Cartelu del taller d'asturianu de Villaviciosa
L’actividá ta enfocada dende una perspeutiva fundamentalmente práutica y de fomentu del coaprendizaxe. El martes, primer día del taller, fina'l plazu pa matriculase.
L'Atenéu Obreru de Villaviciosa acueye y entama estes sesiones en collaboración col Serviciu de Normalización Llingüística 'Comarca de la Sidra' cola idea de crear un espaciu de deprendizaxe y perfeicionamientu de les habilidaes comunicatives en llingua asturiana, tanto nel planu d’espresión y comprensión oral como escrito. L'actividá va empobinada a toda persona interesada n’ampliar los sos conocimientos sobre llingua asturiana independientemente del so nivel y ta dividida en dos partes.
La primera va centrase na espresión escrita, partiendo de les producciones del alumnáu pa correxir y repasar les normes ortográfiques y gramaticales amás d’ampliar los recursos sintácticos y de vocabulariu. Darréu va haber una parte oral, que va facer por quitar mieos a los participantes, que van poder enfrentase n’asturianu a les situaciones comunicatives más diverses, corrixendo errores y buscando un modelu natural y prestosu de llingua falada.
Nel Taller de Llingua Asturiana va dase atención, igualmente, a les producciones culturales actuales n'asturianu, asina como a tolos elementos sociollingüísticos que condicionen el so desarrollu y evolución historicamente y n’actualidá. L'actividá entama'l martes y va celebrase tolos martes de 17.30 a 20 hores hasta'l 25 d'abril.
