“Tamos encantaos cola respuesta de la xente”, afirma Reciella

Día de la Reciella 2016

  Más de mil persones pasaron el domingu pelMuséu del Pueblu d’Asturies pa disfrutar de les munches actividaes pol IV Día de la Reciella. “Tamos encantaos cola respuesta de la xente”, afirma Iris Díaz Trancho de ‘Reciella. Families pol Asturianu”, como amuesa que munches actividaes escosaren les places en minutos.

  Les actividaes entamaron a les once de la mañana cola celebración de “Entaína, I Carrera de families pol asturianu” onde cuasi 200 persones de toles edaes participaron nuna carrera que quier reconocer la tresmisión xeneracional del nuesu idioma. Dempués  continuó cola exhibición de fútbol a cargu de la escuela del U.C. Ceares, el partíu foi retrasmitíu n’asturianu por Nacio González. Les actividaes de la mañana continuaron con xuegos tradiciones cola collaboración de la Tertulia Cultural El Garrapiellu, talleres de llambiotaes por Miel et canelle y xuguetes con material reclicao por EMULSA,  y cuentacuentos con Olga Cuervo.

  Un datu que dexa bien nidio la gran respuesta de públicu dende primer hora de la mañana, cuando se celebró la carrera de families pol asturianu ‘Entaína’, foi l’ésitu del chigre. “Llevemos más del doble de comida del añu pasáu y a la una yá quedamos ensin esistencies, lo que nos llevó a tener que facer más encargos pa poder atender la demanda”, esplica Iris Díaz Trancho.

  Na tarde continuaron los cuentacuentos con “Samalandran, Islla de lleendes” y talleres cola Asociación Apasos. Amás d’otres actividaes pel práu del Tendayu del Pueblu d’Asturies. La música llegó cola actuación de la Banda de Gaites Infantil de Villaviciosa y la Escuela de Música Tradicional de Ribeseya. Les actividaes finaron col conciertu de “Bestiariu” y una Danza Prima.

  En resumen, un Día de la Reciella cargáu d’actividaes pa tola familia que medra añu a añu. “Tolos talleres escosaron les sos places a lo poco d’abrir la inscripción ”, espliquen dende Reciella, que quier “agradecer a tola xente de l'asociación y collaboradores que participaron na organización y a los patrocinadores el so apoyu pa que saliera perbien esta folixa que tien como oxetivu la socialización n'asturianu de les xeneraciones nueves”.     Fonte: asturies.com

L'agua nun pudo cola reciella

Una imaxe del tendayu del Muséu del Pueblu d’Asturies na tarde d’ayeri. (del domingu) Semeya de Jana Suárez

 El lloviu que cayó de manera intermitente esti domingu en Xixón nun tornó la gana de diversión de los neños y neñes qu’acudieron coles sos families al III Día de la Reciella. Los xuegos, la música y la gastronomía foron protagonistes.

 Les posibilidaes que da’l Tendayu del Muséu del Pueblu d’Asturies permitieron treslladar dientro dalgunes de les actividaes previstes y camudar delles de les actividaes d'horariu cuando l’agua fixo actu de presencia obligando a entamar la xornada con más de media hora de retrasu.

 Finalmente cuando entamó a escamplar, abrió la programación el dúu Mestura, con un conciertu participativu nel q ue los asistentes pudieron esfrutar de los temes del CD Pallabres de Carambelu.

 Depués, cuando apaecía en cielu una lluga, y yá colos xuegos tradicionales de l'Asociación Cultural Esbilla y el pintacares en marcha, Lluis Nel Estrada, de 40 Primaveres, conduxo un taller sobre los quesos del país qu'apurrió el comerciu La Gijonesa.

Superllingua       En pasando la posa pa la xinta entamaron les actividaes de la tarde, cola Gynkana a la que convidó'l superhéroe Superllingua que llevó a neños y neñes per tol muséu, enseñándo-yos les lletres y tres de la que toos y toes les participantes tuvieron un regalu.

 Y, ya col pintacares otra vegada en marcha foi'l turnu de la Escuela de Música Tradicional La Quintana, qu'entamaron alredor de les 17.00 col conciertín de Serie2, un grupu formáu por alumnáu de la escuela, al que siguió l'actividá Xugando con Música, pa rematar, tres d'una rifa de productos infantiles, con un conciertu de los profesores de la escuela.

 La Oficina de Normalización Llingüística de Xixón, la TPA, el Centru Social Sestaferia y Asturies.com foron delles de les entidaes que collaboraron pa qu’esta xornada tornara a ser un éxitu y, lo más importante, permitiera a la reciella’l disfrutar d’un día de diversión en llingua asturiana.

L'enfotu de la organización d'esti día d'actividaes infantiles y familiares n'asturianu ye facer normal lo que desgraciadamente nun ye normal n’Asturies; ayudando a cubrir esi déficit que tienen los neños y neñes asturianes al nun tener accesu a asturianu nun periodu tan importante pa la tresmisión xeneracional del idioma.

L'añu de la consolidación  David Guardado, miembru de la directiva de Reciella comentaba durante la xornada que "esti ye l'añu de la consolidación, depués de dos años d'aprendizaxe yá podemos dicir qu'el día de la Reciella ye una cita p'acutar nel entamu de la seronda n'Asturies", y alegrábase de que "el mal tiempu, l'aire y los dos bastiazos que cayeron pela mañana y al mediu día nun impidieren la presencia d'abonda xente y sobre manera de que los neños y neñes lo pasaren 'podre' anque dalgún coló pa casa con una bona pulpera".

 Guardado quixo agradecer especialmente'l so sofitu a tolos collaboradores, que, dixo, "faenlo desinteresandamente y ayúdennos a iguar esos espacios de normalidá que tanta falta nos faen, anque quede munchu camín qu'andar" y recordó que Reciella fai actividaes tol añu pero que'l so llabor "nun pue tapecer que les alministraciones tienen una responsabilidá perimportante na tresmisión interxeneracional del idioma" polo que pidió "un apueste más decidíu a l'alministración nueva pa qu'ente toos y toes podamos asegurar el futuru de la llingua asturiana".

 Una danza prima, alredor de les 19 hores, punxo’l ramu al III Día de la Reciella, una iniciativa que tendrá continuidá dau’l so ésitu añu tres añu. Esta selmana podrán disfrutar n’Asturies.com d’una galería de semeyes coles actividaes d’esta xornada.                                                                    Fonte: asturies.com