Venti años depués de ‘Los caminos secretos’, Xuan Bello torna a espublizar un llibru de poesía. ‘El llibru nuevu’, editáu por Saltadera, yá ta disponible nes llibreríes del país con cincuenta poemes del escritor que va recibir el Premiu Nacional de Lliteratura Asturiana.
El sábadu comenzó la distribución del esperáu llibru nuevu de poesía de Bello, que pese a nun dexar d’escribir esti xéneru lliterariu, namái espublizara en prosa nos venti años últimos. ‘Los caminos secretos’ (Serviciu de Publicaciones del Principáu d'Asturies), obra ganadora del II Premiu Xuan María Acebal de Poesía, correspondiente al añu 1996, ex aequo con ‘Les etimoloxíes del silenciu’ de Xulio Viejo, foi l’últimu poemariu qu’asoleyó’l de Paniceiros, cola esceición única de l’antoloxía billingüe ‘La vida perdida’ (Llibros del Pexe) nel 1999.
En ‘El llibru nuevu’, l’autor “esamina la propia esistencia dende una perspeutiva arriquecida que se mueve de lo personal a lo xeneracional y social. Constrúi d’esta manera un llibru políticu nel sentíu más esencial de la pallabra, un estudiu de la xeoloxía de la vida que nun dexa filón ensin remover, cola intelixencia y la maestría del que conoz bien el valor consolador y provocador de la pallabra por más qu’anuncie querer ‘salise de les pallabres’ pa usales como guía más que como conxuru. Bello algama nesti llibru los momentos más altos de la so obra poética, convertida agora nuna reflexón sobre la vida na que nada nun ye ayeno por más que too paeza estraño”, apunten dende Saltadera.
Fonte: Asturies.com
