Llanera aprueba l'espediente toponímicu por unanimidá

Lugo de Llanera, Llugo

 El Plenu refuga aceptar los nomes de llugar Llugo y El Campo Llugo y caltién los topónimos en castellanu: Lugo y La Morgal.

 A falta de la so espublización nel BOPA, la toponimia tradicional de Llanera, esto ye, l'asturiana, pasa a ser oficial. Asina lo decidió'l Plenu ordinariu de payares por unanimidá de tolos grupos municipales: el PSOE, que tien l'alcaldía gracies al apoyu d'Izquierda Xunida y Somos Llanera, el PP y Ciudadanos.

 Sicasí, esta aprobación nun ta llibre de polémica, y ye que los grupos municipales nun autorizaron los nomes tradicionales recoyíos pola Xunta Asesora de Toponimia 'Llugo' pal topónimu castellanu 'Lugo de Llanera', el llugar más pobláu del conceyu, nin 'El Campo Llugo' pa 'La Morgal'. Ente los argumentos daos pol edil de Cultura, Alfredo Rodríguez, pa xustificar esta decisión ta una supuesta falta de tradición lliteraria y el desusu nel emplegu d'estos nomes ente la población.

 El restu de topónimos asturianos pasen agora a ser oficiales, quedando los castellanos derogaos.                                                                                                 Fonte: asturies.com

Llanera va tener un serviciu de normalización llingüística

Xunta con Padilla p'algamar ayudes.

María Isabel Fernández Álvarez (Somos Llanera), conceyala de Participación Ciudadana, Sanidá y Consumu de Llanera, aconceyó ayeri con Fernando Padilla, direutor xeneral de Planificación Llingüística y Normalización, y con Lourdes Álvarez, de la Conseyería d'Educación, cola intención de llegar a un alcuerdu pa subvencionar parte del gastu del personal pa echar a andar el Serviciu de Normalización Llingüística. Nesti conceyu del centru del país gobierna'l PSOE xunto con Somos Llanera y Izquierda Xunida.

Fonte: Asturies.com

Llectura de los premios y menciones nel Concursu de Rellatos Mineros Manuel Nevado Madrid

Esti xueves en Llanera.

 La Oncena Edición del Concursu de Rellatos Mineros (2104) convocáu pola Fundación Juan Muñiz Zapico cuntó con 124 participantes. Un añu mas el concursu cuntó con participación de toles comunidaes autónomes, ensin escaecenos de la participación internacional con obres unviaes dende Cuba, Arxentina, Costa Rica, Italia, Suiza, Alemaña y Francia. Sigue siendo tamién un concursu únicu nel mundu pola so temática puramente minera.

El fallu del xuráu ye públicu na so web; y l'actu de llectura de los premios y menciones va ser na Casa de Cultura de Llugo (Llanera) el 4 d'avientu de 2014, festividá de Santa Bárbara, a les 19:00. Amás esperen poder editar en 2015 el llibru colos premios y menciones d'esta edición, como cada añu dende'l 2004. 

Fonte: Infoasturies

Dos restoranes de Llanera acueyen unes xornaes gastronómiques dedicaes a les seis races autóctones

 

Na semeya la Conseyera Álvarez nun momentu de la presentación de les xornaes

   L’Asador Alto de la Miranda y el restorán Peña Mea acueyen les I Xornaes Gastronómiques de les 6 Races Autóctones en Peligru de Desaniciu. Ésten dan aniciu esti martes y van ufrir productos d’estos animales hasta’l día 15.

   Les asociaciones de criadores de les seis races, esto ye, asturcón, xata casina, cabra bermeya, gochu asturcelta, oveya xalda y pita pinta, entamen esta iniciativa en collaboración cola Asociación de Hostelería de Asturias, siendo ésta la primer vegada que se xunen al rodiu d’unes xornaes gastronómiques. Asina, per 15 díes, les persones que s’averen a estos dos restoranes asitiaos nel conceyu de Llanera van poder prebar delicies procedentes de toos estos animales. Hai que destacar que’l menú del Asador Alto de la Miranda y del Peña Mea van ser distintos.

   El Gobiernu sofitó esta iniciativa cola presencia de María Jesús Álvarez, conseyera d’Agroganadería y Recursos Autóctonos, na presentación de les xornaes, celebrada’l xueves nel Peña Mea, actu al que la organización convidó tamién a la Coordinadora Ecoloxista d’Asturies y a l’Academia de la Llingua Asturiana, ente otros coleutivos y instituciones. Como puntu negativu d’estes xornaes ta l’ausencia del idioma del país na cartelería.

El gochu asturcelta, na carta del "Transcantábrico".   El tren de luxu de FEVE que percuerre les víes asturianes de vía estrecha, el ‘Transcantábricu’, ufre dende’l domingu pasáu gochu asturcelta na so carta gracies a la iniciativa de Ramón Celorio, xefe de Gastronomía de los trenes turísticos de RENFE y asesor gastronómicu del gochu asturcelta. Asina, los clientes van poder preber gochín asturcelta confitáu y asáu na etapa Ribadeo-Ḷḷuarca.

   Según esplica Celorio, na primer xornada sirviéronse mediu centenar de platos, “con muncha aceptación ente los comensales, que llegaron a entregar pol so métodu de cría”. Los viaxeros, na so mayor parte estranxeros, pudieron saber d’ella gracies a unos cartafueyos editaos en dellos idiomes pola Asociación de Criadores de Gochu Asturcelta.   Fonte: Asturies.com

Xuristes pol Asturianu acusa de discriminación llingüística al Conceyu Llanera

Xuristes pol Asturianu acusa de discriminación llingüística al Conceyu de Llanera y pide que tramite la solicitú de Fai!.

L'Aconceyamientu de Xuristes pol Asturianu acusó al Conceyu de Llanera de discriminación llingüística al nun aceutar la conceyala de Cultura la presentación d'un escritu de l'asociación xuvenil FAI! por tar n'asturianu, y desixó la tramitación del mesmu al alcalde. El coleutivu pidiere la utilización de la Casa de la Cultura pa celebrar un actu públicu mañana sábadu, día 13 de febreru.

El retruque dau per carta dicía que "dichu escritu debe presentase en castellán", con "escesos tipográficos" sorrayando la palabra castellán, según Xuristes.
"La Conceyala de Cultura y Muyer, Belén Rodríguez López, que ye quien robla esta ayalga, entendió, de la cabeza al rau, lo que se-y encamentaba polo que la esixencia de presentación del escritu en castellán ye, de mano, un actu cerriscu, intolerable nun cargu públicu d'una Alministración democrática", manifiesta'l colectivu xurídicu.

Asina, l'Aconceyamientu recordó'l "el drechu a nun ser discrimináu per razón de la llingua, proclamáu nos artículos 2 de la Declaración Universal de los Derechos Humanos y 14 de la Constitución española, porque la Conceyala entendió dafecho lo que se-y pidía, lo qu'acreita la rempuesta que dio, polo qu'ésta, nos sos términos, nun pue tener otru oxetivu que la discriminación llingüística".
Defendió también los drechos fixaos al emplegu na vida pública de la llingua rexonal y el dirixise n'asturianu a l'Alministración, recoyíos na Carta Europea de les Llingües Rexonales o Minoritaries y na Llei d'Usu y Promoción del bable/asturianu.

Poro, Xuristes pol Asturianu pidió al alcalde, "ordenar darréu'l trámite y resolución del pidimientu" y "retirar la delegación de competencies a quien nun sabe facer un emplegu axustáu a drechu, tolerante y democráticu de les mesmes".

Fonte: Europa Press