La Xunta pola Defensa de la Llingua Asturiana (XDLA) valoró güei l'estrenu de 'El faro' como un fracasu. La serie de la Forta, realizada mayormente con medios gallegos y que se rodó en más d’un 80% na llingua del país vecín, estrenóse'l llunes en TPA con un 1,3% d’audiencia, dalgo que convirtió a la asturiana na autonómica onde menos siguimientu tuvo la estrena. "Los asturianos-y dieron el llombu a una serie con una ambientación que refuga les referencies a una idiosincrasia concreta, como dalgo que respondía a la política cultural de la FSA, caracterizada pol complexu d’inferioridá y el despreciu a lo propio", destaca l'asociación nuna nota.
Frente al fracasu de 'El faro', destaquen los bonos resultaos de 'Día de mercáu' y 'Sones', "que siempre tán perriba del 10% de share". Llamente que, a pesar d’estos datos, la televisión pública nun emite más del 5% de programes n'asturianu. "La cadena decidió espilfarrar el so presupuestu y participar na producción d’El Faro, que nun xeneró nengún puestu de trabayu n’Asturies y que nun respuende a los principios de defensa y promoción de la llingua y de la identidá cultural d’Asturies".
La XDLA recuerda l’éxitu de series autonómiques realizaes na llingua propia y pon d'exemplu a la vasca 'Goenkale', qu’acaba de cumplir 20 años n’emisión; la gallega 'Padre Casares', que foi adaptada pola televisión andaluza, valenciana y balear, amás d’emitise doblada al castellanu en TeleMadrid y Castilla-La Mancha TV; la valenciana 'L’Alqueria Blanca', que ye líder d’audiencia nesi territoriu; y 'La Riera', telenovela de producción propia de TV3 qu’axunta cada tarde a 500.000 catalanes. "El so éxitu vien marcáu pola identificación del públicu na pantalla al traviés d’elementos qu’ayuden a reforzar la identidá cultural y llingüística". Encamienten a TPA a facer un apueste poles series de producción propia, lo que "repercutiría na economía del audiviosual asturianu".
Fonte: Quéyeho!
