García Pañeda prometió'l so cargu n'asturianu

Esti llunes los miembros del equipu rectoral de Santiago García Granda tomaron posesión de los sos cargos nun actu celebráu nel Paraninfu del edificiu históricu de la Universidá d'Uviéu. Xabiel García Pañeda, Delegáu de Coordinación y Estratexa Universitaria, prometió'l de so n'asturianu.

El rector tuvo pallabres d'agradecimientu pa toos ellos por sumase al proyectu. García Granda pidió-yos que pongan lo meyor de cada ún" y que "sacrifiquen cualquier ambición personal" en beneficiu de la institución académica.

Manifestó la so voluntá de facer na Universidá d'Uviéu un cambiu "axilosu, pausáu y reflexivu" y unvió tamién un mensaxe de tranquilidá pol fechu de qu'esti procesu se materializará de "forma nidia" y ensin afeutar al trabayu de los estudiantes, el personal d'alministración y servicios y el personal docente y investigador. D'igual forma apuntó que son "munches les incertidumes y los retos" que la universidá tien d'encarar.

Incertidumes

Refirióse de manera espresa a la incertidume política, con un Gobiernu estatal en funciones y unes eleiciones nun mes vista. "Esperemos –dixo– que xeneren un Gobiernu que dea un emburrie nuevu a les universidaes públiques", afirmó.

La segunda incertidume, según el rector, vien marcada pola recuperación económica y el so treslláu al programa de recursos humanos, académicos, d'investigación y tresferencia de les universidaes. "Ye prioridá que les beques Severu Ochoa y Clarín faciliten l'actividá investigadora y el relevu xeneracional", manifestó.

García Granda refirióse igualmente a los diversos contautos que caltuvo mientres la pasada selmana colos sos colegues d'otres universidaes. Destacó la "fonda esmolición" de los rectores pol futuru de la prueba d'accesu a la universidá pal 2017 y 2018. Tamién defendió una rebaxa de la llende d'accesu a les beques d'estudiantes del 5,5 actual al 5, la nota que marca l'aprobáu.

El máximu responsable de la institución académica asturiana abogó tamién por flexibilizar les titulaciones con nuevos itinerarios d'aprendizaxe p'ameyorar l'accesu al mercáu llaboral, cuntando siempres cola participación del estudiantáu.

Emplegu del asturianu

Tolos miembros del so equipu tomaron posesión del so cargu, destacando la intervención de García Pañeda que na so promesa como Delegáu de Coordinación y Estratexa Universitaria emplegó la llingua asturiana.

Na semeya, l'equipu rectoral de García Granda –nel centru–, con García Pañeda en segunda posición pela izquierda.

Fonte. Asturies.com

Yá ye posible presentar tesis n'asturianu

Xabiel G. Pañeda: “Yá ye posible presentar tesis n’asturianu”
Xabiel García Pañeda ye direutor d’area de xestión d’I+D+i y dirixe ún de los cursos de la UABRA. Asturies.com faló con elli en Cangas del Narcea del reglamentu de doctoráu acabante aprobar y que según el profesor “va dexar que se presenten tesis n’asturianu y eso ye un gran fitu pa la llingua”.
El direutor del cursu “Coses Nueves n’Internet”, comenta que “esti procesu que se dio nes últimes selmanes acabó de forma satisfactoria porque s’atopó una fórmula qu’axunta les posibilidaes llegales y normatives y les necesidaes de la xente que quier emplegar l’asturianu pa facer les sos tesis doctorales”.
El rectoráu depués d’aconceyase y caltener conversaciones con profesoráu universitariu y con asociaciones con presencia na Universidá como’l CUPA, qu’alertó de mano sobre la situación, o la Xunta Moza, propunxo una redacción que según Pañeda “ye la meyor de les posibles porque pon a la llingua asturiana al altor d’otres llingües europees, anque desgraciadamente nun seya llingua oficial”.
Pa presentar una tesis n’asturianu, “como pa facelo en cualquier otra llingua”, comenta Pañeda, va facer falta tener un tribunal qu’acepte evaluala n’asturianu, “pero nun va haber nenguna restricción normativa pa facelo”.
Fonte: asturies.com