Les dos islles: Te Ika-a-Maui y Te Waipounamu
Pa nomar la North Island y la South Island, van poder utilizase los topónimos tradicionales Te Ika-a-Māui y Te Waipounamu
Les dos grandes islles que formen Nueva Zelanda, la del Norte y la del Sur, podríen recuperar oficialmente´l so nome en maorí: Te Ika-a-Māui (‘el pexe de Maui’) y Te Waipounamu (‘les agües de xade’), respeutivamente.
El New Zealand Geographic Board (NZGB), la institución encargada de los topónimos, recibió una petición pa camudar el nome de South Island pola so versión maorí y cayó na cuenta qu´l so nome n´inglés nunca fuere declarao oficial.
Don Grant, el direutor del NZGB, desplicaba: "Mientres facíamos la investigación sobre´l tema, cayimos na cuenta que tanto la North Island como la South Island nun yeren nomes llegalmente oficiales. Por eso l’organismu plantégase agora adoptar oficialmente los nomes maorís, xunto al equivalente inglés, pa denominar les dos islles. De fechu, amestaba Grant, los nomes tradicionales aparecíen nos mapes oficiales hasta 1950".
El maorí, falao por un 4% de la población, ye oficial en Nueva Zelanda (o Aotearoa) conxuntamente col inglés.
Fonte: Aruelu.com
