XXIX Conciertu pola Oficialidá

El Conciertu pola Oficialidá qu`entama cada añu la Xunta pola Defensa de la Llingua Asturiana tornará reclamar la oficialidá pal asturianu, como vien faciéndose dende 1989 en dellos llugares de la xeografía asturiana

Cartelu XXIX Conciertu pola Oficialidá

Esti añu la cita va ser el 17 de xunu nel Parque Inglés de Xixón. Esi día, de magar les 19.00 hores dica alrodiu les tres de la mañana, ocho grupos d’estremaos estilos, pero cola llingua en común, van volver xunir llucha y folixa pa desixir los derechos que tien de tener la llingua asturiana.

Esti añu, dos actuaciones a destacar: l’actuación por primer vegada nesti festival del perconocíu artista asturianu Rodrigo Cuevas y l’adaptación de les esistoses Nueches en danza al horariu de tardi, colos grupos Caldo y Os Rabizos, Herbamora y Cantaruxare animando a tolos presentes a ballar cola so música, un bon sistema, ensin dubia, pa entrar en calor pal restu’l conciertu.
Tres de la tardi’n danza actuará LaKadarma, proyeutu musical navetu qu`aporfia pol desendolque de la música tradicional asturiana apurriéndo-y sonoridaes y arreglos nuevos a la gaita asturiana, recibiendo pa ello influyencies de dellos estilos.

Darréu, los l.lenizos Spanta la Xente, formación de gran sonadía nos Valles Mineros y ún de los grupos con más discos vendíos n`Asturies. Tres d’ellos torna a subir al escenariu Dixebra, un clásicu d’estos conciertos que cellebra esti añu`l so 30 aniversariu de conmemoración de los sos trenta años; y pa finar, los moscones Misiva, una banda de punk-rock con una bona montonera de conciertos al llombu.

Tou un maratón de música’l país col qu‘esfrutar y dexar los polmones glayando pola oficialidá.                                                                                                      Fonte: Redaición InfoAsturies

El XXIX Conciertu pola Oficialidá va celebrase’l 17 de xunu en Xixón

Dixebra nel XXVII Conciertu pola Oficialidá

 El Parque Inglés va tornar a ser sede del Conciertu pola Oficialidá, que cambia al mes de xunu na so ventena novena edición. La Xunta pola Defensa de la Llingua Asturiana (XDLA)cuenta con potenciar les actividaes previes a les actuaciones musicales, nes que nun va faltar Dixebra y nes que debuten los ḷḷenizos Spanta la Xente.

 Xixón pasa asina a acoyer la gran folixa reividincativa de la música asturiana depués de que la edición anterior se celebrara n’Uviéu, na plaza de la Catedral. “Nel primer momentu baraxamos el Solarón, pero les dificultaes burocrátiques pola titularidá del mesmu y el fechu de que fora prau, cola problemática que conllevaría na so organización nel casu d’un bastiazu na selmana previa, fixo que nos decidiéramos pol Parque Inglés”, esplica Carlos Pulgar, voceru de la XDLA.

 La sede nun va ser l’únicu cambiu, yá que tamién va haber treslláu de fecha. Tres volver a les tradicionales l’añu pasáu –entámose’l 22 d’abril–, la organización cívica escueye agora averar el conciertu a les puertes del branu. “Queremos potenciar les actividaes previes a les actuaciones musicales, sobre manera les infantiles, y, anque n’Asturies nunca se sabe, xunu conlleva a priori un meyor tiempu”, argumenta.

Grupos y collaboraciones

 Sobre los grupos participantes, la XDLA va dir dando anuncies nes selmanes próximes, anque nel cartelu nun va faltar Dixebra nun añu tan especial pa la formación avilesina: el so trenta aniversariu. Xunto a la banda referente del rock n’asturianu va tar tamién una de les de mayor ésitu de los años últimos, Spanta la Xente, que s’estrenen nesta cita.

 D’igual forma, Pulgar avanza que dalgunos de los grupos previstos cuenten con preparar collaboraciones, nun formatu novedosu nel Conciertu pola Oficialidá.     Fonte: asturies.com