L'Antroxu 2015
Asturies va vivir dende esta nueche cinco díes de folixa, mázcares y gastronomía. Llega l’
Antroxu, festividá asturiana que nel pasáu entamaba col solsticiu d’iviernu y qu’agora, tres la recuperación acontecida col fin del franquismu, resúmese a les xornaes previes al Miércoles de Ceniza.
La primer cita ye’l Xueves de Comadres, xornada nel que les muyeres axúntense pa comer y pasar una xornada festiva. Anque l’orixe d’esta folixa pue tar fuera del Antroxu tradicional, esta cita tan asturiana considérase l’entamu del Antroxu modernu. Xixón y La Pola Siero son les villes que nos años últimos mantienen con fuercia esta tradición que caltuvieron per munchos años les cigarreres de la fábrica de tabacos de Cimavilla. Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles. Güei, la folixa treslladóse de la tarde a la nueche y munchos restaurantes ofrecen menús especiales pa esta xornada.
Ye de destacar tamién el llabor de la Tertulia Feminista Les Comadres pa potenciar esta fecha festiva. Esti grupu de muyeres entama tolos años una espicha na qu’entreguen dos premios: el comadre d’oru y el felpeyu, ésti últimu a persones o entidaes que desprecien a la muyer. El premiáu d’esti añu ye pa la investigadora, ensayista y crítica de cine Pilar Aguilar “polos sos análisis que xiren sobre la manipulación machista y patriarcal de la representación cinematográfica, pola so trayeutoria vital y pol so compromisu intelectual cola causa del feminismu, que la llevó a movilizar al Colectivo de Mujeres Cineastas contra la Reforma de la Ley del Aborto que fixo’l documental ‘Yo decido. El Tren de la Libertad’”. El títulu de felpeyu recala na Asociación Galgos 112 “porque’l so calendariu 2015 ye un exemplu de que les campañes solidaries tamién pueden enllamorgase nel machismu. Precisamente pola nuesa postura a favor del bon tratu y proteición de los animales, nun entendemos la necesidá de presentar a les muyeres nel so calendariu d’esti añu con una cosificación tan burda”. Completen los gallardonaos el comisariu européu de Cambiu Climáticu y Enerxía, Miguel Arias Cañete, que recibe’l títulu de Babayu “por nun tar al alto na confrontación dialéutica con una muyer” en referencia al debate con Elena Valenciano na campaña de les Europees. La folixa, pa la que tien confirmada la so asistencia la sardina del Antroxu xixonés, va tener llugar nel Llagar Castiello a les 20.30 hores y va consistir nuna espicha cola actuación d’Assia.
.jpg)
Rio de Janeiro o Tenerife ganen a la tradición
Los antroxos de Xixón y Avilés son los más importantes en cuantes a programa institucional y participación. Música y delles actividaes más orientaes a asemeyase a los carnavales de Rio de Janeiro, Tenerife o Cádiz qu'a otra cosa, protagonicen estes xornaes na que la xente participa antroxándose, anque con mázcares lloñe de la tradición. Los vienres ye habitual ver a los neños antroxaos nos colexos y en Xixón les charangues calecen motores pal concursu d’estes formaciones del sábadu y del domingu, que yá va pola so ventésimu octava edición, con una participación alta. El sábadu, los focos van p’Avilés, onde se celebra’l XVIII Descensu Internacional y Fluvial de Galiana a partir de les 18.30 hores. Una gran cantidá de chigres de la ciudá antróxense pa estos díes –nesti añu la temática son los vikingos– pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.
El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, sobre manera la más mozo.
El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos y les picatostes.
En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como ye’l casu de Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares. Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición
‘Ye tiempu de…’ d’Asturies.com na que nun falta un detalle d’esta folixa.
Fonte: Asturies.com
