El conseyeru Alonso representó al Gobiernu

• . Cano emponderó’l “papel que la muyer xuega nel procesu hestóricu de caltenimientu y recuperación de la llingua”

 L'actu académicu del Día de les Lletres contó con una presencia destacada d'autoridaes. Ciudadanos acudió per primer vegada, tando nel Teatru Campoamor los sos trés diputaos.

 Ente los asistentes destacó la presencia de Genaro Alonso, conseyeru d’Eduación y Cultura; Fernando Padilla, direutor xeneral de Planificación Llingüística y Normalización; asina como representantes de tolos grupos políticos con representación na Xunta Xeneral,  y dellos alcaldes y conceyales.

 De la FSA-PSOE acudieron, ente otros, Wenceslao López, primer edil d’Uviéu; Gerardo F. Llavona, de Cabranes; y Rogelio Pando, de Colunga. Pel PP, foi la conceyala uvieína Elisa Fernández Rivas, mentes que de Podemos acudió la diputada nel Congresu, Sofía Castañón; el voceru na Xunta Xeneral, Emilio Léon; la conceyala de Somos Uviéu, Andrea Álvarez, y el voceru de Xixón Sí Puede, Mario Suárez del Fueyo.

 Los diputaos Gaspar Llamazares y Concha Masa, por Izquierda Xunida (IX), tuvieron presentes nel Campoamor, amás de Faustino Zapico, conceyal d’IAS en coalición con IX en Mieres. En representación de Foro tuvieron la senadora Rosa Domínguez de Posada, asina como Ana Montserrat López Moro, conceyala d’Educación y Cultura de Xixón, y Esteban Aparaciu, conceyal de Seguridá Ciudadana y Tráfico de Xixón.

 Mentes, por Ciudadanos, formación que nun acudió n'años anteriores, acudieron los trés diputaos de la formación, Nicanor García, Luis Armando Fernández Bartolomé y Diana Sánchez Martín, asina como dellos ediles. Tamién asistió Amparo Antuña (Independientes de Noreña), alcaldesa de Noreña.

 El rector de la Universidá d’Uviéu, Santiago García Granda, vicerrectores y profesores universitarios, asina como sindicalistes y otres munches personalidaes completaron el llistáu d’autoridaes presentes nel actu académicu del Campoamor.                   Fonte: asturies.com

El timu (políticu) de la estampita

Por Vicente García Oliva el 15/07/2015

Siempres que lleemos nel periódicu qu’acaben de da-y a una vieya el timu de la “estampita” entrugámonos: “Pero bueno, la xente ye fata”. Mira que ta cantao. Que yá se dixo mil veces en qué consiste. Que los papeles y la policía nun aparen d’avisar… y nada. A la fin hai dalgún ilusu o ilusa que se dexa engañar. Eso mesmo ye lo que nos pasa a dalgunos con Izquierda Xunida.

Porque en toles convocatories eleutorales, a midida que s’allega la fecha les votaciones, surden les declaraciones de dalgún responsable diciendo que bueno, qu’eso de la llingua ye daqué que-yos llega al corazón. Que la Oficialidá ye como la Declaración de Derechos Humanos y los Diez Mandamientos, xuntos. Y que por supuesto, si en dalgún momentu ellos tienen dala capacidá de facer dalgo que van promovela (la Oficialidá) como si fuere una Encíclica Papal, o seya: “Urbi et Orbe”. Nun contentos con ello, acuden a facese semeyes nos llocales de l’Academia de la Llingua, y asomen la cabecina en dalgún programa televisivu falando de les dos llingües d’Asturies que tienen que ser oficiales.

Y pasa como cola “estampita”, siempre me coloquen el décimu falsu creyendo que ta premiáu. Esta vuelta fue’lpropiu Llamazares, el que nun programa estatal (creo que fue na Sexta) me comenció de les sos bones intenciones pa cola Oficialidá: enséñote un billete de llotería y dígote que tien “el gordu”.

Total, otru cheque en blanco pa los amigos del PSOE asturianu, esos que lleven gobernando, o lo que seya, milenta años n’Asturies, y que tienen el record mundial d’incompetencia pa políticos n’activo. ¡Pero si esta película ya la tenemos vista miles de veces! “Unu mata y l’otru estira pola pata”, diz el refrán. Eso sí, con grandes pallabres que son les que-yos presten, sobre too a los d’Izquierda Xunida: Rexeneración. Tresparencia. Comisiones d’investigación (¡cuando coño salió dalgo práutico d’una comisión d’investigación!) xunto colos nuevos “palabros” recién copiaos d’otres fuerces polítiques: Rescate ciudadanu… ¡Oiga, pero si yo nun quiero que me rescaten, quiero que m’atiendan y nun m’engañen! ¿Y la llingua? La mía bien, gracies. ¿Y la suya?

En fin, dicen los sicólogos que’l que ye engañáu por un timador d’estos ye que, a la so vez, el tamién trataba de timar. Esi debe ser el mio casu. Pero tengo de ser mui malu: nunca consigo colocar a naide esi décimu de la Oficialidá.                                          Fonte: Asturies.com/Trabayu De Campu.Vicente García Oliva