L'Atenéu N'Alfoz anuncia un "Cursu Avanzáu de Llingua Asturiana"

L'Atenéu N'Alfoz anuncia l'apertura del plazu pa inscribise nel "Cursu Avanzáu de Llingua Asturiana" que va comenzar les sos sesiones el martes 25 de febreru. Hasta esi día la xente adulto interesao va poder inscribise nel mesmu, tanto nel Centru Tomás y Valiente como nel Centru Sociocultural de Les Vegues (Corvera). Dende l'Atenéu despliquen qu'esti cursu "quier ser un mecanismu d’afondamientu nel conocimientu y deprendimientu de la gramática asturiana y otres cuestiones más del idioma pero tamién una manera d’acercase a la cultura y a la historia asturiana, va ser impartíu pol téunicu responsable del Serviciu de Normalización Llingüística de Corvera". Poro, esti cursu, de calter gratuitu y con una duración de trenta hores, va desarrollase en sesiones de dos hores tolos martes, n’horariu de 18 a 20 hores. Les sesiones del cursu van facese nel Aula 2 del Centru Sociocultural de Las Vegas/Les Vegues. Los conteníos del cursu son los que s’indiquen de siguío: -Repasu de les normes ortográfiques; -Gramática de la llingua asturiana; -Léxicu; -Situaciones comunicatives, escrites y orales; -Acercamientu a la historia de la llingua asturiana; -Actitúes y prexuicios llingüísticos, qué son y cómo funcionen; -Manifestaciones artístiques n’asturianu. Fonte: Asturnews

L'Atenéu N'Alfoz entama un Conceyu Abiertu pal domingu viniente

L'Atenéu N'Alfoz llama a un Conceyu Abiertu, nel que van a tratase delles cuestiones rellacionaes cola so actividá. L'asociación cultural de la comarca avilesina, Atenéu N'Alfoz, entama un Conceyu Abiertu pa esti domingu 26 de xineru, a les 19.00 hores, nel Llocal Social L'Ensame. L'orde del día tocará cuestiones como la valoración del Cursu d'introducción a la toponimia asturiana, la inscripción del Atenéu como asociación, conceyos con instituciones y asociaciones, o cuestiones organizatives como ayalguería y socies. L'Atenéu N'Alfoz ñaz del enfotu de ciudadanes y ciudadanos de los conceyos d'Avilés, Castrillón, Corvera ya Illas pa crear una entidá cívica centrada nes cuestiones culturales y llingüístiques, que desendolque’l so llabor principalmente nesti ámbetu territorial conocíu como la Comarca d'Avilés". L'orixe d'esta entidá remóntase meses atrás, dempués de dellos alcuentros ente persones veníes de distintos ámbetos de lo que se puede denomar l´asturianismu social. Fonte: Infoasturies

L’Atenéu N’Alfoz y Compromisu critiquen la decisión del Niemeyer pa col Conciertu pola Oficialidá

Pablo R. Guardado
La negativa del Centru Niemeyer a acoyer el Conciertu pola Oficialidá d’esti añu provocó les crítiques de l’Atenéu n’Alfoz y de Compromisu por Asturies. Dambos coleutivos nun entienden esti actu discriminatoriu nuevu pa col nuesu idioma.

La entidá cívica qu’axunta a asturianistes d’Avilés, Castrillón, Corvera y Illas esixe a los responsables del Centru Niemeyer “respetu pola cultura asturiana”. “L’Atenéu N’Alfoz atopa nesta decisión una amuesa más de la actitú d’autoodiu promovida polos socesivos gobiernos d’Asturies, col oxetivu de dexar la nuesa llingua y cultura morrer nel escaezu”, señala nun comunicáu nel que reafita’l compromisu del coleutivu pola oficialidá y nel qu’amuesa la so solidaridá cola Xunta pola Defensa de la Llingua Asturiana (XDLA), organización qu’entama’l Conciertu pola Oficialidá xunto con Xunta Moza.

Pela so parte, la federación de partíos Compromisu por Asturies fala de “una discriminación nueva de la llingua asturiana”, más sangrante entá “al venir d’una entidá de financiamientu públicu”, con un costu de 40 millones d’euros, que se vende “como un espaciu pa la cultura” cuando, al mesmu tiempu, “refuga la presencia de la llingua asturiana nel so espaciu”. Pa Yolanda Huergo, vocera de la organización, negar el centru avilesín a la XDLA ye “la guinda del pastel, la culminación d’un proyeutu cultural qu’aveza a traenos dende la so nacencia noticies de sobrecoste, presupuestos inflaos y dineros perdíos de forma misteriosa; too ello paez que cola conocencia y permisividá del Gobiernu del PSOE, siempres más esmolecíu polo megalómanu que polo asturiano, y por conxurar les sos pantasmes y obsesiones en rellación cola cultura asturiana”.

Los nacionalistes ven nesta decisión “un exemplu nidiu de censura ideolóxica que s’axunta al nomáu paletismu la FSA, incapaces de valorar lo más cercano, inclinándose siempre por cualquier cosa que venga de fuera primero que polo fecho, falao o pensao n’Asturies”, lo que constitúi “otra amuesa del autoodiu qu’esiste ente los políticos asturianos”. Por último, reclamen la oficialidá de la llingua asturiana p’acabar “cola dicriminación de les y los asturianos pol fechu de selo y falar el so idioma”.

Fonte: Asturies.com

L'Atenéu n'Alfoz organiza una charra-alderique n'Avilés

L'Atenéu N'Alfoz d'Avilés, asociación de recién creación, organiza esti xueves 4 d'abril, de magar les ocho la tarde un tertulia baxo'l títulu "La llingua asturiana güei". Na mesatarán represenantes d'Iniciativa pol Asturianu, la Xunta pola Defensa de la Llingua Asturiana, Reciella 'Families pol Asturianu", l'Asamblea de Docentes d'Asturianu y el xestor cultural Adolfo Camilo Díaz.

L'actividá va tener llugar n'El Cafetón (Avilés) col envís d'analizar la situación actual de la llingua asturiana y de buscar respuestes coleutives dende la comarca avilesina, según espliquen los organizadores.

Fonte: Asturnews