García Oliva y Xuan Xosé Sánchez Vicente ganen nos Premios de la Crítica d’Asturies

• . Abiertu'l plazu pa presentar candidatures pa los Premios de la Crítica d'Asturies

Vicente García Oliva

 El 16 d’avientu van entregase n’Uviéu los XVI Premios de la Crítica d’Asturies, de los que yá se conocen los ganadores. Vicente García Oliva llevó’l gallardón de la estaya de narrativa n’asturianu con ‘La vida de siempre’, mentes que Xuan Xosé Sánchez Vicente fixo lo propio na de poesía con ‘De les hores y les memories’.

 La Asociación d’Escritores d’Asturies convoca estos premios cola intención de gallardonar a los meyores llibros del añu pasáu, nesti casu del 2015. Asina, convóquense cuatro estayes, narrativa n'asturianu y castellanu, y poesía n'asturianu y castellanu, a los que cualquier persona física o xurídica pueden presentar candidatures.

Xuan Xosé Sánchez Vicente

 Ente toles que se recibieron enantes del 30 de xunetu, dellos xuraos encargáronse de seleicionar les obres merecedores del Premiu de la Crítica. Asina, ‘La vida de siempre’ (Ediciones Trabe), una novela de xéneru escrita por García Oliva que s'adientra peles siempre negres cais de la inmigración, la prostitución y la trata de blanques, llevó’l de narrativa n’asturianu.

 Pela so parte, el de poesía n’asturianu foi pa ‘De les hores y les memories’ (Ediciones Trabe), primer trabayu de poesía de Sánchez Vicente en más d’una década nel que l’autor algama un gran altor llíricu y na que'l so yo poéticu s'amuesa rescamplante.

El XI Premiu de les Lletres, pa Beltrán

 Les obres ganadores en castellanu foron ‘Once voces humanes’, de Mirta Chamorro, en narrativa; y ‘Gregor Samsa frente a la ventana’, de Francisco Álvarez Velasco, en poesía. Mentes, el XI Premiu de les Lletres foron pa Fernando Beltrán.

 L’otru gallardón que completen estos reconocimientos, el Premiu a la Meyor Columna Periodística recayó en José Luis Argüelles, periodista de ‘La Nueva España de Gijón’.
Fonte: asturies.com

Munches hores y muncha memoria

Invitación De les hores y les memories, Xixón

   Tuvimos esti día na presentación/recital de la cabera (que non la última, como bien dixo l’autor) obra del escritor Xuan Xosé Sánchez Vicente: un poemariu tituláu “De les hores y les memories“, publicáu impecablemente pola editorial Trabe na so coleición “Pontiga”. Y llámolo presentación/recital porque Sánchez Vicente, con mui bon criteriu creo yo, pasó de rollos teóricos o metafísicos (la poesía préstase muncho a ello) pa enfrascase y enfrascanos na llectura d’una seleición de poemes del llibru que falaron por él meyor que cualquier discursu. Fue una llectura emocionada y, poro, emocionante pa los qu’ellí tábemos, non en vano Xuan Xosé ye un de los meyores recitadores de poesía, nun sólo de los poemes propios, sinón tamién de los ayenos. Cada poema fue acompañáu, y eso sí tien interés y sentíu, d’una pequeña desplicación del so conteníu y del orixe del mesmu, munchos d’ellos con apoyatura de poetes clásicos o modernos, de los que garra un pequeñu pie, una fras, un versu, pa encadarmar llueu un poema personal ya intransferible. Creo que tanto l’autor como’l públicu asistente permanecíemos mui a gustu nel guapu marcu de la llibrería “La buena letra”, pues lo que diba ser la llectura de namái unos pocos poemes, terminó siendo tou un recital que recoyó bona parte del total del poemariu.

   El poemariu tien tres partes: una primera que ye un paséu peles distintes hores del día (riscar, primeres hores, meyudía y siesta, tardina y nueche), cauna coles sos estremaes lluces y sensibilidaes. Una segunda amorosa, titulada “Acasu amor”, y una postrera (“Hestoria y memoria”) de recordatoriu y señaldá cola que fina’l  llibru. Como esto de la poesía ye mui personal, nun quiero influyir nos futuros llectores dando una opinión propia. Creo que’l descubrimientu individual ye lo meyor que se pue recomendar de la llectura d’un poemariu. En cualquier casu, amiesto darréu un prestosu sonetu, más porque’l so tamañu ye afayaízu pal blogue que por un petite de gustu personal. Anque, claro, ésti gústame muncho. Que vos preste tamién a vosotros y norabona, como procede, al autor, que de xuro-y dedicó a esti llibru munches hores y muncha memoria.

POMAR COLA LLUZ TEMPRANO

Marea viva en verde al cabu mayu
que maticen los brotos col so rosa,
les solombres del sol y, cuando posa,
la tresparente gota del orbayu.

Ayer fuiste ñevada d’esperanza
en frutu ciertu; enantes, llarga espera
-cañes espíes, pícala valera-
del renacer vernal y l’abondanza.

Mañana vas a ser gustu y arume
dormíos na mazana, y más tarde
ambarina delicia nel so zume.

Nun t’aseñarde’l pasáu nin, cobarde,
temias el nuevu iviernu y la so llume:
la eternidá nesti presente arde

Fonte: Publicao por Vicente García Oliva | en Lliteratura | el 18-01-2016

Xuan Xosé Sánchez Vicente presenta’l so poemariu últimu n’Uviéu y Xixón

Cartelu

   Esti llunes, día 11 de xineru, a les 19, 30 hores, va presentase De les hores y les memories, poemariu últimu de Xuan Xosé Sánchez Vicente, nel Club de Prensa Asturiana, nel Salón d’Actos de la Fundación CaxAstur Liberbank d’Uviéu.

  Nesta primer presentación, n’Uviéu, van abellugar al autor l’editor Antón garcía y la poeta esther Prieto, d’Ediciones Trabe. La presentación del poemariu en Xixón va ser el día  14 na llibrería La Buena Letra, na cai Casimiro Velasco, 12 a les 8 la tarde, y nes dos presentaciones ta prevista la llectura de poemes pol autor.

  Había más d’una década que Xuan Xosé Sánchez Vicente nun publicara un llibru de poesía y por eso ye enforma bien recibía l’apaición d’esta “obra de madurez”, como la noma la Editorial Trabe, na que l’autor algama gran altor llíricu y na que’l yo poéticu s’amuesa rescamplante. Ye “una poesía del sosiegu y de la serenidá que da l’aceptación de la vida y de la muerte” porque “en poemes de corte clásicu que s’allarguen como l’alcordanza, va esgranando Sánchez Vicente los grandes temes de la lliteratura universal, el pasu del tiempu, el amor y la muerte, con versos trescalaos de serena señardá polo perdío y de referencies lliteraries al tiempu que la naturaleza va, a poco y a poco, ganando protagonismu”.

  Xuan Xosé Sánchez Vicente (Xixón, 1949) ye un nome imprescindible de les lletres asturianes: poeta, narrador, dramaturgu y articulista agudu y reflexivu, la so obra, bayurosa y variada, empobina yá’l camín de los clásicos. Asina los sos poemarios Camín de señardaes (1980), Poemes de Xixón (1981), De reidores costes (1988), …Y de llastientes picos (1999) y As de corazones (2001).                              Fonte: asturnews.com

Presentación de 'Picu'l Sol'

La obra ye una recopilación de los artículos de Xuan Xosé Sánchez Vicente asoleyaos nel diariu 'La Nueva España' ente los años 2012 y 2015, testos nos que’l presidente del Partíu Asturianista (PAS) escribe sobre política, economía y el ser mesmu d’Asturies.

A les 12.30 hores na Casa Cultura de Bimenes (Santuyano). Fecha: Sábadu, 24 d'ochobre de2015. 

L'autor va regalar dellos exemplares del llibru.

Tres l'actu va celebrase una xinta de xermandía. Aquelles persones que quieran acudir deberán confirmalo na direición de corréu electrónicuayuntamientubimenes@gmail.com.

Entama'l Conceyu Bimenes y la Fundación Nueva Asturies.                    Fonte: asturies.com

"Picu’l Sol” preséntase en Bimenes

Xuan Xosé Sánchez Vicente

  La Casa Cultura de Bimenes, allegada en Santuyano, va acoyer l’actu de presentación del llibru “Picu’l Sol”, de Xuan Xosé Sánchez Vicente, recopilación del so llabor periodístico.

 La obra ye una recopilación de los sos artículos asoleyaos nel diariu La Nueva España ente los años 2012 y 2015, testos nos que’l presidente’l Partíu Asturianista escribe sobre política, economía y el ser mesmu d’Asturies, nun análisis llúcidu y serenu de la realidá que mos arrodia.

 L’actu, entamáu a comuña pol Conceyu Bimenes y la Fundación Nueva Asturies, cellebraráse’l sábadu 24 d’ochobre, a les 12’30 hores y l’autor apurrirá dellos exemplares del llibru, de baldre, a les persones asistentes.

 Dempués del actu tendrá llugar una xinta de xermandía, na que tamién tará presente Sánchez Vicente; aquelles persones que quieran apuntase pueden facelo unviando un corréu lletrónicu a ayuntamientubimenes@gmail.com.               Fonte: asturnews.com

"Bajo el viaducto", de Xuan Xosé Sánchez Vicente

  Hai determinaos productos lliterarios, mayormente noveles pero tamién obres de teatru y guiones de cine, que cueyen como argumentu dalgún socesu real pa, dándo-y una capa de ficción (porque sinón sería ensayu o crónica periodística) cuntanos una historia a medies ente la vida y la imaxinación. Guerra y paz podría ser un tópicu exemplu, pero hai otros munchos y dalgún d’ellos que cinca a la realidad española más de cerca. Asina, pal que quiera conocer cómo se desendolcó’l famosu “desastre d’Annual”, y en xeneral la guerra del exercitu español n’África, yo recomendaría-y la novela Imán, de Ramón J. Sender cola seguridá de que diba a tener una visión mui afayaíza de cómo fue aquella llacería a la que nos emburriaron un Rei calamitosu, el miserable Alfonso XIII, unos políticos incapaces y un exércitu decadente. Y en xeneral too eso que se da en llamar “novela histórica” con mayor o menor aciertu, incide dafechamente neso, en cuntanos cachinos de realidá peñeraos pola mano de la lliteratura. O al “resve”, que diría un clásicu de Cimavilla.

  Dende esi puntu de vista, de cuntar una realidá más o menos prósima d’una forma lliteraria, enmarco yo la novela de Xuan Xosé Sánchez Vicente Bajo el acueducto. Y daveres que nesti casu lo que se nos cunta cíncanos mui de cerca a los xixoneses y a los asturianos en xeneral, porque’l tema central de la historia, l’únicu diría yo, son los famosos socesos del astilleru Naval Xixón. Unos socesos que s’espurrieron a lo llargo dellos años y que tuvieron una incidencia pergrande na ciudá xixonesa. Barricaes, cortes de carreteres, disparos de tornillería y otres armes caseres, y cargues policiales con gases incluyíos. Too ello, como fue lo de Crady, lo d’Ike, o lo d’Obrerol, por citar otros conflictos xixoneses de la dómina, abrió una resquiebra nun sólo na sociedá xixonesa, sinón ente los propios partíos y sindicatos que nun siempre tuvieron d’alcuerdu na solución de los problemes.

  Con esti caldu de cultivu, l’escritor xixonés mete les tisories hasta’l fondu pa cuntanos, de mano del protagonista de la so novela, Luis, un comprometíu políticu y sindicalista, pero sobre too una persona qu’intenta caltenese independiente, cómo son les entreteles de partíos y sindicatos, colos sos pautos y ambiciones, munches veces al marxe de la xente que daveres ta lluchando por meyorar les coses, por intentar solucionales. Poro, los enfrentamientos de Luis colos sos collacios nun van facese esperar. Unos enfrentamientos nos que les organizaciones siempre lleven ventaxa sobre l’individuu.

  Pero na novela pasen munches coses más. Y ye que, tres los conflictos, na parte d’atrás de la noticia, na retaguardia de tanta llucha y tanta violencia, viven otres persones que tamién sufren lo que ta pasando: les pareyes de los lluchadores, les muyeres y los fíos de los qu’enllacen trabayu, reuniones, actividaes sindicales y polítiques, llucha de barriu… y lleguen tarde, cansos y, en munches ocasiones, con dalguna copa de más. Unes víctimes de la situación y, al tiempu, unes víctimes de los protagonistes d’esa situación.

  Nun quiero –nin puedo- desendolcar más l’argumentu, pero abúltame que colo dicho ya puen los llectores facese una idea de qué va la novela. Una novela valiente, bien escrita, con un final duru y que guarda un pequeñu xuegu lliterariu mui prestosu. Un rellatu, pues, que va a pasar por drechu propiu a formar parte d’esa “hemeroteca lliteraria” de la que, los que nun vivieron aquellos abegosos díes, podrán echar mano pa enterase d’ellos, al tiempu qu’esfrutarán lleendo una historia de ficción bien cuntada.  
Fonte: TrabayudeCampu.VicenteGarcíaOliva 

Arreyos al Diccionariu asturianu-castellanu, CXVII

Sigo colos arreyos y modificaciones al mio Diccionariu asturianu-castellanu. Les novedaes, en gris.

 

Diccionariu asturianu-castellanu CXVII,  Xuan Xosé Sánchez Vicente

esmillar, dial. V. esmellar.

esmilláu, ada, ao, adj. Flaco, delgado. || 2. Sin dientes, desdentado.

esmollancriáu, ada, ao, adj. Decaído, sin ánimo. || 2. Sin consistencia. || 3.Sin vigor, marchito.

esmorgar, v. intr. Caerse la cáscara verde de las nueces. || 2. Desprenderse la suciedad de la ropa o de una superficie. || 3  Curar de algún mal. || 4. tr. Quitar la cáscara verde de las nueces. || 5. Despojar del erizo a las castañas. || 6. Comer con ansia. || 7. Comer en gran cantidad. || 8. Figuradamente, cargar con una cosa, enfrentarse a ella. || 9. Quitar la suciedad a la ropa. || 10. Quitar la piel de una parte del cuerpo. || 11.. En el trabajo, especialmente en la mina, ejecutar  una tarea difícil, particularmente un tajo de mucha dureza.

esmormiellar, v. intr. Plañir, llorar lastimosamente. || 2. Sorber los mocos.   Fonte: Asturies.com

Congresu Cultura Asturiana Mozo nel Auditoriu d'Uviéu

Sánchez Vicente: “Tolos ponentes del Congresu tienen una mui bona disposición; hai munchu enfotu”

   L’Auditoriu d’Uviéu va ser sede esti sábadu del Congresu Cultura Asturiana Mozo. Más de venti ponentes van tomar parte nuna iniciativa na que tol mundu ta poniendo “una mui bona disposición”, afirma Xuan Xosé Sánchez Vicente.

   Fundación Nueva Asturies y l’Asociación Cultural L’Arribada son les organizaciones qu’impulsen esti congresu que coordina un bon piñu de xente especialista en caúna de les estayes nes que se divide. “L’oxetivu ye treslladar a la opinión pública qu’esiste una bona cantidá de xente que trabaya nel mundu de la cultura asturiana, conocer la visión de futuru de los rapazos que participen nel Congresu y propiciar un poco d’ánimu ente ellos”, resume Sánchez Vicente, que va encargase d’inaugurar l’eventu en nome de la organización xunto a Ana Fueyo, direutora de Política Llingüística, en representación del Gobiernu. La conseyera Ana González torna a dar asina’l llombu a un actu que tien que ver cola llingua del país. Tamién taba convidáu l’alcalde d’Uviéu, Agustín Iglesias Caunedo, pero dende la Casa Conceyu tovía nun se confirmó l’asistencia del primer edil o de dalgún representante del gobiernu municipal.

   La inauguración va tener llugar a les 11 hores, pa depués dar pasu a les ponencies diverses previstes. Dende l’avance del programa, conocíu’l llunes, hai delles novedaes. Asina, confirmóse la participación de Claudio López Ardura (Banda de Gaitas El Penedón de Castropol), que va falar de ‘La Escuela d’Asturianía’, y de Miguel Álvarez Solares (Banda de Gaitas La Reina del Truébano), que va tratar del ‘Pasao, presente y futuro das bandas de gaitas nel occidente d’Asturias’, amás de Javier Cubero (Ciencies Polítiques), Iván Cuevas (Filoloxía) y Llorián García (Musicoloxía). Mentes, na estaya de Lliteratura va intervenir Laura Marcos, que sustitúi a Sofía Castañón.

   “Tolos ponentes del Congresu tienen una mui bona disposición; hai munchu enfotu”, asegura Sánchez Vicente, qu’espera una bona asistencia de públicu y que’l Congresu tenga continuidá n’años próximos. La entrada al Auditoriu d’Uviéu ye llibre y la idea ye que los presentes participen nos alderiques que van siguir a caúna de les trés estayes previstes.

Fonte.  Asturnews.

Xuan Xosé Sánchez Vicente y Xesús Cañedo Valle acaben de publicar la 2ª edición del "Refraneru asturianu"

Xuan Xosé Sánchez Vicente nuna imaxe d'arquivu. Xuan Xosé Sánchez Vicente y Xesús Cañedo Valle acaben de publicar con Trabe la segunda edición, revisada y ampliada, del so Refraneru asturianu, la recopilación de los refranes d'Asturies más completa que se pue atopar. El llibru empieza con una parte teórica, na que los autores espliquen con brevedá y aciertu qué s'entiende por refraneru asturianu, les clases y formes sintáctiques que presenta, amás de delles notes característiques de los dichos asturiano referíos al cuerpu, la enfermedá y l’alimentación. Al mesmu tiempu, Sánchez Vicente y Cañedo Valle reflexonen sobre’l camín qu’han triar los estudios futuros sobre’l refraneru asturianu, al empar que comenten la bibliografía yá existente. La segunda parte fórmala'l refraneru propiamente dichu, que recueye más de 4.000 proverbios clasificaos según el tema al que faen referencia. A lo último, pieslla’l llibru un índiz temáticu por palabres qu’apaecen nos refranes, que facilita la busca d’un refrán determináu. Ye esta una publicación pa saborgar, pa deprender y, al empar, pa evitar el desaniciu d’una parte importante de la cultura asturiana, porque nun se pue perder de vista que'l refraneru ye ún de los elementos de la cultura tradicional que meyor espeya la forma de ser, de ver y de sentir la vida del pueblu asturianu. Fonte: Asturnews.