consecuencies sobre la inmensa mayoría de los docentes, seríen desastroses pal conxuntu del sistema educativu. Precisamente unu de los mayores problemes denunciaos polos docentes ye la medría de les xeres burocrátiques deriváu del nuevu sistema impuestu cola LOMCE.
7. DEP: el tan cacarexáu MIR convertiríase na ampliación nun añu y nun cambéu de status del profesoráu. Anguaño’l profesoráu en práctiques cobra un salariu similar al de los sos colegues definitivos. D’aplicase la propuesta, el salariu d’un DEP podría ser equivalente al de los sos colegues MIR, en redol a unos mil euros. Un bon aforru pal sistema. Tres la primer selección, nun hai garantíes de que’l periodu de práctiques dea accesu a la condición de funcionariu sinón que’l sistema actual, el d’oposiciones nun se pon en tela de xuiciu. Una doble seleición que nun esiste nos países de la nuesa redolada.
8. El gran escaecíu ye’l profesoráu interín. Más de la cuarta parte de los docentes son interinos. La única mención que’l llibru blancu fai ye al so gran númberu pero nin una palabra sobre cómo estabilizalos nel emplegu. Esta crecedera esponencial del profesoráu precariu producióse polos retayos y l’interés en siguir con un ERE xigantescu qu’esanició miles de puestos docentes estables al traviés de les xubilaciones ensin que se repunxeren nin una mínima parte de los mesmes. Paez qu’a esti profesoráu condérgase-y al olvidu y l’espulsión del sistema públicu d’educación.

  Estes son dalgunes de les reflexones tres una primer llectura del llamáu llibru blancu. Tratase de propuestes realizaes ensin tener cuenta al profesoráu, nin a les circunstancies nes que desempeña’l so llabor. Pretender encetar un alderique educativu pa supuestamente ameyorar la enseñanza ensin cuntar colos sos principales protagonistes. Ye, poro, una iniciativa que naz muerta. Tres les eleiciones, tienen de revertise los retayos, recuperar la inversión na educación pública, plantegase meyora de les condiciones nes que los docentes trabayen, garantizar una enseñanza pública calidable pa toos y toes. La propuesta de Marina, llamentablemente, va en sentíu contrariu a lo que la inmensa mayoría esperamos”.        Fonte: asturnews.com

La XPLA critica la incapacidá de la direición de RTPA pa xestionar la programación

Dende la Xunta manifiesten que "los primeros programes estrenaos nel 2014 siguen la llinia marcada pol “arecismu” d'inorar la realidá llingüística asturiana, dalgo que fixo que los espectadores nun sigan la programación".

    Dende la Xunta pola Defensa de la Llingua Asturiana critiquen la xestión de la programación del ente radiotelevisivu asturianu por parte de les socesives direutives, al tiempu qu'afita la necesidá d'apostar pola llingua y cultura propio, tanto pola so vertiente social, como polos bonos resultaos d'audiencia. Too esto queda desarrollao nel siguiente comunicáu:

Dende’l nacimientu de RTPA, la Xunta pola Defensa de la Llingua Asturiana (XDLA) vien denunciando una programación inspirada pol discursu oficial del arecismu: modernidá malentendida y distanciamientu de l’Asturies real. Asina, como si’l nuestru país fora una comunidá monollingüe, TPA llegó a les pantalles escondiendo la realidá al nun apaecer l’idioma propiu nes emisiones. Sicasí, la presión social fixo que, un añu depués de la primer emisión, la cadena estrenara los primeros programes n’asturianu que, como reconoció José Ramón Pérez Ornia, primer director del Ente, taben dellos puntos perriba de l’audiencia de los espacios en castellanu. Por eso, comprometióse a que la llingua tuviera «un valor nuevu», semando l’orixe «d’una industria audiovisual n’asturianu».

Años depués d’estes palabres y tres la llegada d’Antonio Virgili a la dirección, los programes n'asturianu siguen siendo mui pocos, anque paradóxicamente sían los más vistos. La canal nun emite dibuxos, series, deportes o informativos n’asturianu; tampoco la toponimia oficial tien un usu xeneralizáu na programación en castellanu. Y ye que la televisión que paguen tolos asturianos nun respeta lleis básiques como la Carta Europea de les Llingües Minoritaries, l’Estatutu d’Autonomía o la Llei d’Usu. La prueba ta nos primeros programes estrenaos nel 2014, propios d’una cadena estatal o de TeleMadrid. Sicasí, pa poner “unes pingarates de casa”, en dalgún d’estos espacios nuevos trátase al nuestru idioma como una realidá ayena, rara, cómica. Pudimos ver un concursu onde se facía una encuesta sobre’l significáu d’una “palabra asturiana” na Plaza la Escandalera d’Uviéu, con un montaxe que busca la comicidá al ver que naide sabe qué significa. Depués, facíen una llamada a Castripol pa ver si topaben a daquién que la conociera, ensin reparar en que nesi conceyu nun se fala asturianu sinón gallego-asturianu. Too ello entemecío con collaboradores del espaciu que dicen que nun saben asturianu, como si d'una llingua remota se tratara, anque la llei de creación de la canal onde trabayen diz que RTPA tien que xugar un papel importante dientro del procesu de normalización.

Con too y con eso, parez que la sociedá dio’l llombu a estos espacios que, a pesar de contar con una promoción bien grande, tuvieron perbaxo de la media d’audiencia –Medicina tv.com salud y De hoy no pasa tuvieron un 2,5% na estrena, mentes que la media del día foi del 4%-. Otra manera, la reemisión del espaciu n’asturianu Día de mercáu, emitíu por sorpresa y en prime-time ensin nenguna promoción, tuvo un share del 5,2%, perriba de la media.

La promoción de los espacios n'asturianu nun tien nada que ver cola que se fai pa los espacios en castellanu: programes como Camín, espaciu que llegó a algamar un 30% de share, emitióse’l sábadu pela nueche ensin nenguna promoción, faciendo que l’espaciu quedara nun 0,7%, que, otra manera, ye la media d’audiencia que tien la TPA un sábadu pela nueche. ¿Por qué nun promocionó la cadena la emisión d’ún de los programes de más éxitu? ¿Nun quieren que Camín ayude a la cadena a xubir a l’audiencia media del mes? ¿O ye que la dirección de RTPA nun quier que los programes n’asturianu tengan éxitu y asina xustificar el pocu porcentaxe d’emisión nesti idioma? Lo mesmo pasó con Día de mercáu –anque nesti casu, sí que tuvo audiencia, anque non la avezada (10%) al tratase d’una reposición que s’emitió ensin promoción- o con El club musical, emitíu’l miércoles ensin anunciu previu.

Toa esta falta d’atención choca cola que-y tán dando a El Faro, serie gallega que por mor de los datos tan malos d'audiencia pasó a emitise peles mañanes. La serie tuvo’l primer día col horariu nuevu un 0% d’audiencia, pero la cadena sigue enfotada nella, mostrando un ciñu que nun tien hacia los espacios n’asturianu y anunciándola en cada pausa publicitaria. Otra manera, la estrena’l domingu pela nueche d’un programa nuevu en castellanu fixo que baxara hasta'l 4% l’audiencia que TPA tenía cola emisión de Güelos. Amás, tamién tuvo repercusión nel programa n'asturianu que vieno depués: Sones, que quedó nun 4,9%, cuando la media ye del 10% (¡y tovía quedó perriba de la media de TPA de tol día, 4,6%). Ún de los espacios más vistos d’esi domingu foi Territoriu sidreru, tamién n’asturianu y que tuvo un 7,1%.

A pesar de que l’audiencia ta mostrando que quier programes basaos na nuestra identidá cultural y llingüística, TPA anecia nuna programación fecha por productores que vienen de Madrid. Mentanto, mantién a les productores del país con programes de pocu presupuestu, dalgo que nun permite l’afitamientu del nuestru sector audiovisual y la so competitividá a nivel estatal. Les productores de fuera, qu’aparecieron n’Asturies col nacimientu de TPA, consumen unos 15 millones d’euros del presupuestu del Ente –23 millones-. La dirección de RTPA ta llevando a la cadena a la so desaparición, con un gastu de dineru escomanáu pa una programación que nun tien una respuesta de l’audiencia nin xenera beneficios nel país. Hai que preguntase qué capacidá tienen los xestores del Ente pa dirixir la nuestra televisión si les sos decisiones tán faciendo que la sociedá asturiana-y dea'l llombu y que cada vez tenga menos sentíu mantener una televisión con esi modelu de programación.

L'aparición de la TDT y l'aumentu na ufierta de canales esixe a la cadena una precisión mayor na so programación, que tien que basar na especificidá y nes espectatives de l’audiencia a la que se dirixen. TPA namás va tener sentíu y namás va contar col respaldu de la xente si va del llau de la nuestra realidá llingüística y del sector audiovisual asturianu. Ye fundamental que los asturianos vean los medios públicos como un serviciu que forma parte de la so identidá, dalgo fundamental p’asegurar el futuru de la cadena y la so aceptación social. Lo contrario va mostrar que la cadena namás respuende a los intereses políticos y empresariales de dalgunos, amás de dexar clara la incapacidá de la directiva de RTPA pa xestionar el seviciu públicu audiovisual de tolos asturianos. Fonte:  InfoAsturies.

Nel Día de la Nación Asturiana, SUATEA pide que l'asturianu seya llingua vehicular nel enseñu

SUATEA
Esti añu llegamos al Día d’Asturies cola novedá del cambiu de Gobiernu. Gobiernu que d’entrada amuesa bones intenciones na promoción y desarrollu de les nuestres señes d’identidá y cultura. Nel ermu de les actuaciones de los anteriores, el que’l nuevu conseyeru de cultura conteste n’Asturianu a una demanda fecha pola asociación Xuristes pol Asturianu pue consideráse hestórica y d’un cambiu d’actitú que toos y toes esperábemos. La promesa eleutoral fecha pol actual presidente del Gobiernu de desarrollar reglamentariamente la Llei d’Usu de 1998 supón un respiru y una xaguatadina d’agua na llarga travesía del desiertu.
La ciudadanía asturiano aguarda se respeten los sos drechos llingüísticos y se promueva y dignifique la so cultura, consciente del retrasu y diferencial de desarrollu hestóricu, en tolos ámbitos, que soporta en comparanza con otros territorios del estáu. Poro, ye menester d’equí a poco, concretar les declaraciones d’intenciones y promeses eleutorales en midíes urxentes necesaries que garanticen la sobrevivencia del nuesu patrimoniu llingüístico-cultural.

Cuando falamos de sobrevivencia facémoslo n’oposición al conceutu conservacionista-museístico-sentimental-folclorico-señaldosu al que yá mos teníen avezaos anteriores gobiernos y referímonos a la sobrevivencia nel sentíu ecolóxicu y evolutivu qu’asegure’l futuru de la nuesa llingua y cultura adaptándose al mediu actual y venideru.
Con esi envís ye col que SUATEA, nel nuesu ámbitu d’actuación sindical, esiximos:

• Que’l currículu d’Educación Infantil recueya la nuesa llingua y que, demientres nun lo faiga, s’atiendan toles demandes d’escolarización recoyíes polos centros tres la ufierta xeneralizada a tolos escolares d’esta etapa, que, per otru llau, ye considerada pedagóxicamente fundamental pal deprendimientu en xeneral y el llingüísticu-cultural en particular.

• Que s’eliminen les ratios mínimes d’alumnáu pa recibir clases de Llingua o Gallego-Asturiano en tolos niveles educativos y asina actuar acordies cola Llei d’Usu, acatando asina la reciente sentencia de Tribunal Superior de Xusticia d’Asturies.

• Que les places de Llingua Asturiana y Gallego-Asturiano pasen a formar parte de les plantiyes orgániques de los centros, la creyación inmediata de la especialidá y la convocatoria d’oposiciones, n’igualdá de condiciones de les otres especialidaes docentes.

• Que nos centros s’axeiten Planes Llingüísticos que dean un tratamientu integráu y coordináu de toles llingües que s’enseñen y onde la nuesa llingua seya vehicular en delles aries.

• Que s’ufierte y s’atienda la demanda en tola Formación Profesional, Escueles d’Adultos, Escueles d’Idiomes y Univerdá.

SUATEA tará sollerte pa que se dean toos estos pasos firmes y d’avance dientro del marcu normativu d’anguaño y venideru, pero ensin dexar de desixir la OFICIALIDÁ de la Llingua Asturiana y el Gallego-Asturiano, como única ferramienta llegal que garantiza’l respetu efectivu de los drechos llingüísticos de tolos asturianos y asturianes.

Fonte: Asturnews

Carta abierta al Sr. Conseyeru de Cultura y Deporte

Cola nuesa consideranza:

La política llingüicida y clientelista de los gobiernos d’Areces obligaron-y al Aconceyamientu de Xuristes pol Asturianu a tener qu’amosar, de contino y per años, la so cara más combativa y fosca: la única posible cuando se llucha pola sobrevivencia.

Como exemplu, quiciás nun sobre refertar, porque la memoria ye davezu feble, qu’una cenciella fras escrita nun impresu oficial (“Día 7-3-07, a les 9:30 hores, pruebes cardiolóxiques n’Hospital Xeneral d’Asturies”) valió-y al gobiernu aquelli pa provocar una retafila pleitos qu’entá nun se zarró porque queden por resolver dos recursos d’amparu, l’ún énte’l Tribunal Européu de los Drechos Humanos y, l’otru, énte’l Tribunal Constitucional.

Por contra, al primer encamientu que-y ficiemos, el nuevu gobiernu arrespuende col testu darréu, escritu en llingua asturiana:

“Estimáu Sr.: Recibíu’l so escritu de fecha 5 d’agostu de 2011 nel que se fae’l pidimientu de que tolos impresos emplegaos davezu o n’asuntos concretos nes Conseyeríes del Principáu d’Asturies tengan redacción billingüe, castellán-asturianu, quiero treslladá-y que valoramos positivamente la so propuesta y que la estudiaremos ente les posibles llinies de trabayu na normalización llingüística del asturianu. Uviéu, a 17 d’agostu de 2011. El Conseyeru de Cultura y Deporte. Emilio Marcos Vallaure”.

Avezaos al tratu arispiu, cuando non direutamente a l’aición represiva, del vieyu gobiernu, les respetuoses pallabres de so suénenmos perbien y danmos pie a la esperanza de poder amosar la parte bonal de nós, la cara negociante y comprensiva. Eso sí, siempres que seya faciendo camín, dando pasos, midíos pero decidíos, p’haza una sociedá asturiana dafechamente tolerante pa colos drechos llingüísticos de tolos sos ciudadanos.

Con respetu y enfotu, reciba un saludu candial.

N’Uviéu a dos de setiembre de dos mil once.

Xurde Blanco. Secretariu del Aconceyamientu de Xuristes pol Asturianu.

Fonte: Infoasturies