Xixón Sí Puede reclama´l cumplimientu del Plan de Normalización del Asturianu

Xixón Sí Puede recuerda'l mandáu de cumplir el Plan de Normalización en tolos eventos qu'entame'l Conceyu.

Xixón Sí Puede (XsP) lleva un ruegu a la Comisión de Bienestar Social, Cooperación, Cultura y Educación y al Conseyu d'Alministración de Divertia reclamando que l'asturianu tea presente en tolos eventos qu'entame'l Conceyu. Una reivindicación que se recueye nel Plan de Normalización Llingüística de Xixón 2016-2019 aprobáu nel Plenu de marzu de 2016 col sofitu de tolos grupos políticos, sacante'l PP que s'abstuvo.

Nesti documentu indícase que se va “impulsar l'usu del asturianu nos ámbitos empresariales, sindicales, culturales, artísticos y demás propios de la sociedá xixonesa”. El Plan tamién diz que se va a procurar usar l'asturianu “na publicidá, información y publicaciones d'eventos relevantes de Xixón programaos a lo llargo l’añu que tengan de ver cola proyección esterior del Conceyu p’asina fomentar la imaxe cultural del propiu Conceyu y venceyala col asturianu; yá seyan los entamaos pol Conceyu de Xixón o nos qu'ésti participe de manera preminente”. El plazu que se da pa principiar a trabayar nesta llinia ye dende'l segundu trimestre de 2016.

Por esti motivu, XsP recuerda al Ayuntamientu la necesidá de que l'asturianu tea presente en tolos eventos que faiga l'Ayuntamientu, les Fundaciones municipales y Divertia. Nesti sentíu, la llingua asturiana habría tener presencia en cartelería, lones y escenarios, tanto no que cinca a la toponimia, como a la información y promoción de les actividaes.

En concreto, el grupu municipal entiende que ye imprescindible que l'asturianu sía visible n'eventos como l'Arcu Atlánticu, los conciertos del branu, el Festival Internacional de Gaites, el Festival Folclóricu, la Selmana Grande, el Festival de la Sidra, el Festival de Cine y los eventos gastronómicos nos que participe Divertia.

Fonte: Asturnews

"Xixón Sí Puede va facer tolos esfuercios pa caltener el Festival Arcu Atlánticu"

• por Pablo R. Guardado

La oposición valtó la programación del V Festival Arcu Atlánticu, que namái contó col apoyu de Foro y Ciudadanos. PSOE y IX opónense al mesmu, mentes que Xixón Sí Puede demanda un enfoque más cultural pal certame.

Daniel Fernández, responsable de comunicación de Podemos Xixón, coleutivu que participa nesta candidatura de xunidá popular, reconoz que'l tiempu cuerre a la escontra pa poder celebrar la edición prevista ente'l 23 y el 31 de xunetu, anque afirma que Xixón Sí Puede "va facer tolos esfuercios" pa qu'ésta sía una realidá "con una programación de consensu".

El votu en contra de la organización na xunta rectora de la de la Fundación Municipal de Cultura, Eduación y Universidá Popular nun foi pol festival, sinón "por una programación que nun xustifica'l gastu de perres nin tien enfotu cultural".

El presupuestu yera de 194.000 euros y nun pudo salir alantre pola oposición de les trés formaciones d'izquierda y l'astención del Partido Popular. D'esta forma, el Festival Arcu Atlánticu queda nel aire, cola dulda de si habrá tiempu de poder ellaborar un programa nuevu, como ye'l deséu de Xixón Sí Puede.

"Creemos que'l festival encaxa bien na idea que tenemos del branu xixonés, pero debe tar más centráu nel aspeutu cultural, ensin negar una parte llúdica, con un importante pesu de la cultura asturiana y atlántica, y de la llingua asturiana", espón Fernández.

El certame, nel aire

La votación d'ayeri, por decisión de Foro tres un pidimientu de retrasu de la mesma de Xixón Sí Puede pa consensuar otra programación, dexa 'l festival pol que puxó Carlos Rubiera dende la conceyalía de Cultura a piques del desaniciu.

Los téunicos municipales apuntaron la dificultá de diseñar un programa nuevu dada la fecha na que tamos y ta por ver qué decisión toma Foro.

El PSOE presenta l'actitú más belixerante contra'l Festival Arcu Atlánticu, apuntando a que se trata de una "ocurrencia" de Rubiera que Foro convirtiera nun actu de propaganda. La edil Lara Martínez tamién criticó la financiación dende Cultura calificando'l certame como "una actividá llúdica y festiva", lo qu'afeuta a otres actividaes culturales.

Mentes, IX entiende que'l festival nun ye prioritariu pa la Fundación Municipal de Cultura y defiende dedicar esos fondos pa otros programes culturales que reciben menos perres.

Rellaciones con otros países y ciudaes

El Festival Arcu Atlánticu nació cola nel 2012 cola intención de crear "un intercambiu cultural y musical ente los países del arcu atlánticu", según aseguró Rubiera a Asturies.com meses depués de llegar a la conceyalía, cuando'l certame yera un xerme.

Pa la so organización implicó a delles coleutivos de la ciudá, casu de l'Asociación Cultural L'Arribada, a diferencia d'otros festivales de la ciudá, como la Semana Negra, entamáu por un únicu coleutivu.

Nes sos cuatro ediciones, Xixón convidó a ciudaes y países del arcu atlánticu, como Lisboa y Portugal, Naunnt o Éire, entamando rellaciones institucionales y comerciales con ellos. Tamién contó cola participación de dellos conceyos asturianos.

Fonte: Asturies.com

XsP entruga pol Plan de Normalización del Asturianu de Xixón

XsP entrugará esti llunes pela mañana na Comisión de Cultura del Ayuntamientu de Xixón pol Plan de Normalización del Asturianu, que tien d’entrar en vigor esti mes de xineru.

Esti mes de xineru yera’l momentu nel que tenía d’echar a andar el Plan de Normalización del Asturianu, sigún se comprometió l’equipu de Gobiernu esti branu, tres aceptar el ruegu de Xixón Sí Puede (XsP) nel que se propunxo esta midida p’atayar el retrocesu na normalización del asturianu nel conceyu.

Pero, una y bones, el mes de xineru ta nos sos últimos díes sin que se vean posibilidaes de cumplir pa col plazu prometíu y Mario Suárez del Fueyo, portavoz de XsP, va entrugar na Comisión de Cultura d’esti llunes si yá esiste’l mentáu Plan de Normalización. XsP tien constancia de que’l Conseyu Asesor de la Llingua aconceyó’l mes de payares pasáu, como pasu previu pa la puesta en marcha del Plan, polo qu’agora tocaría principiar a aplicar esti documentu.

En casu de que’l Plan tea efectivamente ellaboráu, Del Fueyo va pidir al Gobiernu qu’informe sobre cuándo se va a presentar. De nun tar fechu entá, XsP quier saber los plazos nos que se cuenta aprobar, presentar y executar. Al empar, el grupu municipal mantién qu’han facese públiques les midíes concretes que se van tomar pa facer el siguimientu de temporalización y execución del Plan.

La iniciativa de XsP tien por oxetivu “agotar toles posibilidaes” de la Llei d’Usu y Promoción del Asturianu, “da-y vida a la llingua” y que l’Alministración apurra los medios pa que la ciudadanía pueda facer usu del asturianu. Asina lo expunso Mario Suárez del Fueyo nel momentu de presentación del Plan, cuando esplicó qu’una de les primeres acciones había ser la “visibilización” del asturianu p’asina afalar a la ciudadanía al so usu. Esta visibilización tien de facese dende l’Alministración pente la publicidá institucional, asina como nos medios de comunicación y en xeneral en tolos ámbitos nos que l’Ayuntamientu tenga presencia, tanto como organizador d’eventos como cuando dea subvenciones y apoyos a tou tipu d’iniciatives.

Esti Plan, amás, ha de contemplar midíes p’afalar al usu de la toponimia oficial, l’estímulu d’actitúes positives pa col usu del asturianu n’ámbitos empresariales, deportivos, sindicales, culturales y artísticos. Esto ha dir de la mano de la promoción de productos culturales n’asturianu, la so promoción nes escueles d’Educación Infantil y la dotación de personal y recursos pa la Oficina de Normalización Llingüística.

Fonte: Asturnews