"Vamos falar con tol mundu pa pidir la oficialidá"

“Pa nós los resultaos son secundarios; vamos falar con tol mundu pa pidir la oficialidá”.

Carlos Pulgar, voceru del CAO, nun quier facer valoraciones sobre los resultaos de les elleiciones “hasta conocer l’organigrama de Gobiernu y la política llinguística que va siguir”. El coleutivu va continuar cola petición de reuniones pa falar sobre la oficialidá. “Los resultaos son los que son y pa nós son secundarios porque vamos falar con tol mundu pa pidir la oficialidá”, asegura Pulgar, que señaló que’l Conceyu Abiertu pola Oficialidá (CAO) nun quier valorar la situación política actual n’Asturies hasta que “nun se conoza l’organigrama de Gobiernu y la política llingüística que va siguir”.

Nesi sen, Foro Asturias Ciudadano (FAC) recoyía nel so programa elleutoral que “respeuto al idioma asturianu, va desenrrollase la regulación llegal vixente (Llei 1/1998, del 23 de marzu, d’usu y promoción del Bable/Asturianu)”. Pulgar, al ser entrugáu pola posibilidá de que FAC ponga en valor esta llei que n’actualidá nun se cumple en tolos sos puntos, señaló que “el movimientu demuéstrase andando” y repitió qu’hai qu’esperar a conocer la política llingüística que vaya a tomar el partíu d’Álvarez-Cascos.

Fonte: Asturies.com

Artistes pola Oficialidá na Casa Cultura de Nava

Dempués de pasar n'agostu pela Sala Loreto de Colunga, la Casa la Cultura "Marta Portal", en Nava, acueye dende'l llunes 4 al xueves 29 d'ochobre la esposición “Artistes pola Oficialidá”, entamada pol CAO (Conceyu Abiertu pola Oficialidá).

La esposición ye amuesa del sofitu del mundiu artísticu asturianu a la conservación del nuesu padrimoniu llingüísticu, y ta formada d'obres donaes por artistes asturianos de les cuatro últimes xeneraciones. Dende veteranos autores de la talla y el prestixu de Bernardo Sanjurjo o Fernando Alba a otros muncho más mozos que formen parte del arte emerxente actual.

L’amuesa vien a ser un interesante percorríu pol arte contemporaneu producíu n'Asturies, na que s'atopa tanto escultura como pintura y fotografía, con gran variedá de téuniques y soportes. Al marxe de la esposición artística, na esposición danse a conocer les campañes y l'activida que'l CAO tien puesto en marcha.

Fonte: Asturnews