Compromís pide al Gobiernu estatal midíes pa protexer l'asturlleonés en Lleón, Zamora y Salamanca

• Carles Mulet, el senador valencianu qu'emplegó'l lleonés na cámara alta'l miércoles, sigue faciendo xestos pol idioma. Ta acabante de rexistrar una entruga pal Gobiernu estatal sobre qué midíes tien previstes pa protexer l'asturlleonés en Lleón, Zamora y Salamanca.

Esta aición vien tres un pidimientu a Compromís de la Plataforma por el Futuro de la Región Leonesa, coleutivu asentáu en Salamanca dedicada a la defensa d'estos territorios, los sos trabayadores y los derechos sociales nel que participen delles asociaciones.

La entruga concreta plantegada por Mulet, tres facer un análisis de la situación del lleonés, foi: ¿Qué midíes concretes tiene previstes el Gobiernu pa protexer y promocionar la llingua lleonesa nes provincies de Lleón, Salamanca y Zamora?'.

Fonte: Asturies.com

Compromisu por Asturies amuesa la so sospresa énte la decisión de la Xunta Xeneral del Principáu d´Asturies sobre los fondos documentales

La organización nun entiende la decisión adoptada por unanimidá na Xunta Xeneral del Principáu, d’esixir que los papeles asturianos que pasaron d’almacenase en Salamanca a almacenase en Catalunya vuelvan a Salamanca

Dende Compromisu recuérdase que lo que procedería, si les instituciones asturianes consiguieran abandonar la so mentalidá provinciana y se comportaran como representantes de los intereses y del patrimoniu del país que los escoyó, ye l’unvíu a Asturies de los documentos, xuntu col restu de los documentos asturianos qu’entá s’atopen en Salamanca, pa, na llínia que se siguió en Catalunya, que pasen a formar parte del patrimoniu asturianu y puean ser custodiaos nun llugar dignu.

Compromisu por Asturies recuerda que’l llugar onde tean los papeles tien un valir principalmente simbólicu porque anguaño tolos documentos pueden ser copiaos y ufiertaos a consulta en cualesquier llugar fisicu ya inclusive na rede.

Fonte: Aruelu.com