Un Club de Llectura n’Asturianu pa escolinos, iniciativa pal cursu viniente

 

Llibros infantiles

La Direición Xeneral de Planificación Llingüística y Normalización va poner en marcha un Club de Llectura n’Asturianu pal cursu 2017-2018. Va tar destináu tanto a escolinos y escolines de Primaria como de Secundaria y Bachilleratu.

Los centros van poder solicitar títulos que trabayar de la llista que va proporcionar Planificación Llingüística, con 15 a 25 exemplares de cada obra. Mientres 30 a 45 díes, van tar n’empréstamu pa la so llectura por parte de los alumnos de Llingua Asturiana y Gallego-asturiano. 

D’esta forma preténdese fomentar la llectura ente los escolinos y, al empar, avezalos a tratar con testos na so llingua materna. Los maestros, nel trimestre caberu del cursu, van participar nuna  xornada  didáutica na que van presentar toles actividades feches sobre caúna de les llectures presentaes pol alumnáu.                                                                                                          Fonte: asturies.com

Los informes xurídicos valten los argumentos de la Delegación de Gobiernu p’anular el Plan de Carreño

• por Pablo R. Guardado

L’informe xurídicu de Nicolás Bartolomé encargáu por Planificación Llingüística y Normalización y el fechu polos servicios xurídicos del Conceyu de Carreño valten los argumentos de la Delegación de Gobiernu p’anular el Plan de Normalización de Carreño. Dambos dan la razón al Ayuntamientu nos dos frentes nos qu'afondaba Madrid.

Los dos aspeutos nos que se centraba l’informe de la Direición Xeneral de Coordinación de l'Alministración Periférica del Estáu del Ministeriu de Facienda y Alministraciones Públiques, nel que se basa la decisión de la Delegación del Gobiernu estatal n’Asturies pa encamentar a l’anulación del alcuerdu plenariu qu’aprobara’l Plan, yera’l procedimientu formal y el fechu de contener midíes que, n’opinión de Madrid, dan al asturianu categoría de llingua oficial. No primero se centra mayormente’l documentu del Conceyu de Carreño, que conclúi que “l’alcuerdu impugnáu ye conforme a Derechu”, cola única esceición de la evaluación económica “qu’esixe la normativa d’estabilidá presupuestaria”, dalgo que nun supón mayor torga.

Mentes, el testu firmáu por Bartolomé, de 46 fueyes, afita que “el Ayuntamientu de Carreño tien competencia p’aprobar un plan municipal de normalización llingüística del asturianu y pa desendolcar una política de promoción d’esta llingua nel ámbitu del conceyu”, pa lo que se basa nel artículu 8 de la Llei d’Usu y Promoción del Bable/Asturianu y na Llei Reguladora de les Bases del Réxime Llocal. Precisamente, Madrid tamién se basaba nesi artículu de la Llei d’Usu, faciendo una llectura contraria a la so lletra.

L’abogáu y académicu apunta d’igual forma que’l “procedimiento d’ellaboración y aprobación siguíu pol Ayuntamientu axústase plenamente a la normativa estatal de réxime llocal” al nun tener les carauterístiques propies d’una disposición alministrativa de carauter xeneral. Por último afirma que’l Plan respeta l’Estatutu: “Dichu plan nun declara o reconoz la cooficialidá del asturianu xunto cola llengua castellana, nin de forma direuta o indireuta”.

Trés recursos

Estos dos documentos son los que va utilizar el Conceyu de Carreño pa defender el Plan de Normalización Llingüística nos trés recursos presentaos pol PP llocal: a Delegación del Gobiernu estatal n’Asturies, a la Direición Xeneral d’Alministración Llocal y énte la xuridiscción contencioso-alministrativa. Los grupos municipales del PSOE, Somos Carreño y IX defenden en bloque’l documentu aprobáu en xineru en Plenu.

Fonte: Asturies.com

Educación espubliza les actividaes de l'Axenda Didáctica axudicaes a centros

por Pablo R. Guardado

La Conseyería d'Educación y Cultura ta acabante d'espublizar les actividaes de l'Axenda Didáctica Escolar axudicaes a los centros educativos del país que solicitaren la so participación nesta iniciativa. Les direiciones han agora d'acutar la fecha pa la realización de les mesmes.

Les actividaes que van desendolcase son mui variaes. Asina, en Primaria hai dende conciertos de Pop Piquiñín a obres de teatros, pasando por charres sobre les mazcaraes d'iviernu o cuentacuentos. Mentes, en Secundaria atopamos iniciatives sobre rock y los sones d'Asturies o que xiren sobre la lliteratura asturiana, ente otres munches, amás de representaciones teatrales.

El plazu pa desenvolver les actuaciones nos centros educativos remata’l 21 de xunu nel casu de los centros educativos de Primaria y el 24 de xunu nel casu de los centros educativos de Secundaria. Les direiciones de cada escuela han d'alcordar coles entidaes participantes la fecha pa la celebración de l'actividá, siempre col preste de la Direición Xeneral de Planificación Llingüística y Normalización.

Fonte: Asturies.com

Planificación Llingüística va avalar con un informe xurídicu'l Plan de Carreño

• por Pablo R. Guardado

La Direición Xeneral de Planificación Llingüística y Normalización va encargar un informe xurídicu cola fin d'avalar la llegalidá del Plan de Normalización de Carreño. Entiende qu'esti conflictu podría afeutar a otros conceyos.

Una reunión celebrada ayeri n'Uviéu ente los responsables de Planificación Llingüística y una delegación del Conceyu de Carreño encabezada pola alcaldesa Amelia Fernández López y conformada pola conceyala d'Educación, Cultura y Bienestar Social, Cecilia Tascón; el secretariu municipal Fernando Mora; la responsable del Serviciu de Normalización Llingüística de la Mancomunidá del Cabu Peñes, Aránzazu Prado; y Alberto Fidalgo, edil de Somos Carreño, trató sobre la situación provocada pol encamientu de Delegación del Gobienu al Ayuntamientu pa qu'anule l'alcuerdu plenariu qu'aprobó'l Plan de Normalización Llingüística y la forma d'encarar esti asuntu.

PSOE, Somos Carreño y IX –que nun pudo acudir a la reunión– amosaron dende un primer momentu'l so apoyu al Plan aprobáu nel Plenu del  28 de xineru, que reclamó'l grupu municipal del PP énte Delegación de Gobiernu –los populares tamién presentaron un recursu contenciosu-alministrativu nun xulgáu de Xixón–, al entender que nun había base llegal pa la so anulación. Planificación Llingüística ye de la mesma opinión y na so defensa de la posibilidá que da la Llei d'Usu y Promoción del Bable/Asturiana anunció a los representantes del Conceyu de Carreño l'encargu d'un informe xurídicu qu'avale'l so Plan de Normalización Llingüística, asina como del restu de los planes aprobaos por otros ayuntamientos asturianos.

Dos frentes

D'ésti va encargase l'abogáu y académicu Nicolás Bartolomé y va centrase en dos frentes. El primeru, coordináu con Mora, va afondar nel procedimientu formal, dalgo que'l propiu secretariu nun ve difícil salvar con dellos axustes. Mentes, el segundu va enfotase na parte más 'política', la que más sorprendió del informe presentáu pola Direición Xeneral de Coordinación de l'Alministración Periférica del Estáu del Ministeriu de Facienda y Alministraciones Públiques, nel que se basa la decisión de la Delegación.

Madrid afirmaba nél que'l Plan de Normalización igualaba al asturianu a la categoría de llingua oficial y que'l Conceyu de Carreño estralimitaba col mesmu les sos competencies, negando la posibilidá de que los ciudadanos puedan comunicase cola alministración llocal n'asturianu, dalgo que Planificación Llingüística y los responsables municipales entienden que ye una llectura de la Llei d'Usu contraria a la so lletra.

L'informe encargáu, que ta previstu que se termine a finales de la selmana qu'entra, va llevase a la Comisión de Cultura pa depués pasalu a Plenu pol procedimientu d'urxencia y votalu nel convocáu pal día 28. Ésti servirá pa la defensa del Plan de Normalización Llingüística énte Delegación de Gobiernu y nel xulgáu, col convencimientu de que nun haya más torgues pal mesmu.

"Toos a una"

Fidalgo, en declaraciones a Asturies.com, señaló que "l'asuntu ta enfocándose bien" y destacó "la bona voluntá amosada per toles partes", asina como'l convencimientu de los trés grupos municipales a favor de la normalización del idioma de "dir toos a una". "Trátase de defender un derechu y confiamos en que too vaya bien", añadió l'edil de Somos Carreño.

Fonte: Asturies.com

Un cursu na sede de la RTPA va permitir a periodistes formase n'asturianu

por Pablo R. Guardado

La Direición Xeneral de Planificación Llingüística y Normalización y l'Academia de la Llingua Asturiana (ALLA) entamen xunto con RTPA un 'Cursu de Llingua Asturiana pa Programes Informativos' en dos niveles. Ésti ta destináu a profesionales del sector audiovisual.

Esta iniciativa ye asemeyada a la fecha hai unos años pol ente públicu de comunicación pal so personal, cola diferencia de que nesta ocasión ta abierta a tolos profesionales de la comunicación nel país. El oxetivu ye "capacitar al alumnáu pa ellaborar, acordies col so perfil, un programa informativu n’asturianu en radio/televisión".

Pa ello dispondrán de baldre d'un cursu semipresencial de 60 hores de llargor, que se divide en cuatro bloques: 'Gramática, normes ortográfiques y léxicu', impartíu por Marta Mori; 'Sociollingüística, Llexislación y Alministración', a cargu de Pablo Texón y José Luis Remis; 'Medios de comunicación y normalización', con Damián Barreiro como maestru; y  'Práctica del asturianu en programes informativos de radio y televisión', clases que van poner Naciu Varillas y Xosé Miguel Suárez Fernández 'Tapia'.

Les sesiones van celebrase de 15 a 18 hores, xueves y vienres, nun calendariu que va principiar el día 31, con final previstu pal 26 de mayu. Los alumnos que participen nel cursu van recibir un certificáu d'aprovechamientu del mesmu. Pa formalizar la matrícula ye necesario unviar a la direición xeneral la fueya d'inscripción disponible na so web, o nel documentu qu'apaez como axuntu nesta noticia con tola información sobre la so programación, enantes del día 22.

Formar a periodistes nel emplegu de la llingua asturiana

Esta iniciativa naz del enfotu del conseyeru d'Educación y Cultura, Genaro Alonso, y del direutor xeneral de Planificación Llingüística y Normalización, Fernando Padilla, cola intención de formar periodistes nel emplegu de la llingua asturiana. L'oxetivu últimu ye aumentar la programación n'asturianu de la RTPA, unos de los puntos que trata'l documentu del Plan de Dignificación que s'aprobó na Xunta Xuneral, pendiente de la so redaición definitiva por parte del Conseyu de Gobiernu.

Fonte: Asturies.com

Adxuntu	Tamañu
cursu_de_llingua_asturiana_pa_programes_informativos.pdf	101.43 KB

El Gobiernu confirma a Padilla como responsable de política llingüística

Presentó la estructura nueva del Executivu.

Tres l'anuncia dada por Gaspar Llamazares de que la direición xeneral de política llingüística pasaría a depender de manera direuta del conseyeru d'Eduación y Cultural –y non de la viceconseyería de Cultura como hasta agora– baxo'l nome de Direición Xeneral de Planificación Llingüística y Normalización, güei confirmóse que'l so responsable ye, como s'esperaba, Fernando Padilla Palicio. Diplomáu en Maxisteriu y Llicenciáu en Pedagoxía pola Universidá d’Uviéu, yera hasta la fecha Direutor del Colexu Públicu Escueles Blanques (Uviéu).

Padilla ye una persona sensible pa col asturianu y yá collaborara cola conseyería n’asuntos rellacionaos col idioma, llegando a ocupar el puestu de coordinador de la enseñanza de Llingua Asturiana. Va tener más competencies que la so predecesora, Ana María Fueyo, yá que la direición xeneral va contar con funciones que tienen que ver cola presencia del asturianu na educación y l’alministración, asina como nos medios de comunicación.

Otra manera, la estructura nueva del Gobiernu se carauteriza por sumar dos direiciones xenerales más, mentes que'l númberu de viceconseyeríes caltiénse. Asina, va haber ocho conseyeríes, dos viceconseyeríes y 38 direiciones xenerales.

Fonte: Asturies.com

Izquierda Xunida apauta una Direición de Normalización dependiente del Conseyeru

El voceru d’IX na Xunta Xeneral del Principáu, Gaspar Llamazares, anunció güei l’alcuerdu qu’alcanzara col Gobiernu pa que la Direición Xeneral que cuente coles competencies alrodiu de la llingua asturiana dependa directamente del Conseyeru d’Educación y non del Viceconseyeru como hasta agora.

La  nueva direición xeneral de Planificación Llingüística y de Normalización, amás de la xubida de nivel nel organigrama de la Conseyería va cuntar con más competencies y funciones que tienen que ver, esplicó Llamazares, cola Alministración, col asturianu na educación y col asturianu nos medios de comunicación.

Pa Gaspar Llamazares, “a última hora, ye  una potenciación del asturianu y ye más importante’l conteníu de la Direición Xeneral y de la so dependencia direuta del Conseyeru que la denominación final d’esa función, que nós deseyábamos que fora una viceconseyería pero qu’a la fin l’alcuerdu ye de Direición Xeneral de Planificación Llingüística y Normalización”. La dependencia direuta del Conseyeru, Genaro Alonso ye una bona señal, pero que tendrá d’afitase cuando se conozan les funciones de la Direición Xeneral y la persona que la ocupe.

Fonte: Asturnews