Xentiquina va ser protagonista d'un doble cedé y DVD por cuenta de la xubilación de Nacho Fonseca, el so creyador. Pablo A. Quiroga Prendes va dirixir un documental que se va editar nun DVD y que recueye al traviés de delles entrevistes la hestoria del grupu, les sos espublizaciones discográfiques y lliteraries, y el so usu nes escueles d’Asturies.
Amás va editase un doble cedé onde 24 grupos de la escena asturiana van facer un homenaxe y reconocencia a la trayeutoria musical de Seliquín y Xentiquina, versionando ún de los munchos temes que son yá tradicionales nes aules de primaria asturianes. Ente los músicos que van participar van tar nomes como Tuenda, Tejedor, Skama la Rede, Soncai System, Los Berrones, Llangres, Mala Reputación o Anabel Santiago.
La intención d'esti trabayu ye que valga de «ferramienta pedagóxica pa mayestros y mayestres de llingua asturiana y de música, lo mesmo que valieron y siguen valiendo los discos del coru de neños Seliquín primero y Xentiquina detrás». Y ye que, dende mediaos de los años 80, les escueles de primaria n’Asturies cunten con una ferramienta pedagóxica única pa les clases del área de Llingua Asturiana y de Música, ello ye, el material que, de primeres Seliquín, dende Porrua, y depués Xentiquina, apurren a estos centros.
Fonte: Les Noticies
Información apurrida por Manuel
