La Xunta pola Defensa de la Llingua premia a Caudalia y a Editorial Bruño pol so apueste pol asturianu

La Madreña de Purpurina foi pa Paradores de Turismu por nun respetar la toponimia oficial    La Xunta pola Defensa la Llingua Asturiana acaba de dar a conocer los ganadores de los Premios Andrés Solar na so XXIX edición. Nesta ocasión, el Pegollu foi pa la Editorial Bruño y pal Centru Comercial Caudalia. El Madreñazu foi pa Paradores de Turismu, mentantu que la Madreña de Purpurina d'esti añu foi pa Paradores de Turismu por nun respetar la toponimia oficial.    La Xunta pola Defensa la Llingua Asturiana acaba de dar a conocer los ganadores de los Premios Andrés Solar na so XXIX edición. Nesta ocasión, el Pegollu foi pa la Editorial Bruño y pal Centru Comercial Caudalia. El Madreñazu foi pa Paradores de Turismu,    Los Premios Andrés Solar tienen una vertiente doble: per un llau, la Xunta premia a una entidá o persona que rescamplara nel últimu añu pol so llabor en defensa o promoción del asturianu. Esti reconocimientu materialízase nel Pegollu, que nesta ocasión quier reconocer la edición, distribución y promoción de la última entrega del cómic Astérix, Astérix na tierra los Pictos, de la editorial Bruño, que fixo qu’a lo llargo d'unos díes una producción cultural n'asturianu pudiera visibilizase en condiciones d’igualdá en toles llibreríes d’Asturies. De la mesma manera, esti premiu tamién reconoz al Centru Comercial Caudalia, asitiáu en La Vega Santuyano (Mieres), que vien promoviendo campañes publicitaries nestos dos últimos años onde l'asturianu ye la llingua vehicular de tol material impreso que se reparte ente los clientes.    Los Premios Andrés Solar tienen tamién una versión negativa, que pon n'evidencia la persona o entidá que rescamplara pol so llabor negativu pa cola llingua asturiana. Esti honor duldosu represéntase con un Madreñazu, que na edición del 2013 va pa Paradores de Turismo S. A., entidá de capital público que sistemáticamente niégase a contestar tolos requerimientos fechos pa que respete la toponimia oficial nos sos establecimientos d'Asturies, como son los casos de Xixón, Courias o Cangues d’Onís.    La entrega de los Premios va facese’l sábadu 21 d’avientu, a les 19:30 hores, nel Salón d’Actos del Antiguu Institutu de Xixón. La actuación musical va ser de Mapi Quintana y Elías García.    Tamién, como tolos años, depués del actu va haber una espicha nel chigre xixonés Canteli y la entrada val 20 euros. Pa dir, hai qu’acutar sitiu, y pa eso hai que llamar al 985229553 o mandar un mail a infoarrobaexunta.org primero d’esti miércoles 18 d’avientu.       Fonte:  Asturnews

La Xunta pola Defensa de la Llingua convoca una manifestación esti vienres pa reivindicar la oficialidá

N'UVIÉU La Xunta pola Defensa de la Llingua convoca una manifestación esti vienres pa reivindicar la oficialidá La Xunta pola Defensa de la Llingua Asturiana convocó pa esti vienres una manifestación pa reivindicar la oficialidá del asturianu y dar cuenta "del paralís" de l'Alministración en materia llingüística. La marcha va entamar a les 19.30 hores de la estación de Renfe d'Uviéu. Darréu va percorrer les cais d'Uría y San Francisco hasta la plaza de Porlier, frente al Teatru Filarmónica, onde va lleese un discursu p'analizar la situación del asturianu nel últimu añu, esplicaron esti xueves en rueda prensa los representantes de la Xunta y de la Xunta Moza, Carlos Pulgar y Llucía Menéndez, respectivamente. La organización pretende que la manifestación seya "reivindicativa y festiva" al empar, concretó Menéndez. Por ello, va tar amenizada por cortexos de pandereteros y gaites, amás de pola charanga feminista. Y too ello con un doble oxetivu: "celebrar el Día de Les Lletres Asturianes y reivindicar la oficialidá de la llingua", recordó Pulgar. LA CRISIS COMO ESCULPA Mientres la so intervención, Carlos Pulgar fizo balance del 2011 dende la perspectiva llingüística. Al respecto, caltuvo que la situación de paralís política na rexón afectó a les polítiques de promoción de la llingua asturiana. Na so opinión, los recortes presupuestarios tán poniendo "en peligru" la supervivencia de les canales de promoción del asturianu "d'una manera inxustificablemente grave". Estos axustes escúdense, consideró, en "la escusa de la crisis" y resalven los derechos de los asturianu falantes. "NUN HAI NADA MÁS QUE RECORTAR" Preguntáu poles declaraciones de la conseyera d'Educación del Principáu, Ana Isabel Álvarez, qu'ayeri dixo que los recortes nun afectaríen a la llingua, Pulgar dixo que probablemente seya asina porque la situación ye "tan precaria" que "nun hai nada más que recortar" nesti ámbitu. "El pasu siguiente sería que nun hubiera profesores nin asignatura", añadió. UNA BONA NOTICIA PAL ASTURIANU Coles mesmes, Pulgar valoró la decisión del Tribunal Supremu d'anular el cupu mínimu d'ocho alumnos qu'estableciera'l Gobiernu rexonal pa ofrecer la enseñanza d'asturianu na Educación Secundaria. "Ye una bona noticia" que podría tornar en "un puntu d'inflexón" pa meyorar la situación de la escolarización del asturianu y, por estensión, la normalización d'ésti. Fonte: europapress.com