La Llaguna del Torollu, Trebeyu y Muyeres dirán a Lorient esti añu

   La Llaguna del Torollu d’Uviéu y Trebeyu de Xixón van ser la banda de gaites y el grupu folklóricu asturianos que compartan escenariu esti añu nel Festival de Lorient con The Corrs, Joan Baez o Alan Stivel na so 46 edición que va desenvolvese del 5 al 14 d’agostu y que va dedicada a Australia.

  Vieno acabante de presentase la programación de la 46a edición del Festival Intercélticu de Lorient onde Asturies va tar presente una vegada más y darréu d’ello conocemos los grupos asturianos que van actuar nesta edición. Anguaño’l festival va celebrar ente los díes 5 y 14 d’agostu na ciudá de Lorient y el país al honor va ser Australia.

  Nesta ocasión los representantes asturianos van ser la banda de gaites “La Llaguna del Torollu” d’Uviéu y el grupu de baille “Trebeyu” de Xixón los escoyíos pa representar Asturies en Bretaña.

  A lo llargo del festival tamién va haber ocasión d’esfrutar de la música de “Muyeres” que va llevar al escenariu del Gran Teatru de Lorient el so nuevu espectáculu “País Malva”, según del últimu proyectu musical de Marcos García Alonso, ERRAI.

  Tamién el grupu folk “Corquiéu”, de Ribesella, volverá atopase esti branu col públicu bretón. Falta entá por conocer los cuatro gaiteros que concursarán nel Troféu MacCrimon de gaita y que los sos nomes van salir del Concursu de Folclore “Ciudá d’Uviéu” a finales de mayu. En total, más d’un centenar d’artistes van formar la delegación asturiana nesta edición.                                                                       Fonte: asturnews.com

Texedor, Corquiéu y N'Arba ponen música a la Romería del Llaciniegu esti sábadu 12 de xunetu

Habrá xuegos y bailles tradicionales a lo llargo de tol día

Porrúa,  cartelu de la Romería del Llaciniegu

   Texedor, Corquiéu y N'Arba van ser les tres formaciones que compongan el programa de la nueche Folk "Llacín" y darréu d'ello les encargaes de pone-y música a la Romería del Llaciniegu que se celebra esti sábadu 12 de xunetu en Porrúa, enramada como tilos años polla asociación Llacín. El tradicional repartu del bollu, un concursu de recetes de cocina y xuegos tradicionales y talleres de baille tradicional van componer un programa nel que tamién va contase con conciertos a lo llargo de la tarde de la Banda de Gaites LLacín, los alumnos de la Escuela de Folk "Llacín" y la Bandina que lleva'l mesmu nome.

Nueche Folk "Llacín"

   Les actividades enramará pela mañana cola repartida del Bollu Preñáu acompangáu d'una Casadiella y una Botella de Sidra ente les 13,00 y les 15,00 hores y de 19,00 a 21,00 hores. Un bollu que pa tenelu ye necesariu presentar el D.N.I o tarjeta d'invitación, dándose namái qu'unu por sociu.

   .  El CONCURSU DE RECETES DE COCINA va entamar enantes de la xinta col apurre de los platos previstu de 13,00 a 14,00 hores y el Fallu del xuráu a les 14,30 hores. L'ingrediente imprescindible esti añu en tolos platos ye'lYOGUR.

   .  Una COLCHONETA ENCHIBLE DE 12,00 a 14,00 hores va tar a la disposición de tolos neños y neñes que podrán esfrutar pela tarde de XUEGOS TRADICIONALES y un TALLER DE BAILLE TRADICIONAL, a partir de les 17:00 horas.

   .  A partir de les 19:30 hores entamarán los conciertos de de la Banda de Gaites LLacín, los alumnos de la Escuela de Folk "Llacín" y la Bandina y a les 23,30 hores entamará la Nueche Folk.                              Fonte: Asturnews