La viesca centra’l XVII Seminariu d’Estudios Asturianos de la Fundación Belenos

Cartelu del XVII Seminariu d'Estudios Asturianos de la Fundacion Belenos

  La Puela torna a acoyer una edición nueva del Seminariu d’Estudios de la Fundación Belenos, la decimosétima, pa la que yá ta abierta la matrícula. Les actividaes van celebrase los díes 19 y 20 de payares baxo’l nome de ‘Asturies: la viesca habitada’.

  Tres centrar los dos seminarios últimos en bébores propies como la sidra y el vinu, y na cultura del gochu, la Fundación Belenos centra la so mirada nuna entidá clave pa entender el país, como ye la viesca. Al traviés de cinco conferencies, los asistentes van conocer la importancia de los árboles na nuesa sociedá, sobre los productos que se pueden sacar de la madera y inclusive lleendes alredor de la mesma, ente otros asuntos.

  L’actividá va principiar el sábadu a les 10 hores cola inauguración oficial, actu que va contar cola presencia del alcalde, José Antonio Mesa. Darréu, el naturalista Ignacio Abella va abrir les charres cola intervención ‘L’árbol y la viesca na sociedá tradicional’, a la que va siguir la doctoranda de la Universidá d’Uviéu Maider Fernández Zúñiga, que va falar de ‘Les madreñes: decoración tradicional y el so posible significáu’.

  Enantes de la xinta, prevista pa les 14.45 hores, va haber otra charra, entitulada ‘Cachapos: una güeyada hestórica, xeográfica y tipolóxica’, a cargu de Alfonso Fernández Canteli, profesor eméritu de la Universidá d’Uviéu. Tres garrar fuercies, a les 17 hores, l’etnógrafu y miembru de la Fundación Belenos, va sorprender a los presentes con ‘L’ánima de la viesca: mitos y llendes’.

  La intervención cabera del seminariu va protagonizala a les 18 hores l’inxenieru de Montes y sociu de Biesca Inxeniería, Adolfo Blanco, que va falar de ‘Viesques y xestión forestal n’Asturies: una visión integral y propuestes de futuru’. Llueu, como ye vezu, los presentes van poder disfrutar d’una cena a les 21.30 hores pa siguir col tradicional filandón del seminariu con música del país qu’acueye, a partir de les 23.30 hores, el Café Centro.

Tornería y paxos

  La xornada de domingu, baxo’l nome de Conceyu Abiertu, va principiar a les 11 hores con una amuesa de tornería tradicional a cargu de Vitorino García, tixileiru de Trabáu. Tres la mesma, Xosé García ‘Llábana’ va amosar, en comuña cola xente de L’Alcuentru, cómo se faen los paxos. La xinta, prevista pa les 14.30 hores, va servir como piesllu a esta edición del seminariu.

  Les persones que quieran formalizar la matrícula pa participar nesta actividá han de facer un ingresu de 30 euros, axuntando’l nome y apellíos, na cuenta bancaria de la Fundación Belenos: ES83-3059-0086-0923-4865-2823. Nel casu de que s’escueya tamién la opción d’agospiu con pensión completa –inclúi les dos xintes y una cena– en ‘La Nueva Allandesa’, han de sumar 60 euros a la cantidá inicial. Pa más información sobre’l XVII Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o al traviés del corréu electrónicu seminariubelenos@gmail.com.               Fonte: asturies.com

Adxuntu	Tamañu
programa_del_xvii_seminariu_destudios_asturianos_de_la_fundacion_belenos.jpg	2.31 MB
programa_del_xvii_seminariu_destudios_asturianos_de_la_fundacion_belenos_ii.jpg	2.06 MB

La cultura del gochu n’Asturies, temática del XVI Seminariu d’Estudios Asturianos

  La Fundación Belenos entama en La Puela esta fin de selmana la decimosesta edición del Seminariu d’Estudios Asturianos. Lleva’l nome de ‘El rei de la cubil: la cultura del gochu n’Asturies’.

  Tres centrase na sidra y el vinu l’añu pasáu, nesta ocasión la organización decidió facer xirar la temática del seminariu n’otru productu clave pa entender el país: el gochu. Asina, los participantes van poder conocer la importancia d’esti animal na nuesa cultura y el papel que xuega anguaño.

  L’actividá va principiar el sábadu a les 10 cola inauguración oficial, pa darréu dar pasu a les ponencies del seminariu. La primera va correr a cargu d’Antón Álvarez Sevilla, de la Fundación Belenos, que va falar de ‘La castra asturcelta: el gochu’l país’, pa depués siguir col gastrónomu Lluis Nel Estrada, que va dar la charra ‘El gochu na gastronomía asturiana d’anguaño’.

  Tres una posa pa la xinta, prevista pa les 14.30 hores, l’antropólogu de la Universidá d’Uviéu Roberto González-Quevedo va intervenir a les 17 hores cola ponencia ‘Aspeutos rituales, económicos ya sociales de la matanza’l gochu’. Va zarrar la xornada Alberto Álvarez Peña, etnógrafu de la Fundación Belenos, con ‘Mitos y tradición oral al rodiu gochu n’Asturies’.

  Como ye vezu, los presentes van poder disfrutar d’una cena a les 21.30 hores pa siguir col tradicional filandón del seminariu con música del país qu’acueye, a partir de les 23.30 hores, el Café Centro.

Visita a una casería         La xornada del domingu va dedicase a la visita, dende les 10.30 hores, d’un casería del conceyu cola fin de que los asistentes puedar conocer de primer mano el procesu y ellaboración tradicional de los productos del gochu. A esta actividá hai que sumar la ellaboración demostrativa d’un choscu a cargu de la Inicación Xeográfica Protexida (IXP) Choscu de Tinéu, que se va celebrar mientres el seminariu nun horariu por confirmar. La xinta, prevista pa les 14.30 hores, va servir como piesllu d’esta edición.

  Les persones que quieran formalizar la matrícula pa participar nesta actividá han de facer un ingresu de 30 euros, axuntando’l nome y apellíos, na cuenta bancaria de la Fundación Belenos: ES24-2048-0000-26-3400123307. Nel casu de que s’escueya tamién la opción d’agospiu con pensión completa en ‘La Nueva Allandesa’, han de sumar 60 euros a la cantidá inicial. Pa más información sobre’l XVI Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o al traviés del corréu electrónicu seminariubelenos@gmail.com.                                Fonte: asturies.com

Adxuntu	Tamañu
programa_del_xvi_seminariu_destudios_asturianos.pdf	262.51 KB

XV Seminariu d'Estudios Asturianos de Belenos

La Puela d’Allande acueye, un añu más, el Seminariu d’Estudios Asturianos de la Fundación Belenos. Estes xornaes d’estudiu, que lleguen a la so XV edición, van desendolcáse los díes 29 y 30 de payares y nesta ocasión van tratar sobre "La tradición de la bébora n’Asturies: la sidre ya’l vinu".

La Fundación Belenos dedica el so XV Seminariu d'Estudios Asturianos a la tradición de la bébora n'Asturies. El 29 y 30 de payares van desendolcase na Puela d'Allande cola participación de dellos espertos.

 El sábadu 29 ye’l día acutáu pa la presentación de ponencies, coles intervenciones, n’horariu de mañana, de Juan Redondo Losada (Averamientu a la hestoria del vinu de Cangas: d’APROVICAN a la DOP), Carolina Pelaz Soto (La vide ya’l vinu en Cangas del Narcea: patrimoniu material ya inmaterial), Inaciu Hevia Llavona (La sidre tradicional asturiana: oríxenes, procesos y preseos) y José María Díaz Díaz (La orixinalidá ta nel orixen: los aguardientes de sidre); y, yá pela tardi, David Rivas Infante (La sidre y los sos rituales na sociedá asturiana) y Xosé María García García(Facer sidra en casa. Una esperiencia práutica: dende la esbilla de la mazana hasta la preba de la sidre’l duernu). El domingu 30 van visitase una viña, una bodega y el Muséu del Vinu, too ello en Cangas del Narcea.

El preciu de la matrícula ye de 30 € y la inscripción considérase fecha namái que col ingresu d’esi importe na cuenta bancaria de la Fundación Belenos. Amás, esiste la posibilidá d’agospiu opcional en réxime de pensión completa en “La Nueva Allandesa” a un preciu por persona de 60 € (igual que cola matrícula, la reserva queda afitada col ingresu del importe na cuenta de la Fundación Belenos).

Pa más información sobre’l XV Seminariu d’Estudios Asturianos pue contautase cola Fundación Belenos nos teléfonos 985244811 / 616242319 o nel corréu lletrónicu seminariubelenos@gmail.com.

Fonte: Infoasturies

Arte popular astur en La Puela d'Allande

El XIII Seminariu d’Estudios Asturianos dedícase al arte popular

Esta fin de selmana la Fundación Belenos entama en La Puela d’Allande una nueva edición, la XIII, del so Seminariu d’Estudios Asturianos, que nesta ocasión va tar dedicáu al “Arte Popular na sociedá tradicional asturiana”. La xornada del sábadu 17 ábrese bien ceo, a les 10’30 h., cola presentación del seminariu. A les 11’00 h. entamen les conferencies con Gerardo Díaz Quirós (“Considerances sobre teoría y fenomenoloxía del Arte Popular”) y, dempués, Ástur Paredes (“Arte Popular y modernidá: el casu del horru asturianu”).p>

Tres la xinta, les charres vuelven de magar les 17’00 h. con Jesús González Calle (“Arte Popular de tradición barroca nos horros y paneres asturianos”) y Alberto Álvarez Peña (“Ornamentación y simbolismu nos preseos tradicionales asturianos: cuernes, gaxapos, marcos, rueques…”). La xornada pesllaráse, tres la cena, col tradicional filandón nel Café Centro, onde habrá música del país. El domingu 18 ta empobináu a visitar, de magar les 11’00 h., dellos llugares d’Allande con bonos conxuntos d’horros y paneres y a aldericar en conceyu abiertu al rodiu’l tema “Simbolismu y funcionalidá nel Arte Popular”. A les 14’30 h. tendrá llugar la xinta y el pieslle d’esti XIII Seminariu.

Fonte:  Asturnews.