Podemos sofita la conversión de la casa natal del Padre Galo nun centru pa la promoción del idioma

Va instar a la Conseyería d'Educación y Cultura, al traviés d'una proposición non de llei, a que dea apoyu téunicu y económicu al proyeutu pa convertir la vivienda nun centru cultural. La intención ye que sía un llugar pa la difusión de la obra de Fernán Coronas y pa la promoción de la llingua asturiana.

El diputáu Andrés Fernández Vilanova 'Ron' considera al Padre Galo como “un referente de les lletres asturianes y, más en concreto, del usu de la variante occidental de la llingua asturiana, qu'abarca'l  vaqueiru o falieḷḷa d’occidente propia de los concejos de Valdés, Tinéu, Ayande, Cangas de Narcea, Degaña y parte de Villayón y Salas”. “Foi ún de los escritores pioneros en llingua asturiana, un lliteratu qu'aportó amás una gran calidá a les nueses lletres”, añadió, faciendo tamién referencia al so papel de traductor.

D'esta forma, Podemos apoya la iniciativa del movimientu asociativu valdesanu pa convertir la casa natal del escritor de Cadavéu nun centru cultural que sirva pa promocional el nuesu idioma y divulgar la so obra.

Fonte: Asturies.com

Cadavéu: V Xunta d'Escritores en Llingua Asturiana

La 'V Xunta d’Escritores en L.lingua Asturiana' va celebrase esti sábadu en Cadavéu

Payares 15, 2013 por Alejandro S. García

   

     Cartelu de la V Xunta d'Escritores en Llingua Asturiana

    La Casa Natal del Padre Galo en Cadavéu (Valdés) acueye el 16 de payares la "V Xunta d’Escritores en L.lingua Asturiana". Va cuntar con un interesante programa d'actividaes, destacando l'análisis del asturianu nos medios de comunicación.

    Esta quinta edición de la Xunta ta entamada de nuevu pol Ayuntamientu de Valdés, al traviés de la so Casa de Cultura y Biblioteca “Joaquín Rodríguez”. Como importante novedá anguaño va apurrise el Premiu de Poesía “Fernán Corones”, con un alcuentru colos anteriores ganadores y una llectura de poemes. Amás d'estos premios lliterarios los platos fuertes van ser les meses redondes, que van analizar la situación actual de la llingua. La primera va tar dedicada a l'asturianu nos medios de comunicación, al cargu del escritor y periodista Inaciu Galán y González, les tamién escritores Mari Lluz Pontón y Mª Esther García, y la periodista Paula Fernández Suárez-Coronas. La segunda va tratar sobre la llingua asturiana na escuela, na familia y nas biblioteques, y van intervenir Carolina Castro Fernández, Presidenta del Grupu etnográficu y folclóricu “La Fonte La Faya”; Norberto Martín, profesor y director del Colexu de Muñas (Valdés); Carmen Guardado Parga, escritora y profesora; Manuel Busto, responsable de la Biblioteca de Castropol.

    El programa complétase coles actuaciones musicales del dúu ‘Mestura’, Dani García de la Cuesta y Rafa Lorenzo. Nun va faltar l'alcordanza pa Nené Losada, presidenta del xuráu hasta'l so fallecimientu, y tamién pa Fernán Coronas, el Padre Galo, con ponencies per parte de Inaciu Galán y Xosé Ramón Iglesias Cueva.                     Fonte;  Asturnews.