La FSA da-y la razón a la XDLA

La FSA-PSOE argumentó l’autonomía del ente públicu de comunicación pa refugar nel plan de Dignificación presentáu por IX porcentaxe dengún de programación n’asturianu en TPA y RPA y dio-y la razón a la XDLA: hai falta d’un director comprometíu col asturianu.

L’ausencia única de los porcentaxes d’emisión na RTPA que pidía IX nel Plan de Dignificación de la Llingua astutirana ye bien significativa de que la demanda de la Xunta pola Defensa de la Llinguafecha esta selmana pasada ye dafechamente la exa del problema. La propuesta d’IX cuantificaba nun 30 por cientu de la programación de la TPA en toles sos franxes horaries y en too tipu de conteníos, la emisión n’asturianu d’un 50 por cientu de la programación de la RPA y l’apaición de la Web por defeutu n’asturianu dafechu, ensin perxuiciu de que tamién pueda consultar la so versión en castellanu.

Nuna nota de prensa asoleyada’l xueves 16, conocedores de que vieno acabante empezar la recta final pa la designación del direutor xeneral de RTPA, la Xunta pola Defensa de la Llingua Asturiana (XDLA) destacaba “los resultaos d’audiencia escelentes del programa n’asturianu L’Alzada, estrenáu’l martes 13 d’ochobre y que llegó a doblar la media d’audiencia de la cadena”, que nun llega al 6% munches vegaes, quedando perbaxo de Cuatro y LaSexta. Estos resultaos muestren “la necesidá d’un cambiu al frente de la dirección de la radiotelevisión pública, porque nestos años pudimos ver que mentes l’equipu de dirección va per un llau, la sociedá asturiana -que tien apegu al so territoriu y a la so cultura- va per otru”.

Por too esto, la XDLA recordaba a los grupos parllamentarios que “ye imprescindible cuntar con un direutor xeneral comprometíu cola cultura asturiana y que nun se niegue a desarrollar la llexislación vixente -Estatutu, Llei d’Usu y Llei de RTPA, testos que reconocen el papel de la radiotelevisión pública nel procesu de recuperación del patrimoniu llingüísticu del país-. Hasta’l momentu vimos una directiva que nun quixo normalizar l’usu del idioma na programación y que namás lu arrequexó pa los usos humorísticos y diglósicos, ensin nengún procuru pa cola so correición y calidá.

Cola so decisión y desixencia pa sofitar el Plan de Dignficación d’Izquierda Xunida, la FSA daba-y dafechu la razón un día depués a la XDLA. Fonte: Asturnews

Suatea reclama al Gobiernu

   Nun comunicáu asoleyáu hai dellos díes, SUATEA recama-y al nuevu gobiernu asturianu que faiga los deberes pendientes si quier aprebar esta nueva llexislatura. El sindicatu educativu SUATEA recuérda-y a Javier Fernández que ye necesariu un cambiu nes formes y nel conteníu de les polítiques educatives que desenvolvió'l so gobiernu na última llexislatura, si quier mantener un sistema educativu públicu de calidá y al serviciu de les necesidaes de la sociedá asturiana.

   Pal sindicatu "esta última llexislatura a manes del gobiernu de la FSA-PSOE tuvo marcada pol escándalu del casu Marea qu'afectaba a l'anterior alministración. Nun se supo, o nun se quiso, aparar nel camín esbrozáu al desastre, a la desorganización, al cortoplacismu y a la improvisación que lleva reinando na Conseyería durante más llexislatures de les deseables pa la bona salú del sistema educativu asturianu".

   El gobiernu de Javier Fernández tien per delantre 4 años," si acaba la llexislatura, p'aparar, dar marcha atrás y reconducir les más de les polítiques que se desenvolvieron na Conseyería d'Educación de la mano d'Ana González".                                                                                Fonte: Asturnews

Movilla niega l'usu d'un llocal municipal a un coleutivu de paraos por solicitalo n'asturianu

     L’alcalde socialista de Noreña, César Movilla, torna a protagonizar una falta de respetu a la ciudadanía por mor de la so llingua. Nesta ocasión niega l’usu d’un llocal municipal a un coleutivu de paraos por solicitalo n’asturianu.

    “En relación a su escrito de fecha 13/12/13, deberá ser redactado en castellano, lengua oficial de esta Comunidad Autónoma”  foi la contestación breve del alcalde nuna carta remitida a Mariu Arbesú, representante del Coleutivu de Paraos/es y Precarios/es Siero-Noreña, firmada por Movilla con fecha del 26 d’avientu. Esta asociación de formación nueva pretendía solicitar l’usu d’un llocal municipal p’aconceyar tolos miércoles en Noreña, recibiendo la refuga d’esti políticu de la FSA-PSOE. “Pensábemos que quiciabes nun tendríamos un sofitu abondu de les instituciones públiques, pero lo que nun esperábamos yera atopanos con un portazu na cara de buenes a primeres.

La solicitú

    Ye un insultu a tolos paraos y paraes de los conceyos de Siero y Noreña nun atender los sos pidimientos por una cuestión formal relativa a la llingua que s'use pa presentar una instancia y paeznos una falta de sensibilidá absoluta del alcalde de Noreña escontra los paraos. Un alcalde asina tendría de dimitir darréu y l'oposición tendría d'esixir la so dimisión porque nos demuestra que nun ta al altor de les circunstancies y paez desconocer la realidá social y económico del propiu conceyu que rixe, onde hai más de 500 paraos y un porcentaxe de desemplegu cimeru al 20 por cientu y onde, a éstes,  l'asturianu ye la llingua tradicional, colo cual nun entendemos como puede negase el so usu a los ciudadanos”, espliquen nun comunicáu.

    Esta situación llevó a esti coleutivu a refugar la posibilidá de siguir les instrucciones de Movilla y a celebrar los sos aconceyamientos en Siero, en concreto nel salón d'actos del Llar del Pensionista d'El Berrón, onde mañana va tener llugar la presentación oficial de la organización a les 19 hores. Paraos y emplegaos en trabayos precarios y temporales de la zona deciden dar forma a esti proyeutu “p'analizar y buscar una respuesta coleutiva al problema del paru y la precariedá. A un problema coleutivu tenemos que buscar soluciones colectives”, espliquen al tiempu que recuerden qu’en Noreña hai más de 500 desemplegaos y, en Siero, 5.000. Ente los oxetivos de l’asamblea destaca l’enfotu n’implicar a les instituciones a iguar esti problema, la esixencia de polítiques que frenen la emigración forciada de xente mozo y la puesta en marcha d’esperiencies d’autoemplegu y cooperativismu, ente otros asuntos.

Iniciativa pol Asturianu pide la so dimisión.
     Tres conocer la postura del alcalde de Noreña, reincidente n’ataques a la llingua asturiana dende la so posición na Casa Conceyu, Iniciativa pol Asturianu reclamó la so dimisión. “Yá intentó prohibir  l'usu del asturianu n'otros ámbitos, como'l Plenu del Conceyu de  Noreña”, polo qu’esixe a la FSA-PSOE que tome midíes “contra esti alcalde antidemocráticu que reprime a  ciudadanos por querer usar la so llingua propia, tal y como recueye  como drechu la Llei d'Usu del Asturianu, vixente dende 1998”. Respeuto al fechu en concretu que denuncia’l Coleutivu de Paraos/es y Precarios/es Siero-Noreña, señala que “ye un ataque a la dignidá y la igualdá de los  ciudadanos asturianos que deciden en llibertá espresase na so llingua propia”, amás d’una aición que va “contra la llexislación vixente”.     Fonte:  Asturies.com.

La FSA-PSOE espublizará noticies "en bable" na so web

La páxina web de la Federación Socialista Asturiana va convertise nuna "canal de promoción ya impulsu del bable". El portal de la formación quier faer "una reconocencia espreso" al fomentu de la llingua asturiana, "siguiendo los criterios recoyíos na so política llingüística". Asina, yá puede conocese la centenaria hestoria del PSOE n'Asturies pinchando na pestaña na que s'atopen estos conteníos, onde s'ufierta la posibilidá de consultar los testos n’'asturianu. Fonte: Qué ye ho!